1, 2. Che stòrie catemo nel libro de Génesi de persone che le gavea problemi una colaltra? Come che queste stòrie le pol giutarne?

 GHETO belche pensà sora le stòrie che ghen’è nela Bìblia de persone che le ga bio problemi una colaltra? Nei primi capìtoli de Génesi se pol catar arquante de queste stòrie. Cain el ga copà Abel. (Gén. 4:3-8) Lameche el ga copà el gióveno che lo ghe gavea dato bote. (Gén. 4:23) I pastori de Lò e i pastori de Abraon (Abron) i se ga dito su. (Gén. 13:5-7) Agar la ga tratà Sara (Sarai) tanto mal e Sara la ze restada cativa con Abraon. (Gén. 16:3-6) Ismael el gavea problemi con tuti e tuti i gavea problema con lu. — Gén. 16:12.

² Queste stòrie dela Bìblia le pol giutarne a seitar in pace e le ne insegna come farlo. Quele persone le era imperfete come noantri e le gavea problemi compagni ai nostri. El so esémpio el ne insegna cossa far e cossa no far quando semo nte una situassion compagna a lori. — Rom. 15:4.

3. Cossa ndaremo veder in questo stùdio?

³ In questo stùdio ndaremo veder parché che i servi de Geovà i ga de risolver i problemi che i ga e come farlo. Anca ndaremo veder consili dela Bìblia che i pol giutarne quando no semo intesi coi fradei e a seitar in pace coi altri e con Geovà.

4. Quala che la ze la maniera de pensar dele persone ancoi? E qual che l’è el risultà?

⁴ L’è Sàtana che fà le persone gaver problemi una colaltra. Nel giardin del Èden, lu el ga parlà che le persone le podea dessider quel che l’è giusto e quel che l’è sbalià. E che le gavea de farlo. Anca el ga parlà che no le ghe tochea far la volontà de Dio. (Gén. 3:1-5) Ancoi, podemo veder quel che ze vegnesto fora par via de quel che Sàtana el ga dito. El mondo l’è pien de persone che le vol dessider quel che l’è el meio par lore. Cossita lore le deventa pi orgoliose, le pensa de pi sol in lore stesse e le fà competission intrà de lore. Queste brute qualità che ghen’è nel mondo le ghe dà apoio a la idea de Sàtana de che cada un el ga de far quel che el vol sensa badar i altri. Questa maniera de pensar fà vegner fora barufe. L’è pròpio come la Bìblia la dise, che “el omo che el resta suito cativo el fà vegner fora barufe, e quel che el se inràbia con facilità el fà tanti sbali.”. — Pro. 29:22.

5. Che consili Gesù el ga dato sora esser intesi coi altri?

⁵ Difarente del mondo, Gesù el ga dito che ghemo de sforsarse par seitar in pace stesso quando no ghemo fato gnente de sbalià. Nel discorso che Gesù el ga fato nte un monte, lu el ga dato consili sora cossa podemo far par esser intesi coi altri. Par esémpio, lu el ga dito che i so dissìpoli i gavaria de esser calmi, ndar in serca dela pace, no gaver ràbia, risolver suito i problemi e amar i so nemighi. — Mat. 5:5, 9, 22, 25, 44.

6, 7. (a) Parché che l’è importante risolver suito i problemi coi fradei? (b) Che domande tuti quei che i servi a Dio i ga de far?

⁶ Parché che l’è importante risolver suito i problemi coi fradei? Parché pregar, ndar ale riunion, predicar e altre robe, le fà parte dela nostra adorassion a Dio. Ma se no volemo far la pace coi nostri fradei, la nostra adorassion la sarà sensa valor (Mar. 11:25) Se no perdonemo i sbali dei altri, no podemo esser amighi de Dio. — Ledi Luca 11:4; Efesi 4:32.

⁷ Tuti i servi de Dio i ga de esser intesi coi altri, onesti e perdonadori. Te sì bon de perdonar i fradei e sorele? Te sì bon de passar tempo con lori stesso che i te gàpia disgustà? Geovà el vol che i so servi i sia perdonadori. Ma se te vedi che te ghè de far meio, domanda el aiuto de Geovà. Se le to orassion le ze fate con umiltà, lu ndarà risponderte. — 1 Gioani 5:14, 15.

8, 9. Cossa che ghemo de far quando una persona la ne dise su?

⁸ Tuti semo imperfeti, par quela che sempre gavarà una persona che ndarà dir o far una roba che ndarà assarne disgustà. (Ecl. 7:20; Mat. 18:7) Ma la domanda la ze: Cossa che te ndarè far? Pensa in questa situassion: Una volta, fradei e sorele i era insieme par divertirse, e una sorela la ga saludà due fradei. Ma un dei fradei no’l ga piasesto de una roba che la sorela la gavea dito. Dopo, el fradel che l’era disgustà el ga parlà mal dela sorela. Ma quelaltro fradel el ghe ga ricordà che fea 40 ani che la sorela la era leal a Geovà stesso cole dificoltà. Lu l’era sicuro che no la gavea dito quele robe aposta. Dopo de pensar, el fradel disgustà el ga dito: “Te ghè rason”, e el ga assà star quel assunto.

⁹ Cossa che questo esémpio ne insegna? Che podemo scòlier cossa ndaremo far quando qualchedun ne disgusta. La persona che la ga amor, la ze bona de assar de banda i pìcoli sbali dei altri. (Ledi Proverbi 10:12; 1 Piero 4:8.) Geovà el cata tanto bel quando la persona la desside no seitar disgustada. (Pro. 19:11; Ecl. 7:9) Alora, se una persona la te ga dito su e no la ga mostrà rispeto, te pol domandarte: ‘Son bon de assar de banda quel che ga sucedesto? Sarà che ghe ocore seitar parlar del problema?’

10. (a) Come che una sorela la se ga sentio quando i ga parlà mal dela? Cossa che ela la ga fato? (b) Come Mateo 6:1-4 ga giutà la sorela a seitar contenta?

¹⁰ Quando una persona la parla mal de noantri l’è fadiga no badar. Varda quel che ga sucedesto con una Sorela che la ga nome Luciana. ^[1] Arquanti fradei i ga parlà mal del so laoro de pioniera e dela maniera che la doperea el so tempo. Luciana la ze restada disgustada. Par quela, la ze ndata in serca de fradei che i gavea speriensa par giutarla. Ela la ga dito: “I consili dela Bìblia i me ga giutà a veder la opinion dei altri de una maniera positiva e a consentrarme in quel che l’è pi importante — Geovà.” Luciana la ze restada pi contenta dopo che la ga ledesto Mateo 6:1-4. (Ledi.) Questi versìcoli i la ga giutada a ricordarse che el pi importante l’è assar Geovà contento. Ela la ga dito: “Ancora che le persone le parle mal de mi, seito contenta. Mi sò che son drio far el me meio par Geovà.” Adesso, Luciana la ze bona de assar de banda le brute robe che i dise sora ela.

11, 12. (a) Cossa che un servo de Geovà el ga de far se el pensa che un fradel ghen’è qualcossa contra lu? (b) Cossa che imparemo dela maniera che Abraon el ga dato fora con un problema? (Varda la ilustrassion dela prima pàgina.)

¹¹ “Tuti noantri sbaliemo tante volte.” (Tia. 3:2) Metemo dir che te ghè ofendesto un fradel par via de una roba che te ghè parlà o che te ghè fato. Cossa che te toca far? Gesù el ga dito: “Se te porti la to oferta al altar e te te ricordi che el to fradel el ga qualcossa contra ti, assa la to oferta davanti del altar e va via. Prima te ghè de far la pace col to fradel, e dopo torna al altar par far la to oferta.” (Mat. 5:23, 24) Te pol meter in pràtica el consìlio de Gesù. Parla col to fradel no par meterghe la colpa, ma col ogetivo de dir che te sì sbalià e far la pace. Esser in pace coi fradei la ze la roba pi importante.

¹² La Bìblia la parla de servi de Dio che i ze stati boni de risolver i problemi vanti che i restesse pedo. Un esémpio l’è stà Abraon e Lò. Lori due i gavea tante piégore, e i so pastori i ga scominsià a barufar parché no gavea magnar par tute le bèstie. Abraon el volea finir con quela barufa, par quela el ga assà Lò scòlier el meio toco de tera par le so bèstie e la so fameia viver. (Gén. 13:1, 2, 5-9) Che bel esémpio! Par Abraon, l’era pi importante esser in pace coi altri che far quel che l’era meio par lu. Sarà che Abraon el ga perso qualcossa parché l’è stà generoso? Nò. Pena dopo, Dio ghe ga prometesto tante benedission. (Gén. 13:14-17) Alora, Geovà el ndarà benedir quei che i fà quel che la Bìblia la dise e quei che i proa risolver i problemi con amor. ^[2]

13. Cossa che un superintendente el ga fato dopo che un fradel lo ga tratà mal? Cossa che imparemo del so esémpio?

¹³ Varda un esémpio dei nostri giorni. El superintendente de un departamento del congresso el ga telefonà a un fradel e el ga domandà se lu el podea laorar come volontàrio. Quel fradel l’è restà cativo e el ga smorsà el telèfono parché l’era disgustà par via de un problema che el ga bio col superintendente che ghen’era vanti. El fradel che el ga telefonà no l’è restà ofendesto, ma anca no’l ga assà star. Una ora dopo, lu el ga parlà nantra volta con quel fradel e el ghe ga domandà se lori due i podea catarse par risolver el assunto. Una stimana dopo, lori i se ga catà nte un Salon del Regno. Dopo de far una orassion, i ga discoresto e el fradel che l’era disgustà el ga spiegà parché el se sentia cossita. El superintendente el ga capio e el ghe ga mostrà diversi versìcoli dela Bìblia. Dopo, no i ga pi parlà de quel assunto. Quel fradel el ga laorà nel congresso e l’è restà contento parché i lo ga tratà con bontà e passiensa.

14, 15. (a) Quando che ghemo de meter in pràtica el consìlio de Mateo 18:15-17? (b) Che tre robe Gesù el ga dito che ghemo de far? E con che ogetivo?

¹⁴ La pi granda parte dei problemi dei fradei pol esser risolvesta intrà de lori. Ma Gesù el ga dito che dele volte ghe ocore del aiuto dei ansiani. In che situassion? (Ledi Mateo 18:15-17.) De acordo con quel che Gesùe el ga dito, saria quando sucede qualcossa pi grave intrà i fradei. Parché podemo dir cossita? Parché Gesù el ga dito che se la persona no la volesse far la pace e no la acetesse el aiuto dele testimònie e dei ansiani, la saria come una persona dele nassion o come un che el ciapa imposti. Ancoi podemo dir che la saria desassossiada. Alora, podemo dir che Gesù l’era drio parlar de robe come contar una busia che rovinesse la reputassion de un fradel. Ma, questo pecato che Gesù el ga parlà in Mateo 18 no l’era un bruto pecato come adultèrio, omossessualismo, apostasia e idolatria. Questi pecati i ga de esser tendesti par i ansiani.

¹⁵ El ogetivo de Gesù quando el ga dato questo consìlio, l’era che i fradei i fusse boni de risolver i problemi con amor. (Mat. 18:12-14) Alora te pol meter in pràtica el so consìlio par far cossita: (1) proa risolver el assunto cola persona che te ghè bio el problema. Fursi te tocarà parlar con ela de pi che una volta. Ma se el problema el seita? (2) Te pol parlar cola persona insieme con quei che i ga visto quel che ga sucedesto o con altre persone che le pol giutar a dessider se quel che el fradel el ga fato l’è pròpio sbalià. Se te si stà bon de risolver el problema col aiuto de queste persone, te ghè “guadagnà el to fradel”. Ma, se el problema gnancora l’è stà risolvesto (3) te ghè de parlar coi ansiani.

16. Parché che meter in pràtica el consìlio de Gesù l’è la meio maniera de risolver i problemi con amor?

¹⁶ Tante volte gnanca ghe ocore far le tre robe che Gesù el ga dito par risolver el problema. El problema l’è risolvesto sensa la persona esser desassossiada parché la se nicorde che la ga sbalià e la fà qual cossa par coreger la situassion. Cossita, la persona che la ze restada disgustada la pol perdonar. Le parole de Gesù le ne mostra che i ansiani no i ga de proar risolver suito el problema. Lori sol i ndarà far qualcossa se le due prime robe le ze state fate e se ghen’è prove de che ga sucedesto un sbàlio.

17. Quale che le ze le benedission de quei che i se sforsa par esser in pace coi altri?

¹⁷ Tuti semo imperfeti, par quela una ora o l’altra ndaremo disgustar qualche persona. Tiago el ga scrito: “Se qualchedun no’l fà sbali quando el parla, l’è una persona perfeta, che la pol controlar tute le parte del so corpo.” (Tia. 3:2) Alora, par risolver i problemi, ne ocore ndar in serca de far la pace e sforsarse par gaverla. (Sal. 34:14) Se femo cossita, gavaremo una bona amicìssia coi fradei e la congregassion la restarà unida. (Sal. 133:1-3) E el pi importante, gavaremo una amicìssia pi forte con Geovà, “el Dio che dà pace”. (Rom. 15:33) Tute queste le ze le benedission de quei che i risolve problemi con amor.