1, 2. Исанын Мәтта 24:14 ајәсиндә јазылан сөзләри һансы суаллары доғурур?

ЈЕҺОВАНЫН ШАҺИДЛӘРИ. Кимләрсә онларла разылашмыр, кимләрсә онлара гаршы чыхыр. Лакин чох аз адам тапылар ки, Јеһованын Шаһидләринин тәблиғ фәалијјәти илә танындығыны инкар етсин. Бәзән хидмәт заманы елә инсанларла растлашырыг ки, бизим етигадларымызла разылашмасалар да, ҝөрдүјүмүз ишә һөрмәтлә јанашдыгларыны дејирләр. Билдијимиз кими, Иса Мәсиһ Падшаһлыг һагда мүждәнин бүтүн јер үзүндә тәблиғ едиләҹәјини демишди (Мәт. 24:14). Бәс һарадан билирик ки, Мәсиһин бу пејғәмбәрлији бизим ҝөрдүјүмүз ишлә јеринә јетир? Мүждәни бүтүн јер үзүндә тәблиғ етдијимизи демәк бизим тәрәфимиздән өзүндәнразылыг кими чыхмыр ки?

² Бир чох дини груплар дүшүнүрләр ки, Инҹили, јәни мүждәни тәблиғ едирләр. Анҹаг онларын фәалијјәти ја тәкбашына шаһидлик вермәклә, ја килсәдә моизә сөјләмәклә, ја да медиа — телевизија вә ја Интернет васитәсилә јајымланан програмларла мәһдудлашыр. Бир башгалары хејријјәчиликлә мәшғул олур, јахуд тибб вә тәһсил саһәсиндә ишләр ҝөрүр вә дүшүнүр ки, бу да онларын  тәблиғ үсулудур. Бәс бунлар Мәсиһин шаҝирдләринә тапшырдығы ишә нә дәрәҹәдә ујғун ҝәлир?

3. Мәтта 28:19, 20 ајәләринә әсасән, Исанын давамчылары һансы дөрд иши ҝөрмәли идиләр?

³ Исанын шаҝирдләри әлини әлинин үстүнә гојуб отурмалы, ҹамаатын онларын јанына ҝәлмәсини ҝөзләмәли иди? Әлбәттә ки јох! Мәсиһ дириләндән сонра јүзләрлә шаҝирдинә хитаб едәрәк бујурмушду: «Ҝедин вә бүтүн халгларын ичиндә шаҝирд һазырлајын, онлары... вәфтиз един, сизә әмр етдијим һәр шејә риајәт етмәји онлара өјрәдин» (Мәт. 28:19, 20). Демәли, дөрд шеј тәләб олунур. Биз шаҝирд һазырламалы, онлары вәфтиз етмәли вә өјрәтмәлијик. Амма бүтүн бунлардан габаг нә етмәлијик? Иса демишди: «Ҝедин». Бир библијашүнас бу әмрлә бағлы демишди: «Фәрг еләмәз, истәр күчәнин о тајына олсун, истәрсә дә океанын, “ҝетмәк” һәр бир иманлыја верилән тапшырыгдыр» (Мәт. 10:7; Лука 10:3).

4. Мәсиһ «инсан тутмаг» дејәндә һансы нөв балыгчылығы нәзәрдә тутмушду?

⁴ Бәс, ҝөрәсән, Иса Мәсиһ давамчыларынын тәкбашына ҝөрмәли олдуғу ишдән данышырды, јохса мүждәнин мүтәшәккил сурәтдә тәблиғ олунмасыны нәзәрдә тутурду? Бир нәфәр тәкбашына ҝедиб бүтүн халглара тәблиғ едә билмәз. Демәли, мәнтигәујғундур ки, бу иши ҝөрмәк үчүн чохларынын мүтәшәккил сурәтдә фәалијјәт ҝөстәрмәси лазым ҝәләҹәкди. Иса балыгчы олан шаҝирдләрини «инсан тутмаға» чағыранда да буна ишарә етмишди. (Мәтта 4:18—22 ајәләрини охујун.) Онун дедији «балыгчылыг» елә дејилди ки, бир нәфәр тәк-тәнһа, әлиндә тилов вә јем сакитҹә отуруб балығын тилова дүшмәсини ҝөзләсин. Сөһбәт торла балыг тутмагдан, чохларынын мүтәшәккил сурәтдә чалышмасыны тәләб едән вә бөјүк әмәк һесабына баша ҝәлән балыгчылыгдан ҝедирди (Лука 5:1—11).

5. Һансы дөрд суалын ҹавабыны билмәк лазымдыр вә нәјә ҝөрә?

⁵ Кимләрин Мәсиһин пејғәмбәрлијини јеринә јетирәрәк мүждәни тәблиғ етдијини мүәјјәнләшдирмәк үчүн бу дөрд суалын ҹавабыны билмәк лазымдыр:

• Һансы хәбәр тәблиғ олунмалыдыр?

• Бу иш һансы нијјәтлә јеринә јетирилмәлидир?

• Тәблиғ иши һансы үсулларла һәјата кечирилмәлидир?

• Тәблиғ ишинин мигјасы вә мүддәти нә гәдәр олмалыдыр?

Бу суалларын ҹавабы бизә бу һәјати ваҹиб иши кимләрин һәјата кечирдијини мүәјјәнләшдирмәјә көмәк едәҹәк, о ҹүмләдән тәблиғ ишини бундан сонра да дәјанәтлә давам етдирмәјә ҝүҹ верәҹәк (1 Тим. 4:16).

6. Нәјә ҝөрә әмин ола биләрсиниз ки, Јеһованын Шаһидләри Иса Мәсиһин тапшырдығы хәбәри чатдырырлар?

⁶ Лука 4:43 ајәсини охујун. Иса Мәсиһ Падшаһлыг һаггында мүждәни тәблиғ едирди. О, шаҝирдләриндән дә буну етмәји ҝөзләјир. Бәс кимләр һәмин хәбәри бүтүн халглара тәблиғ едир? Ҹаваб ајдындыр. Јалныз Јеһованын Шаһидләри. Һәтта әлејһдарлардан да бәзиләри буну етираф едирләр. Мәсәлән, бир дәфә бир миссионер кешиш Јеһованын Шаһидинә демишди ки, о, чох өлкәдә јашајыб вә һәр өлкәдә Шаһидләрдән һансы хәбәри тәблиғ етдикләрини сорушуб. Алдығы ҹаваб нә олуб? Кешиш демишди: «Онлар елә ахмагдырлар ки, һамысы ејни шеји дејирди: “Падшаһлыг һагда мүждәни”». Лакин о Шаһидләр әсла ахмаг дејилдиләр, онлар әсил мәсиһи кими, јекдил идиләр (1 Кор. 1:10). Онлар «Ҝөзәтчи  гүлләси» журналындакы хәбәри чатдырырдылар. Бу журнал исә «Јеһова Аллаһын Падшаһлығыны бәјан едир». 254 дилдә чыхан бу журналын һәр сајы орта һесабла 59 милјон нүсхәси чап олунур. Беләликлә, бу журнал дүнјада ән чох јајылан журналдыр.

7. Һарадан билирик ки, Христиан руһаниләри лазыми хәбәри тәблиғ етмирләр?

⁷ Христиан дининин руһаниләри Аллаһын Падшаһлығыны тәблиғ етмирләр. Падшаһлыг һагда данышанда да чохлары дејир ки, бу Падшаһлыг мәсиһинин үрәјиндәки һиссдир вә гәлбинин вәзијјәтидир (Лука 17:21). Онлар инсанлара баша салмырлар ки, Аллаһын Падшаһлығы сәмави һөкумәтдир, Башчысы Иса Мәсиһдир вә бу Падшаһлыг тезликлә бәшәријјәтин бүтүн проблемләрини һәлл едәҹәк, тезликлә јер үзүнү бүтүн писликләрдән тәмизләјәҹәк (Вәһј 19:11—21). Онлара Исаны Милад вә Пасха бајрамында јада салмаг сәрф еләјир. Исанын јер үзүнүн јени Рәһбәри кими ҝөрәҹәји ишләрдән анлајышлары јохдур. Онлар тәблиғ етмәли олдуглары хәбәри нәзәрдән гачырыблар. Белә исә тәәҹҹүблү дејил ки, бу иши һансы нијјәтлә етмәли олдугларыны да баша дүшмүрләр.

8. Тәблиғ ишинин јеринә јетирилмәсиндә һансы нијјәт дүзҝүн дејил?

⁸ Тәблиғ иши һансы нијјәтлә јеринә јетирилмәлидир? Бу ишдә мәгсәд пул јығмаг, дәбдәбәли тикилиләр уҹалтмаг олмамалыдыр. Иса Мәсиһ шаҝирдләринә демишди: «Тәмәннасыз алмысыныз, тәмәннасыз да верин» (Мәт. 10:8). Аллаһын Кәламыны бизнесә чевирмәк олмаз (2 Кор. 2:17). Хәбәри тәблиғ едәнләр бу ишдән мәнфәәт ҝүдмәмәлидирләр. (Һәвариләрин ишләри 20:33—35 ајәләрини охујун.) Белә ајдын ҝөстәришә бахмајараг, әксәр килсәләр әсас иши бир кәнара гојуб ја пул јығмагла мәшғулдурлар, ја да әлләшиб-вурушурлар ки, мүфлисләшмәсинләр, кешишләрин, еләҹә дә чохлу сајда башга ишчиләринин маашыны верә билсинләр. Үстәлик, христиан дининин бир чох руһаниләри өзләри үчүн бөјүк вар-дөвләт топлајыблар (Вәһј 17:4, 5).

9. Јеһованын Шаһидләри дүзҝүн нијјәтлә тәблиғ етдикләрини неҹә ҝөстәрирләр?

⁹ Бәс пул јығмаг мәсәләсиндә Јеһованын Шаһидләри барәдә нә демәк олар? Онларын иши көнүллү ианәләр һесабына һәјата кечирилир (2 Кор. 9:7). Нә ибадәт евиндә, нә дә топлантыларда пул јығылмыр. Лакин тәкҹә өтән ил Јеһованын Шаһидләри мүждәнин тәблиғинә 1,93 милјард саат сәрф едиб вә һәр ај 9 милјондан чох инсана пулсуз Мүгәддәс Китаб дәрси кечибләр. Онлар бу иши нәинки һавајы ҝөрүрләр, һәтта бу иш үчүн пулу өз ҹибләриндән хәрҹләјирләр. Јеһованын Шаһидләринин ҝөрдүјү ишлә бағлы бир тәдгигатчы демишди: «Әсас мәгсәд тәблиғ етмәк вә өјрәтмәкдир... Онларда руһаниләр синфи јохдур. Бунун да сәјәсиндә нә гәдәр хәрҹ азалыр». Демәли, биз бу иши һансы нијјәтлә ҝөрүрүк? Садә диллә десәк, буну көнүл хошлуғу илә едирик, чүнки Јеһова Аллаһы вә инсанлары севирик. Белә ҹанла-башла хидмәт етмәклә Зәбур 110:3 ајәсиндә јазылан пејғәмбәрлији јеринә јетиририк. (Ајәни охујун.)

10. Иса Мәсиһ вә онун шаҝирдләри һансы үсулларла тәблиғ едирдиләр?

¹⁰ Иса Мәсиһ вә онун шаҝирдләри мүждәни һансы үсулларла тәблиғ едирдиләр? Онлар адам олан һәр јердә — иҹтимаи јерләрдә вә евләрдә тәблиғ едирдиләр. Бундан башга, ев-ев ҝәзиб лајигли адамлары ахтарырдылар  (Мәт. 10:11; Лука 8:1; Һәв. 5:42; 20:20). Бу үсулун сајәсиндә ајры-сечкилик етмәдән һамыја шаһидлик едилирди.

11, 12. Мүждәнин тәблиғи мәсәләсинә ҝәлдикдә Јеһованын Шаһидләри Христиан дүнјасындан нә илә фәргләнир?

¹¹ Бәс демәк олармы ки, Христиан килсәләри онларын изи илә ҝедир? Әксәр һалларда килсәјә ҝәләнләр ҹанла-башла тәблиғ ишини руһаниләр синфинин өһдәсинә бурахырлар. Христиан руһаниләри јени-јени инсанлары тапмаг әвәзинә, артыг килсәјә ҝәләнләри итирмәмәк үчүн әлләшиб-вурушурлар. Дүздүр, һәрдән бәзи руһаниләр килсәјә ҝәләнләри тәблиғ етмәјә сәсләјирләр. Мәсәлән, 2001-ҹи илин әввәлиндә II Иоһанн Павел мәктубунда демишди: «Илләрдир ки, мән һамыны јени мүждәчилик ишинә сәсләјирәм. Инди јенә дә буну едирәм... Биз өзүмүздә Булусдакы әһвал-руһијјәни аловландырмалыјыг. О демишди: “Әҝәр тәблиғ етмирәмсә, вај һалыма!”» Папа сөзүнә давам едәрәк демишди ки, бу иш «бир груп “пешәкарын” иши олмамалыдыр. Бу иш Аллаһын халгынын һәр бир үзвүнүн өһдәсинә дүшүр». Анҹаг нә олсун? Нә гәдәр адам бу чағырыша һај верди?

¹² Бәс Јеһованын Шаһидләри һаггында нә демәк олар? Јалныз онлар Мәсиһин 1914-ҹү илдән Падшаһ кими идарә етдијини тәблиғ едирләр. Онлар Исанын ҝөстәришинә әмәл едәрәк тәблиғ ишини һәјатларында ән биринҹи јерә гојурлар (Марк 13:10). Бир китабда јазылыб: «Јеһованын Шаһидләри үчүн тәблиғ иши бүтүн ишләрдән даһа өнәмлидир» («Pillars of Faith—American Congregations and Their Partners»). Бир Шаһидин сөзүнә истинад едәрәк һәмин китабын мүәллифи јазмышды: «Кимсә аҹлыг чәкәндә, тәнһа оланда, хәстәләнәндә онлар чалышырлар көмәкләрини әсирҝәмәсинләр, анҹаг һеч вахт унутмурлар ки, онларын әсас иши дүнјанын ахыры вә гуртулушун ваҹиблији илә бағлы хәбәри тәблиғ етмәкдир». Јеһованын Шаһидләри Исанын вә онун шаҝирдләринин тәблиғ үсулларындан истифадә едәрәк һәмин хәбәри усанмадан тәблиғ едирләр.

13. Тәблиғ иши һансы мигјасда һәјата кечирилмәлидир?

¹³ Иса Мәсиһ мүждәнин «бүтүн јер үзүндә» тәблиғ едиләҹәјини дејәрәк тәблиғ ишинин мигјасыны ҝөстәрмишди (Мәт. 24:14). Онун давамчылары «бүтүн халгларын ичиндә» шаҝирд һазырламалыдырлар (Мәт. 28:19, 20). Демәли, тәблиғ иши бүтүн дүнјаны әһатә етмәлидир.

14, 15. Нә сүбут едир ки, Јеһованын Шаһидләри тәблиғин мигјасы илә бағлы Мәсиһин етдији пејғәмбәрлији һәјата кечирир? (Мәгаләнин әввәлиндәки шәклә бахын.)

¹⁴ Јеһованын Шаһидләри Мәсиһин тәблиғин мигјасы илә бағлы етдији пејғәмбәрлији һәјата кечирир. Онларын буна неҹә наил олдуғуну анламаг үчүн бәзи мәгамлара бахаг. Бирләшмиш Штатларда мөвҹуд олан мүхтәлиф мәзһәбләрдә тәхминән 600 000 дин хадими вар. Һәмин өлкәдә тәхминән 1 200 000 Јеһованын Шаһиди јашајыр. Бүтүн дүнјада Рома  католик килсәсинин 400 000-дән чох кешиши вар. Инди Падшаһлығы тәблиғ едән Шаһидләрин сајына фикир верин. Бүтүн дүнјада тәхминән сәккиз милјон көнүллү хидмәтчи 240 өлкәдә тәблиғ едир. Доғрудан да мөһтәшәм бир иш һәјата кечирилир. Бу исә Јеһоваја шәрәф ҝәтирир! (Зәб. 34:1; 51:15).

¹⁵ Јеһованын Шаһиди кими бизим арзумуз будур ки, сон ҝәлмәмишдән әввәл мүмкүн гәдәр чох инсана мүждәни чатдыраг. Бу сәбәбдән, биз Мүгәддәс Китаба әсасланан нәшрләрин тәрҹүмәси вә чап едилмәси саһәсиндә ҝөрдүјүмүз ишләрә ҝөрә һамыдан сечилирик. Милјонларла китаб, журнал, буклет, топланты дәвәтнамәләри вә Мәсиһи анма мәрасими үчүн олан дәвәтнамәләр пулсуз пајланылыр. Биз 700-дән чох дилдә нәшрләр дәрҹ едирик. Мүгәддәс Китабын «Јени Дүнја Тәрҹүмәси»нин 130-дан чох дилдә 200 милјондан чох нүсхәси чап олунуб. Тәкҹә өтән ил әрзиндә тәхминән 4,5 милјард нәшр дәрҹ едилиб. Бизим рәсми веб-сајтымыз 750-дән чох дилдә мөвҹуддур. Башга һансы дини груп бу гәдәр иш ҝөрүр?

16. Һарадан билирик ки, Јеһованын Шаһидләриндә Аллаһын руһу вар?

¹⁶ Бәс тәблиғ иши нә гәдәр давам едәҹәк? Иса Мәсиһ демишди ки, үмумдүнја тәблиғ иши ахырзаман бојунҹа давам едәҹәк вә сонра сон ҝәләҹәк. Јашадығымыз ахырзаман дөврүндә башга һансы дини груп мүждәни тәблиғ едир? Бәзән хидмәтдә растлашдығымыз адамлар дејирләр: «Мүгәддәс руһ биздәдир, амма иши ҝөрән сизсиниз». Анҹаг бу иши мәтанәтлә давам етдирмәјимиз биздә Аллаһын руһунун олдуғундан хәбәр вермир? (Һәв. 1:8; 1 Бут. 4:14). Һәрдән мүәјјән дини груплар Јеһованын Шаһидләринин мүнтәзәм олараг етдији иши ҝөрмәјә ҹәһд ҝөстәрирләр, анҹаг онларын ҹәһдләри мүвәффәгијјәтсизлијә уғрајыр. Бәзиләри мүәјјән бир вахт әрзиндә миссионер ады алтында хидмәт едир, сонра исә јенидән гајыдыб өз һәјатыны јашајыр. Бир башгалары һәтта ев-ев тәблиғ етмәјә чалышыр. Анҹаг нәји тәблиғ едирләр? Бу суалын ҹавабы ајдын ҝөстәрир ки, онлар Мәсиһин башладығы иши давам етдирмирләр.

17, 18. а) Нәјә ҝөрә әминликлә дејә биләрик ки, бу ҝүн Падшаһлыг һагда хәбәри тәблиғ едән Јеһованын Шаһидләридир? б) Нәјин сајәсиндә бу иши давам етдиририк?

¹⁷ Беләликлә, бу ҝүн Падшаһлыг һагда мүждәни ким тәблиғ едир? Там гәтијјәтлә дејә биләрик ки, Јеһованын Шаһидләри! Нәјә ҝөрә буна әминик? Чүнки биз лазыми хәбәри, Падшаһлыг һаггында мүждәни тәблиғ едирик. Инсанларын јанына ҝетмәјимиз ону ҝөстәрир ки, биз дүзҝүн үсуллардан истифадә едирик. Тәблиғ ишини дүзҝүн нијјәтлә — мадди мәнфәәт үчүн јох, мәһәббәтдән ирәли ҝәләрәк јеринә јетиририк. Бизим ишимиз дүнја мигјасында һәјата кечирилир, мүждәни бүтүн халглара вә бүтүн дилләрдә данышан инсанлара чатдырырыг. Биз бу иши јубанмадан, илбәил, сон ҝәләнәдәк давам етдирәҹәјик.

¹⁸ Һәгигәтән дә, јашадығымыз бу тарихи дөврдә Аллаһын халгынын әлдә етдији наилијјәтләр һејрәтамиздир. Бәс бүтүн бу ишләр нәјин сајәсиндә һәјата кечирилир? Һәвари Булусун мәктубунда бу суалын ҹавабы јазылыб: «Аллаһ Өз хош мәрамына ҝөрә сизи гүввәтләндирир. О, гәлбиниздә һәм арзу ојадыр, һәм дә фәалијјәт ҝөстәрмәјиниз үчүн сизә ҝүҹ верир» (Филип. 2:13). Гој сәмави Атамыз бундан сонра да һәр биримизи гүввәтләндирсин ки, биз әлимиздән ҝәләни едиб, хидмәтимизи там јеринә јетирәк (2 Тим. 4:5).