1, 2. Soangen kahpwal dah kan me pwarada nanpwungen aramas akan me sansalda nan Senesis, oh dahme kahrehda kitail en men ese duwen met?

 IA DUWE, mie pak ke kin medewe duwen kahpwal kan me kin pwarada nanpwungen aramas akan nan Paipel? Tehk ekeite tepin irelaud kan nan pwuhken Senesis. Kain kemehla Eipel (Sen. 4:3-8); Lamek kemehla mwahnakapw men me wokih ih (Sen. 4:23); nein Eipraam (Eipram) oh Lohd sounsilepen mahn kan kin akamaipene (Sen. 13:5-7); Akar mwamwahlkihla Sara (Sarai), me kahrehda Sara en nsensuwedla pahn Eipraam (Sen. 16:3-6); Ismael uhwong aramas koaros oh aramas koaros uhwong ih.​—Sen. 16:12.

² Dahme kahrehda Paipel kin kasalehda soangen kahpwal pwukat? Pwehki kitail kak sukuhl sang mehn kahlemeng en aramas soh unsek ko me ahneki kahpwal kan. Kitail pil soh unsek, oh ni atail lelohng soangen kahpwal kan me duwehte arail, kitail kak alasang mehn kahlemeng mwahu pwukat nan Paipel oh soikala mehn kahlemeng suwed kan. (Rom 15:4) Met kak sewese kitail en sukuhlki ia duwen atail pahn ahneki popohl rehn meteikan.

3. Dahme iren onop wet pahn koasoia?

 ³ Nan iren onop wet, kitail pahn sukuhlki dahme kahrehda kitail anahne kamwahwihala kahpwal kan rehn meteikan, oh ia duwen atail kak wia met. Kitail pil pahn sukuhlki ekei kaweid en Paipel me kak sewese kitail en apwalihala kahpwal kan oh kolokol nanpwungmwahu rehn Siohwa oh meteikan.

4. Soangen madamadau dah me kin kohpeseng nan sampah, oh ia imwilahn met?

⁴ Sehdan iei me kin keieu kahrehda aramas akan en ahneki nanpwungsuwed oh kahpwal tohto. Dahme kahrehda kitail ndahki met? Nan mwetuwel en Ihden, Sehdan nda me koaros kak oh pil anahne pein pilada dahme mwahu oh dahme suwed oh uhtohrda sang Koht. (Sen. 3:1-5) Ahpw ni atail kilang sampah rahnwet, kitail kak kilang me soangen madamadau wet kin ihte wahdo kahpwal kan. Aramas tohto pehm me re ahneki pwuhng en pein pilada dahme mwahu oh dahme suwed. Re kin pohnmwahso, roporop, oh men siaipene, oh re sohte nsenohki ma arail pilipil ko kin kamedekihala meteikan. Soangen wiewiahn roporop wet kin imwikihla akamai. Paipel katamankihong kitail me ma kitail kin mwadang lingeringerda, kitail pahn ahneki kahpwal tohto rehn meteikan oh pahn wiahda dihp tohto.​—Lep. Pad. 29:22.

5. Dahme Sises ketin padahkihong aramas akan duwen arail en apwalihala kahpwal kan rehn meteikan?

⁵ Ni Sises eh ketin wia Kapahrek en Pohn Dohl, e ketin padahkihong sapwellime tohnpadahk kan en rapahki popohl oh soikala wiahda kahpwal kan rehn meteikan, mehnda ma met kakete kamedekihala irail. Karasepe, e ketin mahsanihong irail en kasalehda kadek, rapahki popohl rehn meteikan, kihsang lingeringer, mwadang kapwungala kahpwal kan oh poakohng arail imwintihti kan.​—Mad. 5:5, 9, 22, 25, 44.

6, 7. (a) Dahme kahrehda e kesempwal en mwadang kamwahwihala kahpwal rehn meteikan? (b) Peidek dah kan me sapwellimen Siohwa aramas koaros anahne pein idek rehrail?

⁶ Rahnwet, kitail kin kaudokiong Siohwa ni ahnsou me kitail kin kapakap, kalohk, oh towehda mihting kan. Ma kitail sohte rapahki popohl rehn riatail Kristian kan, Siohwa sohte pahn ketin kupwurki atail kaudok ong ih. (Mark 11:25) Pwe kitail en kompoakepahnkihla Siohwa, kitail anahne mahkohng meteikan ni arail wiahda sapwung.​—Wadek Luk 11:4; Episos 4:32.

⁷ Siohwa kin ketin kasik sapwellime ladu kan koaros en kasalehda mahk oh ahneki popohl rehn meteikan. Kitail kak pein idek rehtail: ‘I kin mwadang en mahkohng riei Kristian kan? I kin perenki werekiong irail mehnda ma I nsensuwedla pahrail?’ Ma ke esehda me ke anahne kalaudehla omw kasalehda mahk, kapakap ong Siohwa oh peki ih en ketin sewese iuk kamwahwihala met. Samatail nanleng pahn ketin karonge oh sapengala atail kapakap karakarahk kan.​—1 Sohn 5:14, 15.

8, 9. Dahme kitail anahne wia ma emen eh kansensuwedihkitailla?

⁸ Kitail koaros sohte unsek, eri kitail kak kasik me dahme aramas kin nda de wia kakete kansensuwedihkitailla. (Ekl. 7:20; Mad. 18:7) Dahme ke pahn wia? Kitail kak sukuhlki mehn kasukuhl kesempwal ehu sang dahme wiawi wasaht: Sister men rahnmwahwih brother riemen ahnsou ehu me Kristian kan pokonpene en mwemweit. Ahpw emen brother ko nsensuwedkihla mwomwen sistero eh rahnmwahwih  ih. Ni ahnsou me brother riemeno kelehpwla, brothero me nsensuwedla tepida kaulimki sistero. Ahpw, brother teio katamankihong ih me sistero kin ni loalopwoat papahki Siohwa erein sounpar 40 mendahki kahpwal tohto. E pil kamehlele me sistero sohte men kansensuwedihala ih. Dahme tepin brother wia? E nda: “Ke pwung.” Ih eri pilada en manokehla dahme wiawi.

⁹ Dahme kitail kak sukuhlkihsang met? Ni emen eh kansensuwedihkitailla, kitail kak pilada mwomwen atail pahn mwekidki irairo. Aramas limpoak men kin kasalehda mahk. (Wadek Lepin Padahk 10:12; 1 Piter 4:8.) Ma ke kin “pohnsehsehla” mwekid kansensuwedo, met wia mehkot kaselel mwohn silangin Siohwa. (Lep. Pad. 19:11; Ekl. 7:9) Eri ma emen nda de wia mehkot me kansensuwedihala iuk, idek rehmw: ‘I kak pohnsehsehla? I uhdahn anahne medemedewehte met?’

10. (a) Ia duwen emen sister eh mwekidki dahme aramas kin ndahkin ih? (b) Iren Paipel dahieu me sewese sister menet en kolokol eh popohl?

¹⁰ Ma meteikan nda mehkot kansensuwed duwen kitail, e kakete apwal en pohnsehsehla dahme re nda. Medewehla dahme wiawihong emen pioneer sister me kitail pahn kahdaneki Lucy. Mie ekei nan mwomwohdiso me koasoia soahng sohte mwahu kan duwen eh kalohko oh mwomwen eh doadoahngki eh ahnsou. Lucy nsensuwedkihla met oh peki kaweid sang rehn brother koahiek ko. Ia imwilahn met? E nda me re doadoahngki Paipel pwehn sewese ih en tokedihsang eh nohn medemedewe laud soahng kansensuwed kan me meteikan kin nda oh tepida kalaudehla eh kin medemedewe duwen Siohwa. E ale mehn kangoang sang ni eh wadek Madiu 6:1-4. (Wadek.) Iretikitik pwukat katamankihong ih me en kaperenda Siohwa iei me keieu kesempwal. Eri e pilada en pohnsehsehla soahng kansensuwed kan me meteikan kin nda. Met, mehnda ma meteikan kauwe mwomwen eh kin kalohk, e kin peren pwehki e ese me e kin nantihong wia uwen eh kak en kaperenda Siohwa.

11, 12. (a) Dahme Kristian men anahne wia ma e kamehlele me rie Kristian men “nsensuwed” pah? (b) Dahme kitail kak sukuhlki sang mwomwen Eipraam eh apwalihala kahpwal ehu? (Menlau kilang tepin kilel.)

¹¹ “Kitail koaros kin kalap sapwungala.” (Seims 3:2) Ele ke esehda me riomw Kristian men nsensuwedkihla mehkot me ke nda de wia. Dahme ke pahn wia? Sises mahsanih me ma “ni omw pahn wiahiong Koht omw meirong pohn pei sarawi ehu, ke ahpw tamanda me riomw mehn Suhs men nsensuwed pahmw, pwilikihdi mahs omw meirongo mwohn pei sarawio, ke ahpw kohwei oh kapwungala nanpwungamwa; mwuri, ke ahpw pwurodo wia omw meirong ong Koht.” (Mad. 5:23, 24) Eri, koasoiong riomw Kristiano. Ni omw wia met, omw mehn akadeio iei en kahrehda popohl nanpwungamwa. Ke dehr kapwukoahki riomwo dahme wiawi ahpw kasalehda omw sapwungo. En ahneki popohl rehn riatail kan iei me keieu kesempwal.

¹² Paipel kin kasalehda ia duwen sapwellimen Koht ladu kan ar kak kolokol popohl ni kahpwal kan ar pwarada. Karasepe, Eipraam oh Lohd koaros naineki mahn tohto, oh neira sounsilepen mahn ko tepida akamai pwehki sapwarailo sohla itar ong irail koaros. Pwehki Eipraam men kamwahwihala kahpwal wet, e mweidohng Lohd mahs en pilada mehnia sahpw me e mwahuki. (Sen. 13:1, 2, 5-9) Ia uwen met eh wia mehn kahlemeng mwahu ong kitail! Ia duwe, Eipraam apwalla pwehki eh kadek? Uhdahn soh. Mwurinte dahme  wiawi, Siohwa ketin inoukihda en kapaiada Eipraam laudsang mahs. (Sen. 13:14-17) Dahme kitail sukuhlki? Mehnda ma kitail luhssang soahng kei, Siohwa pahn ketin kapaikitailda ni atail kapwungala kahpwal kan ni elen limpoak. ^[1]

13. Dahme emen sounapwalih wia ni emen brother eh wia lokaia kamedek ong ih, oh dahme kitail kak sukuhlkihsang eh mehn kahlemengo?

¹³ Medewehla duwen ehu irair me wiawi nan atail ahnsou. Ni emen sounapwalih en wasahn mihting tohrohr eh delepwohnih emen brother pwehn peki ma e kak toukihda eh ahnsou oh iang sawas, brothero ndahla koasoi kamedek kei ong ih oh pwilikihdi delepwohno pwehki e nsensuwedte pahn sounapwalih en mahso. Sounapwalih me kapwo sohte nsensuwedkihla met, ahpw e pil sohte kak pohnsehsehla dahme wiawi. Mwurin awa ehu, e pwurehng call oh peki ma ira kak tuhpene. Wihk ehu mwuri, brother riemeno tuhpene nan Wasahn Kaudok, oh mwurin ara kapakap ong Siohwa, ira koasoipene erein awa ehu. Brothero koasoiahda dahme wiawi nanpwungen ih oh sounapwalih en mahso. Sounapwalih kapwo karonge oh ehukihong brothero ekei iren Paipel kan. Imwilahn met, brother ko kapwungala nanpwungara oh sawaspene doadoahk ni mihting tohrohro. Brothero uhdahn kalahnganki me sounapwaliho koasoiong ih ni meleilei oh lokaia kadek.

14, 15. (a) Iahd me kitail en doadoahngki kaweid me kileldi nan Madiu 18:15-17? (b) Kahk siluh dah me Sises ketin kasalehda, oh ia atail mehn akadei ni atail wia kahk pwukat?

¹⁴ Pali laud en kahpwal kan me pwarada nanpwungen Kristian riemen kak oh pil anahne kapwungpwungla nanpwungarahte. Ahpw, ekei pak met sohte kak wiawi. Mie soangen irair kei me anahne sawas sang meteikan  duwehte me Madiu 18:15-17 kasalehda. (Wadek.) ‘Dihp’ me Sises kin mahmahsanih wasaht sohte dokedoke kahpwal tikitik ehu nanpwungen Kristian kan. Ia duwen atail ese met? Sises mahsanih me ma me dipano sohte koluhla mwurin e koasoiong rie Kristiano, ong sounkadehde kan, oh brother kan me ahneki pwukoa nan mwomwohdiso, a ren wiahkihla ih “mehn liki men de sounrik daksis men.” Rahnwet, met wehwehki me e anahne piskenla. “Dipeo” kak pidada pitihedi oh pirapahsang emen mwohni de karaun likamw, ahpw e sohte pahn pidada soangen dihp kan me duwehte kamwahl, ohl mwahuki ohl oh lih mwahuki lih, mwekid en kesehla oh uhwongada kaudok mehlel, de pwongih dikedik kan. Soangen wiewiahn dihp pwukat uhdahn anahne elder kan nan mwomwohdiso en apwalihala.

¹⁵ Sapwellimen Sises mehn akadeio ni eh ketikihda kaweid wet iei en kasalehiong kitail ia duwen atail en sewese riatail men pwehki atail poakohng ih. (Mad. 18:12-14) Ia duwen atail kak idawehn kaweid wet? (1) Kitail anahne song en kahrehda popohl rehn riatailo ahpw meteikan en dehr iang pidada. Ele kitail anahne koasoiong ih pak tohto. Ahpw dahme kitail pahn wia ma met sohte pweida? (2) Kitail anahne koasoiong riatailo rehn emen me ese duwen irairo de emen me kak kilang me mie mehkot sapwung wiawi. Ma kahpwalo kapwungpwungla, ke “kasapahldohr riomwo.” Ahpw ma ke koasoiongehr ih pak tohto ahpw sohte kak ahneki popohl reh, ihte ahnsowo me ke anahne (3) padahkihong elder kan duwen kahpwalo.

16. Dahme kasalehda me atail idawehn kahk kan me Sises ketikihda kin wia ahl mwahu oh limpoak ehu?

¹⁶ Pali laud en ahnsou kitail sohte anahne doadoahngki kahk siluh pwukat koaros me sansalda nan Madiu 18:15-17. Met wia mehn kangoang ehu ong kitail. Dahme kahrehda? Pwehki pali laud en ahnsou, me wiahda dihpo kin wehwehkihla eh sapwungo oh kapwungala kahpwalo, eri e sohte anahne piskensang nan mwomwohdiso. Eri me nsensuwedlao pahn mahkohng rie Kristiano pwe ren kak ahneki popohl. E sansal sang sapwellimen Sises kaweido me kitail sohte anahne mwadangete kohla rehn elder kan. Kitail anahne padahkihong irail duwen kahpwalo ihte mwurin atail kapwaiada kahk keieu oh keriau ko oh mie mehn kadehde mwahu me sapwung ehu wiawihda.

17. Kapai dah kan me kitail pahn paiekihda ni atail kin “nantihong kolokol popohl” nanpwungatail?

¹⁷ Erein atail wie soh unsekte, kitail pahn pousehlahte kansensuwedihada meteikan. Tohnpadahk Seims ntingihedi: “Me sohte kin sapwungala ni eh lokaia, iei ih me unsek, oh ih me kin kak kaunda paliwere unsek.” (Seims 3:2) Pwehn kamwahwihala kahpwal ehu nanpwungatail, kitail anahne “nantihong kolokol popohl ni mohngiong unsek.” (Mel. 34:14) Ni atail kin pousehlahte kahrehda popohl rehn meteikan, kitail pahn kompoakepahnkihla mwahu riatail Kristian kan, oh met pahn kaminiminkitailpene. (Mel. 133:1-3) Keieu kesempwal, kitail pahn ahneki nanpwungmwahu keren rehn Siohwa, “Koht, me tepin atail popohl.” (Rom 15:33) Kitail pahn paiekihda kapai pwukat koaros ma kitail kin kamwahwihala kahpwal kan nanpwungatail ni elen limpoak.