စ​တီ​ဗင် * က သူ့​အဖြစ်​ကို အခု​လို ပြန်​ပြော​ပြတယ်– “ကျွန်​တော်​တို့ လင်​မယား​နှစ်​ယောက်​စ​လုံး တစ်​ပြိုင်​တည်း အလုပ်​ပြုတ်​သွား​တယ်။ သူ​များ ပေး​တာ​ကမ်း​တာ​လေး​နဲ့ နှစ်​နှစ်​လောက် အသက်​ဆက်​ပြီး ကြုံရာ​ကျ​ပန်း အလုပ်​လုပ်​ခဲ့ရ​တယ်။ ဒါ​ကြောင့် ကျွန်​တော့်​မိန်း​မ ဆူ​ဇီ​ဟာ စိတ်​ဓာတ်​ကျ​လာ​ပြီး ကျွန်​တော်​ကိုယ်​တိုင်​လည်း အသုံး​မကျ​ဘူး​လို့ ခံစား​ခဲ့ရ​တယ်။

“ဒီ​အခြေ​အနေ​ကို ကျွန်​တော်​တို့ ဘယ်​လို ရင်​ဆိုင်​ခဲ့​ကြ​သလဲ။ ယေရှု​က မဿဲ ၆:၃၄ မှာ ‘နေ့​ရက်​တိုင်း​ဟာ သူ့​စိုး​ရိမ်​စ​ရာ​နဲ့​သူ ရှိ​နေ​မှာ​ဆို​တော့ မနက်​ဖြန်​အတွက် မစိုး​ရိမ်​ပါ​နဲ့’ လို့​ပြော​ခဲ့​တယ်။ ဆူ​ဇီ​က အဲဒီ​ကျမ်း​စကား​နဲ့ သူ့​ကိုယ်​သူ မပြတ်​သတိ​ပေး​ခဲ့​တယ်။ အဲဒီ​အပြင် ထက်​ထက်​သန်​သန် ဆုတောင်း​တာ​က​လည်း ဘဝ​ကို​ရှေ့​ဆက်​နိုင်​ဖို့ သူ့​ကို ခွန်​အား​ပေး​ခဲ့​တယ်။ ကျွန်​တော့်​ကို​တော့ ဆာလံ ၅၅:၂၂ မှာ​ပါ​တဲ့ ကျမ်း​စကား​က နှစ်​သိမ့်​ပေး​ခဲ့​တာ​ပါ။ ဆာလံ​ဆ​ရာ​လို​ပဲ ကျွန်​တော်​လည်း ထမ်း​ထား​ရ​တဲ့​ဝန်​တွေ​ကို ဘု​ရား​သခင်​ဆီ ပုံ​အပ်​တဲ့​အခါ ကျွန်​တော့်​ကို ဘု​ရား​သခင် တ​ကယ်​ဖေး​မပေး​မှန်း သိ​ခဲ့ရ​တယ်။ အခု ကျွန်​တော့်​မှာ အလုပ်​အကိုင်​ရှိ​နေ​ပေမဲ့ မဿဲ ၆:၂၀-၂၂ မှာ​ပါ​တဲ့ ယေရှု​ရဲ့​အကြံ​ပြု​ချက်​အတိုင်း ဘဝ​ကို ရိုး​ရိုး​ရှင်း​ရှင်း​ပဲ ထား​တယ်။ ဒါ​ကြောင့် ဘု​ရား​သခင်​နဲ့ ပို​ရင်း​နှီး​လာ​ပြီး လင်​မယား​နှစ်​ယောက်​လည်း ပို​ရင်း​နှီး​တွယ်​တာ​လာ​တယ်။”

ယောန​သန်​က​လည်း အခု​လို ဝန်​ခံ​တယ်– “မိသား​စု​ရဲ့ တ​ပိုင်​တ​နိုင် စီးပွား​ရေး​လုပ်ငန်း ဒေ​ဝါ​လီ​ခံ​လိုက်​ရ​တုန်း​က​ အနာ​ဂတ်​အတွက် စိုး​ရိမ်​ပြီး ကျွန်​တော် သိပ်​ကြောက်​ခဲ့​တယ်။ စီး​ပွား​ရေး ချွတ်​ခြုံ​ကျ​သွား​တော့ နှစ်​ပေါင်း ၂၀ လုံး​လုံး ကြိုး​စား​လုပ်​ခဲ့​သမျှ အလ​ကား​ဖြစ်​သွား​တယ်။ ပိုက်​ဆံ​ကိစ္စ​ကြောင့် လင်​မယား​နှစ်​ယောက် စကား​များ​လာ​တယ်။ အကြွေး​ဝယ်​ကဒ်နဲ့ စျေး​ဝယ်​ရင်​တောင် လက်မခံ​​မှာ​စိုး​တာ​နဲ့ မဝယ်​ရဲခဲ့​ဘူး။

“ဒါ​ပေမဲ့ သမ္မာ​ကျမ်း​စာ​နဲ့ ဘု​ရား​သခင့် စွမ်းအား​တော်​က မှန်​ကန်​တဲ့​ဆုံး​ဖြတ်​ချက်​တွေ ချ​တတ်​အောင် ကျွန်​တော်​တို့​ကို ကူညီ​ပေး​ခဲ့​တယ်။ ဘယ်​အလုပ်​မဆို လုပ်​တတ်​အောင် သင်​ယူ​ခဲ့​တယ်။ မလို​အပ်​တဲ့ အသုံး​စ​ရိတ်တွေ​ကို လျှော့​ချ​တယ်။ ယေဟောဝါ​သက်​သေတွေ​ဖြစ်​တဲ့​အတွက် ခ​ရစ်​ယာန်​ချင်း​တွေ​ဆီ​က​လည်း အကူ​အညီ​ရခဲ့​တယ်။ ကိုယ့်​ကိုယ်​ကိုယ် လေး​စား​တဲ့​စိတ် ပြန်​ရ​လာ​အောင် သူတို့​အား​ပေး​ရုံ​မက ဘဝ​ရဲ့ အခက်​ခဲ​ဆုံး​အချိန်တွေ​မှာ ရိုင်း​ပင်း​ကူညီ​ခဲ့​ကြ​တယ်။”

ရေ​ချယ်​က​လည်း အခု​လို ဖြစ်​ကြောင်း​ကုန်​စင် ပြော​ပြတယ်– “ကျွန်မယောက်ျား ရုတ်​တ​ရက် ထား​သွား​တုန်း​က ကျွန်​မ ဒေါသ​တ​ကြီး​နဲ့ နာ​ကြည်း​မိ​တယ်။ နောက်​တော့ ဝမ်း​နည်း​ကြေ​ကွဲ​တဲ့​စိတ်​က မခံ​မရပ်​နိုင်​အောင် ဖိ​စီး​တော့​တာ​ပဲ။ ဒါ​ပေမဲ့ ဘု​ရား​သခင်​နဲ့ ပို​ရင်း​နှီး​ဖို့ ကြိုး​စား​တဲ့​အခါ ဘု​ရား​က နှစ်​သိမ့်​ပေး​ခဲ့​တယ်။ ဘု​ရား​သခင်​ဆီ နေ့​တိုင်း ဆုတောင်း​တဲ့​အတွက် ဘု​ရား​ပေး​ငြိမ်သက်​မှု​က ကျွန်​မရဲ့ စိတ်​နှလုံး​ကို ကာ​ကွယ်​ပေး​ခဲ့​တယ်။ ကျွန်​မရဲ့ ကြေ​ကွဲ​နေ​တဲ့ စိတ်​နှလုံး​ကို ပြန်​ကု​စား​ပေး​လိုက်​သလို​ပါ​ပဲ။

“ဒေါသ​နဲ့ နာ​ကြည်း​စိတ်​ကို ဘု​ရားရဲ့ နှုတ်​ထွက်​စကား​ဖြစ်​တဲ့ ကျမ်း​စာ​ရဲ့ အကူ​အညီ​နဲ့ ဖြေဖျောက်​နိုင်​ခဲ့လို့ ကျေး​ဇူး​တင်​လိုက်​တာ။ ‘အဆိုး​အား​ဖြင့် အၡုံး​မခံ​နှင့်။ အကောင်း​အား​ဖြင့် အဆိုး​ကို ဆက်​၍​အနိုင်​ယူ​နေ​လော့’ ဆို​တဲ့ ရော​မ ၁၂:၂၁ ထဲ​က တမန်​တော်​ပေါလု​ရဲ့ စကား​ကို ကျွန်​မ နှလုံး​သွင်း​ခဲ့​တယ်​လေ။

“မိတ်ဆွေ​ကောင်း တစ်​ယောက်​က​လည်း ဘဝ​ကို​ရှေ့​ဆက်​ဖို့​လို​မှန်း သိ​လာ​အောင် ကျွန်​မကို ကူညီ​ပေး​ခဲ့​တယ်။ သူ​က ဒေ​သနာ​ကျမ်း ၃:၆ ကို​ပြပြီး ဘဝ​မှာ ‘ပျောက်​ဆုံး​သွား​ပြီ’ လို့ ယူ​မှတ်​ရ​တဲ့​အချိန်​ရှိ​တယ်​ဆို​ပြီး ကြင်​ကြင်နာ​နာ ပြော​ပြတယ်။ ဒီ​အကြံ​ကို​လက်ခံ​ဖို့ ခက်​တာ​မှန်​ပေမယ့် ကျွန်​မ​လိုအပ်​နေ​တာ အဲ​ဒါ​ပဲ။ အခု​တော့ ဘဝ​ကို ရှေ့​ဆက်​လျှောက်​နိုင်​ပါ​ပြီ။”

အဲ​လီ​ဇ​ဘက်​က​လည်း အခု​လို​ပြော​ပြတယ်– “အိမ်​ထောင်​ဖက်​နဲ့ ကွာ​ရှင်း​လိုက်​တဲ့​အခါ တ​ကယ်​ပဲ အကူ​အညီ​လို​တယ်။ ကျွန်​မကို နေ့​စဉ်​ရက်​ဆက် ကူညီ​ပေး​တဲ့ မိတ်ဆွေ​ကောင်း တစ်​ယောက်​ရှိ​ခဲ့​တယ်။ ကျွန်​မငို​တဲ့​အခါ သူ​လည်း လိုက်​ငို​ပြီး နှစ်​သိမ့်​ပေး​တယ်။ စွန့်​ပစ်​ခံ​ရ​တယ်​ဆို​တဲ့ ခံစား​ချက်​ထက် အချစ်​ခံ​ရ​တယ်​ဆို​တဲ့ ခံစား​ချက်​ရှိ​လာ​အောင် ကူညီ​ပေး​တယ်။ ယေဟောဝါ​ဘု​ရား​က သူ့​ကို​သုံး​ပြီး ကျွန်​မရဲ့ စိတ်​ဒဏ်​ရာ​ကို ကု​သပေး​မှန်း ကျွန်မ အပြည့်​အဝ​ယုံ​တယ်။”

ဒီ​ဆောင်း​ပါး​တွဲ​ရဲ့ အစ​မှာ ဖော်ပြထား​တဲ့ လူး​ဝစ်​ဟာ ပြင်း​ထန်​တဲ့ နှလုံး​ရော​ဂါ​ကြောင့် နှစ်​ကြိမ်​တိ​တိ သေလု​မျော​ပါး​ဖြစ်​ခဲ့ရ​တယ်။ အခု​ဆို သူ့​ကို တစ်​နေ့ ၁၆ နာ​ရီ အောက်​စီ​ဂျင်​ပေး​ထား​ရ​တယ်။ သူ​အခု​လို​ပြော​တယ်– “အချိန်​တိုင်း ယေဟောဝါ​ဘု​ရား​ဆီ ကျွန်​တော်​ဆုတောင်း​တယ်။ ဆုတောင်း​ပြီး​သွား​တဲ့​အခါ ဘု​ရားရဲ့ စွမ်းအား​တော်​ကြောင့် ခွန်​အား​ရှိ​လာ​တယ်​လို့ ခံစား​ရ​တယ်။ ဘု​ရား​သခင် ဂရု​စိုက်​မယ်​ဆို​တာ ကျွန်​တော်​သိ​နေ၊ ယုံ​ကြည်​နေ​တဲ့​အတွက် ဘု​ရား​ဆီ ဆုတောင်း​တာ​က ဆက်​ရှင်​သန်​နိုင်​ဖို့ လို​အပ်​တဲ့ အစွမ်း​သတ္တိ​ကို ရ​ရှိ​စေ​တယ်။”

အသက် ၈၀ ကျော် ရို​စ​လင်း​က​လည်း အခု​လို​ပြော​ပြတယ်– “လုပ်​ချင်​တာ​တွေ သိပ်​များ​ပေမဲ့ ကျွန်​မ မလုပ်​နိုင်​ဘူး။ ခွန်​အား​တွေ တ​ဖြည်း​ဖြည်း ဆုတ်​ယုတ်​လာ​ပြီဆို​တဲ့ အသိ​ဟာ တော်​တော်​ဆိုး​ဝါး​တာ​ပဲ။ သိပ်​မော​လာလို့ ဆေး​ဝါး​တွေ​ကို​ပဲ အား​ကိုး​နေ​ရ​တယ်။ ဖြစ်​နိုင်​မယ်​ဆို​ရင် ဒီ​အခက်​အခဲ​ကို ဖယ်​ရှား​ပေး​ပါ​ဆို​ပြီး အဖဘု​ရား​ကို ယေရှု​တောင်း​ပန်​ခဲ့​သလို​ ကျွန်​မလည်း တစ်​ခါ​တ​လေ​ အဲဒီ​လို​ခံစား​ရ​တယ်။ ဒါ​ပေမဲ့ ယေဟောဝါ​ဘု​ရား​က ယေရှု​ကို ခွန်​အား​ပေး​ခဲ့​သလို ကျွန်​မကို​လည်း ခွန်​အား​ပေး​ပါ​တယ်။ ဆုတောင်း​တာ​ ဟာ ကျွန်​မအတွက်​တော့ နေ့​တိုင်း​သောက်​တဲ့ အား​ဆေး​တစ်​ခွက်​နဲ့​တူ​တယ်။ ဘု​ရား​နဲ့ စကား​ပြော​ပြီး​သွား​တဲ့​အခါ တော်​တော်​လေး စိတ်​သက်​သာ​ရာရ​သွား​တယ်။”—မဿဲ ၂၆:၃၉။

နာ​တာ​ရှည် နာ​ဗ်​ကြော​ဖွဲ့​ရော​ဂါ​ကို နှစ်​ပေါင်း ၃၀ လောက် ခါး​စည်း​ခံ​ခဲ့ရ​တဲ့ ဟို​လီ​ယန်​လည်း အဲဒီ​လို​ပဲ ခံစား​ရ​တယ်။ “မန်​နေ​ဂျာ​ထိုင်​ခုံ​က​နေ ဘီးတပ်​ကု​လား​ထိုင်​ပေါ်​ကို ပြောင်း​ထိုင်​ခဲ့ရ​တယ်။ ဒါ​ပေမဲ့ သူ​တစ်ပါး​ရဲ့ အကျိုး​အတွက် ဘဝ​ကို မြုပ်​နှံ​ထား​တာ​မို့ အသက်​ရှင်​ရ​ကျိုး​နပ်​ပါ​တယ်။​ သူ​တစ်ပါး အကျိုး​ဆောင်​တာ​က ခံစား​ရ​တဲ့​ဒုက္ခတွေ​ကို လျော့​ပါး​စေ​တယ်။ ယေဟောဝါ​ဘု​ရား​က​လည်း လို​အပ်​ချိန်​တိုင်း​မှာ အား​ပေး​မယ်​ဆို​တဲ့ ကတိ​အတိုင်း လုပ်​ဆောင်​ပေး​ခဲ့​တယ်။ တမန်​တော် ပေါလု​လို​ပဲ ကျွန်​တော်​လည်း ‘ငါ့​ကို တန်ခိုး​ပေး​တော်​မူ​သော ကိုယ်​တော်​အား​ဖြင့် အရာ​ခပ်​သိမ်း​ကို ငါ​တတ်​စွမ်း​နိုင်​၏’ လို့ ပြော​နိုင်​ပါ​တယ်။”—ဖိ​လိပ္ပိ ၄:၁၃။

အန်​ဒ​ရူး အခု​လို​ပြော​ပြတယ်– “ကျွန်​တော့်​အဖေ ကား​အက်​ဆီး​ဒင့်​ဖြစ်​ပြီး ဆုံး​သွား​တုန်း​က အစ​ပိုင်း​မှာ ကျွန်​တော် လက်မခံ​​နိုင်​ဘူး။ လူ​သွား​လမ်း​ပေါ် အေး​အေး​လူ​လူ လျှောက်​နေ​တဲ့ အဖေ့​ကို​မှ တိုက်​သွား​တာ လုံး​ဝ​မတ​ရား​ဘူး​လို့ ခံစား​ရ​တယ်။ ဒါ​ပေမဲ့ ဘာ​မှ မတတ်​နိုင်​ဘူး​လေ။ ငါး​ရက်​လောက် မေ့​မျော​နေ​ပြီး​နောက် အဖေ ဆုံး​သွား​တယ်။ အမေ့​ရှေ့​မှာ မငို​မိ​အောင် ထိန်း​ထား​ပေမဲ့ တစ်​ယောက်​တည်း ရှိ​တဲ့​အခါ ချူံး​ပွဲ​ချ ငို​ပစ်​လိုက်​တယ်။ ပြီး​တော့ ‘ဘာ​ကြောင့် ဒီ​လို​ဖြစ်​ရ​တာ​လဲ’ ဆို​ပြီး တ​မေး​တည်း မေး​နေ​မိ​တယ်။

“အဲဒီ​တုန်း​က စိတ်​ထိ​ခိုက်​လွန်း​နေ​တော့ ခံစား​ချက်​တွေ​ကို ထိန်း​ချုပ်​နိုင်​ဖို့၊ စိတ်​ငြိမ်သက်​မှု​ရှိ​လာ​ဖို့ ကူညီ​ပေး​ပါ​ဆို​ပြီး ယေဟောဝါ​ဘု​ရား​ဆီ တ​ဖွဖွ အသနား​ခံ​ခဲ့​တယ်။ နောက်​တော့ တ​ဖြည်း​ဖြည်း စိတ်​တည်​ငြိမ်​လာ​တယ်။ လူ​တိုင်း​ဟာ ‘မျှော်​လင့်​မထား​တဲ့ ဖြစ်​ရပ်တွေ’ ကြုံရ​တတ်​တယ်​ဆို​တဲ့ ကျမ်း​စကား​ကို ကျွန်​တော် သတိ​ရ​လာ​တယ်။ ဘု​ရား​သခင်​ဟာ လိမ်​ညာ​တတ်​တဲ့ ဘု​ရား​မဟုတ်​လို့ သေဆုံး​သူ​တွေ ရှင်​ပြန်​ထ​မြောက်​လာ​ချိန်​မှာ အဖေနဲ့ ပြန်​ဆုံ​တွေ့​ရ​မယ်​ဆို​တာ ကျွန်​တော် တ​ထစ်​ချ​ယုံ​တယ်။”—ဒေ​သနာ ၉:၁၁၊ က​ဘ; ယောဟန် ၁၁:၂၅; တိတု ၁:၂။

အဖွင့်​ဆောင်း​ပါး​မှာ​ပါ​တဲ့ ရော​ဘတ်​လည်း အဲဒီ​လို​ပဲ တွေး​မိ​တယ်။ သူ အခု​လို​ပြော​ပြတယ်– “ယေဟောဝါ​ဘု​ရား​ကို ဆုတောင်း​လိုက်​တဲ့​အခါ ဖိလိပ္ပိ ၄:၆၊ ၇ မှာ​ပြော​ထား​တဲ့ စိတ်​ငြိမ်သက်​မှု​ကို ကျွန်​တော်​ရော ဇနီး​သည်​ပါ ခံစား​ရ​တယ်။ အဲဒီ​စိတ်​ငြိမ်သက်​မှု​ကြောင့် သတင်း​ထောက်​တွေ​ကို ရှင်​ပြန်​ထ​မြောက်​ခြင်း မျှော်​လင့်​ချက်​အကြောင်း ကောင်း​ကောင်း ပြော​ပြနိုင်​ခဲ့​တယ်။ လေ​ယာဉ်​ပျက်​ကျ​လို့ သား​လေး ဆုံး​ပါး​သွား​ပေမဲ့ သူ​နဲ့​အတူ​ပျော်​ရွှင်​ခဲ့​တဲ့ အမှတ်​တ​ရတွေ​တော့ အများ​ကြီး​ရှိ​ပါ​သေး​တယ်။ အဲ​ဒါ​တွေ​ကို ပြန်​သတိ​ရ​နေ​ဖို့ ကျွန်​တော်​တို့ ကြိုး​စား​တယ်။

“ကိုယ့်​ရဲ့​မျှော်​လင့်​ချက်​အကြောင်း တည်​တည်​ငြိမ်​ငြိမ် ရှင်း​ပြနိုင်​တဲ့ ကျွန်တော်​တို့​ကို ရုပ်​သံ​အစီ​အစဉ်​မှာ တွေ့​လိုက်​တယ်​လို့ မိတ်ဆွေ​တွေ ပြော​တဲ့​အခါ ကျွန်​တော်​တို့​အတွက် ဝိုင်း​ဝန်း​ဆုတောင်း​ပေး​ခဲ့​ကြ​လို့ အဲဒီ​လို​ရှင်း​ပြနိုင်​တာ​ပါ​ဆို​ပြီး သူတို့​ကို ပြန်​ပြော​ခဲ့​တယ်။ အဲဒီ​အပြင် နှစ်​သိမ့်​စကား​ရေး​ထား​တဲ့ စာ​တို​လေး​တွေ အများ​ကြီး​ရလို့​လည်း ယေဟောဝါ​ဘု​ရား ဖေး​မပေး​နေ​မှန်း ကျွန်​တော်​တို့ သိ​ခဲ့ရ​တယ်။”

ဘု​ရား​သခင်​ဟာ ပြဿ​နာ​အမျိုး​မျိုး၊ အခက်​အခဲ အဖုံ​ဖုံ ကြုံ​နေ​ရ​သူ​တွေ​ကို နှစ်​သိမ့်​မှု​ပေး​နိုင်​မှန်း အထက်​ပါ​ဖြစ်​ရပ်တွေ​က​နေ သိ​ရ​တယ်။ သင့်​အတွက်​ကော။ ဘဝ​မှာ ဘာ​ပဲ​ကြုံရ​ပါ​စေ အခက်​အခဲ​ကြုံ​ချိန်​မှာ ခံ​ရပ်​စေ​နိုင်​တဲ့ နှစ်​သိမ့်​မှု​ကို ရ​ရှိ​နိုင်​ပါ​တယ်။ * ယေဟောဝါ​ဘု​ရား​ဆီ အကူ​အညီ​တောင်း​ကြည့်​ပါ။ အကြောင်း​က ကိုယ်​တော်​ဟာ “နှစ်​သိမ့်​ခြင်း​ရှိ​သမျှ​တို့​၏ ဘု​ရား​သခင်” ဖြစ်​လို့​ပါ​ပဲ။—၂ ကော​ရိန္သု ၁:၃။