Seth * aya: “I ambu re ti sunge wa sa na diare. Tipa agarã ue ani araka mbiko kina agu ahe i naafuhe fu airarungo gbiati manga rukutu wiri asunge ni bee. Ni sangbana gipai re, bakere gberãrago azi diare nga Priscilla na mi ki bi tire nga sunge ti re te.

“Ginipai ani amangihe tipa gipai re? Priscilla anaatingida tiri ti aregbo dunduko na gu fugo Yesu du rogo Matayo 6:34. Ko ape gupai nga, si aidanga ani wisigipai tipa gupai du gba te, bambiko gba nika wisigopai tipaha nisaha. Na gu kparakpee ri anaamangaha dedede aima nyakasa ri ri naahipai kindi. Tipa re tigimi, Atambuahe 55:22 aima fu wasa fere. Wa kina bake papara Atambuahe, mi aba gimi tindiro ku auru Yekova, na mi abi gupai nga Yekova aangera angerafuo re. Wa vura duhe nga mi namangasunge awere, ani nabanda gaani gene raka taata kina kuti gu rugute Yesu afuhe rogo Matayo 6:20-22. Gu susi gbe nga, ani ima mbeda na Mbori gbiati kura aboro.”

Jonathan aya, “Mi adu na bakere gunde tipa gaani raka kumbatayo ho gaani wiri sunge marã nga ga kporo ati ni. Mbiko gu kere zingo marã naamanga, ani amangisunge tipa agarã nga 20 ka ani agbianga undo ti ni ya. Paya aguari dagbare na diare tipa marã. Gene aadunga ani ngbehe na karite nga ga marã te, mbiko marã aakiongo berani te.

“Ono Fugo Mbori gbiati gako ziazia toro aundo rani tipa ani mangi wene adiaberã. Mi awiriki ka manga angbatunga asunge dunduko, na ani ki kati agu ahe dunduko paha aanyakanga ya. Ni du ani ni aDezire Yekova, ani aima gbia undo a be akuarani aidipase. I ana zambuasi rani na kini fu agamahe furani a ti kere aregbo.”

Raquel aya “Ho kumbami ambu re ni, si aima imisa re. Na bakere gberãrago azire. Ono mi ambedi na Mbori na ko ki fu wasa fere. Gu zereda nga ga Mbori abanda kpotore yo ho mi anaamanga kparakpee ni fuko dedede. Mi abi tire nga ko aima husa gu kpotore yo du na mbugo.”

“Mi nafu tambuahe tipa Fugoko nga Ziazia Kekeapai, mi adibe agu asino nga ga zinga na kpikopai. Mi amangipai kuti fugo gu mokedi nangia Pauro du rogo ARomo 12:21 nga gu naya: ‘Ka gbegberẽpai di nga be roni ya, oni di adia be gbegberẽpai ni wenepai.’

“Kura nakureami sa aundo re tipa mi diberã re ti agu apai re. Ri ayugu Batungusipai 3:6 na ki pe gupai fere nga ‘rago ingisa he’ kina ti ni. Gu rugute re aima igirã, ono gure nangia gupai si aida mi mangihe. Mi ima maa vovo asásá awere nga ga raka.”

Elizabeth aya “Ho pa ga boro rogatise agberã ni, ni naida boro duho tipa ka undo ni. Mi adu na wene nakureami nanaafu gu undo re fere na aˈuru dũ. Ri anaakpara kuti re, kini fu wasa fere, na kini sare mi naabi tire nga ri ima kpinyemure. Mi ima inoho nirengo nga, Yekova namangisunge na ri tipa ka husa gu aro naadu ngbadure yo.”

Luis i nipepa ko ti tonatona gi waraga re adu na nyanyaki kere kaza nga ga ngbaduse, ko ambedi ka kpi bara ue. Awere i namaa okisigini (oxygen) ti ko tipa asaa 16 na aˈuru dũ. Ko aya: “Mi naapiriganga ti kparakpee fu Yekova te. Na fuo manga mi kparakpee fu Mbori, mi naabi tire nga gako toro ima fu undo fere. Kparakpee ni naangarasa re bambiko mi na idapase kuti ko na ki ini gupai nga ko naberã pare aberã.”

Petra du garãri nga 80 aya: “Mi naida ka manga dungu apai ono ka mi mangingo ho te. Si ima nyaka fere ka bi gupai nga omere nanyasa. Mi ima mbu na mi naraka kina kurii dawa. Ti kura aregbo, mi naaberã kina wai Yesu asana Bako tipa kura fudifudipai susi riko ka ko idihe wo. Ono Yekova afu kina ome fu Yesu, ko nafu ome fere a. Kparakpee nga gi dawa mi naadiaha na aˈuru dũ. Mi nidu wenengai fuo fura mi na Mbori.”​—Matayo 26:39.

 Julian, naaima digo nisovura na gu kaza nga ga berã tipa agarã awere nga 30 ape kina bangisapai ki ya. “Gi mi basunge ningia kina gi ngbagida re. Ono mi nagbia ngbarago rogo gi mi raka yo mbikopa fu mi tire kaa undo aboro. Ho ani afu tirani ni ka undo aboro, si ima rengba ka zeresa gaani igirã, na Yekova naahenga ngarãsa rani ti regbo akparakapai te. Wakina gu mokedi nangia Pauro, mi ima rengba ka pehe ni rengo nga: ‘Mi rengbe na manga apai dunduko rogo gu ko nanyakasa re.’”​—AFiripoio 4:13.

Antonio aya: “Ho i afõ buba ni na tarambiri, mi aaidanga kuti ni mbata te. Si aima gberã ni kerehe mbiko ko aandu gako ni nduko. Ono pai aadunga ho ka mi amangihe te. Ko asamba tipa arame bisue mbata fu ko kpi. Ti kura aregbo mi anaabanda tire abanda ti kpee ho du nina ni, ono ho mi ani du ni nisare mi anaakpara akpara. Mi anaasana tire nga ‘Tipagine? Tipagine?’.

“Ti gu kere aregbo re, mi anaasana Yekova kindi tipa ko undore mi du na zatise na ki gbia zereda nga ga kpotose yo. Mi atona ka zereda yeeye. Mi atingidi gupai Ziazia Kekeapai apehe nga ‘rago gbia kuti mamu’ namanga furani dunduko. Wa duhe nga ka Mbori gumbanga zire te, mi na gu kido nga mi nika bi buba abi berewe ti regbo zingabekpio.”​—Batungusipai 9:11; Yoane 11:25; Tito 1:2.

Robert, i ni pepako ti tonatona gi kekeapai re, afura wakina gure ki ya: “Mi na diare nga Maribel aima gbia gu zereda gumbayo paha rogo AFiripoio 4:6, 7. Ani naagbia gi zereda re mbiko gaani kparakpee fu Yekova. Gi zereda nga ga kpotoseyo re asa rani tipa ani fura fu agu aboro naasana rani tipa gu maabangirise nga ga zingabekpio. Wa vura duhe nga gu tiyara (avion) nati re aima imo wirani, ani naagbia ngbarago kindi ti berã ani kurii agu weneapai ani amangi he wa sa. Ani naasada kaa berã gbe kina kurii agu apai re.

“Ho kura awirina ape gupai ni furani nga, i abi rani ani sakipai tipa gaani idapase rogo terevizioni, ani aya fuyo we, ani na gu kido nga, gipai re amangi mbiko gu dungu akparakpee awirina amangaha tipa rani. Mi ima inoho ni rengo nga Yekova du naundo rani vurube gu dungu wene awaraga nga ga wasa agu aboro re afuhe.”

Wa ani nabihe rogo agi akpiapai re, Mbori ima rengba ka fu wasa fu agu aboro nagbiatiyo na kpakaraapai gbiati arungo. Na mo tigamo? Ka mo vura gbiatiro na kina gini ngbatunga kereapai rogo gamo raka yo vurũ, wasa kinaho rengbe mo ka gbiaha ti gu kere aregbo re. * Mo kpari fu Yekova tipa undo. Ko “nga Mbori wasa dunduko.”​—2 AKorindo 1:3.