«Өөм ишти-биле ажылывысты хары угда чидирген бис, — деп, Сет a сактып чугаалаан. — Ийи чыл иштинде төрелдеривистиң ачызында амыдырап, ында-мында бичии ажылдар кылып чурттап турган бис. Түңнелинде кадайым Приссилла ундаралга алзыпкан, а мен бодумну чөгенчиг кижи кылдыр миннип турган мен.

Ону канчаар ажып эрткен бис? Приссилла Матфей 6:34-те Иисустуң сөстерин бодунга үргүлчү сагындырып чораан. «Даартагы хүн дээш сагыш човаваңар. Даартагы хүн боду дээш боду сагыш човаар» — деп, ол чугаалаан. Кадайымның мөргүлдери аңаа дүжүп бербезинге дузалаан, а мени Ырлар 54:23-те сөстер оожургаткан. Ыр күүседикчизи дег, Иеговага үүрге-чүъгүмнү хүлээдипкеш, ооң деткимчезин алган мен. Бөгүн ажылдыг-даа болзумза, Матфей 6:20—22-де Иисустуң сүмезинге дүүштүр бөдүүн амыдыралды тударын кызып чоруур бис. Ам Бурганга болгаш бот-боттарывыска оон-даа чоок апарган бис».

«Кажан өг-бүлевистиң бичии бизнези буурап каарга, келир үевис дээш, коргуп эгелээн мен — деп, Джонатан чугаалаан. — Экономиктиг кризистиң хайындан чүү-даа чок арткан бис. 20 чыл ишти кызып ажылдаан күжүвүс хилис барган! Кадайым-биле акша дээш маргыжар апарган бис. Төлевирни эрттирбейн баарындан корткаш, чээли картазын безин ажыглавайн турган бис.

Библия биле Бурганның сүлдези биске мерген угаанныг шиитпирлерни хүлээп алырынга дузалаан. Кандыг-даа ажылды кылырындан чалданмас кылдыр өөренип алган мен база херек чок чарыгдалдарны кызырган бис. Оон аңгыда чоок өңнүктеривис бисти деткип турган. Ылаңгыя аажок берге үелерде олар биске үргүлчү дузалап, сорук киирип чораан».

«Ашаам мени хенертен кааптарга, бир дугаарында килең биле хомудалды миннинген мен, — деп, Ракель сактып турар. — Аажок ундаргай байдалга турган-даа болзумза, Бурганның деткимчезин дилеп чораан мен. Хүннүң-не мөргүп турганымның ачызында сагыш-сеткилим оожургаан. Ынчан балыгланган чүрээмни Бурган экиртип каан деп билип кагдым.

Ооң Сөзүнүң, Библияның, ачызында хомудал биле килеңимни чавырып алган мен. Меңээ: „Бузутка бодуңну бастыртпа, а ону буян-биле бас“ — дээн Павел элчинниң, Римчилерге 12:21-де сүмези дыка дузалаан.

Бир арга-дуржулгалыг христиан акым чуртталга мооң-биле төнмээн деп чүүлдү билип алырынга дузалаан. Ол Экклесиаст 3:6-ны көргүскеш, чамдыкта „чидирер-даа үе турар“ деп чымчаа-биле сагындырган. Ындыг сүмени хүлээп алыры белен эвес-даа болза, шак ол сүме меңээ херек турган. Ам чуртталгамда чаа сорулгаларлыг мен».

«Өг-бүле буураарга, деткимче аажок херек — деп, Элизабет чугаалап турар. — Меңээ шак ындыг деткимчени чоок кыс эжим көргүскен. Ол мээң-биле кады ыглап, оожуктуруп, ынакшылынга бүзүреткен, ынчангаш бодумну херек чок, кагдырган кижи кылдыр миннивес апарган мен. Ол эжимни таварыштыр Иегова мээң сагыш-сеткилимниң балыгларын экирткен деп бүзүрээр-дир мен».

Статьяның эгезинде бижээн Луистиң чүрээ баксырап турар. Ол ийи катап чок болур часкан. Бо хүн Луиске, хүнде 16 шак дургузунда кислород бээр, тускай аппараттың дузазы херек. Ол: «Иеговага үргүлчү мөргүп турар мен. Мөргүл соонда Бурган сүлдези-биле мени деткип турар деп билип каар чордум. Мөргүл меңээ чуртталга дээш туржурунга тура-сорукту берип турар, чүге дизе Бурган  бар база Ол мен дээш сагыш човап турар деп, эки билир мен».

«Хөйнү кылыксаар мен, ынчалза-даа шыдавас мен — деп, 80 хар ашкан Петра чугаалаан. — Күжүм эвээжеп турар деп бодап кээрге, берге-дир. Кадыым баксыраанындан эмнер чокка шыдавас-тыр мен. Иисус Адазындан, болдунар-ла болза, бергелерни чайладыптарын дилеп турганын болганчок сактыр мен. Ынчалза-даа Иегова, бергелерни чайлатпайн, Иисусту быжыктырган. Бурган мени база быжыктырып турар. Мөргүл — мээң эмим-дир. Мөргүл соонда чүгээртей бээр чордум» (Матфей 26:39).

30 чыл «рассеянный склероз-биле» b аарып чоруур Хулиан ооң-биле чөпшээрежип турар. «Директорнуң креслозун инвалид креслога солупкан мен — деп, ол үлешкен. — Ынчалза-даа чуртталгам уткалыг, чүге дээрге өскелерге бараан бооп чоруур мен. Улуска дузалаарымга, бодумга чиик апаар. Иегова берге үелерде бисти быжыглаар дээн сөзүнге ээ дээрзин көрдүм. Павел элчин дег: „Меңээ күштү хайырлап турар Христостуң [«Бурганның», ЧД] ачызында чүнү-даа шыдажып эртер мен“ — деп болур мен» (Филипчилерге 4:13).

«Ачамны машина үстүрүпкен дээрге, эгезинде бүзүревээн мен — деп, Антонио сактып чугаалаан. — Буруу чок кижини үстүрүпкени меңээ дыка хоранныг болган! Ынчалза-даа чүнү өскертиптер турган деп мен. Ол беш хүн иштинде медерел чок чыткаш, чок апарган. Авамның мурнунга арай деп туттунган мен, оон чааскаан арткаш, мөөредир ыглай берген мен. „Чүге аан, чүге?!“ — деп, айтырыг угаанымдан үнмейн турган.

Ол аар-берге үеде Иеговадан дузаны чаннып-дилеп турган мен. Чоорту оожургай бердим. „Үе-хуусаа биле таварылга“ кандыг-даа кижини таварыптар деп бодумга сагындырып чораан мен. Бурган кажан-даа мегелевес деп, билир мен, ынчангаш ачам дирлип кээрге, катап ужуражып келиривиске ыяк бүзүреп чоруур-дур мен» (Экклесиаст 9:11; Иоанн 11:25; Титке 1:1—2).

Роберт база шак ындыг минниишкиннерлиг. «Кадайым-биле Филипчилерге 4:6, 7-де бижээн амыр-тайбыңны мөргүлдүң ачызында миннинген бис. Оожургай бергеш, журналистерге диргизиишкин дугайында идегеливисти безин чугаалап шыдаан бис. Озал-ондак оглувустуң амы-тынын алгаш барган-даа болза, кады эрттирген үелеривис сагыжывыска артып калган. Ынчангаш ону бодаарын кызар чордувус.

Христиан чыыштан эштеривис телевизорга дүвүрел чок чугааланып турганывысты кайгаан. Хөй улустуң мөргүлдери болгаш аргалалдыг сөстери таварыштыр Иегова бисти деткээн деп, ыяк бүзүрээр-дир мен».

Бурган кандыг-даа байдалда аргалап шыдаар. А хууда силерни Ол аргалап шыдаар бе? Кандыг-даа бергеге таварышсыңарза, аргалал чаныңарда c деп бүзүреңер. Иегова — «бисти аргалап, деткип чоруур Бурган-дыр» деп сактып чоруңар (2 Коринфичилерге 1:3).