Nkand’a Nzambi uvovanga vo, “o ntela Ngoleyate yinkoso sambanu yo lutama.” (1 Samuele 17:4) Kinkoso kimosi kiakala yo lambuka kwa 44.5 cm, vo i lutama 22.2 cm. Yikonso sambanu yo lutama lumosi, luvananga meta zole ye ndambu (2.9 m). Kansi akaka bevovanga vo o Ngoleyate kakala yo ntela wau ko. Kansi yindula diambu edi: O unu kiaki, o muntu osundidi lambuka mu nza yawonso o ntel’andi 2.7 m. Nga o Ngoleyate 15 cm kakala yovo wanda kikilu kakala? Ngoleyate wawutukila muna kanda dia Refaime, watoma zayakana mu kuma kia ntel’andi wasivi. Nkanda mosi wa esi Ngipito, tuka muna tandu kia 13 vitila tandu kieto, uyikanga vo makesa mankaka bamonwanga wonga kuna zunga kia Kenani bakala yo ntela wa meta zole, (2.4 m). Ozevo, ke tulendi vova ko vo o ntela wa Ngoleyate wa luvunu kwandi.

Va kala ye ntangwa ina akwa ngangu bavezanga lusansu lwa Ntinu Davidi yo yikila lo vo savu. Kansi o unu kiaki se diampasi mu vanga wo. Asatuludi basolwele babu kia nz’ankulu kiasonama vo “nzo a Davidi.” Ke diau kaka ko, Yesu Kristu wayika vo Davidi muntu wakieleka kikilu. (Matai 12:3; 22:43-45) O lusansu lwa Yesu wa Masia lusonganga vo wawutukila muna luvila lwa Ntinu Davidi. (Matai 1:6-16; Luka 3:23-31) Dialudi vo, Davidi wazinga kikilu.

Nkand’a Nzambi uvovanga vo kuna Ndimb’a Ela banwanina. Kansi ke usasilanga mawonso ko. Uvovanga vo, Afelesetia bavanga e ndo ya makesa kuna mongo, vana kati kwa mbanza zole, Soko ye Azeka. Aneyisaele bakala kuna ndambu a ndimba wakala kuna sambu diankaka dia mongo. Nga e fulu yayi izayakene kikilu?

Wá dina diavovua kwa muntu mosi wayenda mu zunga kiakina: “O nsongi a nzila, ona wina vo ke munkwikizi ko, watunata yakuna Ndimb’a Ela. Twayenda tomboki yakuna mbat’a mongo. Twamona o ndimb’a Ela muna yanda. I bosi, o muntu ndioyo watutangila 1 Samuele 17:1-3. Wasonga o nlembo kuna ndimba wauna yo vova vo: ‘Okwakuna, kuna lumonso lweno, i kwakala e mbanz’a Soko.’ Ovilukidi, ovovele diaka vo: ‘Okuna, kuna lunene lweno, i kwakala e mbanz’a Azeka. Afelesetia bavanga e ndo ya makesa vana kati kwa mbanza zazi. Nanga ovava tutelamene i vau Aneyisaele bavangila e ndo ya makesa.’ Yabanza vo Saulu yo Davidi batelama vana ndambu ame. I bosi twakulumuka, twamona e fulu kiakala o nkoko, kansi wayuma kwandi. E fulu kiakina kiazala ye matadi. Yayindula Davidi oningamene vana fulu kiakina yo bonga matadi tanu, mana kavondela Ngoleyate.” O muntu ndioyo ye ndonga yankaka bekwenda kingulanga e fulu kiakina, betoma sivikanga e ziku kia lusansu lwalu lwasonama muna Nkand’a Nzambi.

Ke vena diambu ko dilenda kutufila mu katikisa e ziku kia lusansu lwalu. Davidi yo Ngoleyate bazinga kieleka. E fulu kina banwanina kina yamu unu kiaki. Edi disundidi o mfunu, o lusansu lwalu luna muna Diambu dia Nzambi diavumunwinwa. Nzambi aludi wasonekesa lo, Oyandi “kalendi vuna ko.”—Tito 1:2; 2 Timoteo 3:16.