“Ijkuak nejua onikpolo notekiyo nosiuauj noijki okipolo itekiyo”, kijtoua Seth. * “Ipan ome xiuitl ouel otopanoltijkej ika tomintsin tlen techmakayaj tochanejkauan niman itech seki tekitl tlen techmakayaj. Yejuin okichiuj ika nosiuauj Priscila melak manajmana niman nejua nikmachiliaya ika xtlaj ika nitepaleuiaya”.

“¿Kenon ouel otipanokej ika tlayekapan? Priscila nochipa kilnamikiya itlajtoluan Jesús ipan Mateo 6:34. Yejua okijto ika xnoneki melak matajmanakan ipampa uajmostla, pampa nochi tonaltin onka tlen itech tajmanaskej. Pampa yejua kichiuaya teoyotl ika nochi iyojlo, melak okipaleui. Nejua melak onechpaleui tlen kijtoua Salmo 55:22. Ijkon ken salmista, oniktlali notlamamal ipan Jehová niman yejua onechpaleui. Maski aman nikpiya se tekitl, tinemij san ika achijtsin ijkon ken Jesús okijto ipan Mateo 6:20-22. Niman aman melak kuajli touikaj iuan toTajtsin niman tejuamej noijki”.

Jonathan kijtoua: “Ijkuak opeuj xok tiktlanij itech totekiyo, xok nikmatiya tlenon nikchiuas. Pampa ouajla tonajli ijkuak otlasotik tomin, nochi tekitl tlen yotikchiujkaj ipan 20 xiuitl san ouajpopoliuj. Nejua iuan nosiuauj opeuj tokualaniaj san ipampa tomin. Nion xueliya tiktekitiltiskej tarjeta de crédito pampa tomojtiayaj tla xtechseliliskej”.

“San ika, itlajtol toTajtsin niman iespíritu santo otechpaleui matikmatikan tlenon tikchiuaskej. Opeuj nitekiti maski san itech katlejua tekitl niman otikitakej itech tlenon xnonekiya matikpopolokan totomin. Pampa tejuamej tiiteixpantijkauan Jehová, tokniuan akin imiuan titlaneltokaj noijki otechpaleuijkej. Okichiujkej kuajli matomachilikan niman melak kuajli otechpaleuijkej ijkuak xtikmatiyaj tlenon tikchiuaskej”.

Raquel kijtoua: “Ijkuak san totoka onechkauj noueuentsin, melak onikualan niman oninoyolkoko. Kuakon melak oninajman, san ika, oninonisiui itech toTajtsin niman yejua onechyolseui. Iyolseuilis toTajtsin okichiuj melak kuajli maninomachili ijkuak mojmostla nikchiuiliaya teoyotl yeskia kentla yejua onechpajti itech tlen nechyolkokouaya”.

“Ika itlapaleuilis iTlajtol toTajtsin ouel onikpopolo tlauejli tlen nikmachiliaya. Onikchiuj tlen Pablo okijto ipan Romanos 12:21: ‘Ma ka xmokauilikan mamechtlani on tlen xkuajli. Yej  ika on tlen kuajli xtlanikan on tlen xkuajli’”.

“Se akin kuajli iuan ninouika onechijli ika nonekiya manikilkaua tlen yopanoka. Yejua onechititi Eclesiastés 3:6 niman ika tlasojtlalistli onechijli ika onka tonajli ijkuak uelis tikpoloskej itlaj. Melak ouijtika onikitak yejuin tlajtolpaleuilistli, san ika, melak nonekiya nijkakis. Aman nitlanemilia itech tlen kuajli panos ika tlayekapan”.

Elisabeth kijtoua: “Ijkuak se kikaua ixnamik melak noneki makipaleuikan. Nejua nikpiaya se akin iuan ninouika akin onechpaleui mojmostla. Yejua nouan ochokak mojmostla, onechyolseui niman onechititi tlasojtlalistli. Kuajli nikasikamati ika Jehová ijkon onechpaleui itech tlen nechyolkokouaya”.

Luis, akin otikteneujkej ipan kachtopa tlamachtijli, kipiya se kokolistli itech iyojlo niman okpa imikiskia. Yejua noneki kipiyas oxígeno ipan 16 horas. Yejua kijtoua: “Niknotsa toTajtsin mojmostla niman sakin nikmachilia ika iespíritu santo nechyolchikaua. Ijkuak niknotsa toTajtsin, nechyolchikaua nitlanemilis ika tlayekapan pampa itech nitlaneltoka niman nikmati ika yejua nechtlajpiya”.

 Petra akin kipiya 80 xiuitl kijtoua: “Nikneki nikchiuas miyek tlemach, san ika, xueli nikchiua. Melak xkuajli ninomachilia ijkuak nikita ika tlantiuj nokojtilis. Melak nisiaui niman san ninopaleuiya ika pajtli. Miyekpa nitlanemilia ipan tlen Jesús okijto ijkuak okitlajtlanili itaj makipanoltili tlajyouilistli tla ueliskia. San ika, Jehová okiyolchikauj Jesús niman yejuin nechyolchikaua. Melak nechpaleuiya ijkuak mojmostla niknotsa toTajtsin. Niman melak kuajli ninomachilia tla iuan yonitlajto toTajtsin” (Mateo 26:39).

Julián, akin ikipiya 30 xiuitl ika se kokolistli itoka esclerosis múltiple, noijki ijkon onomachili: “Onopatlak silla tlen ipan ninotlalia oficina ika se silla de ruedas. San ika, aman melak kuajli ninemi pampa nikinpaleuiya oksekimej. Ijkuak nikinpaleuiya oksekimej, kichiua kuajli maninomachili itech tlajyouilistli. Jehová yemelak kichiua tlen kijtoua ika techyolchikauas ijkuak noneki. Ijkon ken apóstol Pablo nejua noijki ueli nikijtoua: ‘Nochi niueli nikxikoua tlen nopan uajlau pampa [...] yejua nechpaleuiya’” (Filipenses 4:13).

Antonio kijtoua: “Ijkuak notaj omik ipan se accidente xueliya nikneltokaya. Nesi ika xkinamikiya tlen ipan onochiuj, yejua xkipiya tlajtlakojli ika ijkon ipan manochiua. San ika, xok tla uelis nikchiuaskia. Ijkuak ximikiya, nemiya kentla yomijka makuijli tonajli. Nejua xnichokaya ixpan nonan, san ika, melak nichokaya ijkuak san noselti ninemiya. Niman ninotlajtoltiaya: ‘¿Tleka? ¿Tleka ijkon opanok?’”.

“Ipan yejon tonaltin ijkuak melak ninajmanaya, xkeman onijkauj niktlajtlanilis Jehová manechpaleui ika tlen nikmachiliaya. Ika yolik opeuj kuajli ninomachilia. Onikilnamik ika Biblia kijtoua uelis panos itlaj ijkuak xtikchiaj niman san akinon uelis ipan nochiuas. Pampa toTajtsin xueli tekajkayaua, kuajli nikmatstika ika oksejpa uelis nikitas notaj ijkuak uajnemiskej akin yomijkej” (Eclesiastés 9:11; Juan 11:25; Tito 1:2).

Robert, akin otikteneujkej kampa peua yejuin tlamachtijli noijki ijkon onomachili. Yejua kijtoua: “Ijkuak nejua iuan nosiuauj Maribel otiknotskej Jehová, otikmachilijkej yolseuilistli tlen kijtoua Filipenses 4:6, 7. Yejuin yolseuilistli tlen otikmachilijkej otechpaleui matitlajtokan imiuan reporteros itech tlamachialistli tlen tikpiayaj ika oksejpa tikitaskej tokoneuj. Maski tokoneuj omik ipan se accidente ipan avión, onka miyek tlen kualtsin tikilnamikij ijkuak san sekan otipanokej. Tikyejyekouaj titlanemiliskej itech yejon”.

“Ijkuak sekimej akin imiuan titlaneltokaj otechijlikej ika otechitakej ipan televisión kenon kuajli titlajtouayaj itech totlaneltokil, tejuamej otikimijlikej ika melak otechpaleui nochi teoyotl tlen kichiuayaj topampa. Yemelak nikneltoka ika Jehová otechpaleui niman otechyolseui ipampa oksekimej”.

Nochi yejuin tlen yotikteneujkej kuajli teititia ika toTajtsin ueli techyolseuiya maski san katlejua ajmantli matikixnamikikan. ¿Tlenon tiknemilia tejua? Maski san katlejua ajmantli tikpiya ipan monemilis, uelis tiknextis yolseuilistli tlen mitspaleuis kuajli xmomachili. * Ika yejon, xtlajtlanili mamitspaleui toTajtsin Jehová akin “nochipa techyoltlalijtikaj” (2 Corintios 1:3).