Seth uvuluka amba, “Ami ne wami mukaji twajimije kaji kya pamo. * Mu bula bwa myaka ibidi kisaka kyetu kyadi kidīla mu kupebwa, ne mu tumingilo twa bukidibukidi. Mfulo mfulō, mukajami Priscilla, watyumukwa mutyima, ami nami nemona’byo bule.

“Le twanekenye namani? Priscilla wadi uvuluka kitatyi ne kitatyi binenwa bya Yesu bidi mu Mateo 6:34. Wānenene amba ketufwaninwepo kukambakanya mityima mwanda wa dya kesha, ke-pantu difuku dyonso didi na bikoleja byadyo. Kadi milombelo yandi itamba ku mutyima yamupele bukomo bwa kwendelela kumeso. Ami nami, nasengelwe na Ñimbo ya Mitōto 55:22. Pamo bwa kaimba wa mitōto, naelele kiselwa kyami padi Yehova, kadi namwene amba waundela. Nansha pano byokendi na kaji, tudi na būmi bupēla bukwatañene na madingi a Yesu adi mu Mateo 6:20-22. Kya mvubu kutabuka, twi bafwene bininge kudi Leza ne kwifwena batwe bene.”

Jonathan unena’mba, “Pafwile kaji ka kyetu kisaka, nazakele pa mobisa kwitwikadila. Mwanda misokwe yakomene, myaka 20 ya kwipeneneka na kaji yaenda mu luvula. Ami ne wami mukaji twaanjile kwipotomeja pa mwanda wa lupeto. Twadi tukomenwa ne kupota na kalata ka ku banki, kutyina’mba baketupelela’ko.

“Ino Kinenwa kya Leza ne mushipiditu wandi byetukweshe tukwate butyibi buyampe. Nefundile kwitabija kaji ko-konso, ne kuleka kupota bintu bya kubulwa mvubu. Byotudi Batumoni ba Yehova, twakwashibwe na banabetu mu lwitabijo. Betukweshe tuleke kwimona bule kadi shi bibakole, badi betwela’ko kuboko.”

Raquel uvuluka’mba, “Paunyemene mulume mu kitulumukila, byansense ne kundobeja. Njia yandēmenene bininge. Inoko nafwenene kudi Leza, nandi waunsenga. Ndoe ya Leza yalamine mutyima wami ponadi nombela difuku ne difuku. Namwene amba waundapa mutyima wami muladike.

“Dyese, Kinenwa kyandi Bible kyankweshe nekenye bulobo ne kiji. Nalamine mu mutyima binenwa bya mutumibwa Polo bidi mu Loma 12:21, bya amba: ‘Kemwakinekenibwai na bibi, ino banwe nekenyai nyeke bibi na biyampe.’”

“Mudingidi umo wa tunangu wankweshe ñendelele kumeso. Wanombwele Musapudi 3:6 ne kunsapwila na bunwa amba kudi ‘kitatyi kya kujimija.’ Adi madingi makomo, inoko ye onadi nsakilwa. Pano ngidi na bitungo bikwabo mu būmi.”

Elizabeth unena’mba, “Shi busongi bwenu bubapomoka, usakilwa bukwashi. Naikele na mulunda muswe wankweshe difuku ne difuku. Wadi udila nami, unsenga, ne kunkwasha nemone bu muswedibwe pa kyaba kya kwimona bu musūlwe. Mona’mba Yehova ye wamwingidije mwanda wa kundapa bilonda byami bya ku mutyima.”

Luis, utelelwe mu kishinte kibajinji, wadi ubela bininge dityima, kadi waswile kufwa misunsa ibidi mituntulu. Usakilwanga luvula lwa kufoma nalo mansá 16 pa difuku. Unena’mba, “Nombanga Yehova kitatyi kyonso. Kadi shi napu kulombela, ngimvwananga mushipiditu wandi wakankamika. Milombelo impanga bukankamane bwa kwendelela mwanda ngidi na lwitabijo mwadi ne ngyukile amba untele mutyima.”

 Petra wa myaka 80 ne musubu ushintulula’mba, “Nsakanga kulonga bivule, inoko nkibwanyangapo. Binkomenanga kumona bukomo bwami bwenda butyepa. Ngimvwananga buzoze, ke ndi na būmi bulomba’nka malawa. Divule nañanga byānenene Yesu kudi Shandi amba shi bikokejika ano makambakano ampite. Yehova wākomeje Yesu, ukankomeja ne ami. Milombelo bo bwanga bwami bwa difuku ne difuku. Neimvwananga biyampe mpata shi napu kwisamba na Leza.”​—Mateo 26:39.

Mo mwiimvwaninanga ne Julian walwile na misongo mivule ya bulebe mu kintu kya myaka 30. Unena’mba, “Nadi na kityi kya bitupu, pano ke ndi na kya babela. Būmi bwami’ko budi na mvubu mwanda ñingidilanga bantu bakwabo. Kupāna kutyepejanga’ko misanshi, kadi Yehova ufikidijanga mulao wandi wa kwitukomeja mu kitatyi kifwaninwe. Mbwanya kunena bine pamo bwa mutumibwa Polo amba: ‘Mu byonsololo ngidi na bukomo kupityila kudi yewa unkomeja.’”​—Fidipai 4:13.

Antonio uvuluka amba, “Pafwile tata ku akishida, nkyaitabije’byopo dibajinji. Kyadi kibi​—mwanda wadi’tu ñenda wampikwa mambo. Ino nkyadipo na kya kulonga. Wadi mupungile mu bula bwa mafuku atano kumeso kwa kufwa’ye. Kyaba kimo, nadi nekankamika’ko shi tudi na mama, ino shi ke ndi bunka, nesaba muyoa. Nadi neipangula kyaba kyonso amba, ‘Mwanda waka? Mwanda waka?’

“Mu kino kitatyi kibi, nadi nzenza Yehova ankwashe mfundule kinku ne kumpa ndoe. Bityebitye, mutyima wantūka. Navulukile binena Bible amba ‘mwikadilo wa bu-muntu’ ubwanya kufikila bonso. Leza byakabepangapo, nkulupile kukemona monka na tata pakasangulwa.”​—Musapudi 9:11; Yoano 11:25; Tetusa 1:2.

Robert, utelelwe mu kishinte kibajinji nandi ulañanga muswelo umo. Unena’mba: “Ami ne wami mukaji, twaimvwene ndoe ya mutyima itelelwe mu Fidipai 4:6, 7. Twaikele na ndoe kupityila ku milombelo yotwadi tulomba Yehova. Ino ndoe ya mutyima yetupele bukankamane bwa kusapula lukulupilo lwetu lwa lusangukilo ku boba banenanga myanda ku bisanji. Nansha wetu mwana byaafwile ku akishida ya amviyo, tuvulukanga nyeke bitatyi bya nsangaji byotwapityije nandi pamo. Yo myanda yotutanga’ko bininge mutyima.

“Petunenene banabetu Batumoni amba abetumonanga twisamba na mutyima mutūke ku televijo, twebalondolwele amba, bine shi tubebibwanyanga i kupityila ku milombelo mivule ya banabetu potudi. Nkulupile na bubine amba Yehova wetukwatakenye kupityila ku misapu mivule ya kwitusenga yobadi betutumina.”

Monka mwekilombwela bimfwa byesambilwa’po, Leza ubwanya kusenga bantu batenwe na makambakano makatampe ne bikoleja. Le abe nobe? Nansha utanwe na mwanda’ka mu būmi, busengi bwa kukusenga mu bitatyi bikomo budi’ko. * Le wabulwa’po kukimba bukwashi bwa Yehova? Aye i “Leza wa kusenga konso.”​—2 Kodinda 1:3.