E kaya o Semi *: “Keirau vakacegui vakaveiwatini mai na neirau cakacaka ena dua ga na gauna. Rua na yabaki neirau bula tiko ena veika era solia na wekai keirau, kei na so ga na cakacaka lalai keirau bau rawailavo tu kina. Qori e vakavuna nona lomabibi na watiqu o Virisila, au nanuma tale ga niu tawayaga.

“Keirau vosota vakacava? E vakasamataka tu ga o Virisila na vosa i Jisu ena Maciu 6:34. E tukuna kina o Jisu meda kua ni lomaocaocataka na siga nimataka, ni siga kece sa dui tu ga na kena lomaocaoca. A vakaukauataki Virisila tale ga na nona dau masu mai vu ni lomana. Vakacava o yau? E vakacegui au na Same 55:22. Niu biuta vei Jiova na noqu icolacola bibi me vaka ga e cakava na daunisame, au vakila sara ga na nona veitokoni. Sa dua tale na noqu cakacaka, ia keirau sa bula rawarawa ga me vaka e veivakasalataki kina o Jisu ena Maciu 6:20-22. Keirau sa qai veivolekati kei na Kalou, keirau veivolekati tale ga vakaveiwatini.”

“Au veilecayaki sara ga ena gauna e lusi kina na neitou bisinisi vakavuvale,” e kaya o Jonathan. “Gauna a yaco kina na leqa vakailavo, sega ni dua na ka e vo mai na 20 na yabaki ni noqu buno ena bisinisi. E vakavu vala vei keirau vakaveiwatini na ilavo. Keirau rere tale ga na volivoli vakadinau.

“Ia e vukei keirau na Vosa ni Kalou kei na yalona tabu me keirau vakatulewa vinaka. Au yalorawarawa meu ciqoma na cakacaka cava ga e soli vei au, keirau lewa vinaka tale ga na vakayagataki ni ilavo. Ni keirau sotava na ituvaki dredre, era dau veivuke vakalevu o ira keimami lotu vata, o ira na iVakadinadina i Jiova. Qori e solia tale vei keirau na igu me keirau toso tiko ga.”

E nanuma lesu o Raquel: “Au sega ni namaka ni na biuti au o watiqu, dua na ka noqu rarawa kei na cudru. Gauna mosimosi dina vei au ya. Ia niu toro voleka vua na Kalou ena noqu masu e veisiga, au vakila ni taqomaka na lomaqu na nona vakacegu. E seavu kina na noqu rarawa kei na mosi.

“E vukei au na nona Vosa na iVolatabu meu lewa vinaka noqu cudru, meu valuta tale ga na yaloca. E uqeti au sara ga na ka e kaya na yapositolo o Paula ena Roma 12:21: ‘Me kua ni rawai iko na ca, mo rawa tiko ga na ca ena vinaka.’

“A uqeti au e dua na noqu itokani meu kua ni vakasamataka tale tiko na ka sa oti. A vakaraitaka vei au na Dauvunau 3:6, qai tukuna vakayalololoma vei au ni so na gauna e tawayaga meda ‘vaqara na ka sa yali.’ E dredre toka meu ciqoma na ivakasala qori. Ia au marau niu a muria ni veisautaka sara ga noqu rai me baleta na bula.”

E kaya o Ilisapeci: “Ni kavoro na nomu vakawati, o na vinakata me toka e yasamu e dua me tokoni iko. Au kalougata ni cakava sara ga qori noqu itau dredre, e tokoni au e veisiga. Keirau tagi vata, qai vakacegui au. Au vakadeitaka kina nira tu eso tale era lomani au, ni se tiko tale ga na kequ yaga. Au kila ni vakayagataki koya o Jiova me vukei au ena ituvaki rarawataki au sotava.”

E tauvi mate ni uto qai voleka sara ni mate o Luis a cavuti ena imatai ni ulutaga. E dau vakayagataka me 16 na aua e veisiga e dua na misini me cegu vinaka kina. E kaya: “Sega ni cegu noqu masu vei Jiova. Niu masu oti, au vakila sara ga na veivakaukauataki ni yalona tabu.” E tukuna tale ga o Luis ni vakabauti Jiova qai kila ni kauaitaki koya. Na nona dau masu e vukei koya me kua ni soro.

E kaya o Paulini sa yabaki 80 vakacaca: “Levu na ka au sa sega ni rawa ni cakava, niu sa malumalumu, au dau wawale, au sa bula tu ga ena wainimate. Au dau vakasamataka vakalevu na nona kerei Tamana o Jisu me kauta laivi e dua na ituvaki dredre a sotava. A vakaukauataki Jisu ga o Jiova, e dau cakava tale ga vei au qori. Au masu e veisiga, au dau  lomavakacegu sara ga niu talaucaka na lomaqu vua na Kalou.”​—Maciu 26:39.

E va tale ga qori na nona rai o Julian, sa voleka ni 30 na yabaki na kena tauvi koya voli e dua na mate e rawa ni tini ena paralasi. E kaya: “Au dua tu na manidia e liu, ia qo au sa dabe tu vakadua ena idabedabe qiqi. E se vakainaki ga noqu bula niu dau vakaogai au ena nodra qaravi eso tale. E vakaseavutaka na rarawa na soli ka, qai yalataka o Jiova ni na vukei keda nida sotava na ituvaki dredre. Au duavata kei na ka e kaya na yapositolo o Paula: ‘Au rawata na ka kece ena vuku i koya e vakaukauataki au.’”​—Filipai 4:13.

E nanuma lesu o Apenisa: “Au sega ni vakabauta niu rogoca ni mate o tamaqu ena dua na vakacalaka e gaunisala. E sega ni cala o koya, a taubale welewelei sara tu ga. Ia e sega ni dua na ka au cakava rawa kina. A sega tu ni vakilai koya me lima na siga sa qai mate. Au saga meu kua ni tagi ke toka voleka o tinaqu, au dau qai sorova na tagi niu sa tiko taudua. Au veinanuyaka tu ga se cava e yaco kina na leqa ya.

“Dua na gauna rarawataki dina ya. Au kerei Jiova tiko ga me vukei au meu lewa vinaka, me vakacegui au tale ga. Toso na gauna au sa qai vakila na lomavakacegu. Au kila ni tukuna na iVolatabu nida rawa ni sotava kece na ‘ka e sega ni namaki.’ Au nuidei ni keirau na sota tale kei tamaqu ena gauna ni veivakaturi ni sega ni dau lasu na Kalou.”​—Dauvunau 9:11; Joni 11:25; Taito 1:2.

E sotava tale ga e dua na ituvaki va qori o Robert, a cavuti tale ga ena imatai ni ulutaga. E kaya: “Keirau dau masu vakaveiwatini vei Jiova, keirau vakila kina na vakacegu e cavuti ena Filipai 4:6, 7. Keirau doudou kina ni tukuna vei ira na dauvolaitukutuku ni keirau nuitaka na veivakaturi. A mate na luvei keirau tagane ena voca ni dua na waqavuka, ia e levu na ka totoka keitou a marautaka vata ni se bula. Qori na veika keirau dau vakananuma.

“Era qoroya o ira keimami iVakadinadina i Jiova vata na neirau yalodei ni vakamacalataka ena tivi na ka keirau vakabauta. Keirau dau tukuna vei ira ni rawa ga ya ena nodra veinanumi ena masu. Au kila ni nodra ivola ni veivakayaloqaqataki e dua na sala e tokoni keirau kina o Jiova.”

Na ivakaraitaki kece qori e vakadinadinataka ni rawa ni veivakacegui na Kalou ena ituvaki cava ga eda sotava. Vakacava o vinakata tale ga mo vakacegui ni o sotava na ituvaki dredre? * Vakararavi gona vei Jiova, “na Kalou e dau vakacegui keda ena ka kece.”​—2 Korinica 1:3.