1, 2. Menshoná algun konflikto ku tin den e buki di Génesis, i pakiko esaki mester interesá nos?

ABO a yega di para ketu na e konfliktonan personal ku tin den Beibel? Tuma nota di algun di nan den e promé kapítulonan di Génesis. Kain a mata Abel. (Gén. 4:3-8) Lamèk a mata un yònkuman ku a dal e. (Gén. 4:23) E wardadónan di bestia di Abraham (Abram) i esnan di Lòt a diskutí ku otro. (Gén. 13:5-7) Hagar a despresiá Sara (Sarai), kende na su turno a rabia ku Abraham. (Gén. 16:3-6) Ismael a lanta kontra di tur hende, i tur hende a lanta kontra dje.—Gén. 16:12.

² Dikon Beibel ta menshoná e konfliktonan ei? Wèl, un motibu ta ku e relatonan ei ta yuda hende imperfekto mira pakiko ta importante pa mantené pas. Tambe nan ta mustra nos kon pa hasi esei. Ora nos lesa e relatonan ei, nos ta siña tokante hende real ku a trata ku problema real. Nos ta mira kon nan esfuersonan a duna bon resultado, i esei por yuda nos trata ku e situashonnan ku nos ta enfrentá den bida. Sí, tur esaki por yuda nos analisá kiko nos mester hasi òf evitá di hasi ora nos haña nos ku problema similar.—Rom. 15:4.

3. E artíkulo akí lo trata ki tópikonan?

³ Den e artíkulo akí, nos lo konsiderá dikon sirbidónan di Yehova tin ku resolvé desakuerdo i kon nan por logra esei.  Ademas, e ta referí na prinsipionan bíbliko ku lo yuda nan trata ku konflikto i yuda nan mantené un bon relashon ku Yehova Dios i ku otro hende.

4. Ki aktitut a plama rònt mundu, i kiko ta e konsekuensianan?

⁴ Ta Satanas ta esun ku mester kulpa na promé lugá pa e konflikto- i desakuerdonan ku ta reina awe. Den Hòfi di Edén el a insinuá ku kada hende por i mester disidí pa su mes kiko ta bon i kiko ta malu, sin dependé riba Dios. (Gén. 3:1-5) E konsekuensianan di esei ta klaramente bisto. Mundu ta pèstá ku hende ku tin un spiritu di independensia, i esei ta fomentá orguyo, egoismo i rivalidat. Hende ku ta laga e spiritu akí influensiá nan, den un sentido, ta aseptá loke Satanas ta insinuá, esta, ku ta mihó bo sigui bo mes interesnan sin importá kon esei lo afektá otro hende. E egoismo ei ta hiba na problema. Ta bon pa nos kòrda tambe ku “un hende rabiá ta lanta pleitu, i un hende furioso ta hasi hopi transgreshon.”—Pro. 29:22.

5. Ora surgi un desakuerdo, ki konseho di Hesus nos por sigui?

⁵ Na kontraste, Hesus a siña hende pa buska pas, asta ora esei por parse di sali nan malu. Den e Sermon Riba Seru Hesus a duna ekselente konseho tokante kon pa trata ku desakuerdo òf konflikto ku por surgi. Por ehèmpel, el a urgi su disipelnan pa nan ta di genio suave, pa ta pasífiko, pa kita tur loke por kousa rabia, pa resolvé desakuerdo mesora i pa stima nan enemigu.—Mat. 5:5, 9, 22, 25, 44.

6, 7. (a) Dikon ta importante pa nos resolvé desakuerdo mesora? (b) Ki preguntanan tur sirbidó di Yehova tin ku hasi nan mes?

⁶ Nos esfuerso pa sirbi Dios, loke ta inkluí orashon, asistensia na reunion, sirbishi i otro aspekto di nos adorashon, lo ta en bano si nos ta nenga di hasi pas ku otro hende. (Mar. 11:25) Nos no por ta amigu di Dios si nos no ta dispuesto pa pordoná fayo di otro hende.—Lesa Lukas 11:4; Efesionan 4:32.

⁷ Kada kristian mester pensa bon i ser franko ku su mes pa sa si e ta dispuesto pa pordoná otro hende i si e ta na pas ku tur hende. Bo ta pordoná bo rumannan libremente? Bo ta gusta asosiá ku nan? Yehova ta ferwagt ku su sirbidónan ta pordoná otro. Si bo konsenshi ta bisa bo ku bo mester mehorá den e aspekto akí, pidi Yehova yuda bo hasi e kambionan ei. Nos Tata selestial lo skucha nos petishon humilde i kontestá nos.—1 Huan 5:14, 15.

8, 9. Kiko nos mester hasi ora nos sinti nos ofendí?

⁸ Komo ku tur hende ta imperfekto, tardi òf trempan un hende lo bisa òf hasi algu ku lo ofendé bo. Esaki ta inevitabel. (Ekl. 7:20; Mat. 18:7) Kon lo bo reakshoná? Tuma nota di loke a yega di pasa un biaha: Na un reunion sosial di rumannan, un ruman muhé a kumindá dos ruman hòmber na un manera ku ún di nan a haña ta inapropiá. Ora e dos ruman hòmbernan akí tabata nan so, esun ku a sintié ofendí a kuminsá kritiká e ruman muhé pa loke el a bisa. Sinembargo, e otro ruman hòmber a rekord’é ku e ruman muhé a sirbi Yehova fielmente pa 40 aña largu bou di sirkunstansia  difísil. Pues e tabatin sigur ku e ruman muhé no tabatin intenshon di ofend’é. Despues di a pensa un ratu, e ruman ku a sintié ofendí a bisa: “Bo tin rason.” Komo resultado, e asuntu a keda te ei.

⁹ Kiko e eksperensia akí ta siña nos? E manera ku bo ta reakshoná ora bo sinti bo ofendí ta den bo mes man. Amor ta yuda nos pasa por haltu di fayonan chikitu. (Lesa Proverbionan 10:12; 1 Pedro 4:8.) Yehova ta keda masha kontentu ora nos no ta “tuma nada na malu.” (Pro. 19:11, BPK; Ekl. 7:9) Pues e promé kos ku bo tin ku puntra bo mes ora bo sinti ku un hende a falta bo rèspèt òf no a trata bo na un manera bondadoso ta: ‘Mi por pasa por haltu di e fayo akí? Mi tin ku hasi un pieu bira un baka?’

10. (a) Kon un ruman muhé a reakshoná na promé instante ora el a hañ’é ku krítika? (b) Ki konseho bíbliko a yuda e ruman akí mantené su pas mental?

¹⁰ No ta semper fásil pa kontrolá e manera ku nos ta reakshoná ora hende kritiká nos. Tuma por ehèmpel e kaso di un pionero ku nos lo yama Lucy. Algun komentario negativo tokante su sirbishi i kon e tabata usa su tempu tabata skeiru rònt. Esei a molesti’é, i p’esei el a buska konseho serka algun ruman hòmber maduro. E ta konta: “Nan konseho basá riba Beibel a yuda mi pa keda ku un punto di bista korekto tokante opinion di hende i pa enfoká riba ken ta mas importante, esta, Yehova.” Lucy a haña hopi animashon ora el a lesa Mateo 6:1-4. (Les’é.) E versíkulonan ei a rekord’é ku e kos di mas importante ta pa hasi Yehova kontentu. El a agregá: “Asta si otro hende ta papia malu di mi aktividatnan, mi ta felis ya ku mi sa ku mi ta hasi mi bèst pa haña Yehova su aprobashon.” Despues di yega na e konklushon ei, el a tuma e desishon sabí di pasa por haltu di e komentarionan negativo ei.

11, 12. (a) Kiko un kristian mester hasi si e ta pensa ku su ruman tin “algu kontra” dje? (b) Kiko nos por siña for di e manera ku Abraham a trata ku un problema? (Wak e promé plachi.)

¹¹ “Nos tur ta trompeká hopi biaha.” (Sant. 3:2) Imaginá ku bo ta haña sa ku bo a bisa òf hasi algu ku a hùrt un ruman. Kiko bo mester hasi? Hesus a bisa: “Si bo trese bo ofrenda na altar, i einan bo kòrda ku bo ruman tin algu kontra bo, laga bo ofrenda einan, dilanti di altar, i bai. Hasi pas ku bo ruman promé, i despues, ora bo bini bèk, duna bo ofrenda.” (Mat. 5:23, 24) Di akuerdo ku e konseho ei, papia ku bo ruman. Ora boso papia, bo meta no ta pa tira falta riba dje, ma pa atmití bo fout i hasi pas. Pues loke ta mas importante ta pa nos ta na pas ku nos rumannan.

¹² Den Beibel tin un relato kaminda sirbidónan di Dios a resolvé na un manera pasífiko un desakuerdo ku por a kousa divishon. Ta trata aki di e relato di Abraham ku su subrino Lòt. Tur dos hòmber tabatin krio di bestia, i aparentemente nan wardadónan a diskutí ku otro tokante tereno kaminda nan bestianan por a haña yerba. Pa plakia e situashon tenso, Abraham a laga Lòt skohe promé unda e tabata ke bai biba ku su famia. (Gén. 13:1, 2, 5-9) Ki un bon ehèmpel! Abraham a buska pas i no su mes interes. Abraham a sali pèrdí pa su muestra di generosidat? Niun ora so! Nèt despues di e insidente ku Lòt,  Yehova a primintí Abraham ku lo el a dun’é hopi bendishon. (Gén. 13:14-17) Hamas Dios lo laga su sirbidónan sufri pèrdida permanente si semper nan komportá nan mes di akuerdo ku prinsipionan bíbliko i resolvé desakuerdo ku amor. ^[1]

13. Kon un superintendente a reakshoná ora un ruman a papia na un manera skèrpi kuné, i kiko nos por siña for di su ehèmpel?

¹³ Tuma por ehèmpel un kaso den nos tempu. Ora un superintendente nobo pa un departamento di kongreso a bèl un ruman hòmber pa puntr’é si e kier a yuda, e ruman hòmber akí a duna un kontesta skèrpi i dal e telefòn sera. Ainda e ruman akí tabata karga renkor kontra e superintendente ku tabatin promé. E superintendente nobo no a tuma e remarkenan akí na kurason, ma e no por a ignorá nan tampoko. Ún ora despues, e superintendente a bolbe yam’é i a sugerí pa nan papia kara kara ya ku nan no a yega di topa otro mes ainda. Despues di un siman, nan a topa na un Salòn di Reino. Despues di hasi orashon, nan a papia pa un ora largu, i e ruman a konta e superintendente kiko a pasa. E superintendente a skuch’é atentamente i kompartí algun teksto bíbliko kuné, i e dos rumannan a keda bon ku otro. Mas despues, e ruman a yuda na e kongreso i ta gradisidu ku e superintendente a trat’é na un manera kalmu i bondadoso.

14, 15. (a) Ki ora nos mester apliká e konseho na Mateo 18:15-17? (b) Ki tres paso Hesus a menshoná, i ku ki meta bo mester apliká nan?

¹⁴ Mayoria di desakuerdo ku surgi entre rumannan por i tin ku ser resolvé den privá, entre nan ku nan. Sinembargo, Hesus a bisa ku den sierto situashon  mester enbolbé e kongregashon. (Lesa Mateo 18:15-17.) Kiko ta sosodé si un ruman nenga di skucha e ruman ku el a faya kuné, e testigunan i e kongregashon? Mester trat’é “meskos ku un hende di e nashonnan i meskos ku un kobradó di belasting.” Den nos tempu, esei ke men ku e mester ser ekspulsá. Esaki ta indiká ku e “piká” no ta djis un desakuerdo chikitu. Mas bien, e ta (1) un piká ku e rumannan enbolbí por resolvé entre nan ku nan, pero tambe (2) un piká ku ta asina serio ku un persona por ser ekspulsá si e desakuerdo no keda resolvé. Tal piká por enserá algun tipo di froude òf kalumnia ku ta daña reputashon di un persona. E tres pasonan akí ku Hesus a menshoná ta konta solamente ora tal situashon presentá. Esaki no ta inkluí piká manera adulterio, homoseksualidat, apostasia, idolatria òf otro piká grave ku ta rekerí atenshon di e ansianonan di kongregashon.

¹⁵ E meta di Hesus su konseho tabata pa yuda un ruman motivá pa amor. (Mat. 18:12-14) Di promé, mester purba di resolvé e desakuerdo sin enbolbé otro hende. Kisas ta nesesario pa papia mas ku un biaha ku e ruman ku a faya ku bo. Si esei no yuda, papia kuné den presensia di testigu di e mal echo òf ku otro ruman ku por bisa si di bèrdat ta trata aki di un mal echo. Si bo a logra resolvé e desakuerdo ku nan yudansa, “bo a gana bo ruman bèk.” Bo mester bai serka ansiano solamente despues ku bo a purba vários biaha di yuda e ruman ku a faya ku bo sin logra.

16. Kiko ta mustra ku ta práktiko i amoroso pa sigui e konseho di Hesus?

¹⁶ Rara bes rumannan mester sigui tur e tres pasonan ku Mateo 18:15-17 ta papia di dje. Esaki ta masha animante ya ku generalmente desakuerdonan sa keda resolvé promé ku un pekadó ku no arepentí mester ser ekspulsá for di e kongregashon. Mayoria di biaha e ruman ku a peka kontra un otro ta rekonosé ku el a faya i ta drecha e asuntu. E ruman ku a ser di hùrt kisas ta sinti ku e no tin motibu bálido mas pa keha e otro ruman i ta preferá di pordon’é. En todo kaso, e palabranan di Hesus ta indiká ku no mester enbolbé e kongregashon promé ku ta nesesario. E ansianonan por intervení solamente ora a sigui e dos promé pasonan i ora tin prueba sólido di loke a pasa.

17. Ki bendishon nos lo haña ora nos ta “buska pas”?

¹⁷ Tanten ku e sistema di kosnan akí ta eksistí, hende lo keda imperfekto i lo sigui faya ku otro. Ku bon motibu anto disipel Santiago a skirbi: “Si un hende no ta trompeká den loke e ta bisa, e ta un hòmber perfekto, kapas pa frena tambe henter su kurpa.” (Sant. 3:2) Pa nos por resolvé desakuerdo, nos mester hasi hopi esfuerso pa “buska pas i siguié.” (Sal. 34:14) Si nos buska pas, nos lo tin un bon relashon ku nos rumannan i lo kontribuí na union di e kongregashon. (Sal. 133:1-3) Riba tur kos, nos lo tin un bon relashon ku Yehova, e “Dios ku ta duna pas.” (Rom. 15:33) Hende ku ta resolvé desakuerdo ku amor ta disfrutá di e bendishonnan akí.