DAVIDI to pipli awhànfuntọ delẹ tọn pọ́n dile yé to agọjoyigodo. Obu jẹ yé ji bọ yé to hinhọ̀n sọn awhàngbenu. Etẹwẹ dobuna yé sọmọ? E na ko sè dile yé yí obu do to yinkọ dawe de tọn ké mapote. Podọ dawe asuka lọ lọsu ṣite to dankló lọ ji finẹ, vlavo bo dite bosọ tọ́nalùn hú sunnu he Davidi ko mọ pọ́n to gbẹzan etọn mẹ lẹpo.

Goliati wẹ! Davidi na ko mọ nuhewutu awhànfuntọ lọ lẹ do to budina ẹn—sunnu gángánsu de wẹ. Eyin e ma tlẹ hẹn gbaja huhlọnnọ etọn, e nọ dibla pẹ̀n hugan sunnu glegbenu awe. Ṣigba, e sọawhànnu taun bo dohuhlọn bosọ yin awhànfuntọ akonka de. Goliati sọ fọ́n whlepọn de dote. Yí nukun homẹ tọn do pọ́n ẹn dile ogbè daho etọn to núdọ to lẹdo osó tọn lọ mẹ bọ e to awhànpa Islaeli tọn po ahọlu yetọn Sauli po vlẹko. E dọ dọ eyin yè ji sunnu de, ni bo tọ́n wá hoavùn hẹ emi ṣo!—1 Samuẹli 17:4-10.

Obu jẹ Islaelivi lẹ ji. Obu sọ jẹ Ahọlu Sauli lọsu ji. Davidi sè dọ e ko hugan osun dopo bọ nulẹ to yìyì domọ! Awhànpa awe lẹ, enẹ wẹ Filistinu lẹ po Islaelivi lẹ po nọ whii dile Goliati to Islaelivi lẹ vlẹko egbesọegbesọ. Davidi jẹflumẹ. Lehe e huwinyan do sọ nado mọdọ ahọlu Islaeli tọn po awhànfuntọ etọn lẹ po, ehe bẹ mẹdaho Davidi tọn atọ̀n hẹn, to budi sinsinyẹn! To nukun Davidi tọn mẹ, e ma yin awhànpa Islaeli tọn kẹdẹ wẹ Goliati he yin kosi enẹ to winyando gba; ṣigba Jiwheyẹwhe Islaeli tọn, Jehovah zun wẹ e te! Amọ́ etẹwẹ Davidi he yin jọja de poun sọgan wà to whẹho ehe mẹ? Podọ etẹwẹ míwlẹ sọgan plọn sọn yise Davidi tọn mẹ to egbehe?—1 Samuẹli 17:11-14.

Mì gbọ mí ni flin nuhe ko jọ wayi to osun delẹ die. Owhè ko to họyì dile Davidi to lẹngbọ otọ́ etọn tọn lẹ yìn to lẹdo osó tọn de mẹ sẹpọ Bẹtlẹhẹm. E yin jọja sunnu whanpẹnọ de, vlavo he gbẹ́ pò to aflanmẹ, yèdọ omẹ bibia he yọ́npọ́n taun de bosọ yọnnuin. To whenue filẹpo to whii, e nọ jẹ ajalẹn hò ji. Whanpẹ nudida Jiwheyẹwhe tọn lẹ tọn nọ whàn ẹn, podọ e ko lẹzun hànsinọ dagbe de dile e nọ yí ojlẹ ayajẹ tọn susu zan nado to hànjinu lẹ hò bo to hànji. Ṣigba, to whèjai gbenẹgbe, mẹde wá ylọ Davidi. Otọ́ etọn jlo na mọ ẹn to niyaniya mẹ.—1 Samuẹli 16:12.

E mọ bọ otọ́ etọn, Jẹsse, to hodọ hẹ dawe de he ko poyọnho taun. Yẹwhegán nugbonọ lọ Samuẹli wẹ. Jehovah ko do e hlan nado yiamisisadode dopo to visunnu Jẹsse tọn lẹ mẹ taidi ahọlu Islaeli tọn he na bọdego! Samuẹli ko mọ mẹdaho Davidi tọn sunnu ṣinawe lọ lẹ, ṣigba Jehovah dọna Samuẹli dọ Emi ma de depope to yé mẹ. To whenue Davidi wá, Jehovah dọna Samuẹli dọmọ: “Yiamisisadode e, na mẹlọ die!” To mẹdaho Davidi tọn lẹpo nukọn, Samuẹli hùn azò he mẹ amì vonọtaun de ko yin awuwlena do lọ bo kọ̀n ẹn do ota na Davidi. Sọn ojlẹ enẹ mẹ sọyi, gbẹzan Davidi tọn diọ. Biblu dọmọ: “Gbigbọ Jehovah tọn . . . jẹ huhlọn na Davidi ji bẹsọn gbenẹgbe sọyi.”—1 Samuẹli 16:1, 5-11, 13.

Be Davidi jẹ ojlo zogbe tindo ji na otẹn ahọlu tọn wẹ ya? Lala, e yí sọwhiwhe do nọtepọn anademẹ gbigbọ Jehovah tọn nado yọ́n whenue ewọ na didá azọngban daho enẹ do. To ojlẹ enẹ mẹ, e yí  whiwhẹ do zindonukọn taidi lẹngbọhọtọ de. E yí mẹdezejo po adọgbigbo nujọnu tọn po do wazọ́n enẹ. Whla awe wẹ lẹngbọpa otọ́ etọn tọn yin nukundiọsọ, tintan gbọn kinnikinni de dali podọ awetọ gbọn beali de dali. Davidi ma tẹnpọn nado yàn kanlin nuwledutọ enẹlẹ dogbé poun gba. Kakatimọ, e ze ogbẹ̀ etọn do owù mẹ nado whlẹn lẹngbọ agbátọnọ otọ́ etọn tọn lẹ. Ewọ kẹdẹ wẹ yí alọ etọn titi lẹ do hù gbekanlin ylankan enẹlẹ!—1 Samuẹli 17:34-36; Isaia 31:4.

To nukọn mẹ, mẹdevo sọ wá ylọ Davidi. Linlin etọn lẹ ko jẹ otó Ahọlu Sauli tọn mẹ. Mahopọnna dọ Sauli gbẹ́ yin awhànfuntọ huhlọnnọ de, e ko ba nukundagbe Jehovah tọn pò, na e ṣiatẹ sọta anademẹ etọn lẹ wutu. Jehovah ko de gbigbọ etọn sọn Sauli ji, bọ gbigbọ ylankan nọ saba dotukla ẹ—ehe nọ zọ́n bọ e nọ gblehomẹ, vẹnudomẹ, bosọ nọ wadanu. Eyin gbigbọ ylankan ehe wá Sauli ji, onú dopo he sọgan hẹn ẹn gọ̀ biọ ede mẹ wẹ nuhiho. Devi Sauli tọn delẹ ko sè dọ Davidi nọ hònú ganji bosọ yin avùnhotọ de. Enẹwutu, Davidi yin yiylọ, podọ e ma dẹn bọ e lẹzun dopo to hànsinọ he nọ nọ̀ họ̀nmẹ Sauli tọn lẹ po gbaja-hẹntọ etọn lẹ po mẹ.—1 Samuẹli 15:26-29; 16:14-23.

Jọja lẹ sọgan plọn nususu sọn yise Davidi tọn mẹ. Mì doayi e go dọ e nọ yí gbọjẹ whenu etọn lẹ zan nado doafọna nuhe na dọ̀n ẹn sẹpọ Jehovah dogọ lẹ. Humọ, e yí sọwhiwhe do wleawuna azọ́nyinyọnẹn dagbe lẹ he zọ́n bọ e wá yọ́n-na-yizan taun. Hú popolẹpo, e jo ede na gbigbọ Jehovah tọn nado deanana ẹn. Nuplọnmẹ họakuẹ nankọ lẹ die na mímẹpo!—Yẹwhehodọtọ 12:1.

To whenue Davidi to devizọnwa na Sauli, e nọ saba lẹkọyi whé nado penukundo lẹngbọ lẹ go bo nọ nọ̀ na ojlẹ dindẹn to whedelẹnu. Ojlẹ mọnkọtọn mẹ wẹ Jẹsse do Davidi hlan nado yì kàn jijọho mẹdaho etọn atọ̀n he to awhànpa Sauli tọn mẹ lẹ tọn biọ. Davidi setonu bo blá agbàn delẹ hẹn na mẹdaho etọn lẹ, bosọ dedo agbàdo Elahi tọn mẹ. To whenue e jẹ finẹ, e jẹflumẹ nado mọdọ awhànpa awe lọ lẹ to whii dile mí dọ do to bẹjẹeji hosọ ehe tọn. Yé pannukọn yede to awà awe agbàdo daho ehe tọn lẹ ji.—1 Samuẹli 17:1-3, 15-19.

Ninọmẹ lọ ma hẹn homẹ Davidi tọn hùn paali. Nawẹ awhànpa Jehovah Jiwheyẹwhe ogbẹ̀nọ lọ tọn na dibuna sunnu tata de—yèdọ kosi de poun gbọn? Davidi mọdọ Jehovah zun wẹ Goliati te tlọlọ. Enẹwutu, e jẹ didọna awhànfuntọ lẹ ji dọ emi na pehẹ Goliati. E ma dẹn bọ mẹdaho Davidi tọn, Eliabi, gblató nuhe dọ Davidi te. E wọhẹ nọvisunnu etọn sinsinyẹn, bo sawhẹdokọna ẹn dọ awhàn lọ pọ́n gbé wẹ e wá. Ṣigba Davidi gblọnna ẹn dọmọ: “Etẹwẹ n’wà yindo din? Nukanbiọ janwẹ n’te poun sin!” Enẹgodo, e zindonukọn bo to didọ po adọgbigbo po dọ emi na duto Goliati ji, kaka bọ nuhe dọ e te jẹ otó Sauli tọn mẹ. Ahọlu lọ degbe dọ yè ni plan Davidi wá na emi.—1 Samuẹli 17:23-31.

Davidi dọ hogbe tulinamẹ tọn ehelẹ na ahọlu gando Goliati go dọmọ: “A dike ahun mẹdepope tọn gbàdo, na ewọ tọn wutu blo.” Na nugbo tọn, ahun Sauli po sunnu etọn lẹ po tọn ko gbàdo na Goliati wutu. Vlavo yé na ko gbọn nuṣiwa dali yí  yede jlẹdo sunnu asuka enẹ go, bo na ko lẹnnupọndo lehe dawe lọ tọ́nalùn hú yé taun do ji. Yé mọdọ dawe gángánsu he sọawhànnu sọn aga wá odò enẹ na gbidi yé po awubibọ po. Ṣigba, Davidi ma lẹnnupọn to aliho enẹ mẹ. Dile mí na wá mọ do, aliho he gbọnvo pete mẹ wẹ e pọ́n nuhahun lọ hlan te. Enẹwutu, e biọ nado hoavùn sọta Goliati.—1 Samuẹli 17:32.

Sauli dọna ẹn dọmọ: “Hiẹ ma na penugo nado hoavùn hẹ Filistinu ehe gba, na yọpọ sunnu de poun wẹ hiẹ bọ ewọ ka ko yin awhànfuntọ de sọn jọja whenu etọn.” Be yọpọvu wẹ Davidi yin nugbo ya? Lala, amọ́ e gbẹ́ whè gbau nado biọ awhàn mẹ, podọ e na ko tindo nukunmẹ yọpọvu tọn. Ṣigba, Davidi ko yin yinyọnẹn taidi avùnhotọ huhlọnnọ de podọ e masọ yin yọpọvu ba to ojlẹ enẹ mẹ.—1 Samuẹli 16:18; 17:33.

Davidi hẹn Sauli deji gbọn nuhe jọ do kinnikinni lọ po beali lọ po go didọna ẹn dali. Be nùgo yí wẹ e te ya? Lala. Davidi yọ́n lehe e duto avùn enẹlẹ ji do. E dọmọ: “Jehovah he whlẹn mi sọn ofẹ̀n kinnikinni po beali lọ po tọn mẹ, ewọ wẹ nasọ whlẹn mi sọn alọ Filistinu ehe tọn mẹ.” Hogbe ehelẹ duto Sauli ji, bọ e gblọn dọmọ: “Yì, na Jehovah ni tin hẹ we.”—1 Samuẹli 17:37.

Be e na jlo we nado tindo yise Davidi tọn nkọ ya? Yise etọn ma yin odlọ de poun. E tindo yise to Jiwheyẹwhe etọn mẹ na oyọnẹn po numimọ he e tindo lẹ po wutu. E yọnẹn dọ Jehovah nọ basi hihọ́namẹ bosọ nọ hẹn opagbe etọn lẹ di. Eyin mí jlo na tindo yise mọnkọtọn, mí dona to nuplọn gando Jiwheyẹwhe he yin dowatọ Biblu tọn go zọnmii. Dile mí to gbẹnọ sọgbe hẹ nuhe plọn mí te lẹ, mí na tindo kọdetọn dagbe podọ ehe na hẹn yise mítọn lodo.—Heblu lẹ 11:1.

To tintan whenu, Sauli tẹnpọn nado blá gbaja etọn titi na Davidi. Gbaja lọ taidi Goliati tọn nkọ, bo yin bibasi po gànvẹẹ po bọ linlọ̀n etọn lẹ ṣinyọ́n ode awetọ ji. Ṣigba, Davidi tẹnpọn nado zinzọnlin po awhànwù pinpẹn lọ po, amọ́ e mọdọ e ma na pà emi. E ma ko plọn awhàn, enẹwutu e ma nọ saba blá gbaja dai, titengbe gbaja Sauli tọn, yèdọ dawe he dite hugan to akọta Islaeli tọn mẹ! (1 Samuẹli 9:2) E de awù lọ dai bo ze awù etọn titi do—ehe lẹngbọhọtọ de nọ do nado basi hihọ́na lẹngbọ lẹ.—1 Samuẹli 17:38-40.

Davidi ze aglò lẹngbọhọtọ tọn etọn, plá saki de do abọ́ ji bo ze akòtopẹ́ de. Akòtopẹ́ lọ sọgan nọma taidi nujọnu de, amọ́ avùnhonu titengbe de wẹ. E yin bibasi po okàn ayú tọn gaa awe he yin linlọ̀n do apò pẹvi de go po, bo yin avùnhonu dagbe de na lẹngbọhọtọ de. E na yí zánnu de do apò lọ mẹ, bo na lilẹ́ ẹ po awuyiya po, bo nasọ jo okàn lọ dopo do, bọ zánnu lọ na yì fihe e do e hlan tlọlọ. Avùnhonu enẹ nọ tindo kọdetọn dagbe sọmọ bọ awhànfuntọ lẹ nọ yí i zan to whedelẹnu.

Todin he Davidi ko wleawufo, e yawu dedo nado pé kẹntọ etọn. Mí sọgan yí nukun homẹ tọn do pọ́n ẹn dile e to dẹ̀ho vẹkuvẹku bo to zannu flinflin atọ́n he dídí ṣinyan sọn agbàdo lọ mẹ. Enẹgodo, e dedo awhàn nukọn—po wezun po!

Whenue Goliati mọ kẹntọ kiẹkiẹ he jlo na wá pé e, etẹwẹ e lẹn? Mí hia dọmọ: “E yẹ́n-awọnlín do e bo vlẹ ẹ kò, na ewọ bia bosọ yin yọpọ sunnu whanpẹnọ de.” Goliati gbó dọmọ: “Avún de wẹ n’ka yin bọ hiẹ do ja dè e po opò lẹ po ya?” E họnwun dọ e mọ opò Davidi tọn, amọ́ e ma doayi akòtopẹ́ lọ go. E hodẹ̀do Davidi to yinkọ yẹwhe Filistinu lẹ tọn lẹ mẹ bo whlé dọ emi na yí olàn etọn na ohẹ̀ po gbekanlin danji tọn lẹ po.—1 Samuẹli 17:41-44.

Kakajẹ egbehe, gblọndo Davidi tọn gbẹ́ yin dohia yise nujọnu tọn de. Yí nukun homẹ tọn do pọ́n jọja lọ dile e yí awhá do to didọhlan Goliati dọmọ: “Hiẹ ja dè e po ohí po gọna owhán po dludlu de po, ṣigba yẹn ja dè we to oyín Jehovah awhànpa lẹ tọn mẹ, yèdọ Jiwheyẹwhe awhànpa Islaeli tọn, mẹhe hiẹ vlẹko.” Davidi yọnẹn dọ huhlọn po awhànfunnu gbẹtọ tọn po ma yin nujọnu lọ. Goliati ko do mẹmasi hia Jehovah Jiwheyẹwhe, bọ Jehovah nasọ do ede hia ẹ. Dile Davidi dọ do, “Jehovah tọn wẹ awhàn lọ.”—1 Samuẹli 17:45-47.

Davidi mọ kiklo po awhànfunnu Goliati tọn lẹ po ganji. Etomọṣo, Davidi ma dike onú ehelẹ ni gbàhundona ẹn. E ma yinuwa taidi Sauli po  awhànfuntọ etọn lẹ po. Davidi ma yí Goliati jlẹdo ede go. Kakatimọ, Jehovah go wẹ e yí i jlẹdo. Goliati dite na nudi mẹtlu 2,9 bo dite hú mẹlẹpo, ṣigba be e sọtẹ́n eyin yè yí i jlẹdo Nupojipetọ wẹkẹ lọ tọn go ya? Na nugbo tọn, taidi gbẹtọvi depope, e ma hugan wánvú de poun—ehe Jehovah ko wleawufo nado husudo!

Davidi họ̀nwezun dedo kẹntọ etọn dè bo de zannu de sọn aglò etọn mẹ. E yí i do akòtopẹ́ lọ mẹ bo jẹ lilẹ́-lilẹ́ ẹ ji gbọn ota mapote. Goliati dọnsẹpọ Davidi, vlavo to godona awọ̀yinu hẹntọ etọn klikli. Tedidi Goliati tọn ma wà dagbe na ẹn to ojlẹ ehe mẹ, na awọ̀yinu hẹntọ etọn ma dite sọmọ nado basi hihọ́na ota etọn he to jẹhọn mẹ lọ. Podọ finẹ pẹẹ wẹ Davidi lẹn nado dlan zannu lọ do.—1 Samuẹli 17:41.

Davidi dlan zannu lọ. Pọ́n lehe filẹpo to tó-ó do dile zannu lọ dlí dedo. Matin ayihaawe, Jehovah hẹn ẹn diun dọ Davidi ma na yìn zannu devo. Zannu lọ hò nukọnna Goliati bo biọ e mẹ. Dawe gángánsu lọ họ́jai bo sú nukunmẹ ai. Obu na ko jẹ awọ̀yinu hẹntọ lọ ji bọ e na ko doge-wezun mẹ. Davidi dọnsẹpọ Goliati bo yí ohí asuka lọ tọn bosọ sán ota etọn sẹ̀.—1 Samuẹli 17:48-51.

Todin, Sauli po awhànfuntọ etọn lẹ po gọ̀ adọgbigbo mọ. Po awhágbe awhàngbigba tọn daho de po, yé jẹgodona Filistinu lẹ. Awhàn lọ yì pẹpẹ dile Davidi ko dọna Goliati do dọ: “Jehovah . . . nasọ jo mìmẹpo do alọ mítọn mẹ.”—1 Samuẹli 17:47, 52, 53.

To egbehe, devizọnwatọ Jiwheyẹwhe tọn lẹ ma nọ funawhàn to agbasa-liho. Ojlẹ enẹ ko wayi. (Matiu 26:52) Etomọṣo, mí gbẹ́ dona hodo apajlẹ yise Davidi tọn. Taidi Davidi, mí dona nọ mọ Jehovah taidi omẹ nujọnu tọn de—enẹ wẹ taidi Jiwheyẹwhe dopo akàn lọ he mí dona nọ sẹ̀n bosọ nọ dibusi. To whedelẹnu, mí sọgan nọ mọdọ nuhahun mítọn lẹ húagbọ́ mí, ṣigba nuhahun mítọn lẹ ma sọtẹ́n yijlẹdo huhlọn madodogbó Jehovah tọn go. Eyin mí de Jehovah taidi Jiwheyẹwhe mítọn bo nọ do yise hia to ewọ mẹ dile Davidi wà do, avùnnukundiọsọmẹ po nuhahun depope po ma dona gbàhundona mí. Nudepope ma hugan huhlọn awhàngbigba tọn Jehovah tọn!