1, 2. Anto ran agpantatalosan so nabasa ed Genesis, tan akin ya makapainteres itan ed sikatayo?

WALA tay nanonotan mon agpantatalosan ya nabasad Biblia? Imanoen pay pigara ya walad unona iran kapitulo na Genesis. Pinatey nen Cain si Abel (Gen. 4:3-8); pinatey nen Lamec so sakey ya kalangweran a laki ya amasakit ed sikato (Gen. 4:23); nankokolkol iray managkomponi na ayayep nen Abraham (Abram) tan Lot (Gen. 13:5-7); minudmora nen Hagar si Sara (Sarai), ya sinmyodot ed si Abraham (Gen. 16:3-6); si Ismael et sinumpa toy amin, tan sikatoy sinumpa na amin.—Gen. 16:12.

² Akin ya abitla ed Biblia iratan ya agpantatalosan? Say sakey a rason et pian naaralan na saray aliwan perpekton totoo no akin ya kaukolan dan pansiansiaen so kareenan. Ipapanengneng met na satan no panon tayon napansiansia so kareenan. Nagunggonaan itayo no basaen tayo ray salaysay ed Biblia nipaakar ed saray totoo ya aktual a nipaarap ed saray problema. Makaaral tayo ed resulta na impansagpot da tan niyaplika tayo iratan ed saray situasyon ed bilay tayo. On, makatulong irayan amin pian naamtaan tayo no antoy nepeg tan agtayo nepeg ya gawaen ed ontan iran situasyon.—Roma 15:4.

3. Antoy aralen ed sayan artikulo?

 ³ Aralen ed sayan artikulo no akin a kaukolan ya resolbien na saray lingkor nen Jehova so agpantatalosan tan no panon dan gawaen itan. Ontan met, pantongtongan iray prinsipyo ed Biblia ya makatulong pian naresolbe ray agpantatalosan tan napansiansia ray maabig ya relasyon ed arum tan ed si Jehova a Dios.

4. Anton ugali so angimpluensya ed interon mundo, tan antoy resulta?

⁴ Si Satanas so manunan sengegan na pankokolkol tan agpantatalosan na saray totoo. Diad Eden, inkatunongan to ya kada too et sarag tan nepeg toy mandesisyon no antoy duga tan aliwa, tan agto kaukolay mandepende ed Dios. (Gen. 3:1-5) Sankaimano so resulta na ontan ya panagnonot. Ipapatnag na dakdakel a totoo tan ulopan ed sayan mundo so agmapasakop ya ugali ya sengegay inkamapaatagey, inkamakasarili, tan kompetisyon. Saramay manpapaimpluensya ed satan ya ugali et singa da met la susuportaan so katunongan nen Satanas ya makabat so pangiyuna ed sarilin panlabayan tan agla ikonsidera so epekto na satan ed arum. Say ontan ya makasarilin kagagawa et manresultad pankokolkol. Maabig no tandaan tayo ya “say toon mipepetang so ulo to et mamapawalay kolkolan; siopaman a misasanok et dakel so pakakalingoan to.”—Pro. 29:22.

5. Antoy imbangat nen Jesus ya gawaen na saray totoo pian naresolbe iray agpantatalosan?

⁵ Balet, imbangat nen Jesus ed saray totoo ya mikareenan ira, anggano nayarin apektaen toy pankaabigan da. Diad Sermon to ed Palandey, alay abig so bilin nen Jesus nipaakar ed panresolbe ed saray posiblin pansengegay agpantatalosan. Singa bilang, pinaseseg to ray disipulo to ya magmaliw a mauyamo, mikakareenan, paliisan da ray liknaan ya pansengegay isanok, miaregloan lan tampol, tan aroen da ray mamubusol ed sikara.—Mat. 5:5, 9, 22, 25, 44.

6, 7. (a) Akin ya importantin resolbien ya tampol iray agpantatalosan? (b) Anto ray kaukolan ya itepet na saray totoo nen Jehova ed sarili da?

⁶ No agtayo labay so mikareenan ed arum, sayang labat so pansasagpot tayo ed panaglingkor ed Dios—a singa say panagpikasi, pipiaral, panagpulong, tan arum ni ran kabiangan na panagdayew tayo. (Mar. 11:25) Ag-itayo makapikaaro ed Dios no agtayo mabulos ya perdonaen iray lingo na arum.—Basaen so Lucas 11:4; Efeso 4:32.

⁷ Kaukolan ya usisaen a maong na kada Kristiano so sarili to nipaakar ed panamerdona tan pakawalaay maabig ya relasyon ed arum. Kasin mabulos mon peperdonaen iray kapananisiaan mo? Maliket ka kasin miuulop ed sikara? Iilaloan nen Jehova ya mamerdona iray lingkor to. No ididiktay konsiensiam ya wala ray kaukolan mon paaligwasen, ipikasim ed si Jehova ya tulongan to kan gawaen itan! Seguradon dengelen na Ama tayod tawen iratan ya mapaabeban pikakasi tan ebatan to iratan.—1 Juan 5:14, 15.

8, 9. Antoy nepeg tayon gawaen no naopendi itayo?

⁸ Lapud aliwan perpekto iray totoo, seguradon walay ibaga odino gawaen na arum ya makaopendi ed sika. Ag-itan napaliisan. (Ecl. 7:20; Mat. 18:7) Antoy reaksion mo ey? Imanoen pay agawa ed sayan situasyon: Diad sakey ya okasyon ya inatendian na pigaran agagi, imbano na sakey ya sister so duaran brother tan sakey ed sikara et naopendi ed imbaga to. Kaalis na sister, binalaw na naopendin brother imay sister lapud imbaga  to. Balet, impanonot na samay sakey ya brother ya say sister et 40 taon lan matoor ya manlilingkor ed si Jehova diad mairap iran kipapasen tan amta ton anggapoy mauges ya intension na sister. Kayarin nannonot ya agano imay naopendin brother, imbaga to, “Duga ka.” Kanian agla binmaleg so isyu.

⁹ Antoy naaralan ed satan ya eksperiensya? Akadepende ed sika no antoy magmaliw ya reaksion mo ed saray situasyon ya posiblin pakaopendian. Say sakey a maaron too et sakbongan to ray angkelag a lingo. (Basaen so Proverbio 10:12; 1 Pedro 4:8.) Parad si Jehova et “karakpan” ed sika so “pamalabas na kasalanan.” (Pro. 19:11; Ecl. 7:9) Kanian say unonan itepet mod sarilim no walay mantrato ed sika ya makapasakit odino aliwan marespeto et: ‘Sarag ko kasin palampasen la iya? Kaukolan ko ni kasin gawaen iyan isyu?’

10. (a) Antoy inmunan reaksion na sakey ya sister ed panagbalaw? (b) Anton simbawa ed Biblia so akatulong ed samay sister pian napansiansia toy kareenan na nonot to?

¹⁰ Nayarin mairap ya palampasen so panagbalaw. Imanoen pay alimbawa na sakey a payunir ya tawagen tayon Lucy. Wala ray negatibon komento nipaakar ed ministeryo to tan ed panguusar toy panaon to. Adismaya si Lucy kanian kinerew toy simbawa na saray maespiritual ya brother. Imbaga to: “Akatulong ed siak so simbawa ra ya base ed Biblia pian napansiansiak so dugan panmoria ed saray opinyon na arum tan manpokus ed no siopay mas importante—si Jehova.” Apaseseg si Lucy nen binasa toy Mateo 6:1-4. (Basaen.) Sikatoy apanonotan ya say nepeg ya pampokusan to et say pamaliket ed si Jehova. “Anggano wala ray negatibon komento na arum nipaakar ed saray gagawaen ko,” so kuan to, “siansia nin maliket ak ta amtak ya gagawaen koy anggaay nayarian ko ya naawat so panangabobon nen Jehova.” Nen naisip to iya, makabat ya nandesisyon si Lucy ya palampasen to la ray negatibon ibabaga na arum.

11, 12. (a) Antoy nepeg ya ikiwas na sakey a Kristiano no isipen ton “walay babarongan” na sakey ya agi ed sikato? (b) Antoy naaralan tayo ed ginawa nen Abraham sanen niresolbe toy problema? (Nengnengen so litratod gapo na artikulo.)

¹¹ “Amin tayo et naynay a nalilingo.” (Sant. 3:2) No bilang ta naamtaan mo ya asakitan so sakey a brother ed imbagam odino ginawam, antoy nepeg mon gawaen? Inkuan nen Jesus: “No mangiyaapay kad altar tan anonotan mon say agim et walay babarongan tod sika, itilak moy apay mo ed arap na altar tan anap mo so agim. Mikareenan ka nid sikato, insan kapawil mo, iter mo so apay mo.” (Mat. 5:23, 24) Base ed simbawa nen Jesus, mitongtong kad agim. Agmo lilingwanan no antoy nepeg ya gagalam. Aliwan pian tetelen so agim noagta pian bidbiren moy lingom, tan mikareenan ka. Importantin maong so pikareenan ed saray kaagian tayo.

¹² Sakey ed saray salaysay ed Biblia ya mareen a niresolbe na saray lingkor na Dios so isyun posiblin pansengegay inkaapag-apag et samay agawad si Abraham tan say kaanakan ton si Lot. Pareho iran walaay ayayep, tan nankokolkol iray managkomponi na ayayep da nipaakar ed dalin ya pankabkaban na saray ayep da. Lapud labay nen Abraham ya naresolbe lay agpantatalosan, pinampili toy Lot no iner so labay to ya panayaman na sankaabungan to. (Gen. 13:1, 2, 5-9) Talagan balibalin alimbawa! Mas inyuna nen Abraham so kareenan nen say sarilin pankaabigan to. Kasin alugi lapud inkamapalugar to? Andin balot. Kayari na satan ya agawa ed sikara nen Lot, insipan nen Jehova ya dakel so iter ton bendisyon ed si Abraham. (Gen.  13:14-17) Agbalot abuloyan na Dios ya saray lingkor to et tuloytuloy ya nalugi lapud impangiyaplika dad saray prinsipyo na Dios tan impanresolbe dad saray agpantatalosan panamegley na aro. ^[1]

13. Antoy reaksion na sakey a manangasikaso ed ansasakit iran salita ed sikato, tan antoy naaralan tayo ed alimbawa to?

¹³ Imanoen iyan situasyon ed panaon tayo. Nen tinawagan na balon manangasikaso ed sakey a departamento ed kombension so sakey a brother no kasin sarag toy manboluntaryo, wala ray ansasakit ya salitan imbaga na brother insan to la inleksab so telepono. Walay sakit na linawa tod datin manangasikaso. Agnaopendi so balon manangasikaso ed reaksion na brother, balet agto met basta pinalampas itan. Kayari sakey oras, tinawagan to lamet tan imbaga ton agni ra sankabat, insan to imbaga ya no nayari et resolbien da so agda impantalosan. Kayari sakey simba, nannengneng iran dua ed sakey ya Kingdom Hall. Nampikasi ira tan sakey oras iran nantongtong, tan inistorya na brother so agawa ed sikato. Masimpatyan dinmengel so manangasikaso insan to innabang iray naaralan tod Biblia, tan maabig so nansumpalan na impantongtong da. Kayari na saman, namboluntaryo so brother diad kombension tan misalsalamat ed samay manangasikaso lapud kalmado tan maabig so impantrato tod sikato.

14, 15. (a) Kapigan so nepeg tayon pangiyaplika ed simbawa ed Mateo 18:15-17? (b) Anto ray taloran kundang ya imbaga nen Jesus, tan antoy nepeg ya gagala tayo diad pangiyaplika ed saratan?

¹⁴ Kaslakan ya agpantatalosan na saray Kristiano et naresolbe na saramay mismon nalalanor labat. Balet, imbaga nen Jesus ya wala ray situasyon ya ompan kaukolan ya ipasabi ed kongregasyon. (Basaen so  Mateo 18:15-17.) Antoy epekto no say sakey a nankasalanan et ag-ondengel ed agi to, ed saray akatasi, tan ed kongregasyon? Kaukolan ya sikatoy ipasen ya “singa sakey a too na saray nasyon tan singa sakey a managsingil na buis.” Diad panaon tayo, nibaga tayon sikatoy nepeg ya nadispelo. Ipapanengneng na sayan seryoson kundang ya satan a “kasalanan” et aliwan simplin agpantatalosan. Imbes, sakey itan ya (1) kasalanan ya nayarin resolbien na saramay mismon nalalanor, balet sakey met itan ya (2) seryoson kasalanan ya kaukolan so pandispelo no agnaresolbe. Satan a kasalanan et nayarin panagsaol odino panagpauges ya nayarin akaderalan na reputasyon na sakey a too. Say taloran kundang ya imbaga nen Jesus et onaplika labat no ontan so situasyon. Agkaiba ed satan iray kasalanan a singa say pikakalugoran, homoseksualidad, apostasya, idolatriya, odino arum ni ran ambelat ya kasalanan ya talagan kaukolan so panangasikaso na saray elder ed kongregasyon.

¹⁵ Say gagala na simbawa nen Jesus et pian tulongan so sakey ya agi panamegley na aro. (Mat. 18:12-14) Unona, kaukolan ya salien ya resolbien so isyu ya sikaran dua labat. Ompan kaukolan so maminpigan pikatunongan ed nankasalanan. No agni naresolbe, katongtongen so nankasalanan ya kaiba iray akatasi ed aliwan ginawa to odino arum ya makatulong pian naamtaan no talaga kasin walay agawan kasalanan. No aresolbim so isyu lapud tulong da, “apapawil mo so agim.” Say pangibaga labat na isyu ed saray elder et no agni itan naresolbe anggano aminpiga lan sinali ya tulongan so nankasalanan.

16. Akin et praktikal tan maaro so pangiyaplika ed simbawa nen Jesus?

¹⁶ Mataltalag iray situasyon ya kaukolan ya gawaen na saray agagi iray taloran kundang ya walad Mateo 18:15-17. Makapaseseg itan ta nasolusyonan lay sakey a problema antis nin onloor so situasyon ya say agmagbabawin nankasalanan et kaukolan ya ekalen ed kongregasyon. Kaslakan, namoria la na nankasalanan so lingo to tan ipetek to itan. Namoria met na samay naopendi ya agi ya agto la kaukolan ya anapey lingo tan perdonaen to la. Antokaman so situasyon, impabitar nen Jesus ya agnepeg ya mibabalin tampol so kongregasyon ed agpantatalosan. Mibali labat iray elder no agawaan lay unonan duaran kundang tan walay mabiskeg ya ebidensya no anton talagay agawa.

17. Anto ran bendisyon so nagamoran tayo no mikareenan tayo ed arum?

¹⁷ Anggad agni anampot iyan sistema na mundo, siansia nin aliwan perpekto iray totoo tan makaopendi ni ra ed arum. Duga labat so insulat na disipulon si Santiago: “No walay agnalilingo ed panagsalita to, sikatoy perpekto, a nakontrol to met so interon laman to.” (Sant. 3:2) Pian naresolbe iray agpantatalosan, kaukolan tayon pansagpotan ya ‘anapen so kareenan tan panggunaetan ya pansiansiaen itan.’ (Sal. 34:14) No mikareenan itayo, panliketan tayoy maabig ya relasyon ed saray agagi tan niwalay pankakasakey ed kongregasyon. (Sal. 133:1-3) Tan say importante ed amin et nawalaan tayoy maabig a relasyon ed si Jehova, say “Dios a mangiiter na kareenan.” (Roma 15:33) Saratan ya bendisyon et nagamoran na saramay reresolbien day agpantatalosan panamegley na aro.