Nuu ko ni atsɛɔ lɛ Seth * lɛ wie akɛ: “Mi kɛ miŋa fɛɛ nitsumɔ ŋmɛɛ wɔ yɛ be kome too mli. Yɛ afii enyɔ sɔŋŋ mli lɛ, nibii ni mɛi keɔ wɔ kɛ nitsumɔi bibiibibii komɛi ni wɔtsuɔ lɛ pɛ wɔkɛkwɛɔ wɔhe. Enɛ hewɔ lɛ, miŋa Priscilla hao, ni minu he akɛ sɛɛnamɔ ko bɛ mihe.

“Te wɔfee tɛŋŋ wɔkpee naa? Priscilla kɛ Yesu wiemɔi ni yɔɔ Mateo 6:34 lɛ kai ehe be fɛɛ be. Yesu kɛɛ yɛ jɛmɛ akɛ, wɔkafee yeyeeye yɛ wɔ́ he, akɛni gbi fɛɛ gbi kɛ emli naagbai lɛ hewɔ. Ni sɔlemɔ ni ejɛɔ etsuiŋ esɔleɔ lɛ ye ebua lɛ. Yɛ migbɛfaŋ lɛ, Lala 55:23 lɛ shɛje mimii. Taakɛ lalatsɛ lɛ fee lɛ, mishɛ mijatsu lɛ mifɔ̃ Yehowa nɔ, ni mina faŋŋ akɛ, ehiɛ mimli. Eyɛ mli akɛ amrɔ nɛɛ miyɛ nitsumɔ moŋ, shi wɔhãa wɔshihilɛ feɔ mlɛo yɛ Yesu wiemɔi ni yɔɔ Mateo 6:20-22 lɛ naa. Nɔ ni fe fɛɛ lɛ, wɔtsi wɔbɛŋkɛ Nyɔŋmɔ kpaakpa, ni wɔfee ekome waa.”

Nuu ko ni atsɛɔ lɛ Jonathan lɛ wie akɛ: “Be ni wɔweku nitsumɔ lɛ fite lɛ, mihao waa yɛ bɔ ni wɔwɔsɛɛ baaji ahã lɛ he. Yɛ shika he naagba ni maŋ lɛ kɛkpe lɛ hewɔ lɛ, nitsumɔ ni wɔkɛ afii 20 etsu lɛ fɛɛ fee efolo. Mi kɛ miŋa bɔi saji anaataamɔ yɛ shika he. Wɔnyɛɛɛ wɔkɛ kaadi ni akɛheɔ nii lɛ po ahé nɔ ko, ejaakɛ wɔmiishe gbeyei akɛ wɔbaahiɛ kɔmpene ni hãa kaadi lɛ nyɔmɔ babaoo.

“Shi Nyɔŋmɔ Wiemɔ lɛ kɛ emumɔ lɛ ye ebua wɔ ni wɔkpɛ yiŋ ni ja. Mibayɔse akɛ esa akɛ matsu nitsumɔ fɛɛ nitsumɔ ni maná lɛ; ni wɔheee nii kɛkɛ hu dɔŋŋ. Akɛ Yehowa Odasefoi lɛ, wɔnyɛmimɛi Kristofoi lɛ hu ye amɛbua wɔ. Amɛjie bulɛ kpo amɛtsɔɔ wɔ, ni kɛ́ nibii amli bawa waa kɛhã wɔ lɛ, amɛshiii wɔ efolo.”

Raquel wie akɛ: “Be ni miwu shi mi trukaa lɛ, edɔ mi waa, ni mimli fũ. Ni minii fee mɔbɔ aahu akɛ, mihao waa. Shi mitsi mibɛŋkɛ Nyɔŋmɔ, ni eshɛje mimii. Akɛni misɔleɔ daa gbi hewɔ lɛ, Nyɔŋmɔ toiŋjɔlɛ lɛ bu mitsui he. Efee tamɔ nɔ ni etsa mitsui ni ekumɔ lɛ.

“Ni yɛ e-Wiemɔ, ni ji Biblia lɛ hewɔ lɛ, minyɛ miye mimlifu lɛ nɔ kwraa. Mikɛ bɔfo Paulo wiemɔi ni yɔɔ Romabii 12:21 lɛ shɛje mimii, ni jɛmɛ kɛɛ: ‘Kaahã efɔŋ miiye onɔ kunim, shi moŋ yaa nɔ okɛ ekpakpa aye efɔŋ nɔ kunim.’

“Minaanyo ko ye ebua mi ni mina akɛ, esa akɛ majie mijwɛŋmɔ kɛje nɔ ni eba lɛ nɔ. Ekɛ mi kane Jajelɔ 3:6 lɛ, ni ejɛ mlihilɛ mli ekɛɛ mi akɛ, be shɛɔ ni esa akɛ wɔkpɛlɛ nɔ akɛ ‘laajemɔ be yɛ.’ Eji ŋaawoo ni naa wa fioo, shi no ji nɔ ni he hiaa mi. Amrɔ nɛɛ mikɛ otii hei emamɔ mihiɛ yɛ shihilɛ mli.”

Yoo ko ni atsɛɔ lɛ Elizabeth lɛ wie akɛ: “Kɛ́ ogbãla fite lɛ, yelikɛbuamɔ he hiaa bo. Miyɛ naanyo ko ni kɛ nakai yelikɛbuamɔ lɛ hã mi gbi fɛɛ gbi. Ekɛ mi fee ekome kɛfó, eshɛje mimii, ni nɔ najiaŋ ni ebaahã manu he akɛ akpoo mi lɛ, ehã minu he akɛ asumɔɔ mi lolo. Miná nɔmimaa akɛ Yehowa tsɔ enɔ eshɛje mimii.”

Luis, ni atsĩ etã yɛ klɛŋklɛŋ sane lɛ mli lɛ ye tsui hela ko ni naa wa waa, ni shwɛ fioo kulɛ, hela nɛɛ gbe lɛ yɛ bei srɔtoi enyɔ mli. Amrɔ nɛɛ ehe miihia ni akɛ ɔksijin ama enɔ ŋmɛlɛtswai 16 daa gbi. Ewie akɛ: “Misɔleɔ mihãa Yehowa be fɛɛ be. Ni be fɛɛ be ni masɔle mahã Nyɔŋmɔ lɛ, minuɔ he akɛ emumɔ lɛ ewo mi hewalɛ. Sɔlemɔ hãa mináa ekãa kɛkpeɔ shihilɛ lɛ naa, ejaakɛ miyɛ hemɔkɛyeli yɛ Nyɔŋmɔ mli, ni mile akɛ esusuɔ mihe.”

Yoomo ko ni atsɛɔ lɛ Petra, ni eye afii 80 kɛ sɛɛ lɛ wie akɛ: “Miitao mafee nibii pii, shi minyɛɛɛ. Edɔɔ mi waa akɛ mihewalɛ nɔ miigbɔ. Minuɔ tɔlɛ he, ni esa akɛ makɔlɔ tsofai be fɛɛ be. Bei pii lɛ, misusuɔ bɔ ni Yesu bi e-Tsɛ lɛ ni ehã jaramɔ shihilɛ ko ni ekɛkpe lɛ aho ehe aya kɛ́ aaahi lɛ he. Shi Yehowa hã Yesu hewalɛ kɛkpee naa, ni nakai nɔŋŋ efeɔ ehãa mi. Sɔlemɔ ji nɔ ni tsaa mi daa gbi. Be fɛɛ be ni mikɛ  Nyɔŋmɔ baawie magbe naa lɛ, mimii shɛɔ mihe waa.”​—Mateo 26:39.

Nuu ko ni atsɛɔ lɛ Julian, ni eye kuumɔ hela ko aaafee afii 30 sɔŋŋ lɛ hu nuɔ he nakai nɔŋŋ. Ewie akɛ: “Be ko ni eho lɛ, miyɛ gbɔmɔtsoŋ hewalɛ, shi amrɔ nɛɛ mika shwiilii mli. Shi miyɛ miishɛɛ yɛ shihilɛ mli ejaakɛ mikɛ miwala miisɔmɔ mɛi krokomɛi. Kɛ́ ofeɔ nii ohãa mɛi lɛ, ejieɔ ojwɛŋmɔ yɛ opiŋmɔ lɛ nɔ, ni Yehowa yeɔ shi ni ewo akɛ ebaawaje wɔ kɛ́ wɔkɛ naagbai miikpe lɛ nɔ. Taakɛ eba lɛ yɛ Paulo gbɛfaŋ lɛ, mi hu manyɛ makɛɛ akɛ: ‘Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.’”​—Filipibii 4:13.

Nuu ko ni atsɛɔ lɛ Antonio lɛ wie akɛ: “Be ni lɔle tswa mipapa ni egbo lɛ, kulɛ ewa kɛhã mi akɛ mahe maye. Bɔ ni ebalɛ lɛ ehã lɛ esaaa kwraa​—no mli lɛ enyiɛ gbɛjegbɛ lɛ he ni lɔle lɛ tswa lɛ. Shi nɔ ko bɛ ni manyɛ mafee yɛ he. Etee kooma gbii enumɔ dani egbo. Akɛni misumɔɔɔ ni mimami naa akɛ miifo hewɔ lɛ, mifooo yɛ ehiɛ, shi kɛ́ eshwɛ mikome too pɛ lɛ, mifoɔ waa. Mibi mihe shiiabɔ akɛ, ‘Mɛni hewɔ? Mɛni hewɔ?’

“Yɛ nakai shihilɛ ni jaraa lɛ mli lɛ, mibi Yehowa shiiabɔ koni ehã manyɛ maye mihenumɔi anɔ, ní ehã maná toiŋjɔlɛ. Ni fiofio lɛ mihe jɔ mi. Mikai akɛ, Biblia lɛ ewie akɛ nibii komɛi baanyɛ aba wɔteŋ mɔ fɛɛ mɔ nɔ “trukaa.” Akɛni Nyɔŋmɔ nyɛŋ emale hewɔ lɛ, miyɛ nɔmimaa akɛ mana mipapa ekoŋŋ yɛ gbohiiashitee lɛ mli.”​—Jajelɔ 9:11, 12; Yohane 11:25; Tito 1:2.

Robert, ni atsĩ etã yɛ klɛŋklɛŋ sane lɛ mli lɛ hu hiɛ susumɔ ni tamɔ nakai nɔŋŋ. Ekɛɛ akɛ: “Mi kɛ miŋa fɛɛ ná toiŋjɔlɛ ni awie he yɛ Filipibii 4:6, 7 lɛ eko. Wɔná toiŋjɔlɛ nɛɛ kɛtsɔ sɔlemɔ ni wɔsɔleɔ wɔhãa Yehowa lɛ nɔ. Toiŋjɔlɛ nɛɛ hã wɔnyɛ wɔkɛ adafitswalɔi ni bɔ sane lɛ he amaniɛ lɛ gba gbohiiashitee he hiɛnɔkamɔ ni wɔyɔɔ lɛ he sane. Eyɛ mli akɛ wɔbinuu lɛ gbo yɛ kɔɔyɔŋ lɛlɛ mli oshara lɛ mli moŋ, shi wɔkaiɔ bei ni yɔɔ miishɛɛ ni wɔkɛ lɛ ná mli ŋɔɔmɔ lɛ lolo. Wɔbɔɔ mɔdɛŋ akɛ wɔbaasusu nibii ni wɔfee yɛ nakai beiaŋ lɛ he.

“Be ni wɔnyɛmimɛi Odasefoi lɛ kɛɛ wɔ akɛ amɛna wɔ ni wɔto wɔtsui shi kɛmiigbala wɔhemɔkɛyeli lɛ mli yɛ TV lɛ nɔ lɛ, wɔhã amɛle akɛ sɔlemɔi babaoo ni nyɛmimɛi lɛ sɔle amɛhã wɔ lɛ ji nɔ ni ye bua wɔ. Miheɔ miyeɔ akɛ, no mli lɛ, Yehowa miitsɔ saji babaoo ni shɛjeɔ mɔmii ni amɛkɛmaje wɔ lɛ nɔ eeye ebua wɔ.”

Taakɛ wɔna yɛ nɔkwɛmɔnii ni wɔwie he nɛɛ amli lɛ, Nyɔŋmɔ baanyɛ ashɛje mɔ fɛɛ mɔ mii, ekɔɔɔ he eko naagbai ni ekɛkpeɔ. Ni bo hu? Ekɔɔɔ he eko naagba ni ekolɛ okɛbaakpe yɛ shihilɛ mli lɛ, obaanyɛ oná yelikɛbuamɔ ni baashɛje omii yɛ nakai bei ni jaraa lɛ mli. * No hewɔ lɛ, mɛni hewɔ oyaaa Yehowa ŋɔɔ kɛhã yelikɛbuamɔ? Lɛ ji “miishɛjemɔ fɛɛ Nyɔŋmɔ lɛ.”​—2 Korintobii 1:3.