ANTO AMƆTSHI MBUTAKA dia Diolelo diaki Nzambi ekɔ kɛnɛ kele l’otema w’onto; akina fɔnyaka dia ɔsɔ ekɔ etombelo w’oma lo welo wadja anto dia mbidja wɔladi ndo kaamɛ l’andja w’otondo. Kakɔna kafɔnyayɛ?

KƐNƐ KATA BIBLE

‘Nzambi ka l’olongo ayotondja Diolelo diahalanyemaki pondjo. Diɔ diayominola waolelo tshɛ w’ana w’anto.’ (Danyele 2:44) Diolelo diaki Nzambi diekɔ lowandji la mɛtɛ.

AWUI AKINA WAKOKASO MBEKA OMA LO BIBLE

• Diolelo diaki Nzambi diekɔ lo mbolɛ oma l’olongo.​—Mateo 10:7; Luka 10:9.

• Nzambi ekɔ lo nkamba la Diolelo diakɔ dia nkotsha lolango lande l’olongo ndo la nkɛtɛ.​—Mateo 6:10.

NGANDE WAYOYOKADIMOLA?

• Ndooko onto leya

• Keem’edja

• Hadioyaki

KƐNƐ KATA BIBLE

“Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.” (Mateo 24:14) Kam’ayosambishama lokumu l’ɔlɔlɔ tshɛ lo tshɛ, Diolelo diayoya dia ndjokumiya dikongɛ nɛ di’akambo dia kɔlɔ.

AWUI AKINA WAKOKASO MBEKA OMA LO BIBLE

• Ndooko onto la la nkɛtɛ leya l’eshikikelo tshɛ etena kayoya Diolelo diaki Nzambi.​—Mateo 24:36.

• Prɔfɛsiya ya lo Bible mɛnyaka dia keema edja Diolelo diaya suke la ndja.​—Mateo 24:3, 7, 12.