“Ne taha ni e magaaho ne fakaoti e gahua tupe he hoana haaku mo au,” he talahau e Seth. * Ke he ua e tau, ne moui a maua he tau mena foaki mai he magafaoa mo e tau gahua ikiiki. Ti ko e hoana haaku ko Priscilla, kua fakatagoa a ia, ka ko au kua logona e ai fai aoga.

“Fehagai fēfē a maua ke he mena nei? Ne fakamanatu tumau e Priscilla ki a ia ni e tau kupu ha Iesu he Mataio 6:34. Pehē a Iesu kua nakai lata ia tautolu ke fakaatukehe ke he aho a pogipogi, ha ko e mena igatia e aho mo e tau fakaatukehe. Mo e fakamalolō foki a ia he tau liogi mafanatia haana ke fakatumau a ia. Ki a au, ne mafanatia au he Salamo 55:22. Tuga a ia ne tohia e salamo, ne tuku atu e au e kavega haaku ki a Iehova, ti logona e au kua leveki mai e ia au. Pete kua fai gahua au mogonei, ne fakamukamuka e maua e puhala moui ha maua he fakatatau ke he tomatomaaga ha Iesu he Mataio 6:20-22. Ka e mua atu, kua fakatata lahi a maua ke he Atua mo e ki a maua ni ko e taha ke he taha.”

“Ne matakutaku au he onoono ke he vahā i mua he magaaho ne tomo e pisinisi he magafaoa,” he talahau e Jonathan. “Ha ko e lekua fakatupe he magahala ia, ne nakai moua ha fua mitaki he 20 e tau ne gahua fakamalolō ai. Ne kamata au mo e hoana haaku ke taufetoko he tau tupe. Nakai maeke ia maua ke fakaaoga e credit card ka taute e fakatau, neke nakai talia.

“Ka kua lagomatai he Kupu he Atua mo e agaaga haana a maua ke taute e tau fifiliaga mitaki. Ne fakaako au ke talia e tau gahua kehekehe mo e fakatote hifo e fakatau fakahanoa he tau koloa. Ha ko maua ko e Tau Fakamoli a Iehova, ne lagomatai mai foki he tau matakainaga talitonu. Kua lalago e lautolu a maua ke mauokafua mo e lagomatai mai he tau magaaho uka lahi.”

“Magaaho ne amanaki ni e taane haaku ti tiaki au, ne mamahi e loto haaku mo e ita,” he talahau e Raquel. “Ti momoko lahi mahaki au. Ka e fakatata au ke he Atua ti fakamafana e ia au. Ne puipui he mafola he Atua e loto haaku he liogi au ki a ia he tau aho takitaha. Tuga kua liu a ia atihake e loto malipilipi haaku.

“Ti fakaaue foki ke he haana Kupu, ko e Tohi Tapu, ati kautū au mai he ita mo e fakafualoto. Ne manatu e au e tau kupu he aposetolo ko Paulo ia Roma 12:21: ‘Aua neke mahala a koe ke he kelea, ka kia mahala e kelea ke he mitaki.’

“Taha e kapitiga mitaki haaku ne lagomatai au ke kitia kua lata ke hiki mo e ono ki mua. Ne fakakite mai e ia e Fakamatalaaga 3:6 mo e talamai fakatotonu ki a au na hoko e ‘vaha ke fakagalo ai.’ Ko e fakatonuaga mamahi, ka ko e mena ia kua latatonu mo au. Kua fakafoou e tau foliaga he moui haaku mogonei.”

“Ka mavehevehe e fakamauaga haau, kua lata a koe ke moua e lalagoaga,” he talahau e Elizabeth. “Taha e kapitiga fakahele haaku ne foaki mai e lalagoaga ia he tau aho takitaha. Ne tagi a ia mo au, fakamafana ki a au, ti logona e au e fakaalofa ka e nakai fakavihia. Kua talitonu au ko Iehova ne fakaaoga a ia ke fakamaulu e loto haaku ne mamahi.”

Ko Luis ne totoku he valatala fakamua, ne lolelole e ate, ti lagaua e teitei a ia ke mate. He mogonei ne fakaaoga e ia e okesitene ke he 16 e tulā he aho. “Liogi tumau au ki a Iehova,” he talahau e ia. “Ti ka oti e liogi ke he Atua, ne logona e au e malolō ha ko e agaaga haana. Ko e liogi ne omoomoi au ke fakatumau he tua ki a ia mo e iloa to leveki e ia au.”

“Kua loga lahi e gahua haaku ne manako ke taute, ka kua nakai maeke,” he fakamaama e Petra ne 80 tumā e tau tau moui. “Ko e mena uka he mailoga kua lolelole fakahaga au. Ne lolelole e tino haaku mo e falanaki ke he tau vai ekekafo. Ti manamanatu tumau au ke he puhala ne ole a Iesu ke he haana a Matua ke utakehe e matematekelea, ka maeke. Ka e fakamafana e Iehova a Iesu ti fakamafana e ia au. Ko e liogi e vailakau haaku he tau aho oti. Ne logona e au e malolō ka oti e liogi ke he Atua.”​—Mataio 26:39.

 Ko Julian, ne matematekelea he multiple sclerosis ke he teitei 30 e tau, ne pihia foki e logonaaga. “Hiki mai au he nofoa he takitaki gahua ke he nofoa fakataveli,” he talahau e ia. “Ka kua aoga e moui haaku he foaki ke lagomatai e falu. Ko e aga foaki kua maeke ke fakatote hifo e mamahi, ti fakamooli a Iehova ke he poakiaga haana ke fakamalolō a tautolu ka lolelole. Tuga e aposetolo ko Paulo, kua maeke mooli au ke pehē: ‘Kua maeke ia au e tau mena oti kana ke he fakamalolo’ mai he Atua.”​—Filipi 4:13.

“Magaaho ne mate e matua taane haaku he pakia he motoka, ne nakai talitonu e au he magaaho fakamua,” he talahau e Antonio. “Ai hako he pihia​—ko e tagata fano hui noa ni a ia. Ka kua nakai maeke au ke taute ha mena. Ne nakai ala mo e lutu (coma) a ia ke he lima e aho ato mate a ia. Ne nakai tagi au i mua he matua fifine haaku ka e tagi lahi ka nofo tokotaha. ‘Ko e ha? Ko e ha?’ he hūhū tumau e au ki a au ni.

“He tau aho matematekelea ia, ne ole tumau au ki a Iehova ke lagomatai ke fakatotoka e tau logonaaga haaku mo e foaki mai e mafola. Ti mitaki fakahaga e loto haaku. Manatu e au na fakamaama mai he Tohi Tapu ko e ‘tau mena ke tutupu’ to hoko ia ki a tautolu oti. Ha ko e mena nakai pikopiko e Atua, ti talitonu mooli au to liu kitia e matua taane haaku ka liu tumai.”​—Fakamatalaaga 9:11; Ioane 11:25; Tito 1:2.

Ko Robert ne totoku he vala tala he kamataaga, ne pihia foki e tau manatu. Pehē a ia: “Ne logona e au mo e hoana haaku e tau loto mafola tuga ne talahau ia Filipi 4:6, 7. Ne moua mai e maua he tau liogi ki a Iehova. Ko e tau loto mafola ati maeke a maua ke tutala ke he tau tagata tohitala hagaao ke he amaamanakiaga he liu tumai. Pete kua mate e tama taane ha maua he tō e vakalele, ne manatu agaia e maua e tau magaaho fiafia he fakalataha mo ia. Ti lali a maua ke manamanatu ke he tau mena ia.

“Ne talamai e tau matakainaga Fakamoli, ne kitia e lautolu he televisoni a maua ne fakatotoka he fakamaama e tua ha maua. Ti talaage e maua e fakaaue ke he tau liogi loga ne talahau e lautolu ke lata mo maua. Kua talitonu mooli au ko Iehova ne lalago a maua ha ko e tau manatu mafanatia loga ha lautolu ki a maua.”

Tuga ne fakakite mai he tau fakafifitakiaga nei, maeke a Iehova ke fakamafanatia e tau tagata ka fehagai mo e tau lekua mo e tau paleko kehekehe. Ka e kua a koe? Ko e heigoa ni e lekua he moui haau, to fai fakamafanaaga ke lagomatai a koe ke fahia he tau magaaho uka. * Ko e ha mogoia kua lata ke fuluhi ki a Iehova ke moua e lagomatai? Ha ko ia ko e “Atua [he] tau fakamafanaaga oti.”​—2 Korinito 1:3.