Seth * kiijtoua: “Nosiua uan na ayokmo tijpixkej tekitl. Ome xiuitl tochampoyouaj techpaleuijkej uan nojkia timopaleuiyayaj ika tlen nijtlaniyaya ipan se keski tekitl tlen nijchiuayaya. Pampa kiampa techpanok, nosiua kipixki nopa kokolistli tlen itoka depresión uan nopa kichiuayaya tlauel ma mokueso miak tonali, uan na nijmatiyaya amo tleno nopati.

”¿Tlake techpaleuik? Priscilla nochipa kiilnamikiyaya tlen Jesús kiijtok ipan Mateo 6:34, kampa kiijtoua amo kinamiki techtekipachos kenijkatsa tiitstosej ualmostla, pampa sejse tonali tikixnamikij kuesoli. Kema momaijtouayaya, kiiljuiyaya toTeotsij nochi tlen kiyolmatiyaya, nopa kipaleuik ma kiixnamiki nopa kuesoli. Uan na tlauel nechyolchikajki Salmo 55:22. Kej katli kiijkuilok nopa Salmo, nijkajki imako Jehová nochi nokuesol uan ya nelia nechpaleuik. Maske nama nijpixtok se tekitl, amo tlauel titlapijpiaj, pampa tijneltokaj tlen Jesús kiijtok ipan Mateo 6:20-22. Nopa techpaleuijtok kuali ma timouikakaj, uan nojkia iuaya toTeotsij”.

Jonathan nojkia kiijtoua: “Na ininuaya nochampoyouaj tijpixtoyaj se tekitl, 20 xiuitl tlauel titekititoyaj. Uan kema ayokmo tlauel onkak tomij, nochi tijpolojkej, nopa kichijki tlauel ma nimotekipacho. Nosiua uan na timokualaniyayaj pampa amo tijpixtoyaj tomij. Amo ueliyaya tijtekiuiaj totarjeta de crédito pampa amo tleno kipixtoya.

”Biblia uan ToTeotsij itonal techpaleuik ma tijmatikaj tlake tijchiuasej. Pejki nijchiua tlen ueli tekitl, maske amo nechpaktiyaya, uan ayokmo tijkouayayaj tlen amo moneki. Pampa tielij Jehová itlajtoltemakauaj, toikniuaj nojkia techpaleuijkej. Kichijkej kuali ma tijyolmatikaj uan techpaleuijkej ika se keski tlamantli kema amo tleno tijpixtoyaj”.

Raquel kiijtoua: “Kema noueue sanima nechkajki, tlauel nikualanki uan nimoyolkokok. Maske tlauel nimokuesok, nimonechkauik ika toTeotsij uan ya nechyolchikajki. Mojmostla nimomaijtouayaya, uan ya nechmakayaya tlaseuilistli tlen kichiuayaya kuali ma nijyolmati.

”ITlajtol Biblia nechpaleuik amo ma nimoyolkokojto uan amo ma nisenkuajkualanto. Nijchijki tlen Pablo kiijtok ipan Romanos 12:21: ‘Ma axinmechtlani tlen axkuali. Xijtlanikaj tlen axkuali ika tlen kuali’.

”Se nouampo nechiljuik monekiyaya nikilkauas nochi. Nechpouilik Eclesiastés 3:6 uan ika miak tlaiknelili nechiljuik kemantika ‘onka tonali kema se kipoloua’ se tlenijki. Maske nijmatki ouij, ya nopa nijchijki. Nama nimosentlalijtok nijchiuas se keski tlamantli tlen kichiua ma niyolpaki”.

Elizabeth kiijtoua: “Kema mosiua o moueue mitskaua, moneki ma mitspaleuikaj. Na mojmostla nechpaleuik se kuali nouampo. Chokak nouaya, nechyolchikajki uan kichijki ma nijmati nechikneliyayaj. Na nijmati Jehová nechpaleuik ika nouampo ma nimoyolchikaua uan ayokmo ma nimokueso”.

Luis, katli tikijtojkej ipan nopa achtoui tlamachtili, kipia se kokolistli ipan iyolo uan ompa nechka miki. Mojmostla moneki kiselis oxígeno 16 horas. Ya kiijtoua: “Mojmostla nimomaijtoua, uan kema nitlami, nijmati Jehová nechyolchikaua ika itonal. Nimomaijtoua  pampa nopa nechpaleuia ma nikijiyoui. Uan pampa nimotemachia ipan toTeotsij, nijmati ya kitekipachoua tlen nechpano”.

Petra, katli kipia kipano 80 xiuitl, kiijtoua: “Maske nijneki nijchiuas miak tlamantli..., amo niueli. Tlauel nimokuesoua pampa ayokmo nitetik uan moneki nochipa nipajtolojtos. Miakpa nimoiljuia ipan tlen kiijtok Jesús: ‘Tlaj tiueliskia, xinechkixtili ni tlaijiyouilistli’. Jehová amo kikixtilik nopa tlaijiyouilistli, san kipaleuik ma kiijiyoui. Uan na nojkia kiampa nechpaleuia. Nimomaijtos, ya nopa nopajui. Tlauel kuali nijyolmati kema nijnojnotsa toTeotsij” (Mat. 26:39).

Julián, katli kipia 30 xiuitl ika se kokolistli tlen itoka esclerosis múltiple, nojkia kiijtoua: “Nama ayokmo nimoseuia ipan se kuali silla pampa nitekiti, nama san nijtekiuia se silla de ruedas. Maske amo ninejnemi, niyolpaktok pampa nikinpaleuia maseualmej. Nopa kichiua amo tlauel ma nitlaijiyoui, uan nojkia Jehová nochipa teyolchikaua kema titlaijiyouiaj kej kiijtok kichiuaskia. Kej Pablo, ueli nikijtoua ‘nochi niueli nijchiua ika nopa chikaualistli’ tlen Jehová nechmaka” (Filip. 4:13).

Antonio kiijtoua: “Tlauel nimokuesok kema nijmatki se carro kitepachok notata. Nimoiljuiyaya amo kinamikiyaya mikis pampa amo tleno kichijtoya. Amo uelki nijpaleuik, makuili tonali amo moliniyaya, kejuak miktoya, uan teipa mijki. Maske kema niitstoya iuaya nonana nimoijyauiyaya pampa amo nijnekiyaya ma nechita nichoka, kema niitstoya noselti, nelia tlauel nichokayaya. Uan nimoiljuiyaya: ‘¿Kenke mijki? ¿Kenke?’.

”Maske nitlaijiyouiyaya, nochipa nikiljuiyaya Jehová ma nechpaleui amo tlauel ma nimokueso uan ma nechmaka tlayolseuilistli. Yolik pejki kuali nijyolmati. Nikilnamijki Biblia kiijtoua ‘tlen ueli tlamantli axkuali ueli kipantis akiueli tlakatl kema axkichia’. Uan pampa toTeotsij amo istlakati, nijmati sampa nikitas notata kema moyolkuis” (Ecl. 9:11; Juan 11:25; Tito 1:2).

Robert, tlen nojkia tikijtojkej ipan nopa achtoui tlamachtili, nojkia kiijtoua: “Kema nimomaijtouayaya iuaya nosiua Maribel, tijpiayayaj nopa tlayolseuilistli tlen kiijtoua Filipenses 4:6, 7. Nopa techpaleuik ma tikinixtomilikaj periodistas kenijkatsa moyolkuisej mijkatsitsij. Maske tokone mijki kema motepexiuik nopa avión, nochipa tikilnamikij kenijkatsa tiyolpakiyayaj kema tiitstoyaj sansejko, uan san ya nopa tikilnamiktokej.

”Kema sekinok Jehová itlajtoltemakauaj techiljuijkej amo nesiyaya tlaj tlauel timokuesojtoyaj kema tikixtonkej ipan televisión tlen tijneltokayayaj, tikiniljuijkej kiampa tiitstoyaj pampa miakej momaijtojkej uan kiiljuijkej Jehová ma techpaleui. Jehová nelia techyolchikauayaya ika miak mensajes tlen sekinok techtitlaniliyayaj”.

Nochi tlen kinpanok ni maseualmej kinextia toTeotsij uelis kinyolchikauas nochi katli tlaijiyouiaj. ¿Nojkia mitsyolchikauas? Kena. Maske tijpias uejueyi tlaouijkayotl, nojkia uelis mitspaleuis xikixnamiki. * Yeka, ximonechkaui ika Jehová, pampa ya nochipa “techyoltlalia” (2 Cor. 1:3, Icamanal Toteco).