Yakala dimosi nkumbu andi Seth, * wavova vo, “Omono yo nkaz’ame twakatulwa mu salu. Se mvu miole miviokele kala, mu salu yakete-kete tuzingilanga. Mu kuma kiaki, o nkaz’ame Priscilla wabakama kwa lukendalalu lwasaka, vo i mono kikuyivuanga diaka mfunu ko.”

“Adieyi twavanga? Nkaz’ame Priscilla nkumbu miayingi kansungamesanga e mvovo mia Yesu muna Matai 6:34. Yesu wavova vo, ke nutokani ko mu kuma kia lumbu kia mbazi, kadi e lumbu kia mbazi kikala ye ntokani zandi. E sambu yandi ya nsi a ntima yansadisa mu zizidila e mpasi. Vo i mono, e sono kia Nkunga 55:22 kiamfiaulwisa kikilu. Nga ntozi a nkunga, yayekeka e zitu diame kwa Yave, yamona vo Yave wansiamisa kikilu. Kana una vo yabaka e salu, kansi twavevola e zingu kieto muna lemvokela nkanikinu a Yesu wina muna Matai 6:20-22. Edi disundidi o mfunu, omono yo nkaz’ame twafinama Yave yo wokesa e nzol’eto.”

Yakala dimosi nkumbu andi Jonathan, wavova vo, “Vava kinkita kieto kiabwa, yatokana kwayingi mu kuma kia nzo ame. E mvu 20 mia salu miayenda kwandi mu maza. Mono yo nkaz’ame twayantika tantana mu kuma kia nzimbu. Ke twalendanga sumba lekwa ko mu cartão de crédito, kadi twakala yo wonga vo e kompani ke ditonda ko.

“Kansi, o mwand’avelela ye Diambu dia Nzambi, diatusadisa mu baka nzengo zambote. Yatondanga sala konso salu kimonekene, ke twasumbanga mpe lekwa kisumbi-kisumbi ko. Wau vo tu mbangi za Yave, ampangi zeto muna lukwikilu batoma kutusadisa. Batusadisa twalembi vidisa e kiese kieto yo kutuvana o moko vava e mpasi zeto zasaka.”

Raquele wavova vo: “Vava o nkaz’ame kangiambula, yamona ntantu yo funga makasi. Yabakama kwa lukendalalu lwasaka. Kansi, yafinama Yave wa Nzambi, oyandi wamfiaulwisa. O luvuvamu lwa Nzambi, lwatanina o ntim’ame vava yasambanga kwa yandi lumbu yawonso. Yamona vo o Nzambi wakumika o ntim’ame wabudika.”

“Muna lusadisu lwa Diambu dia Nzambi yasunda e makasi mame yo lembi landa e kunda. Yalemvokela e mvovo mia Paulu wa ntumwa muna Roma 12:21: “Kusundwa kwa bi ko, kansi sunda kaka o bi muna wete.””

“Nkundi ame wampovesa vo yayaluka. Wansonga e sono kia Kimpovi 3:6 yo kumpovesa kuna zola kwawonso vo, vena ye “ntangw’a vava ye ntangw’a yambula.” Luludiku lwa mpasi lwakala, kansi i diau yavavanga. Owau, ngina ye makani mankaka muna zingu kiame.”

Elizabeti wavova vo: “Avo o longo lwaku lufwidi lusadisu lwa akaka ovua o mfunu. O nkundi ame wansadisanga lumbu ke lumbu. Wadilanga yame, wamfiaulwisanga yo kunzola vana fulu kia kumbembola. Ngina ye ziku vo, Yave wasadila mpangi ndioyo mu wuka o ntim’ame walwala.”

Luis, ona tuyikidi muna longi diantete, kimbevo kia ntima keyelanga. Nkumbu miole kavuka muna lufwa. Konso lumbu wasiwanga mu oxigénio tezo kia ola 16. Wavova vo, “Isambanga kwa Yave ntangwa zawonso. Avo nsambidi kwa Nzambi mwand’andi ukunkumikanga. E sambu ikumpananga unkabu wa zizidila, kadi ikwikilanga muna Yave, nzeye wo vo Nzambi wete diame ketokanenanga.”

Mpangi Petra una ye mvu 80, wavova vo: “Mayingi nzolele vanga, kansi kilendanga ko. E nitu ke ina diaka yo nkuma wafwana ko. Mono muntu mu nlongo izingilanga. Nkumbu miayingi iyindulanga una Yesu kalomba kwa Se diandi kakatula e mpasi zandi avo dilendakana. Yave wakumika Yesu, okunkumikanga mpe. E sambu i nlongo miame mia konso lumbu. Avo mbokene yo Nzambi,  kuna mfoko a sambu e ngindu zame zivuvamanga.”—Matai 26:39.

Juliana oyelanga kimbevo kiangolo kia ntu se mvu 30, i wau mpe kemonanga. Wavova vo, “yayambula e salu kimfutanga zimbu zayingi yo vuanda kuna nzo. Kansi e zingu kiame kiambote, kadi ikuyivananga muna sadisa akaka bazaya Nzambi. Ediadi dikunsadisanga mu lembi sia sungididi muna mpasi zame, Yave olungisanga o nsilu andi wa kutusadisa muna ntangw’a mpasi. Ndenda vutukila e mvovo mia Paulu wa ntumwa ye ziku kiawonso: “Muna mambu mawonso ngina ye nkuma muna ndiona okunkumikanga.””—Filipi 4:13.

António wavova vo, “Vava se diame kadiatwa kwa kalu, entete kiakwikila dio ko. Ke dia unsongi ko, kadi kazaya kwandi diambu ko. Kansi kiamona dina mfwete vanga ko. Lumbu tanu kavanga muna lupitalu lembi vova, kuna kwalanda wafwa. Nkumbu miayingi kialendanga didila vana ndose a ngudi ame ko. Yabokomokanga ye dilu va fulu kia mono mosi kaka. Yakiyuvulanga vo, ‘Ekuma divangamene? Ekuma?’

“E lumbu yayina yampasi kikilu yakala, yalombanga kwa Yave kansadisa yavuvika e ngindu zame yo kumpana luvuvama lwa ntima. Malembe-malembe o ntim’ame wavuvama. Yasungamena dina Nkand’a Nzambi uvovanga, ‘o mambu makinsalukisa mebwilanga yeto awonso. Wau vo Nzambi kalendi vuna ko, ngina ye ziku vo se yamonana yo se diame vava kefuluka.”—Kimpovi 9:11; Yoane 11:25; Tito 1:2.

Roberto, ona tuyikidi muna longi diantete, i wau mpe kamonanga. Wavova vo: “Muna lusadisu lwa sambu yeto kwa Yave, omono yo nkaz’ame Maribel, twamona o luvuvamu lwa Nzambi luyikwanga muna Filipi 4:6, 7. O luvuvamu lwalu lwatusadisa mu zayisa kwa wantu e vuvu kieto kia lufuluku. Kana una vo mwan’eto ayakala mu sumbula kia ndeki kafwila, tusungamenanga e lumbu ya kiese twakalanga yandi kumosi. Ke tuvilakananga lumbu yayina ko.

“Vava mpangi zeto batuvovesa vo, twakunumona muna televizau vava nwavovelenge oma ma lukwikilu lweno, twabavutula vo, tulendele wo vanga mu kuma kia lusadisu lwa sambu yeno muna wete dieto. Yatoma dio zaya vo Yave watusadisanga muna mvovo mia lufiaulwisu mia mpangi zeto.”

Wantu ana tuvovele muna longi diantete, i ziku kisonganga vo, Nzambi ofiaulwisanga o wantu benwananga ye mpasi za mpila mu mpila. Nga o Nzambi okufiaulwisanga mpe? Kana nkia mpasi onwananga zau muna zingu kiaku, vena yo muntu olenda kusadisa muna ntangw’a mpasi. * Olenda lomba lusadisu kwa Yave. Yandi i “Nzambi a fiauzi wawonso.”—2 Korinto 1:3.