“Bansag kami nen asawak ya nakal ed trabaho,” kuan nen Seth. * “Duay taon ya akadepende kami labat ed iderew na kakanayon mi tan aawaten mi anggan anto la ditan ya trabaho. Lapud satan, a-depress so asawak ya si Priscilla, tan pakaliknak et anggapo lay kanak.

“Panon min inarap itan? Lanang ya ipapanonot nen Priscilla ed sarili to imay imbaga nen Jesus ed Mateo 6:34 ya agtayo nepeg ya mapagpaga ed ontumbok ya agew, ta kada agew et wala ni ray kapagaan to. Say impapuson panagpikasi to so amabiskeg met ed liknaan to. Siak balet, tinmulong ed siak so Salmo 55:22. Singa samay salmista, impasakbat koy ambelat ya awit ko ed si Jehova, tan talagan tinulongan to ak. Anggano wala lay trabahok natan, uunoren mi so bilin nen Jesus diad Mateo 6:20-22 kanian pansiasiansiaen min simpli so bilay mi. Lapud saray dinalan mi, mas inmapit kamid Dios tan ed sakey tan sakey.”

“Nen alugi so melag ya negosyo mi, mapagpaga ak no anto lay pansumpalan na pamilyak,” kuan nen Jonathan. “Lapud binmagsak so ekonomya, baliwala so 20 taon ya impansagpot mi. Manlapud saman et lanang mi lan pankokolkolan nen asawak so kuarta. Agmi la anggan nausar ya pansaliw so credit card mi ta agkami la makakabayar.

“Balet tinulongan kami na Salita na Dios tan say espiritu to pian makapandesisyon na duga. Agak la mapili na trabaho, tan agkami manggagastos no agmet kaukolan. Tan lapud Tasi nen Jehova kami, pinabiskeg kami na saray kaagian mi. Impalikna dan walay kana mi tan tinulongan da kami nen mair-irap so situasyon mi.”

“Nen biglan tinaynan ak nen asawak, asakisakitan ak tan agaylay syodot ko,” kuan nen Raquel. “Maer-ermen ak. Balet inmasingger ak ed Dios, tan tinulongan to ak. Lapud inagew-agew ak ya manpipikasi, say deen na Dios so namprotekta ed pusok. Aliknak ya tinambal toy asugatan ya pusok.

“Diad tulong na Salita to, say Biblia, nakal so naliliknak ya sanok tan sakit na linawa. Impapusok so imbaga nen apostol Pablo diad Roma 12:21 ya, ‘Agka padadaeg ed mauges, noagta itultuloy mon daegen so mauges diad panamegley na maong.’

“Walay kaarok ya tinulongan to ak ya maka-move on. Impabasa tod siak so Eclesiastes 3:6 tan imbaga to ya walay panaon ya kaukolan tayo lan ‘awaten ya abalangan’ itayo. Mairap ya gawaen itan, balet atan so kaukolan kon gawaen. Natan et wala la ray planok ed bilay.”

“No insian ka na asawam, kaukolan moy tulong,” kuan nen Elizabeth. “Walay malet a kaarok ya wadtan ya lanang ed abay ko. Onakis met no onakis ak, papabiskegen to ak, tan ipapalikna ton walay mangaaro ed siak. Antak ya sikatoy inusar nen Jehova pian paabigen so asakitan ya liknaan ko.”

Si Luis ya abitlad unonan artikulo et walay graben sakit tod puso, tan amidua la ya inatey lawari. Natan et kaukolan ya aka-oxygen na 16 oras kada agew. “Naynay ak ya manpipikasi ed si Jehova,” kuan to. “Tan kayarik ya manpikasi ed Dios, naliknak ya papabiskegen ak na espiritu to. Say pikakasi so mangiiter ed siak na biskeg a manbilay, ta walay pananisiak ed sikato tan antak ya iyaansakit to ak.”

“Amayamay so labay kon gawaen, balet agko la sarag,” kuan nen Petra, ya 80 lay taon to. “Makapaermen so ikakapuy na laman ko. Anggapoy kasil ko tan akadepende ak lad tambal. Mabetbet kon nanonotan may kinerew nen Jesus ed Ama to ya no nayari et agla komon manirap. Balet pinabiskeg nen Jehova si Jesus tan papabiskegen to ak met. Say pikakasi so tambal ko kada agew. Onlelemew so liknaan ko kayarik ya mitongtong ed Dios.”—Mateo 26:39.

 Ontan met so nalilikna nen Julian ya ngalngali 30 taon lan manaanos ed sakit ton multiple sclerosis. “Dati et pan-opisina so yurongan ko, natan wheelchair la,” kuan to. “Balet maliket so bilay ko ta uusaren kon panlingkor ed arum. Say itulong ed arum et makabawas na paniirap, tan talagan totooren nen Jehova so promisa to ya iter toy biskeg ya kakkaukolan tayo. Singa si apostol Pablo, nibagak met ya: ‘Walay biskeg kon arapen so amin a bengatla lapud samay mangiiter ed siak na pakayari.’”—Filipos 4:13.

“Nen atalapos si tatay ko, agak makapanisia nen unaan,” so nanonotan nen Antonio. “Singa agko naawat so agawa—ombebeltang labat irad karsada. Balet anggapoy nagawaan ko. Limaran agew iran a-comatose antis ya inatey. No wadtay nanay ko, pipigilan koy onakis, balet no bukbukor ko la, iyaki-akis ko. ‘Akin et oniay agawa?’ so paulit-ulit kon itetepet ed sarilik.

“Diad saman ya mair-irap ya dinalan mi, lanang kon ipipikasid si Jehova ya tulongan to ak ya kontroley liknaan ko tan ikdan to ak na deen. Kanian kalkalnan dinmeen so liknaan ko. Anonotan ko may imbaga na Biblia ya ‘saray ag-iilaloan a nagawa’ et onsabi ed anggan siopad sikatayo. Agnayarian na Dios so mantila kanian segurado ak ya nanengneng ko lamet si tatay ko sano bilayen lamet na Dios.”—Eclesiastes 9:11; Juan 11:25; Tito 1:2.

Ontan met so sankanonot nen Robert ya abitlad akaunan artikulo. Say kuan to: “Alikna mi nen asawak so deen na nonot ya ibabaga na Filipos 4:6, 7. Alikna mi itan lapud pampipikasi mid si Jehova. Lapud satan, ayarian min itongtong ed saray news reporter so ilalo min nabilay lamet iray inaatey. Anggano naandi anak mi lapud aksidente ed eroplano, dakel nin siansia iray maliket ya pakanodnonotan mi ed sikato. Aratan la so nononoten mi.

“Nen imbaga na saray kapara min Tasi ya anengneng dad TV ya kalmado min ipapaliwawa so pananisia mi, imbaga mid sikara ya agawaan mi iman lapud dakel so mangipipikasi ed sikami. Amtak ya tinulongan kami nen Jehova diad panamegley na amayamay ya makapabiskeg ya mensahen naawat mi.”

Singa nanengneng ed saratan ya alimbawa, sarag na Dios ya tulongan iray totoon ondadalan ed nanduruman problema tan subok. Sika ey? Antokaman so probleman dadalanen mo, walay naromog mon tulong pian nasarag moy mair-irap ya situasyon. * Maabig sirin no onkerew kay tulong ed si Jehova. Sikato so “Dios na amin a ligliwa.”—2 Corinto 1:3.