Sergio * shuti runaguca ninmi: “Ñucapash, ñuca huarmigupash chai punllacunapillatami trabajo illaj quedarcanchi. Ishcai huatatami familia ayudajpi o imagupipash trabajashpa pararcanchi. Shina causajuimandami ñuca huarmigu Priscilaca depresión ungüipi urmarca. Chaimandami ñucapash llaquilla sintirircani” nishpa.

”Ishcandillata trabajo illaj cashca punllacunapica cutin cutinmi Priscilaca Mateo 6:34​pi Jesuspa shimicunata yarin carca. Chaipica nijunmi, caya punlla ima tucunamandaca na yapata preocuparinachu canguichi. Punllandi punllandimi llaquicunaca tian nishpa. Tucui shunguhuan Taita Diosta mañaimandami Priscilaca ñaupaman cati usharca. Cutin ñucaca Salmo 55:22​pi shimicunatami yarin carcani. Chaimandami Salmos librota escribij runagushna sintirishpa ñucapa llaquicunataca Jehovapa maquipi saquircani. Paipa maquipi saquijpimi Jehová Diosca ayudahuarca. Cunanbica ñami shuj trabajoguta charini. Shinapash Mateo 6:20-22​pi Jesús yachachishca shinaca, minishtirishcahuanlla causangapami esforzarinchi. Ashtahuangarin, Jehovamanmi ashtahuan quimirishcanchi, ñucanchipash ashtahuan alimi causanchi” nin.

Jonathanga ninmi: “Ñucanchi llactapi culquimanda problema tiajpimi ñuca negocioca tucurirca. 20 huatacunata shinllita trabajashpami chai negociotaca charircanchi. Chaimandami imatashi cunanga rurashun yashpa manllarircani. Ñuca huarmihuanga culquimandami fiñarin carcanchi. Banco tarjetahuan randinalla cashpapash tarjetata na chasquinatami manllan carcanchi.

”Shinapash Bibliapi consejocuna, Taita Diospa espíritu santomi ñucanchitaca ali decisiongunata agllachun ayudarca. Shinallata, imapash trabajogutami yachajurcani. Ashtahuangarin minishtirishca cosascunatalla randinatami yachajurcanchi. Testigo de Jehovacuna cashcamandacarin, ñucanchi huauquipanicunami chai llaqui punllacunapi ali sintirichun, imagupipash ayudarca”.

Raquelca ninmi: “Ñuca cusa cungashcapi saquishpa rijpica ninanda culirashpami llaquilla sintirircani. Shungu ucucaman ninanda llaquirishpapash Jehovamanmi quimirircani. Paimi ñucataca cushichihuarca. Cada punlla paita mañajpimi ñuca shungupi tranquilo sintirichun ayudahuarca. Chugrishcata jambijpishnami sintiricani.

”Bibliami ñucataca ama risintirishcalla, ama culirashcalla causachun ayudahuarca. Romanos 12:21​pi shimicunataca yariami carcani. Chaipica ninmi, nalita rurana munai ‘mishachunga na saquinachu cangui. Ashtahuangarin alita rurashpami chai nalitaca mishana cangui’ nishpa.

”Shuj ali cumbami ñucataca ña cunganami cangui nishpa ayudahuarca. Ashtahuangarin, Eclesiastés 3:6​ta ricuchishpami aliman nirca, ña ‘chingachishcata’ cuenta japina tiempopash tianmi nishpa. Chai consejota chasquinaca shinllimi carca. Shinapash, chai consejoca alipachami carca. Cunanbica shuj cosascunata rurashpa pactachinatami pensarini.

Elizabethca ninmi: “Cusa saquishpa rijpica pipash llaquishpa ayudachunmi minishtinchi. Chai llaqui punllacunapica shuj amigami punllan punllan ayudahuarca. Paimi ñucahuan igual huacashpa, cushichishpa ciertopacha llaquishcata ricuchihuarca. Chai ali amigata cachamushpa Jehová Dios ñucata ayudashcataca crinipachami”.

Callari temapi parlashca Luisca shungu ungüita charimandami ishcai viajeta casi huañurca. Paica na respirai ushanllu. Chaimandami Luisca cada punlla 16 horasta shuj maquinaman conectarishpa respirana can. Paica ninmi: “Cutin cutinmi Jehová Diosta mañani. Mañashca jipaca paipa espíritu santo tranquilo sintirichun ayudajtami sintini. Jehová Diosta mañashpami ñaupaman cati  ushashcani. Jehová Dios ñucamanda preocuparijtaca crinimi” nishpa.

Petraca ñami 80 huata yalita charin. Paica ninmi: Ashtaca cosascunata rurangapami munani, shinapash na ushanichu. Cada punllami ashtahuan ashtahuan imatapash na rurai ushani. Shaijushcami sintirini, pastillacunata ufiajunallami cani. Tauca viajemi Jesús paipa Taitaman ima nishcata yarini. Paica ninmi: ‘Ñuca Taitalla cai copata yalichinalla cajpica yalichipai’ nishpa. Shinapash Jehová Diosca Jesuspa llaquitaca na chingachircachu. Chaipa randica llaquita aguantachunmi Jehová Diosca ayudarca. Ñucatapash shinallatami Jehová Diosca ayudahuan. Cada punlla Jehová Dioshuan parlashpami ali sintirini” nishpa (Mateo 26:39).

Julianga 30 huatacunatami ashtahuan ashtahuan ungushpa puritapash ñana ushan. Paica ninmi: “Oficinapi trabajajushpaca shuj jatun ali sillapimi tiajurcani. Cunanbica silla de ruedasmi parani. Shinapash cunanbimi ashtahuan cushilla sintirini. Shujcunata ayudashpami na ñucapilla pensarini. Ashtahuangarin, llaquicunapi cajpica ciertopachami Jehová Diosca ayudan cashca. Apóstol Pabloshnami ñucapash sintirini. Paica nircami, Taita Dios ‘ushaita carajpimi tucuita rurai ushani’ nishpa (Filipenses 4:13).

Antonioca ninmi: “Ñuca taitata shuj carro huactashcata yachashpaca na cri usharcanichu. Pensarircanimi, imamandata carroca yangata huactashpa yalirca nishpa. Shinapash na imatapash rurai usharcanichu. 5 punllacunata huañushcashna sirijushca jipami ñuca taitaca huañurca. Ñuca mamata cumbashpa purijushpaca ñuca mama ama ricuchunmi ama huacangapaj esforzarin carcani. Shinapash ñucalla cashpaca caparishpami huacan carcani. Cutin cutinmi tapurin carcani: “Imamandata huañurca” nishpa.

”Chai llaqui punllacunapica Jehová Diostami cutin cutin mañarcani, tranquilo sintiringapaj ayudahuangui nishpa. Asha ashami tranquilolla sintirircani. Bibliapi cai shimicunatapashmi yarircani: ‘Ima punlla ima tucunataca’ pipash na yachanchichu. Shinallata, Jehová Diosca na llullanllu. Chaimandami ñuca taitata Jehová Dios causachijpi cutin ricunataca tucui shunguhuan crini” nirca (Eclesiastés 9:12; Juan 11:25; Tito 1:2).

Callari temapi parlashca Robertpash ninmi: “Ñuca huarmihuan Jehová Diosta mañanajushpaca Filipenses 4:6, 7​pi nishca shinami tranquilo sintirin carcanchi. Shungupi tranquilo sintirimandami periodistacunahuanga huañushcacuna causarinamanda parlai usharcanchi. Ñucanchi churigu avión accidentepi huañujpipash paihuan cushilla cashca punllacunatami yarinchi. Chai ali punllacunatami siempre yaringapaj munanchi.

”Huaquin Testigocunaca nircami, televisionbica tranquilo parlanajujtami ricurcanchi nishpa. Shina nijpimi nircanchi, canguna Jehová Diosta mañanajushcamandami tranquilo parlai ushashca cashun nishpa. Jehová Dios ñucanchita ayudangapaj munajpimi, ñucanchi huauquipanicunaca ashtaca mensajecunata ñucanchiman cachamurianga”.

Imashinami ricupanchi, Jehová Diosca llaquipi caj gentecunata ayudaita ushanmi. Quiquindapash ayudangapami munan. Ima llaquipi cajpipash, ima problemata charijpipash Jehová Diosca ayudangami. * Chaimandami ‘tucuipi cushichij’ Jehová Diosta mascana capangui (2 Corintios 1:3).