NDAVICHI aliwahishile nakuya nakulitaka halizavu lyamaswalale vaze vapwile nakuchina nakulishinjejeka. Vevwile woma kulwa jita, kaha vapwile nakuchina oku meso to mumutwe. Uno vyuma muka vyavevwishile woma? Ndavichi atela evwile omu vapwile nakuvulujokanga lijina lyamutu umwe. Amwene lunga wakutaluka nemana muchinema uze kanda amonengaho lyehi.

Lunga kana ikiye Ngolyate. Ndavichi amwene jino ovyo vyalingishile maswalale vevwenga woma. Lunga kana apwile wakutaluka chikuma kuhambakana vatu vosena. Nge kavwalile uvwalo wajitako kaha alemenenga kuhambakana kulema chamalunga vavanene vavali. Apwile navitwa vyajita vyangolo, kaha nawa apwile lunga wakutakama, liswalale wakwipangweji. Ngolyate aputukile kutambakana oku napihilila. Achishinganyekenu muli kusali yapili munakwivwa lizu lyenyi lyalinene, ali nakutambakana nakutoleka maswalale javaIsalele namwangana wavo Saulu. Avalwezele vatume lunga umwe ezenga nakulwa nenyi jita.—Samwele 1, 17:4-10.

VaIsalele valichikiminyine. Mwangana Saulu naikiye evwile woma. Ndavichi awanyine nge chuma kana chapwileko lika hakakweji wamuundu nakuhambakanaho. Maswalale javaFwilishite navaIsalele kavahashile kukumisa vikokojola vyavoko mwomwo Ngolyate atolekelenga vaIsalele hakumbi hakumbi. Echi chevwishile Ndavichi kupihya. Chapwile chasonyi hakuwana nge mwangana wavaIsalele namaswalale jenyi, navandumbu jaNdavichi vatatu vapwile nakulichikimina nawoma. Ndavichi amwene ngwenyi Ngolyate kapwile nakusaula kaha vaIsaleleko, oloze apwile nakusaula Kalunga kavaIsalele, Yehova. Uno vyuma muka alingile Ndavichi hakuwana nge apwile kanyike? Kaha makumbi ano vyuma muka natulinangula kuli Ndavichi halufwelelo lwenyi?—Samwele 1, 17:11-14.

Tuchitalenu havyuma vyasolokele kunyima. Ndavichi apwile nakulisa mikoko jaise nachingoloshi kujipili japwililile kwakamwihi naMbetelema. Apwile kanyike ushikima, wamwaza, nameso enyi nawa apwile amwaza. Omu apwilenga ukawenyi, embilenga kalyalya kenyi. Evwilenga kuwaha kutala vyuma atenga Kalunga, kaha ahotwele uhashi wenyi wakwimba mwomwo yakwimbanga lwola lwosena. Oloze halikumbi kaneli nachingoloshi, Ndavichi vamulwezele akinduluke kwimbo mwomwo ise asakile kumumona.—Samwele 1, 16:12.

Awanyine ise Yese ali nakuhanjika nalunga umwe uze apwile kashinakaji. Ou lunga kana apwile kapolofweto Samwele uze apwile wakushishika. Yehova atumine ou kapolofweto akawavise mwanaYese umwe kupwa mwangana wavaIsalele. Samwele vamunehelele vayaya jaNdavichi vamalunga 7, oloze Yehova amulwezele ngwenyi vosena navakane. Omu ahetele Ndavichi, Yehova alwezele Samwele ngwenyi: “Muwavise, mwomwo ou ikiye ngunasakula.” Ngocho Samwele ambachile lumbinga luze lwapwile namaji akulipwila nakuwahingunwina mumutwe waNdavichi hakachi kavayaya jenyi. Kufuma halwola kanelu, kuyoya chaNdavichi chalumukile. Mbimbiliya yamba ngwayo: “Shipilitu yaYehova yahanyine ngolo Ndavichi kufuma vene halikumbi lize.”—Samwele 1, 16:1, 5-11, 13.

Uno Ndavichi aputukile kufwila kupwa hawangana hahaze vene tahi? Nduma, asuulukile nakuvandamina shipilitu yaYehova yikamulweze lwola atelele  kuputuka kuzata mulimo kanou waunene. Halwola apwile nakuvandamina, atwalileho lika kuzata mulimo wenyi wakufunga mikoko. Mulimo kana auzachile namuchima wenyi wosena nakumika. Mikoko jaise vapwile muponde yakusaka kuvalya kuli ndumba naulusu. Ndavichi kemanyinyine hahasuku hakuhanga ava tunyamako, oloze aswenyeneko nakulwa navo mangana akinge mikoko jaise. Ndavichi ajihile ava visuma vosena.—Samwele 1, 17:34-36; Isaya 31:4.

Kufumaho, Ndavichi vamusanyikile cheka. Puho yenyi yamwaza yahetele nakuli Mwangana Saulu. Numba tuhu apwile muka-kwasa jita wangolo, oloze Yehova kevwililile cheka Saulu uselewa mwomwo kononokele jishimbi jaKalungako. Ngocho shipilitu yaYehova yamufumine, kaha shipilitu yayipi yaputukile kuzata muli ikiye. Apwilenga namatoto, nakulizakamina naulyanyi. Chuma chakafwilenga Saulu omu shipilitu yayipi yamuyanjishilenga shina myaso yize vamwimbililenga. Kaha vatu jaSaulu vamwe vevwile puho yaNdavichi yakwimbanga kanawa myaso, nakupwa nawa muka-kulwa jita wangolo. Ngocho Ndavichi vamusanyikile, kaha apwilenga umwe wavaze vembililenga Saulu myaso muchipango nakumumbachila nawa vitwa vyenyi vyajita.—Samwele 1, 15:26-29; 16:14-23.

Vakweze vanahase kulinangula vyavivulu kulufwelelo apwile nalwo Ndavichi. Nyingililenu ngwenu Ndavichi azachishilenga lwola lwenyi hakulinga vyuma vize vyamulingishile apandame kuli Yehova. Kaha nawa apwile nauhashi uze wamulingishile awane washi milimo. Chachilemunyi shina, etavilile shipilitu yaYehova yimutwaminyine. Chikupu vene, tuvosena tunahase kulinangula vyuma vyakulipwila kuli Ndavichi.—Muka-kwambulula 12:1.

Omu Ndavichi apwilenga nakuzachila Saulu, kakavulu akindulukilenga kwimbo lyenyi nakulisa mikoko jaise, lwola lumwe atwaminenga kuze hatando yayisuku. Halwola kanelu, Yese atumine Ndavichi kuya nakutala vayayenyi vatatu vaze vapwile maswalale jaSaulu. Ndavichi ononokele nakumbachila vayayenyi vyakulya nakuvatwalila kuChinema chaEla. Omu ahetele kuze, alikomokelele hakumona mazavu avali amaswalale achili nakupindasana ngana muze twavulukanga kumaputukilo achihande chino. Vamwe vapwile musali yimwe, kaha vakwavo vapwile musali yikwavo.—Samwele 1, 17:1-3, 15-19.

Ndavichi amwene ngwenyi ukalu kana watela kukuma. Vyuma muka navilingisa maswalale jaYehova, Kalungou ayoya vachine mutu wamokomoko uze alemeselenga tulunga vamakuli? Ndavichi amwene ngwenyi mazu apwile nakuhanjika Ngolyate apwile akutomba Yehova. Ngocho aputukile kulweza maswalele ngwenyi nahase kujiha Ngolyate. Nakushimbula chiku, yaya yaNdavichi wamukulwane, Elyave evwile vyuma apwile nakuhanjika Ndavichi. Ngocho, atenukilile songo yenyi nakumwamba ngwenyi ezanga kaha nakutala jita. Oloze Ndavichi amukumbulwile ngwenyi: “Uno ngunalingi ika? Ami ngunahulisa kaha.” Kufumaho atwalileho lika kuhanjika kuvatu ngwenyi nahase kufungulula Ngolyate, ngocho mutu umwe ayile nakulweza Saulu mazu kana. Mwangana atumine vatu vanehe Ndavichi kuli ikiye.—Samwele 1, 17:23-31.

Ndavichi ahanjikile mazu ano akukolezeza mwangana kutalisa kuli Ngolyate ngwenyi: “Vatu kanda navalizuzukila nawoma mwomwo yayou kaFwilishiteko.” Saulu navatu jenyi valizuzukilile nawoma mwomwo yaNgolyate. Pamo valimbenjele hakulyesekesa kumutu wakutaluka, uze vakuminyinyinenga mumbunda chipwe hatulo yenyi hakuvemika nenyi hamwe. Vapwile nakushinganyeka omu chingazule kana mwavalindumuna mukapyapya kakandende. Oloze Ndavichi kapwile nakushinganyeka  ngochoko. Ngana muze natumona, ikiye amwene ukalu kana mujila yeka. Ngocho alisuwile kuya nakulwa naNgolyate.—Samwele 1, 17:32.

Saulu akanyine ngwenyi: “Kaweshi kuhasa kuya nakulwa nauze kaFwilishiteko mwomwo ove ukanyike wamundende, oloze ikiye napunga liswalale kufuma kuukweze wenyi.” Uno Ndavichi apwile chikupu kanyike wamundende tahi? Nduma, oloze katelemo kuya nakulwa jitako mwomwo apwile nakusoloka unyike. Ndavichi vamutachikijile kupwa chingazule muka-kulwa jita, kaha halwola kana apwile namyaka yakusemuka kafwe 19.—Samwele 1, 16:18; 17:33.

Ndavichi afwelelesele Saulu hakumulweza omu ajihile ndumba naulusu. Kutala apwile nakulivwa tahi? Nduma. Ndavichi atachikijile owo amukafwile afungulule. Ambile ngwenyi: “Yehova uze angupululwile kuvyala vyandumba nakuvyala vyaulusu ikiye mwangupululula kuli ou kaFwilishite.” Omu vamukunywile, Saulu ambile ngwenyi: “Yakonga, Yehova apwenga nayove.”—Samwele 1, 17:37.

Kutala muli nakusaka kupwa nalufwelelo ngana lwaNdavichi tahi? Nyingililenu ngwenu lufwelelo lwaNdavichi kalwazamine havishinganyeka vyenyi kahako. Afwelelele Kalunga kenyi mwomwo yachinyingi apwile nacho navyuma ahichilemo. Atachikijile ngwenyi Yehova eji kukinganga vatu jenyi nakutesamo jishiko jenyi. Ngocho, nge tuli nakusaka kupwa nalufwelelo ngana mwaNdavichi, kaha twatela kutwalaho lika kulinangula muchano hali Kalunga uze apwa mwenya Mbimbiliya. Omu natukavangizanga vyuma natulinangula mukuyoya chetu, kaha natumona vyuma vyamwaza vize navijikijisa lufwelelo lwetu.—WavaHepeleu 11:1.

Hakavanga Saulu asakile kuvwika Ndavichi uvwalo wenyi wajita. Uvwalo kana walifwanyineko nawaNgolyate mwomwo wapwile wakutunga naunengu, kaha nawa wapwile nge chikovelo chachisuku chize chapwile namavanda. Oloze omu Ndavichi esekele kutambuka nauvwalo kana, wamulemenenene, kaha kahashile kuya nawoko. Kavamunangwile uswalaleko, ngocho kejililile kuvwala uvwalo wajitako chikumanyi uvwalo wajita uze avwalilenga Saulu lunga wamusuku kuhambakana vatu vosena muIsalele. (Samwele 1, 9:2). Auzulile nakuvwala uvwalo wenyi uze avwalilenga hakufunga utanga wamikoko.—Samwele 1, 17:38-40.

Ndavichi ambachile mukombo wenyi, nakulisukika ngonga hachifwiji, nakumbata chikapa chenyi chakwashisa. Chikapa kana chasolokele nge chamokomoko, oloze chapwile chitwa changolo. Chikapa chapwile chitwa changolo chize azachishilenga kafunga mwomwo chapwilenga nakalilambu kaze vatuvilenga kusali nasali nakukashililako jisongo jamihya jivali javilambu. Kafunga ahakilenga lilolwa muze mukalilambu nakujingulwisa chize chikapa nangolo jenyi josena nakwechako jino muhya umwe, echi chalingishilenga lilolwa limizuke nangolo chikuma nakusungama hachuma ali nakwasa. Vikapa vyapwile vitwa vyangolo mwomwo vavizachishilenga kuli maswalale mujita.

Ndavichi apwile jino wakulizanga kuya nakulihumangana namuka-kole wenyi. Tunafwelela ngwetu Ndavichi alombele chikuma kuli Kalunga omu anongamine muchinema nakumbata malolwa asenena atanu. Aputukile kulaha jimbushi nakuswenya kuli muka-kole wenyi.

Vyuma muka ashinganyekele Ngolyate omu amwene Ndavichi? “Ambwatwile nakumulumbilisa mwomwo apwile kanyike wamundende, uchila, wamwaza.” Ngolyate ambile ngwenyi: “Uno ngukawa numba wizenga kuli ami nachitondo nyi?” Pamo amwene kaha mbwechi apwile nayo Ndavichi, oloze chikapa kachimweneko. Angwile Ndavichi mulijina lyatulunga twavaFwilishite nakulishinga ngwenyi mwahana nyama yenyi kutujila nakuvisuma vamuchipapa.—Samwele 1, 17:41-44.

Namakumbi ano, mazu akumbulwile Ndavichi asolola lufwelelo lwakukola. Achishinganyekenu ou kanyike walunga ali nakulweza Ngolyate ngwenyi: “Ove uli nakwiza kuli ami napoko yamukwale namakunga avali, oloze ami nangwiza kuli ove mulijina lyaYehova wamayongomena, ou Kalunga kalizavu lyamaswalale javaIsalele ava uli nakuhulamisa.” Ndavichi atachikijile ngwenyi ngolo jamutu navitwa vyenyi kavyapwa vyavilemuko. Ngolyate asawile Yehova Kalunga, kaha Yehova amuzangamishile. Ngana muze ahanjikile Ndavichi, “Yehova ikiye eji kulwanga jita.”—Samwele 1, 17:45-47.

Ndavichi amwene ngwenyi Ngolyate apwile wakuzandama kaha nawa apwile navitwa. Oloze kechelele vyuma kana vimwivwise womako. Kasakile alimbenje ngana muze alimbenjele Saulu namaswalale jenyiko. Ndavichi kalyesekesele kuli Ngolyateko. Oloze esekesele Ngolyate kuli Yehova. Numba tuhu Ngolyate  apwile wamusuku najimita 2.9, nakuhambakana malunga vosena, oloze kalyesekele hamwe naMwata Wakulitulaho uze atengele vyuma vyosenako. Ngana mwavatu vosena, apwile nge katutu wamokomoko, kaha Yehova alizangile kumuzangamisa.

Ndavichi alahile nakuswenya kuli muka-kole wenyi, kaha ambachile lilolwa limwe mungonga yenyi. Alihakilemo nakujingulwisa chikapa chenyi nakuchasa nangolo. Ngolyate apandamine kuli Ndavichi, oku anakukava munyima yamuka-kumumbachila kepwe yenyi. Kusuhwa chaNgolyate chamuhakile muponde, mwomwo muka-kumumbachila kepwe apwile wamwihi, ngocho kahashile kuzundula livoko mangana kepwe yikinge mutwe waNgolyateko. Kaha Ndavichi azozele chikapa chenyi nakumusungamisa kumutwe.—Samwele 1, 17:41.

Ndavichi jino echele lize lilolwa. Achishinganyekenu ocho chishima vafwile vatu hakumona lize lilolwa linashikishila muluholo. Twafwelela ngwetu Yehova ikiye akafwile Ndavichi, kuchina mwapwa namulimo wakuzoza lilolwa likwavo. Lize lilolwa lyashikishilile kumutwe waNgolyate nakwingila muluholo. Uze chingazule alimbukile chameso hamavu. Muka-kumumbachila kepwe pamo achinyine mwomwo yakwivwa woma. Ndavichi jino ayile kuli Ngolyate nakumusomona poko yenyi yamukwale, nakumuteta mutwe.—Samwele 1, 17:48-51.

Saulu namaswalale jenyi vomikile jino. Vaputukile kulikuwa nakuhangasana vaFwilishite. Ngocho, mazu aze Ndavichi alwezele Ngolyate ateselemo akwamba ngwenyi: ‘Yehova mwamihana muvosena mumavoko etu.’—Samwele 1, 17:47, 52, 53.

Makumbi ano vangamba jaKalunga kavazana mujita yakumujimbako. Lwola kana lwahita lyehi. (Mateu 26:52) Chipwe ngocho, twatela kulondezeza lufwelelo lwaNdavichi. Ngana mwaNdavichi, twatela kumona Yehova kupwa mutu nahenyi, Kalunga uze twatela kwivwa woma, uze eji kuyovolanga vatu jenyi. Lwola lumwe tunahase kumona ukalu tuli nawo nge unatoho chikuma, oloze twatela kwijiva ngwetu ukalu kana unapu waundende hakuwesekesa kungolo atwama najo Yehova. Nge natusakula kuzachila Yehova kupwa Kalunga ketu nakumufwelela ngana muze alingile Ndavichi, kaha katweshi kukevwa woma kala ukaluko. Kakweshi ukalu uze mwahona kufungulula Yehovako.