Juon em̦m̦aan etan Seth ej ba, “Kõm̦ro lio ippa kar luuji jerbal ko am̦ro ilo juon wõt iien. * (Lale kõmel̦el̦e eo itulal̦.) Ium̦win ruo iiõ, kõm̦ro kar bõk am̦ro mour jãn menin letok ko an armej im jãn am̦ro kõm̦m̦ani jet jerbal bajjek. Kõn men in, lio ippa etan Priscilla, ear jino bõk nañinmej in bũrom̦õj, im iar jino l̦õmn̦ak bwe ejjel̦o̦k tokja.

“Ta eo ear jipañ kõm̦ro ñan kijenmej wõt? Aolep iien Priscilla ej kakeememej e make kõn naan ko an Jijej ilo Matu 6:34 (UBS). Jijej ear ba bwe jejjab aikuj inepata kõn ilju kõnke ilju ebwe kõn inepata ko ie. Bareinwõt, ilo an Priscilla kwal̦o̦k bũruon ilo jar, men in ear jipañe ñan kate wõt e im jab ebbeer. Eoon eo ear kaenõm̦m̦an eõ ej Sam 55:22. Ãinwõt kar rijeje sam in, iar jol̦o̦k men ko iar inepata im eddodo kaki ñan Jeova, im iar lo an jipañ eõ. Meñe kiiõ ewõr aõ jerbal, ak kõm̦ro ej kate kõm̦ro ñan l̦oore naanin kakapilõk eo an Jijej ilo Matu 6:20-22, (UBS) ñan jab koorl̦o̦k m̦weiuk im jããn. Kiiõ el̦apl̦o̦k am̦ro epaake doon im epaake Anij.”

Juon em̦m̦aan etan Jonathan ej ba, “Ear wõr an baam̦le eo aõ juon peejnej edik ak ke ear kilõk kõn an jabwe jããn, iar lukkuun inepata kõn ta eo enaaj wal̦o̦k ñan kõm ilo raan ko im̦aan. Kõn an kar l̦ap apañ ko rej wal̦o̦k ikijjeen jããn ilo aelõñ eo, ejjel̦o̦k tokjãn aõ kar kate eõ ilo peejnej eo ium̦win 20 iiõ. Jãn iien eo, kõm̦ro lio ippa kar jino akwããl kõn jããn. Bareinwõt, kõm̦ro kar jab kõjerbal kaat eo am̦ro (credit card) ñan kaikujkuj kõnke kõm̦ro mijak ñe kom̦bani eo an kaat eo eban kamãlim am̦ro wia.

“Bõtab Baibõl̦ eo im jetõb kwõjarjar eo an Anij rar jipañ kõm ñan kõm̦m̦ani pepe ko rem̦m̦an. Iar m̦õn̦õn̦õ in kõm̦m̦ane jabdewõt kain jerbal, im kõmar bõjrak jãn am kõjerbali men ko kõmij jab lukkuun aikuji me kõm  kõn kõl̦l̦ã on̦ãer. Bareinwõt, kõnke kõmij Ri Kõnnaan ro an Jeova, kõmar bõk jipañ jãn rũttõmak ro jeim im jatim. Rar kõkajoor im jipañ kõm ilo iien ko rar pen ñan kõm.”

Raquel ej ba, “Ke l̦eo ippa ear kajju etal jãn ña, iar lukkuun metak im illu. Tokãlik, iar lukkuun bũrom̦õj im eddo bũruõ. Bõtab iar reilo̦k ñan Anij, im ear kaenõm̦m̦an eõ. Ñe ij jar ñane kajjojo raan, ij kile an jipañ eõ bwe en aenõm̦m̦an bũruõ im l̦õmn̦ak ko aõ. Ej ãinwõt ñe Anij ear kõm̦m̦an bwe en jako an rup bũruõ.

“Bareinwõt el̦ap aõ kam̦m̦oolol kõn naan ko an ilo Baibõl̦ kõnke el̦ap aer jipañ eõ ñan jol̦o̦k aõ illu ilo bũruõ. Iar kõn̦aan l̦oore naan ko an rijjilõk Paul ilo Rom 12:21 me rej ba: ‘Nana en jab anjo̦ jãn eok, a kwõn anjo̦ jãn nana kõn em̦m̦an.’

“Juon m̦õtta ear jipañ eõ ñan kile bwe ij aikuj kate eõ ñan jab reilikl̦o̦k ñan men ko rar wal̦o̦k. Ear kwal̦o̦k eoon eo ilo Ekklisiastis 3:6, im ilo jouj ear rõjañ eõ im ba bwe ewõr iien jej aikuj kõtl̦o̦k juon men im jab bar reilikl̦o̦k ñane. Ear jab pidodo ñan l̦oore naanin kakapilõk in, ak iar aikuj kate eõ ñan l̦oore. Kiiõ, ewõr men ko rekam̦õn̦õn̦õ ij kõm̦m̦ani ilo mour e aõ.”

Juon kõrã etan Elizabeth ej ba, “Ñe ej rup pãd eo amiro, kwõj aikuj jipañ im kaenõm̦m̦an. Ke ear wal̦o̦k men in ñan eõ, ewõr juon m̦õtta ear jipañ eõ jãn raan ñan raan. Ear jañ ippa, kaenõm̦m̦an eõ, im kwal̦o̦k an yokwe im kaorõk eõ. Ij tõmak bwe Jeova ear kõjerbale ñan kaenõm̦m̦an eõ ilo iien in ear pen ñan ña.”

Luis, eo kar kwal̦o̦k kake ilo katak eo jinointata, ewõr an nañinmej in menono, im ear wõr ruo iien ko ebaj wõt kar mej. Kiiõ ej menono kõn juon kein akjijen ium̦win 16 awa kajjojo raan. Ej ba: “Aolep iien ij jar ñan Jeova. Ãlikin aõ jar ñan Anij, ij kile an kõjerbal jetõb kwõjarjar eo an ñan kõkajoor ña. Ilo aõ jar ñane, men in ej kõkajoor eõ kõnke ij tõmak bwe Jeova enaaj jipañ eõ im ijel̦ã bwe el̦ap an kea kake eõ.”

Juon lel̦l̦ap etan Petra me 80 jim̦a an iiõ, ej ba: “Elõñ men ko ikõn̦aan kõm̦m̦ani ak ijjab maroñ. Elukkuun pen ñe ij lo aõ m̦õjn̦o̦l̦o̦k. El̦ap aõ em̦m̦õkm̦õk im aolep iien ij aikuj idaak uno. Ekkã aõ l̦õmn̦ak kõn wãween an kar Jijej kajjitõk ippãn Jemãn bwe en jab kõtl̦o̦k an iioone mãlejjoñ eo ear itõn jelm̦ae el̦aññe emaroñ. Bõtab, Jeova ear kõkajoor im jipañ Jijej, im ej bar kõkajoor im jipañ ña. Aõ jar ej men eo ej jipañ eõ kajjojo raan. Ãlikin  aõ kwal̦o̦k bũruõ ñan Anij, ej em̦m̦anl̦o̦k aõ mour.”​—Matu 26:39, UBS.

Julian ej bar bõk ejja l̦õmn̦ak in wõt an lel̦l̦ap in. Epaake 30 iiõ kiiõ in an bõk juon kain nañinmej me ekõm̦m̦an bwe en pen an m̦akũtkũt. Ej ba: “M̦okta iar jerbal ãinwõt juon mãnija, ak kiiõ ejako aõ jerbal im ij m̦akũtkũt wõt kõn wiil̦jea. Bõtab, el̦ap aõ m̦õn̦õn̦õ ilo mour e aõ kõnke ij kõjerbal iien im maroñ eo aõ ñan jipañ ro jet. Ñe jej m̦õn̦õn̦õ in lel̦o̦k ak jipañ ro jet, men in ej kadikl̦o̦k ad inepata, im Jeova ej kõkajoor kõj ilo iien ko jej aikuj jipañ ãinwõt an kar kallim̦ur. Ãinwõt rijjilõk Paul, em̦õj aõ lo an m̦ool naan kein rej ba: ‘Imaroñ in kõm̦m̦an men otemjej ilo Eo ej kõkajoor eõ.’”​—Pilippai 4:13.

Juon l̦addik etan Antonio ej ba: “Ke jema ear mej kõn an juon wa kar dibõje, ilo jinoin iar jab tõmak. Iar jab mel̦el̦e etke ear mej ke ejjel̦o̦k men en̦ ebõd ear kõm̦m̦ane. Ak ejjel̦o̦k men en̦ iar maroñ kõm̦m̦ane. Jema ear kom̦a ium̦win 5 raan im tokãlik ear jako. Iar maroñ dãpij aõ jañ ñe ij pãd iturin jinõ, bõtab ñe ij make iaõ, joñan aõ bũrom̦õj ijjab maroñ dãpij aõ jañ. Aolep iien ij kajjitõk ippa make etke ear wal̦o̦k men in ñane.

“Ilo kar tõre in me iar lukkuun bũrom̦õj, ikõn kajjitõk ippãn Jeova bwe en jipañ eõ jel̦ã irooj ioon eñjake ko aõ im ñan kaenõm̦m̦an bũruõ. Jidik kõn jidik, ear dikl̦o̦k aõ bũrom̦õj. Ij keememej an Baibõl̦ ba bwe ‘menin wal̦o̦k’ ak men ko jejjab kõtmãne bwe renaaj wal̦o̦k remaroñ jelõt jabdewõt armej. Im kõnke Anij eban riab, ij tõmak bwe inaaj bar loe jema ñe enaaj bar mour.”​—Ekklisiastis 9:11; Jon 11:25; Taitõs 1:2.

Ãindein bar l̦õmn̦ak eo an Robert, eo kar kwal̦o̦k kake ilo katak eo jinointata. Ej ba: “Ilo am̦ro lio ippa, Maribel, jar ñan Jeova, kõm̦ro ej lo aenõm̦m̦an eo me bokin Pilippai 4:6, 7 ej kõnono kake. Kõn an aenõm̦m̦an bũruom̦ro im l̦õmn̦ak ko am̦ro, men in ear jipañ kõm̦ro ñan kwal̦o̦k ñan ro rej kwal̦o̦k nuuj ko ilo tipi kõn kõjatdikdik eo kõn an ro remej naaj bar mour. Meñe l̦adik eo nejũm̦ro ear mej ke bal̦uun eo ear kũrããj, ak elõñ men ko rem̦m̦an im rekam̦õn̦õn̦õ kõmar maroñ kõm̦m̦ani ippãn doon im kõm̦ro ej kate kõm̦ro ñan l̦õmn̦ak wõt kõn men kein.

“Rũttõmak ro m̦õttam me rej Ri Kõnnaan ro an Jeova rar ba ñan kõm̦ro bwe rar lo am̦ro aenõm̦m̦an wõt ke rar alwõje am̦ro kõmel̦el̦e kõn tõmak eo am̦ro ilo tipi. Kõm̦ro kar ba ñan er bwe unin am̦ro kar maroñ ãindein ej kõn wõt jar ko an rũttõmak ro m̦õttam. Ij lukkuun tõmak bwe Jeova ear jipañ kõm̦ro ikijjeen naanin kaenõm̦m̦an ko aer.”

Ãinwõt an alikkar ilo aolep bwebwenato kein, ewõr an Anij maroñ ñan kaenõm̦m̦an armej ro ilo jabdewõt apañ ko rej iiooni. Ak ta kõn kwe? Jekdo̦o̦n ta apañ ko kwõj iiooni, kwõmaroñ bõk kaenõm̦m̦an im jipañ ilo iien kein reppen ñan kwe. * (Lale kõmel̦el̦e eo itulal̦.) Kwõmaroñ reilo̦k ñan Jeova bwe en jipañ eok. E eo ej “Anij in aenõm̦m̦an otemjej.”​—2 Korint 1:3.