1, 2. Hu nao samfala wea Bible buk Genesis storyim wea garem problem witim narawan, and wanem nao iumi savve lanem from olketa story hia?

BIBLE story abaotem samfala wea garem problem witim narawan. Tingim samfala example long Bible buk Genesis. Cain hem killim dae Abel. (Gen. 4:3-8) Lamech killim dae wanfala young man wea hitim hem. (Gen. 4:23) Olketa man wea lukaftarem sheepsheep bilong Abraham raoa witim olketa man wea lukaftarem sheepsheep bilong Lot. (Gen. 13:5-7) Hagar hem ting daonem Sarah, and Sarah hem kros long Abraham. (Gen. 16:3-6) Ishmael raoa witim evri pipol and evriwan les long Ishmael. (Gen. 16:12) Evri story hia insaed first 16-fala chapter long Genesis nomoa!

² Why nao Bible garem olketa story olsem? Wanfala reason hem bikos iumi savve lane from example bilong olketa hia wea no perfect wea garem problem witim narawan. Iumi tu no perfect, so taem iumi garem problem witim narawan, olketa gudfala example insaed Bible savve helpem iumi for savve wanem for duim, and olketa nogud example savve helpem iumi for savve wanem for no duim. (Rome 15:4) Diswan savve helpem iumi for gohed stap gud witim olketa narawan.

3. Wanem nao bae iumi storyim long disfala study?

³ Long disfala study, bae iumi storyim why iumi mas stretem  problem witim narawan, and hao iumi savve duim datwan. Bae iumi lanem tu samfala Bible principle wea savve helpem iumi long diswan mekem iumi savve stap gud witim nara pipol, and fren gud witim Jehovah.

4. Wanem tingting nao staka pipol garem distaem, and wanem nao kamaot from datwan?

⁴ Satan nao bihaenem wei wea staka pipol distaem divaed and no stap gud tugeta. Why nao iumi sei olsem? Long Eden, Satan sei iumi no needim God for talem iumi wanem hem stret and wanem hem no stret. Hem sei iumi savve disaedem datwan seleva. (Gen. 3:1-5) Bat evri samting wea gohed long world distaem showimaot kaen tingting olsem hem mekem staka problem kamap. Long tingting bilong staka pipol distaem, olketa garem raet for disaedem seleva wanem hem stret and wanem hem no stret. Olketa praod, selfish, and laek winim narawan, and no tingim feeling bilong narawan. Kaen tingting olsem savve mekem pipol raoa witim each other. Bible sei sapos iumi garem wei for kros kwiktaem, bae iumi evritaem raoa witim narawan and duim staka sin.—Prov. 29:22.

5. Wanem nao Jesus sei man mas duim for stap gud witim narawan?

⁵ Long Sermon long Maunten, Jesus talem olketa disaepol hem barava important for olketa mas waka hard for stap gud witim narawan. Olsem example, hem talem olketa for hambol, no raoa and stap gud witim narawan, no gohed for kros, kwiktaem stretem eni problem, and lovem olketa enemy.—Matt. 5:5, 9, 22, 25, 44.

6, 7. (a) Why nao hem important for kwiktaem stretem problem witim narawan? (b) Wanem nao samfala kwestin wea hem gud for iumi evriwan ting raonem?

⁶ Olketa samting wea iumi duim for worshipim God, olsem wei for prea, preaching waka, and for attendim olketa meeting, bae iusles sapos iumi no stretem problem wea iumi garem witim olketa brata and sista bilong iumi. (Mark 11:25) Sapos iumi laekem Jehovah for hapi long iumi, iumi mas forgivim olketa wea mekem iumi feel nogud. —Readim Luke 11:4; Ephesus 4:32.

⁷ Jehovah sei pipol bilong hem mas willing for forgivim narawan and stap gud witim each other. Ting raonem tufala kwestin hia: ‘Waswe, mi willing for forgivim olketa brata and sista bilong mi? Waswe, mi hapi for associate witim olketa?’ Sapos iu luksavve wei for no forgivim narawan hem wanfala wik point bilong iu, prea long Jehovah and askem hem for helpem iu. Dadi bilong iumi long heven bae ansarem prea bilong iu.—1 John 5:14, 15.

8, 9. Wanem nao iumi mas duim sapos eniwan mekem iumi feel nogud?

⁸ Iumi evriwan no perfect so bae samfala taem pipol talem or duim samfala samting wea mekem iumi feel nogud. (Eccl. 7:20; Matt. 18:7) Wanem nao bae iu duim sapos samting olsem happen long iu? Tingim disfala experience: Long wanfala hapitaem, wanfala sista talem wanfala toktok long tufala brata. Bat wanfala long tufala no hapi long wanem sista hia talem, and taem sista lusim tufala, hem talem feeling bilong hem long nara brata. Bat nara brata hia storyim wei wea datfala sista hem faithful long Jehovah for 40 year nomata hem kasem staka hard taem. Hem sei hem no tingse datfala sista min for spoelem feeling bilong datfala brata. Wanem nao brata wea feel nogud hem duim? Hem sei: “Iu tok tru.”  Then hem disaed for forgetim nomoa samting wea happen.

⁹ Wanem nao iumi lanem from disfala experience? Iumi seleva nao savve disaed sapos iumi bae letem samting wea narawan talem or duim for mekem iumi feel nogud. Man wea showimaot love bae hem willing for forgivim narawan. (Readim Proverbs 10:12; 1 Peter 4:8.) Jehovah hem hapi tumas taem iumi forgivim narawan. (Prov. 19:11; Eccl. 7:9) So sapos eniwan talem or duim samting wea mekem iumi feel nogud, tingim diswan: ‘Waswe, hem samting wea mi shud gohed tingim? Or waswe, hem samting wea mi savve forgetim nomoa?’

10. (a) Wanem nao wanfala sista duim taem samfala talem nogud samting abaotem hem? (b) Wanem nao helpem hem for no gohed feel nogud long olketa?

¹⁰ Taem olketa narawan talem nogud samting abaotem iumi, maet datwan hem hard samting for deal witim. Tingim wanfala pioneer sista, wea iumi bae kolem hem Lucy. Samfala long kongregeson talem nogud samting abaotem wei wea hem duim pioneer waka bilong hem. Lucy barava feel nogud and askem samfala mature brata for advaes. Wanem nao happen? Lucy sei olketa showim hem samfala scripture wea helpem hem for no tingim tumas nogud toktok wea olketa narawan talem, bat for luksavve tingting bilong Jehovah nao hem important. Taem hem readim Matthew 6:1-4, datwan encouragem hem. (Readim.) Olketa verse hia helpem hem for luksavve main samting nao hem for mekem Jehovah hapi. So hem disaed for forgetim nomoa nogud toktok bilong olketa narawan. Distaem, Lucy hem hapi bikos hem savve hem duim best bilong hem for mekem Jehovah hapi, and bae hem no wari sapos eniwan talem nogud samting abaotem hem.

11, 12. (a) Wanem nao iumi shud duim sapos iumi luksavve brata or sista bilong iumi ‘feel nogud long iumi’? (b) Wanem nao iumi savve lanem from samting wea Abraham duim for stretem wanfala problem? (Lukim piksa long start bilong study.)

¹¹ “Iumi evriwan savve sin staka taem.” (Jas. 3:2) Sapos iu savve wanfala brata or sista feel nogud long samting wea iu talem or duim, wanem nao iu shud duim? Jesus sei: “Tingim sapos iu tekem sakrifaes bilong iu go long altar. Waswe sapos taem iu kasem long there iu tingim hao brata bilong iu hem feel nogud long iu? Firstaem, leavim sakrifaes bilong iu long there and go stretem datfala problem witim brata bilong iu. Bihaen, go bak moa long altar and givim datfala sakrifaes.” (Matt. 5:23, 24) Jesus sei iu mas go story witim brata bilong iu. Goal bilong iu hem for stretem datfala problem witim hem. Iu shud talemaot mistek bilong iu and no sei hem nao rong. For stap gud witim olketa brata and sista nao hem barava important.

¹² Bible showim wanem pipol bilong God savve duim for stretem problem wea kamap midolwan olketa. Olsem example, Abraham and nephew bilong hem Lot, garem staka animal gogo olketa wakaman bilong tufala start for raoa bikos ples bilong olketa no fitim nao evri animal for stap. From Abraham laek for stap gud witim Lot, hem letem Lot nao for chusim firstaem wea hem laek for stap. (Gen. 13:1, 2, 5-9) Hem showimaot gudfala example! Waswe, Abraham no kasem eni gud samting from hem duim datwan? Nomoa. Stretawe bihaen Abraham duim datwan, Jehovah promis for givim hem staka blessing. (Gen. 13:14-17) Wanem nao iumi lanem from datwan? Nomata sapos iumi mas  lusim samfala samting, taem iumi followim olketa Bible principle and stretem problem wea iumi garem witim narawan, Jehovah bae blessim iumi. ^[1]

13. Wanem nao wanfala overseer duim taem wanfala brata tok kros long hem, and wanem nao iumi lanem from datwan?

¹³ Tingim nara example. Wanfala brata wea kasem assignment for lukaftarem wanfala department long convention hem ringim nara brata for askem hem for waka long datfala department. Datfala brata tok kros long hem and then hem daonem phone bikos hem kros yet long brata wea overseer long datfala department bifor. Niu overseer hia hem no feel nogud. Nomata olsem, hem luksavve hem mas stretem datfala problem. Bihaen wanfala hour, hem ringim bak datfala brata and askem hem for tufala meet and story. Wan week bihaen, tufala meet long Kingdom Hall, and bihaen tufala prea long Jehovah, tufala story for wanfala full hour. Datfala brata storyim samting wea happen long hem. Datfala niu overseer lisin long hem and showim hem samfala scripture. Bihaen datwan, tufala hapi and waka tugeta long convention. Datfala brata hem tinghae long wei wea overseer hia hem kaen and story gud long hem.

14, 15. (a) Wanem taem nao iumi shud followim kaonsel bilong Jesus long Matthew 18:15-17? (b) Wanem nao 3-fala samting wea Jesus talem iumi for duim, and why nao hem talem datwan?

¹⁴ Taem problem kamap midolwan tufala Christian, hem gud sapos tufala seleva nao stretem. Bat samfala taem maet tufala needim help from olketa narawan long kongregeson for stretem problem. (Readim Matthew 18:15-17.) “Sin” wea Jesus storyim long scripture hia hem no minim olketa  smol problem wea happen midolwan tufala Christian. Hao nao iumi savve long datwan? Jesus sei sapos man wea duim sin hem no repent bihaen hem story witim brata bilong hem, and witim tu or thrifala witness, and long olketa elder, then kongregeson bae “ting long hem olsem wanfala man long world and wanfala man for tekem tax.” Datwan minim hem bae disfellowship. Datfala “sin” wea Jesus storyim maet hem wei for ravem narawan or laea for spoelem narawan. Hem no minim olketa sin olsem adultery, wei for man sleep witim man or woman sleep witim woman, wei for apostate, or wei for worshipim idol. Olketa elder nao mas deal witim eniwan wea duim olketa sin hia.

¹⁵ Why Jesus talem datfala toktok hem bikos hem laekem iumi for helpem brata bilong iumi from iumi lovem hem. (Matt. 18:12-14) Wanem nao Jesus talem iumi for duim? (1) Iu and datfala brata seleva nao iutufala shud trae for stretem datfala problem. Maet iu mas story witim hem tu-thri taem. Bat wanem nao iu shud duim sapos hem no laek for stretem datfala problem? (2) Iu shud tekem nara brata wea savve long rong samting wea brata hia duim, or wea hem fit for luksavve sapos brata hia duim rong samting or nomoa. Sapos iufala stretem datfala problem, “iu helpem hem nao for duim stret samting moa.” Bat sapos iu story witim brata bilong iu tu-thri taem, and iutufala no savve stretem datfala problem, then (3) iu shud storyim datfala problem long olketa elder.

16. Why nao kaonsel wea Jesus talem hem gudfala advaes for stretem problem witim narawan?

¹⁶ Staka taem olketa Christian wea garem problem witim each other no need for duim mek-thri samting wea Jesus talem long Matthew 18:15-17. Datwan hem gud tumas, bikos diswan showimaot man wea duim rong samting hem luksavve long datwan and hem stretem datwan. So hem no need for disfellowship, and brata wea feel nogud shud forgivim hem and tufala savve stap gud moa. So kaonsel bilong Jesus showimaot iumi no need for kwiktaem go storyim long olketa elder eni problem wea iumi garem witim narawan. Bat iumi savve storyim datfala problem long olketa elder only sapos iumi duim finis nara tufala samting wea Jesus storyim, and sapos iumi savve pruvim datfala brata or sista hem duim rong samting.

17. Olketa wanem blessing nao iumi savve kasem taem iumi traem best for stap gud witim narawan?

¹⁷ From iumi evriwan no perfect, samfala taem iumi bae spoelem feeling bilong narawan. Dastawe disaepol James sei: “Sapos eniwan hem no sin long toktok bilong hem, hem wanfala perfect man wea savve kontrolem full body bilong hem tu.” (Jas. 3:2) Sapos iumi “traem best for stap gud witim nara pipol,” datwan bae helpem iumi for stretem problem wea iumi garem witim olketa. (Ps. 34:14) Datwan bae helpem iumi tu for fren gud witim olketa brata and sista, and diswan bae mekem iumi wan mind. (Ps. 133:1-3) And important samting nao, iumi bae fren gud witim Jehovah, datfala “God wea givim peace.” (Rome 15:33) Iumi bae kasem olketa blessing hia, taem iumi stretem problem witim narawan from iumi lovem hem.