Seth * naagira ati: “Nyowe n’omukazi wangye tukafeerwa emirimo yaitu omu bwire bumwe. Kumara emyaka ebiri tukaba nitubaho ahabw’ebiconco by’esente ebi eka yaitu yaabaire neetunga n’oburimo bwa riijariija. N’ekyarugiremu, omukazi wangye Priscilla, akagira amaganya naanye naayehurira nk’otaine mugasho.

“Tukagumisiriza tuta? Priscilla akaguma naayeyijutsya ebigambo bya Yesu ebiri omu Matayo 6:34. Yesu akagira ngu titushemereire kwerarikirira aha bya nyenkyakare, obu buri izooba riine amaganya gaaryo. Kandi okushaba kwe okurikuruga aha mutima kukamuhwera kugumizamu. Nyowe ebiri omu Zaaburi 55:22 nibyo byampaire amaani. Nk’omuhandiiki wa Zaaburi, oburemeezi bwangye nkabwegyekyera Yehova, kandi nkareeba arikumpwera. N’obu ndaabe nyine omurimo hati, nituteeraho kumarwa n’ebi twine kuhikaana n’obuhabuzi bwa Yesu oburi omuri Matayo 6:20-22. Okukira munonga tubaasize kwirirana haihi kandi twirira haihi Ruhanga.”

Nikwo Jonathan yaagizire: “Nkaba ninyerarikirira aha biro byaitu eby’omumaisho obu akarimo k’eka yaitu kaagwa. Ahabw’embeera egumire erikukwata aha sente, emyaka 20 ey’okukora n’amaani ekahinduka busha. Nyowe n’omukazi wangye tukatandika kutonganira esente. Tukaba tutarikubaasa kugura ebintu turikukoresa credit card, ahakuba tukaba nitutiina ngu nibaza kugyanga.

“Kwonka Ekigambo kya Ruhanga kikatuhwera kucwamu gye. Nkeega kukora buri murimo, kandi tukatuubya aha nshohoza etarikwetengyesa. Kandi ahabw’okugira ngu turi Abajurizi ba Yehova, tukatunga n’obushagiki kuruga aha baheereza ba Ruhanga bagyenzi baitu. Bakatugumya twayeyongyera kweyikiririzamu kandi baatuhwera omu bwire obu embeera zaabaire zigumire munonga.”

Raquel naagira ati: “Ibanyi ku yaantsigireho, nkagira obusaasi n’ekiniga. Kandi amaganya gakaanshweka. Kwonka nkairira haihi na Ruhanga, kandi akampwera. Obusingye bwa Ruhanga bukarinda omutima gwangye ku naatandikire kumushaba buri izooba. Okaba nooshusha oti akanikire omutima gwangye ogucwekire.

“Ninsiima Ekigambo kye Baibuli, ekyambaasiise kusingura ekiniga n’enziika. Nkagyendera aha bigambo by’entumwa Paulo ebiri omu Abarooma 12:21 ebi: ‘Otasingurwa ekibi, kureka ekibi okisinguze ekirungi.’

“Munywani wangye omunyabwengye akampwera kureeba ngu nyine kugumizamu. Akanyoreka Omubuurizi 3:6 omu muringo gw’embabazi yaangira ngu obumwe nituba twine ‘kwebwa ebi twafeereirwe.’ Obuhabuzi obwo bukaba bugumire, kwonka nibwo naabaire ninyetenga. Hati nyine ebigyendererwa bisya.”

Elizabeth naagira ati: “Obushwere bwawe bwashenyuka, nooba nooyetenga obushagiki. Nkaba nyine munywani wangye owaabaire naampa obushagiki, buri izooba. Akaba arira naanye, ampumuriza, andeetera kwehurira ndikukundwa omu mwanya gw’okwangwa. Nimpamya ngu Yehova akamukoresa kukiza ebironda byangye eby’omu mutima.”

Luis, owaaba yaagambirweho omu kicweka eky’okubanza aine endwara y’amaani ey’omutima, kandi emirundi ebiri akaba ari haihi kufa. Hati naaba aine kwikiza aha byoma eshaaha 16 buri izooba. Naagira ati:  “Ninshaba Yehova obutoosha. Kandi bwanyima y’okushaba Ruhanga, nimpurira omwoyo gwe gurikwera gwampa amaani. Okushaba nikumpa obumanzi bw’okugumizamu ahabw’okugira ngu nimwikiririzamu kandi nnimanya ngu naanfaho.”

Petra oine emyaka nka 80 naashoboorora ati: “Nimba niinyenda kukora ebintu bingi, kwonka tindikubaasa. Okureeba amaani gangye nigatuuba kigumire munonga. Nimba nimpurira ntaine maani nimba nyine kuguma aha mibazi. Ninkira kuteekateeka aha ku Yesu yaashabire Ishe ngu kyaba nikibaasika amwihireho oburemeezi.” Kwonka Yehova akaha Yesu amaani, kandi naanye naampa amaani. Okushaba nigwo mubazi gwangye ogwa buri izooba. Nimpurira naaba gye naaheza kugamba na Ruhanga.”​—Matayo 26:39.

Julian, otwire aine endwara ya multiple sclerosis kumara emyaka 30, nawe naayehurira atyo. Naagira ngu entebe ye ey’ebeeyi akagihaanisamu akagaari k’abamuga. “Kwonka ekyo tikiine nshonga ahakuba nyehaireyo kuheereza abandi. Okuha abandi nikibaasa kutuubya aha kubonabona, kandi Yehova naahikiiriza okuraganisa kwe kutugumya omu bwire bw’oburemeezi. Nk’entumwa Paulo, buzima nimbaasa kugira nti: ‘Nimbaasa kukora byona omuri’” ogwo ompa amaani.​—Abafilipi 4:13.

Antonio naijuka ati: “Obu tata yaafeera omuri butandu, tindabandize kukiikiriza. Kikaba nikireebeka nk’ekitari ky’oburingaaniza ahakuba bakamutomera arikugyendesa ebigyere ataine rubanja. Kwonka hakaba hatariho ky’okukora. Akamara ebiro bitaano ataine eki arikumanya okuhitsya obu yaafa. Nkaba nyezibira kuririra omu maisho ga maawe, kwonka nkaba mbaruka ndirira naaba ndi nyenka. Nkaguma ninyebuuza nti: ‘Ahabw’enki? Ahabw’enki?’

“Omu biro ebyo eby’akabi kaingi, nkaguma ninshaba Yehova kumpwera kurinda enyehurira zangye n’okumpa obusingye. Kandi mporampora nkarugaho naikaikana. Nkaijuka ngu Baibuli neeshoboorora ngu ebihikiirizi nibibaasa kuhika ahari buri omwe ahariitwe. Obu Ruhanga atarikubaasa kubeiha, nyine obuhame ngu ninyija kureeba tata ku araazookye.”​—Omubuurizi 9:11; Yohaana 11:25; Tito 1:2.

Robert, orikugambwaho omu kicweka eky’okubanza akaba aine ebiteekateeko nk’ebyo. Naagira ati: “Nyowe n’omukazi wangye, Maribel, tukatunga obusingye oburikugambwaho omu Abafilipi 4:6, 7. Eki kikabaho kurabira omu kushaba Yehova. Obusingye obu bukatubaasisa kugambira ab’amakuru aha matsiko g’okuzooka. N’obu butandu y’enyonyi eraabe yaitsire mutabani waitu, nitwijuka ebirungi bingi ebi twabaire tukora hamwe nawe. Nituteeraho kwijuka ebirungi ebyo.

“Abajurizi ba Yehova bagyenzi baitu ku baatugambiire ngu batureebire aha tiivi turikushoboorora ebi turikwikiriza, tukabagira ngu nitubasiima munonga ahabw’okutushabira. Nimpamiza kimwe ngu Yehova akaba naatushagika arikukoresa obutumwa bwabo bwingi oburikuhuumuriza.”

Nk’oku eby’okureeberaho ebi twareeba birikworeka, Ruhanga naabaasa kuhuumuriza abantu abaine oburemeezi butari bumwe na bumwe n’embeera zigumire. Kandi shi iwe? N’obu waakuba oine enaku erikwingana ki, noobaasa kutunga okuhuumurizibwa okuraakuhwere kuraba omu mbeera zigumire. * Ahabw’enki otarikushaba Yehova kukuha obuhwezi? Ni “Ruhanga ow’okuhuumuza kwona.”​—2 Abakorinso 1:3.