Ma te haamanaˈo i to raua tupuraa, te na ô ra Seth a: “Ua ere mâua ta ˈu vahine i te ohipa i te hoê â taime. E piti matahiti te maoro, ua ora noa mâua na roto i te tauturu a te fetii e te tahi mau ohipa rii. I te hopearaa, ua hepohepo roa Priscilla, ua manaˈo atoa e ere o ˈna i te mea faufaa.

Ua tia râ ia mâua ia faaoromai. Ua haamanaˈo tamau Priscilla i te mau parau i roto i te Mataio 6:34. Ua parau Iesu eiaha e tapitapi i to ananahi ra, na ananahi hoi e tapitapi i ta ˈna iho. Ua tauturu ta ˈna mau pure haavare ore ia ˈna ia faaoromai. No ˈu, o te Salamo 55:22 tei tamahanahana mai. Mai te taata papai Salamo, ua huri au i to ˈu mau fifi i nia ia Iehova e ua ite au na ˈna i tauturu mai ia ˈu. Noa ˈtu, ua noaa ta ˈu ohipa i teie nei, te haapao ra mâua i ta Iesu aˈoraa i roto i te Mataio 6:20-22 ma te tapea i te hoê oraraa haapae. Hau roa ˈtu â, ua piri atu â mâua i te Atua, oia atoa te tahi i te tahi.”

Te faatia ra Jonathan: “Ua haapeapea vau i te topatariraa ta mâua taiete. No te fifi i te pae faanavairaa faufaa, ua mâuˈa 20 matahiti tautooraa. Ua haamata mâua ta ˈu vahine i te tatamaˈi no te moni. Aita atoa mâua i faaohipa i te tareta moni, aˈunei hoi te fare moni e ore e faatia i te aufau.

Ua tauturu mai râ te Parau a te Atua e to ˈna varua moˈa ia rave i te faaotiraa maitai. Aita vau i maiti faahou i te ohipa e ua faaea atoa mâua i te hue i te moni. Ei Ite no Iehova, ua fanaˈo atoa mâua i te tauturu a te mau hoa Kerisetiano. Ua  haapapu mai ratou e ere mâua i te mea faufaa ore e ua turu mai i te taime fifi roa.”

Te faatia ra Raquel: “I te faarueraa mai ta ˈu tane ia ˈu, ua oto vau e ua riri atoa. Ua mauiui roa ino. Ua haafatata râ vau i te Atua e ua tamahanahana oia ia ˈu. Ua paruru te hau no ǒ mai i te Atua i to ˈu aau a pure ai au ia ˈna i te mau mahana atoa. No ˈu, e au te rapaau ra te Atua i te pepe o to ˈu aau!

Maoti ta ˈNa Parau, te Bibilia, ua faaea vau i te riri e te inoino. Ua putapû roa hoi i te mau parau a te aposetolo Paulo i roto i te Roma 12:21, ‘Eiaha oe ia pohe i te ino, ia pohe râ te ino ia oe i te maitai.’

Ua tauturu mai te hoê hoa ia taa mea faufaa ia haere i mua. Ua faaite mai oia i te Koheleta 3:6 e ua parau mǎrû noa mai ‘e taime to te riroraa [aore ra vaiihoraa].’ E ere i te mea ohie ia farii i tera aˈoraa, tera râ te titauhia ia ˈu ia rave. I teie nei, e fa apî ta ˈu i roto i to ˈu oraraa!”

Te parau ra Elizabeth: “Ia faaruehia oe e to hoa faaipoipo, e hinaaro oe te tauturu. Tera ta te hoê hoa i rave no ˈu i tera e tera mahana. Ua taˈi o ˈna na muri ia ˈu, ua tamahanahana mai e ua haapapu atoa mai e mea herehia vau. Ua papu ia ˈu, ua faaohipa o Iehova ia ˈna no te tamǎrû i to ˈu aau.”

E maˈi mafatu rahi to Luis, tei faahitihia i te tuhaa matamua o teie tumu parau. Ua fatata oia i te pohe e piti taime. I teie nei, e titauhia ia faaohipa oia i te matini o te tauturu ia huti maitai i te aho 16 hora i te mahana. Te na ô ra oia: “E pure tamau vau ia Iehova. Oti anaˈe ta ˈu pure, e taa ia ˈu te horoa mai ra te Atua i te puai maoti to ˈna varua moˈa. E tauturu mai te pure ia faaitoito no te mea te tiaturi ra vau ia ˈna e ua ite atoa te tâuˈa ra o ˈna ia ˈu.”

Te faataa ra Petra, e 80 matahiti: “Mea rahi te ohipa ta ˈu e hinaaro e rave, aita râ e haere faahou. E ere i te mea ohie ia ite i to oe puai ia iti noa ˈtu. Ua rohirohi roa vau e e titauhia ia rave noa i te raau. E pinepine au i te manaˈo mai ia Iesu i to ˈna aniraa i to ˈna Metua ia hopoi ê atu i te tahi ati. Ua horoa râ o Iehova ia Iesu i te puai e ua na reira atoa  oia no ˈu. O te pure ta ˈu rapaauraa i te mau mahana atoa. E maitai rii aˈe au ia paraparau vau i te Atua.”—Mataio 26:39.

Hoê â manaˈo to Julian o te faaoromai ra i te tahi maˈi o te mau uaua uira e te mootuaio a 30 matahiti i teie nei. Te na ô ra oia: “Ua vaiiho vau i to ˈu parahiraa faatere no te hoê parahiraa turairai. E ere râ to ˈu oraraa i te mea faufaa ore no te mea te faaohipa ra vau i te reira no te tavini ia vetahi ê. E mâmâ rii mai te mauiui i te horoa ˈtu e e faaitoito mai iho â o Iehova, e tapea noa hoi o ˈna i ta ˈna parau. Mai te aposetolo Paulo, e nehenehe mau vau e parau: ‘E tia ia ˈu te mau mea atoa nei i . . . tei tauturu mai ia ˈu.’”—Philipi 4:13.

Te faatia ra Antonio: “I te poheraa to ˈu papa i roto i te hoê ati purumu, aita vau i tiaturi oioi. Ua na ô vau, ‘Aita e tano, aita o ˈna i rave i te hoê ohipa ino, na tera pereoo i faaû ia ˈna!’ Aita râ ta ˈu e ravea. Ua moe to ˈna hiroa e pae mahana te maoro e pohe atura. Ua tamata vau i te ore e faaite i to ˈu oto i mua i to ˈu mama, o vau anaˈe râ, e taˈi noa ïa. E uiui noa vau, ‘No te aha pai o ˈna?’

I tera mau taime fifi, ua ani noa vau ia Iehova i te tauturu no te vai hau noa. E ua tamahanahana mǎrû noa mai oia ia ˈu. Ua haamanaˈo vau te faaite ra te Bibilia e nehenehe tatou paatoa e farerei i te hoê tupuraa manaˈo-ore-hia. Ua papu ia ˈu e farerei faahou vau i to ˈu papa ia tupu te tia-faahou-raa no te mea eita te Atua e haavare.”—Koheleta 9:12; Ioane 11:25; Tito 1:2.

Hoê â atoa manaˈo to Robert, faahitihia i te tuhaa matamua o teie tumu parau. Te na ô ra oia: “Maoti ta mâua mau pure ia Iehova, ua ite mâua ta ˈu vahine i te hau o te feruriraa ta te Philipi 4:6, 7 e parau ra. Ua tauturu mai tera hau ia paraparau i te mau vea no nia i to mâua tiaturiraa no te tia-faahou-raa. Noa ˈtu ua pohe ta mâua tamaiti i roto i te ati manureva, te mau noa ra ia mâua i te mau taime oaoa ta matou i fanaˈo. Tera noa ta mâua e tapea mai.

Ua parau mai te mau hoa Kerisetiano, ua ite ratou ia mâua i roto i te afata teata e ua vai hau noa a faataa ˈi i to mâua tiaturiraa. Ua pahono atu mâua, auaa e rave rahi tei pure no mâua. Ua papu ia ˈu, o Iehova tei turu mai na roto i ta ratou mau poroi tamahanahana e rave rahi.”

Mai ta te mau hiˈoraa i faaite, e nehenehe te Atua e tamahanahana i te taata o te faaruru ra e rave rau fifi e ati. E no oe? Noa ˈtu eaha te fifi ta oe e farerei, e nehenehe oe e fanaˈo i te tamahanahanaraa. b No te aha e ore ai e fariu ia Iehova no te ani i te tauturu? O ˈna hoi “te Atua no ˈna anaˈe te mahanahana.”—Korinetia 2, 1:3.