Karanga te Pipiria “e ono kubiti e okotai angaonu [a Golia] i te roa.” (1 Samuela 17:4) Te kubiti e 17.5 ini te roa; te angaonu, e 8.75 ini. Ka taea te iva tapuae e ono ini. Karanga tetai pae kare a Golia mei tera te roa, inara akamanako ana: I teia tuatau, te tangata roangarere rava atu e tere atu i te varu tapuae e 11 ini. E ngata ainei te akamanako e ono ini a Golia te roangarere atu? No roto aia i te kopu o Rephai, e katiri tangata roangarere. Akakite tetai tataanga Aiphiti o te 13 anere mataiti M.T.N. e, no te au tumutoa uritumu i Kanaana e tere atu i te varu tapuae te roa. No reira kare to Golia tu roroa i te mea tuke.

Kua tauta ana te aronga kimi kite i te tuatua e e mea maani ua te tua o te Ariki ko Davida, inara e ngata te reira i te irinaki. Kua kitea e te aronga keri apinga taito tetai tataanga “te ngutuare o Davida.” Pera katoa, kua taiku a Iesu Mesia ia Davida ei tangata tikai. (Mataio 12:3; 22:43-45) Kua turuia te akataka anga ia Iesu ei Mesia i roto e rua papaanga kopu tangata te akaarianga e no roto mai aia i te uanga o te Ariki ko Davida. (Mataio 1:6-16; Luka 3:23-31) Te taka ua ra e tangata tikai a Davida.

Karanga te Pipiria e kua tupu te tamaki i te Ō o Ela. Akakite katoa e kua puakapa te au Philiseti i runga i tetai puku maunga i rotopu i nga oire e rua, ko Soko e Azeka. Kua noo te ngati Iseraela i tetai tua i te ō e te puku maunga. E ngai tika tikai ainei teia?

Karanga tetai tangata tei atoro i teia ngai e: “Kua apai to matou arataki turoto​—kare i te tangata aere pure—​ia matou ki te Ō o Ela. Kua aaere matou i te ara ki te take o tetai puku maunga. Ia matou e akara ra ki raro i te ō, kua inangaro aia ia matou kia tatau ia 1 Samuela 17:1-3. I reira kua toʼu aia ki tetai tua o te ō, te karanga anga: ‘I to kotou tua kaui, i vai ana te au pueu o Soko. Ki to kotou tua katau,’ i nana ai, ‘te au pueu o Azeka. Kua puakapa te au Philiseti i rotopu i nga oire, te ngai o te puku maunga e akara atura kotou. No reira penei te tu nei tatou ki te ngai i puakapa ai te ngati Iseraela.’ Kua manako au ia Saula e Davida e tu ra i toku ngai. E oti kua eke matou ki raro i te ō, e kua tikoti i te kauvai marō e maata te au toka i reira. Kua akamanako au ia Davida e piko ra ki raro i te koʼi i nga toka e rima, okotai tei tamate ia Golia.” Mei tetai pae rai, kua umere tikai te tangata atoro i te akakiteanga tika o te papaanga Pipiria.

Kare e tumu kia ekoko i te tikaanga tikai o teia tua taito. E aronga tika tikai teia e te au ngai tikai. Tei puapinga rava atu, e tuanga no te Tuatua akauruia a te Atua, no ko mai i te Atua mou, Tei “kore e tika kia pikikaa.”​—Tito 1:2; 2 Timoteo 3:16.