“Kami nga mag-asawa dungan nga nawad-an hin trabaho,” siring ni Seth. * “Ha sulod hin duha ka tuig, bulig la han pamilya ngan part-time nga trabaho an nakasustinir ha amon. Tungod hito, nadepres an akon asawa, hi Priscilla, ngan inabat ko nga waray ako pulos.

“Ano an nakabulig ha amon? Pirme ginpapahinumdom ni Priscilla an iya kalugaringon han ginsiring ni Jesus ha Mateo 6:34. Hi Jesus nagsiring nga diri kita sadang mabaraka mahitungod han sunod nga adlaw, kay an kada adlaw may kalugaringon nga kabaraka. Ngan an kinasingkasing nga mga pag-ampo ni Priscilla nakabulig ha iya nga makapadayon, samtang ako naliaw han Salmo 55:22. Pariho han salmista, iginsarig ko kan Jehova an akon kabaraka, ngan inabat ko gud an iya bulig. Bisan kon may trabaho na ako, gintitipigan namon nga simple an amon kinabuhi uyon ha sagdon ni Jesus ha Mateo 6:20-22. Labaw ha ngatanan, nagin mas duok kami ha Dios ngan ha kada tagsa.”

“Han nalugi an amon gutiay nga negosyo, nahadlok ako kon ano an mahitatabo ha amon,” siring ni Jonathan. “Tungod hin krisis ha ekonomiya, nagin waray pulos an 20 ka tuig nga pagpinangalimbasog. Kami nga mag-asawa nagtikang magdiniskusyon tungod hin kwarta. Diri ngani namon magamit an amon credit card kay bangin diri ito karawaton.

“Pero an Pulong han Dios ngan an iya espiritu nakabulig ha amon ha paghimo hin husto nga mga desisyon. Nahibaro ako pagkarawat hin bisan ano nga trabaho, ngan ginlikyan namon an diri importante nga paggasto. Sugad nga mga Saksi ni Jehova, ginbuligan liwat kami han amon mga igkasi-tumuroo. Ginpakusog nira an amon kompyansa ngan ginbuligan kami ha panahon han duro nga kakurian.”

“Han ginbayaan ako han akon bana, nasakitan ngan nasina ako,” siring ni Raquel. “Ngan nabug-atan gud ako han duro nga kasubo. Kondi nangalimbasog ako nga magin duok ha Dios, ngan ginliaw niya ako. Napanalipdan an akon kasingkasing han kamurayawan han Dios kon nag-aampo ako ha iya kada adlaw. Baga hin iya gintambal an akon nasamaran nga kasingkasing.

“Ngan ha bulig han iya Pulong, an Biblia, nalamposan ko an pag-abat hin kasina ngan pagdumot. Gintipigan ko ha akon kasingkasing an ginsiring ni apostol Pablo ha Roma 12:21: ‘Ayaw padaog ha maraot, lugod daoga pirme an maraot pinaagi han maopay.’

“Ginbuligan ako hin usa nga maopay nga sangkay nga masantop an panginahanglan nga magpadayon. Iginpabasa niya ha akon an Eklesiastes 3:6 ngan mapinairon nga ginsidngan ako nga may panahon nga kinahanglan naton karawaton nga may mahimo ‘mawara’ ha aton. Makuri adto karawaton nga sagdon, kondi ito an akon kinahanglan. Yana may-ada na ako bag-o nga mga tumong ha kinabuhi.”

“Kon magbulag kamo nga mag-asawa, magkikinahanglan ka hin suporta,” siring ni Elizabeth. “May duok ako nga sangkay nga naghatag ha akon hito nga suporta kada adlaw. Kon nagtatangis ako nasasakitan hiya, iya ako ginliliaw, ngan iya ako ginpaabat nga hinigugma ako, diri kay waray nagpapabili. Kombinsido ako nga gin-gamit hiya ni Jehova basi matambal an samad han akon kasingkasing.”

Hi Luis, nga gin-unabi ha siyahan nga artikulo, may grabe nga sakit ha kasingkasing, ngan duha ka beses nga hapit na hiya mamatay. Yana, naka-oxygen hiya hin 16 ka oras kada adlaw. “Pirme ako nag-aampo kan Jehova,” hiya nagsiring. “Katapos ko mag-ampo, naaabat ko an Iya espiritu nga nagpapakusog ha akon. An pag-ampo naghahatag ha akon hin kaisog nga magpadayon tungod kay may pagtoo ako ha iya ngan maaram ako nga napaid hiya ha akon.”

“Damu an karuyag ko buhaton, pero diri ko na mahimo ito,” siring ni Petra nga sobra 80 anyos. “Makuri gud karawaton nga nagtitikawara na an akon kusog. Maluya na ako ngan nasarig na la ha medisina. Agsob ko mahunahuna han may gin-atubang nga pagsari hi Jesus ngan naghangyo hiya ha iya Amay nga palabyon ito, kon posible. Ngan gintagan ni Jehova hi  Jesus hin kusog, ngan ginpapakusog liwat niya ako. An pag-ampo amo an akon adlaw-adlaw nga terapi. Nag-oopay gud an akon pamati katapos ko makiistorya ha Dios.”—Mateo 26:39.

Sugad liwat hito an inabat ni Julian nga haros 30 ka tuig na nga may sakit nga multiple sclerosis. “Hadto ha executive chair ako nalingkod, kondi yana ha wheelchair na la,” siring niya. “Kondi mapulsanon an akon kinabuhi tungod kay ginagamit ko ito ha pagserbi ha iba. An paghatag nakakaiban han kasakit, ngan gintutuman gud ni Jehova an iya saad nga paparig-unon kita niya ha panahon han kakurian. Pariho kan apostol Pablo, masisiring ko gud: ‘Ha ngatanan nga butang may kusog ako pinaagi ha iya nga naghahatag ha akon hin gahum.’”—Filipos 4:13.

“Han mamatay ha aksidente hi Tatay, waray ako dayon hito makatoo,” siring ni Antonio. “Baga hin diri makatadunganon adto—nagbabaktas la hiya. Kondi waray ako mahihimo. Na-coma hiya hin lima ka adlaw antes mamatay. Maopay na la nga napupugngan ko magtangis kon aada hi Nanay, pero kon nag-uusahan na la ako, diri ako nakakapugong. Ginpinakianhan ko an akon kalugaringon, ‘Kay ano?’

“Hiton makasurubo nga panahon, pirme ako naghahangyo kan Jehova nga buligan ako nga makontrol an akon emosyon ngan tagan ako hin kamurayawan. Ngan hinay-hinay nga nagin kalmado ako. Nahinumdoman ko an ginsiring han Biblia nga an diri ginlalaoman nga panhitabo mahimo maeksperyensyahan han bisan hin-o. Tungod kay an Dios diri makakagbuwa, kombinsido ako nga makikita ko utro hi Tatay kon banhawon na hiya.”—Eklesiastes 9:11; Juan 11:25; Tito 1:2.

Sugad liwat hito an inabat ni Robert, nga gin-unabi ha siyahan nga artikulo. Hiya nagsiring: “Naeksperyensyahan ko ngan han akon asawa an kamurayawan ha hunahuna nga gin-uunabi ha Filipos 4:6, 7. Nakarawat namon ito tungod han amon mga pag-ampo kan Jehova. Ini nga kamurayawan nakabulig ha amon nga maisumat ha mga reporter an amon paglaom nga pagkabanhaw. Namatay man an amon anak tungod han aksidente ha eruplano, may-ada la gihapon kami malipayon nga mga hinumdoman han mga panahon nga kaupod hiya. Nangangalimbasog kami nga magpokus hito.

“Han nagsiring an amon mga igkasi-Saksi nga nakita nira kami ha telebisyon nga kalmado nga nagsasaysay han amon pagtoo, ginsidngan namon hira nga sigurado nga tungod ito han ira damu nga pag-ampo para ha amon. Natoo gud ako nga ginbuligan kami ni Jehova pinaagi han ira damu nga mensahe han pagliaw.”

Sugad han iginpapakita han mga gin-unabi nga eksperyensya, an Dios makakaghatag hin pagliaw ha mga tawo anoman an ira problema ngan kasakitan. Kumusta ka man? Anoman nga kakurian an imo gin-aatubang, may pagliaw nga makakabulig ha imo nga malamposan ito. * Salit kay ano nga diri magpabulig kan Jehova? Hiya “an Dios han ngatanan nga pagliaw.”—2 Corinto 1:3.