Seth * ka kɛ, “Me nee me ye gyima vile yɛ sa mekɛ ko ne ala.” Yɛ mbusuafoɔ boale yɛ wɔ ezukoa afoa nu too ɛvolɛ nwiɔ yɛɛ yɛlile ɛkpa ngyikyi. Ɛhye ati, me ye, Priscilla arɛle bɔle na mendele nganeɛ kɛ mevɛ mgbane.

“Kɛzi yɛgyinlanle ɔ nloa ɛ? Dahuu Priscilla kakye Gyisɛse edwɛkɛ ne mɔɔ wɔ Mateyu 6:34 la. Ɔse yɛmmadwenle ɛhyema anwo, ɔluakɛ ɛhyema ɔdaye ɔ nee ye adwenleadwenle ɛdeɛ lua. Ye asɔneyɛlɛ mɔɔ vi ahonle nu la maanle ye anwosesebɛ maanle ɔgyinlanle ɔ nloa. Edwɛndolɛ 55:22 noko kyekyele me rɛle. Kɛ mɔɔ edwɛndolɛnli ne yɛle la, menvale me adesoa ne memaanle Gyihova, na menwunle kɛ ɔzɔle me nu. Kɛkala menyia gyima ɛdeɛ, noko yɛtete ninyɛne zo kɛ mɔɔ Gyisɛse folɛdulɛ mɔɔ wɔ Mateyu 6:20-22 kile la. Mɔɔ tɛla biala la, yɛbikye Nyamenle nee yɛ nwo kpalɛ.”

Jonathan se, “Mɔɔ yɛ abusua gyima ekyi ne zɛkyele la, ɔmaanle menzulole mɔɔ bado yɛ kenle bie la. Ɔlua maanle ne ezukoa gyinlabelɛ mɔɔ zɛkyele la ati, ɛvolɛ 20 mɔɔ menvale menyɛle gyima ɛsesebɛ la amuala yɛle mgbane. Me nee me ye lile ezukoa nwo butule. Ɛnee yɛngola yɛanva credit card yɛndɔ debie, ɔluakɛ kɔmpɛlɛ ne ɛnrɛlie ɛnrɛdo nu.

“Noko Nyamenle Edwɛkɛ ne nee ye sunsum ne boale yɛ maanle yɛzile kpɔkɛ kpalɛ. Menyɛle gyima biala mɔɔ me sa kɛzɔ nu la, na yɛambɔ ninyɛne mɔɔ anwo ɛngyia la anwo kakɛ. Kɛ Gyihova Alasevolɛ la, eza yɛnyianle moalɛ yɛvile yɛ gɔnwo mɔ diedima ɛkɛ. Bɛlile yɛ eni na bɛboale yɛ wɔ mekɛ mɔɔ ninyɛne nu kɛyɛ se kpalɛ la.”

Raquel se, “Mɔɔ me hu gyakyile me arɛlevilɛ nu la, menlile nyane na menvale ɛya. Alɔbɔlɛ hunle me kpole. Noko membikyele Nyamenle, na ɔkyekyele me rɛle. Saa meyɛ asɔne dahuu a, Nyamenle anzodwolɛ ne bɔ me ahonle ne anwo bane. Ɛhye maanle me nye liele bieko.

“Ɔlua ye Edwɛkɛ, Baebolo ne ati, menlile ɛyavalɛ zo konim. Ɛzoanvolɛ Pɔɔlo edwɛkɛ mɔɔ wɔ Wulomuma 12:21 hanle me ahonle: ‘Bɛmmamaa ɛtane fo bɛ nwo zo; bɛva kpalɛyɛlɛ bɛli ɛtane nwo zo konim.’

“Agɔnwolɛ kpalɛ bie boale me maanle menyianle anwosesebɛ. Ɔhilele me Nolobɔvo ne 3:6 na ɔzele me kɛ ɔdwu mekɛ ne bie a ‘yɛminli debie.’ Ɛnee ɔle folɛdulɛ mɔɔ anu yɛ se, noko yemɔ a ɛnee mehyia nwo a. Kɛkala meva bodane fofolɛ mezie me nyunlu.”

Elizabeth ka kɛ, “Saa wɔ agyalɛ sɛkye a, ɛhyia moalɛ. Melɛ me gɔnwo kpalɛ bie mɔɔ boale me alehyenlɛ biala a. Ɔ nee me zunle, ɔkyekyele me rɛle na ɔmaanle mendele nganeɛ kɛ ɔkulo me na ɔtɛkpole me. Melɛ anwodozo kɛ Gyihova luale ɔ nwo zo kyekyele me rɛle.”

Luis, mɔɔ yɛhanle ɔ nwo edwɛkɛ la ɛnee lɛ ahonle ewule, na fane nwiɔ azo ɔhale kyɛkyɛ na yeawu. Kɛkala bɛmaa ye anwoma (oxygen) dɔnehwele 16 kenle ko biala. Ɔse, “Mesɛlɛ Gyihova dahuu. Saa mesɛlɛ Nyamenle mewie a, mete nganeɛ kɛ ye sunsum ne ɛlɛmaa me anwosesebɛ. Asɔneyɛlɛ maa menyia akɛnrasesebɛ metɛnla aze ɔluakɛ melɛ diedi wɔ ye nu na meze kɛ ɔdwenle me nwo.”

Petra mɔɔ wɔ ye ɛvolɛ 80 ne anu la se, “Mekulo kɛ meyɛ ninyɛne dɔɔnwo, noko mengola. Me anwosesebɛ mɔɔ ɛlɛwie la maa meyɛ bɛtɛɛ. Ɛnee mete nganeɛ kɛ mevɛ na ɔwɔ kɛ meno ayile dahuu. Ɔyɛ a medwenle adenle mɔɔ Gyisɛse zɛlɛle ye Papa kɛ saa ɔkɛyɛ boɛ a ɔmaa amaneɛnwunlɛ bie ɛkpa ɔ ti la anwo. Noko Gyihova maanle Gyisɛse anwosesebɛ, na ɔmaa medame noko anwosesebɛ. Asɔneyɛlɛ a le me ayile a. Saa me nee Nyamenle tendɛ wie a, me nye die kpole.”​—Mateyu 26:39.

 Zɔhane ala a Julian mɔɔ nyianle ewule anwo ɛzulolɛ bie mɔɔ ɔmaa bɛ avinli kpo na ɔka bɛ nye nee bɛ ɛdendɛlɛ la kɛyɛ ɛvolɛ 30 la dele nganeɛ a. Ɔse, “Mengyakyile me ebia kpalɛ ne anu ɛdɛnlanlɛ na mendɛnlanle abuburama ebia nu. Noko nvasoɛ wɔ me ɛbɛlabɔlɛ zo ɔluakɛ metu me nwo memaa mesonle awie mɔ. Yɛkyɛ debie a ɔte yɛ ngyegyelɛ zo, yɛɛ Gyihova di ye ɛwɔkɛ mɔɔ yebɔ kɛ ɔbamaa yɛ anwosesebɛ la azo. Kɛ mɔɔ ɛzoanvolɛ Pɔɔlo yɛle la, mekola meka kɛ: ‘Ɔlua anwosesebɛ ne mɔɔ Kelaese fa maa me la ati, mekola megyinla ninyɛne muala anloa.’”​—Felepaema 4:13.

Antonio ka kɛ, “Mɔɔ kale bɔle me papa maanle ɔwule la, mɔlebɛbo ne, ɛnee menlie menli. Ɔyɛ alɔbɔlɛ, ɔluakɛ ɛnee ɔnlua kale adenle ne anu. Noko mengola menyɛ nwolɛ ɛhwee. Yeangola tendɛ too kenle nnu kolaa na yeawu. Saa mewɔ me mame anwo ɛkɛ a menzu, noko saa me ngomekye mede a ɛnee melɛsu. Membizale me nwo kɛ, ‘Duzu ati ɔ?’

“Wɔ mekɛ ɛtane ɛhye anu, mengɔle zo menzɛlɛle Gyihova kɛ ɔboa me ɔmaa menzɔ me nwo na ɔmaa me anzodwolɛ. Ngyikyingyikyi, me ahonle dɔle me azule nu. Mengakyele kɛ Baebolo ne se ‘esiane mɔɔ yɛ nye ɛnla’ la kola to yɛ nuhua biala. Kɛmɔ Nyamenle ɛmbɔ adalɛ la ati, medie medi kɛ mebanwu me papa bieko wɔ ewudwazo ne anu.”​—Nolobɔvo ne 9:11; Dwɔn 11:25; Taetɛse 1:2.

Robert, mɔɔ yɛhanle ɔ nwo edwɛkɛ la noko nyianle adwenle ko ne ala bie. Ɔse: “Me nee me ye nyianle anzodwolɛ ne mɔɔ Felepaema 4:6, 7 hanle nwolɛ edwɛkɛ la. Yɛluale Gyihova mɔɔ yɛzɛlɛle ye la azo a yɛnyianle a. Anzodwolɛ ɛhye maanle yɛholale yɛhanle yɛ ewudwazo anyelazo ne anwo edwɛkɛ yɛhilele adwelie kɛlɛvoma. Anwumalɛne nu esiane ne maanle yɛ ra nrenyia ne wule ɛdeɛ, noko yɛkakye mekɛ mɔɔ ɛnee yɛbɔ nu yɛdie yɛ nye la. Yɛbɔ mɔdenle kɛ yɛbadwenle yemɔ anwo.

“Mɔɔ yɛ gɔnwo mɔ Dasevolɛma zele yɛ kɛ bɛnwu kɛ yɛlɛkilehile yɛ diedi ne anu wɔ tɛlevihyɛn ne azo la, yɛzele bɛ kɛ bɛ asɔneyɛlɛ dɔɔnwo ne a boale yɛ a. Medie medi bɔkɔɔ kɛ ɛnee Gyihova ɛlɛboa yɛ ɔlua bɛ arɛlekyekyelɛ edwɛkɛ dɔɔnwo mɔɔ yɛdele la ati.”

Kɛ mɔɔ neazo ɛhye mɔ kile la, Nyamenle kola kyekye bɛdabɛ mɔɔ bɛlɛyia ngyegyelɛ ngakyile la arɛle. Na ɛdawɔ noko ɛ? Ɔnva nwo ngyegyelɛ biala mɔɔ ɛbayia ye la, bɛbakyekye ɛ rɛle amaa wɔagyinla ɔ nloa. * Duzu ati a ɛnzɛlɛ Gyihova moalɛ a? Ɔle “arɛlekyekyelɛ Nyamenle.”​—2 Kɔlentema 1:3.