1, 2. Ikkefa ekkewe kapas eis a ppiitá ren minne Jesus a apasa lón Mateus 24:14?

 JESUS a oesini pwe lón ekkewe ránin le sópwólóón, ewe kapas allim usun ewe Mwú epwe esilefeil ngeni aramas meinisin. (Mat. 24:14) Kich Chón Pwáraatá Jiowa sia silleló ren ach ei angangen afalafal. Ekkóch aramas ra pwapwaiti met sia afalafal ngeniir nge ekkóch rese. Nge ren mwo chókkewe rese pwapwaiti ewe pwóróus sia afalafal ngeniir ra chúen súféliti ach angang. Sia apasa pwe sia féri ewe angang Jesus a oesini usun. Mi wor ach pwúng le apasa ena? Ifa usun sipwe fókkun silei pwe ach angangen afalafal ina ewe angang Jesus a oesini an epwe fis?

² Chómmóng lamalam ra apasa pwe ra afalafala ewe kapas allim ngeni aramas. Nge ra chék afalafal lón ar fál, lón TV, are wóón Internet are ra chék apwóróusa ngeni ekkewe ekkóch met ra káé usun Jesus. Ekkóch ra meefi pwe ra féri angangen afalafal ren ar álisi aramas mi osupwang lón pekin pioing me sukul. Nge itá ikkena ekkewe sókkun angang Jesus a ekieki lupwen a fós usun angangen afalafal?

3. Ikkefa ekkewe rúáánú mettóch mi lamot néún Jesus kewe chón káé repwe féri me ren Mateus 28:19, 20?

 ³ Itá Jesus a mochen pwe néún kewe chón káé repwe chék witiwit an aramas repwe etto rer? Aapw! Mwirin án Jesus manawsefál, iei met a ereni fitepúkú chón tapweló mwirin: “Oupwe feinno ren aramas meinisin won fonufan o oupwe ewinireno pwe repwe nei chon kaeo: oupwe papataisir . . . , iwe oupwe afanafaner pwe repwe anneasosichi mettoch meinisin minne ua fen annuk ngeni kemi.” (Mat. 28:19, 20, KG) Iwe, mi lamot pwe oukich néún Jesus chón káé sipwe féri rúáánú mettóch. Mi lamot sipwe ewiliireló, papataisiir, me afalafaler. Nge akkomw, mi lamot sipwe feiló ngeni aramas. Emén sou káé ewe Paipel a áweweei wisen emén me emén chón lúkú an epwe ‘feiló’ ekis meinisin ese lifilifil ika mi kan are towau.​—Mat. 10:7; Luk. 10:3.

4. Met a kapachelong lón án emén wiliti chón “attaua aramas”?

⁴ Met Jesus a mochen néún kewe chón káé repwe féri? Itá a mochen pwe emén me emén epwe féri pwisin an kókkót le afalafal, are a mochen pwe repwe afalafal fán kókkótéch usun eú mwicheich? Pokiten ese fókkun tufich an emén aramas epwe afalafal ngeni “aramas meinisin won fonufan” a lamot néún kewe chón káé repwe kókkótéch usun eú mwicheich. Ina met Jesus a ekieki lupwen a etiwa néún kewe chón káé ar repwe wiliti chón “attaua aramas.” (Álleani Mateus 4:18-22.) Jesus ese fós usun an emén chón attau áeá pwisin an we ó me pa, me wikkitiwit tori epwe ngir. Nge ewe angangen attau Jesus a fós usun a wewe ngeni néúnéún chómmóng epilo. A lamot ngeni ena sókkun angangen attau an epwe kókkótéch, angang weires me chómmóng aramas repwe angangfengen.​—Luk. 5:1-11.

5. Ikkefa ekkewe rúáánú kapas eis a lamot sipwe pélúweni me pwata?

⁵ Ren ach sipwe silei ié kewe ra afalafala ewe kapas allim lón ei fansoun, mi lamot sipwe pélúweni ekkeei rúáánú kapas eis:

•   Itá epwe ifa ewe pwóróus néún Jesus kewe chón káé repwe afalafala ngeni aramas?

•   Itá met popun repwe féri ena angang?

•   Itá epwe ifa alen ar repwe tikeri aramas lón ar afalafal?

•   Itá ifa úkúkún chéúlóón ei angang, me ifa ttaman repwe féri?

 Pélúwen ekkeei kapas eis epwe álisikich le silei ika ié kewe ra féri ei angangen amanawa aramas me epwe apéchékkúla letipach ach sipwe akkachocho le afalafal.​—1 Tim. 4:16.

6. Pwata ka tongeni lúkúlúk pwe Chón Pwáraatá Jiowa ra afalafalafeili ewe pwóróus Jesus a ewisa kich ach sipwe afalafala?

⁶ Álleani Lukas 4:43. Jesus a afalafala “ewe Pworausen Manau [“kapas allim,” NW] usun Mwün Kot,” me a mochen néún kewe chón káé repwe pwal féri ena angang. Menni mwichen aramas ra afalafalafeili ena pwóróus ngeni meinisin? Chón Pwáraatá Jiowa chék! Pwal mwo nge ekkewe aramas rese sanikich ra mirititi pwe mi pwúng ena. Áwewe chék, emén patere mi fen nónnóm lón chómmóng sókkópaten fénú, nge lón eú me eú fénú a nónnóm ie a fen eisini ekkewe Chón Pwáraatá Jiowa ika ifa ewe pwóróus ra afalafala ngeni aramas. Iwe, nengeni met ena patere a ereni emén Chón Pwáraatá Jiowa, a erá: “Iir meinisin ra fókkun tiparoch pwe léllé chék met ra apasa: ‘Ewe kapas allim usun ewe Mwú.’”  Ren enletin minne ena patere a apasa a wesewesen ánnetatá pwe kich sise tiparoch nge sia fen tipeeúfengen usun Chón Kraist mi enlet. (1 Kor. 1:10) Ewe Leenien Mas A Esilefeili Án Jiowa We Mwú a pwal menlapei pwóróusen án Kot we Mwú. Ei magazine a kawor lón 254 fósun fénúfan me a kan katowu arapakkan 59,000,000 kapiin iteitan a ffér, iwe ina ewe a chéúló wóón unusen fénúfan lap seni meinisin magazine!

7. Ifa usun sia silei pwe ekkewe néúwisin lamalam rese afalafala ngeni aramas ewe pwóróus Jesus a fós usun?

⁷ Ekkewe néúwisin lamalam rese afalafala aramas ewe pwóróus usun án Kot we Mwú. Ika ra fós usun ewe Mwú, chómmóng leir ra apasa pwe ina och memmeef mi nóm lón letipen aramas. Rese áiti ngeniir pwe ena Mwú eú mwú lón láng nge Jesus ewe sounemenem. Ra kan fós usun Jesus lón fansoun Krismas are Easter. Rese áweweei pwe ena Mwú epwe pwákini meinisin án aramas osukosuk me ekiseló chék epwe unusen amóeló féfféringaw wóón fénúfan. (Pwär. 19:11-21) A ffat pwe ekkewe néúwisin lamalam rese silei met Jesus epwe féri lón wisan we usun Kingen án Kot we Mwú. Iwe, pokiten rese weweiti ewe pwóróus Jesus a fós usun, iwe rese pwal weweiti pwata mi lamot repwe afalafal.

8. Ifa ewe popun ese pwúng an ekkewe ekkóch féri ewe angangen afalafal?

⁸ Néún Jesus chón káé itá resap féri ei angangen afalafal fán iten moni are kaútáán imw mi kon luló lingan. Jesus a apasa: “Oua angafatei ewe manaman, oupwe pwal fangafat.” (Mat. 10:8) Ina popun ewe angangen afalafal itá esap eú angangen business. (2 Kor. 2:17) Néún Jesus chón káé itá resap ekiekin peiof seni ar féri ei angang. (Álleani Föför 20:33-35.) Inaamwo ika a fókkun ffat án Jesus ei kapasen éúréúr, nge lap ngeni lamalam a watte ar angangen fes moni fán iten peioffun néúr kewe néúwis me pwal ekkóch néúr chón angang me túmúnún feffeitáán ar lamalam. Ina popun, chómmóng néúwisin lamalam ra fókkun pisekisekiló ren.​—Pwär. 17:4, 5.

9. Ifa usun Chón Pwáraatá Jiowa ra pwári pwe mi pwúng ewe popun ra féri ewe angangen afalafal?

⁹ Chón Pwáraatá Jiowa ra fes moni lón ar kewe Leenien Mwich are mwichelap? Aapw! Ar angang a tufich ren álillisin ewe monien asor aramas ra awora seni pwisin letiper. (2 Kor. 9:7) Lón ewe ier, Chón Pwáraatá Jiowa ra áeá arapakkan 2 billion awa le afalafala ewe kapas allim me asukula lap seni 9 billion aramas usun ewe Paipel iteiten maram. Iir rese peiof nge ra pwapwa le néúnéú pwisin néúr moni pwe repwe féri ei angang. Iei met emén sou káé a apasa usun angangen Chón Pwáraatá Jiowa: “Ewe angang ra fókkun achocho ngeni, ina ewe angangen afalafal me asukula aramas.” A pwal apasa pwe Chón Pwáraatá Jiowa ese wor néúr néúwis mi peiof. Iwe ika sise féri ei angangen afalafal fán iten moni, nge met popun sia féri? Sia tipemecheres le féri ei angang pokiten sia tongei Jiowa me aramas. Ena ekiek a apwénúetá ewe oesini lón Kölfel 110:3. (Álleani.)

10. Met Jesus me néún kewe chón káé ra féri ren ar repwe tikeri ekkewe aramas repwe afalafaler?

¹⁰ Met Jesus me néún kewe chón káé ra féri ren ar repwe tikeri ekkewe aramas repwe afalafaler? Ra feiló ngeni ikewe ie mi wor aramas ie. Áwewe chék, ra afalafal wóón al me lón market. Ra pwal achocho le chuuri aramas lón pwisin imwer.  (Mat. 10:11; Luk. 8:1; Föf. 5:42; 20:20) Ewe angangen afalafal imw me imw ina eú angang mi kókkótéch pwe repwe tori sokopaten aramas.

11, 12. Ren ewe angangen afalafala ewe kapas allim Jesus a fós usun, alélléfengeni met ekkewe ekkóch lamalamen Chón Kraist ra féri me met néún Jiowa kewe aramas ra féri.

¹¹ Ekkewe ekkóch lamalam ra afalafala ewe kapas allim usun met Jesus a féri? Fán chómmóng, ekkewe néúwisin lamalam mi peiof ra kan afalafal ngeni pwisin chón ar lamalam. Rese álisi pwal ekkewe ekkóch aramas ar repwe wiliti néún Jesus chón káé, nge ra chék túmúnú chókkewe ra fen chóni ar lamalam. Fán ekkóch ra sótun pesei chón ar lamalam ar repwe féri ewe angangen afalafal. Áwewe chék, lón ewe ier 2001, ewe Papa Pin John Paul II a apasa lón néún we taropwe pwe mi lamot chón an lamalam repwe afalafalafetálei ewe Kapas Allim me repwe tinikken usun aposel Paulus, ewe a apasa: “Osupwangei are usap afalafala ewe Kapas Allim.” Mwirin ewe papa pin a apasa pwe esap chék eú kúkkún kúmiin aramas mi fen káit repwe féri ei angangen afalafal, nge itá wisen meinisin chón ar we lamalam. Iwe nge, chókúkkún chék ra apwénúetá ena pesepes.

¹² Nge ifa usun ren Chón Pwáraatá Jiowa? Iir chék ra afalafala pwe Jesus a fen nemenem usun emén King seni ewe ier 1914. Ra álleasochisi Jesus me akkomwa lón manawer ewe angangen afalafal. (Mark. 13:10) Me ren eú puken káéén lamalam, a apasa pwe a fókkun lamot ewe angangen afalafal me ren Chón Pwáraatá Jiowa. A pwal apasa pwe lupwen ra chuuri aramas mi echik, letipengaw, me semmwen, ra achocho le álisiir. Nge rese ménúki pwe met a lamot seni meinisin, ina ar repwe afalafal usun sópwólóón ótóten ei fénúfan me áiti ngeni aramas ewe alen manaw. Chón Pwáraatá Jiowa ra akkachocho le afalafala ena pwóróus me áppirú met Jesus me néún kewe chón káé ra féri pwe repwe tikeri aramas.

13. Epwe itá ifa úkúkún chéúlóón ewe angangen afalafal?

¹³ Jesus a erá pwe néún kewe chón káé repwe afalafal me asukula aramas usun ewe kapas allim “won unusen fanüfan.” A allúk ngeniir pwe repwe álisi “chon ekewe mwü meinisin” ar repwe wiliti néún Jesus chón káé. (Mat. 24:14; 28:19, 20) Ei mettóch a wewe ngeni pwe mi lamot pwe ewe kapas allim epwe chéúfetál wóón unusen fénúfan.

14, 15. Met a ánnetatá pwe Chón Pwáraatá Jiowa ra apwénúetá án Jesus oesini usun chéúlóón ewe angangen afalafal? (Ppii ewe sasing lepoputáán ei lesen.)

¹⁴ Chón Pwáraatá Jiowa chék ra apwénúetá án Jesus oesini an epwe chéúfetál wóón unusen fénúfan ewe kapas allim. Pwata sia apasa ena? Lón Merika, mi wor ina epwe 600,000 néúwisin lamalamen tipitipin Chón Kraist, nge mi wor 1,200,000 som Chón Pwáraatá Jiowa ra afalafala  ewe kapas allim lón ena fénú. Ina epwe 400,000 patere wóón unusen fénúfan, nge mi wor lap seni 8 million Chón Pwáraatá Jiowa ra afalafala ewe kapas allim lón 240 fénú. A ffat pwe Chón Pwáraatá Jiowa ra afalafala ewe kapas allim wóón unusen fénúfan, me ina eú angang mi elingaaló me mwareiti Jiowa!​—Kölf. 34:1; 51:15.

¹⁵ Kich Chón Pwáraatá Jiowa, sia achocho le tikeri me afalafal ngeni chómmóng aramas usun ewe kapas allim me mwen ewe sópwólóón. Ren ach sipwe féri ei angang, sia fen afféúni me atowu fite fite million puk, chékúkkúnún taropwe, taropween etiwetiw fán iten mwichelap me Áchechchem lón lap seni 700 fósun fénúfan. Sia anéúnéú ngeni aramas nge rese kamé. Lón chék ewe ier a ló, sia atowu ina epwe 4.5 billion minen álillisin Paipel. Sia pwal atowu lap seni 200 million kapiin ewe New World Translation of the Holy Scriptures lón lap seni 130 fósun fénúfan. Aramas ra tongeni tétá wóón ach website, nge masouan lón a kawor lón lap seni 750 fósun fénúfan. Chón Pwáraatá Jiowa chék ra féri ei esin angang mi amwarar.

16. Ifa usun sia silei pwe a nóm ren Chón Pwáraatá Jiowa án Kot we manaman mi fel?

¹⁶ Ifa ttaman ach sipwe féri ei angangen afalafal? Jesus a apasa pwe aramas repwe esilefetálei ewe kapas allim tori sópwólóón. Kich Chón Pwáraatá Jiowa sia tongeni likiitú le féri ei angangen afalafal lón ekkeei ránin le sópwólóón pokiten chék a nóm rech án Jiowa we manaman mi fel. (Föf. 1:8; 1 Pet. 4:14) Ekkóch aramas mi achocho lón ar lamalam ra tongeni apasa: “Mi nóm rem ewe ngún mi fel.” Nge met, ra tongeni féri ewe angang Chón Pwáraatá Jiowa ra féfféri lón ekkeei ránin le sópwólóón? Ekkóch mwichen aramas ra sótun féri ewe esin angangen afalafal sia kan féri, nge ra sópwongaw. Ekkóch ra mochen afalafal, nge ren chék ekis fansoun. Nge mi pwal wor ekkóch neman repwe afalafal imw me imw, nge rese afalafal usun ewe kapas allim usun ewe Mwú. Ina popun, iir rese apwénúetá ena angang Jesus a poputááni.

17, 18. (a) Pwata sia fókkun silei pwe Chón Pwáraatá Jiowa iir ekkewe ra wisen féri ewe angangen afalafala ewe kapas allim usun ewe Mwú lón ei fansoun? (b) Ifa usun sipwe tufichin sópweló le féri ei angang?

¹⁷ Iwe, ié kewe ra esilefetálei ewe kapas allimen ewe Mwú lón ei fansoun? Chón Pwáraatá Jiowa chék! Ifa usun sia silei? Pokiten sia afalafal ngeni aramas ewe pwóróus mi pwúng, ina ewe kapas allim usun ewe Mwú. Sia kúttafetálei aramas pwe sipwe afalafaler, iwe sia eáni napanap mi pwúng ren ach sipwe tikeri aramas. Sia afalafal pokiten sia tongei Jiowa me tongei aramas, iwe mi pwúng ewe popun sia féri ei angang. Ach angangen afalafal a kon watte chéúlóón pokiten sia afalafal ngeni aramas seni mwú meinisin me eáni sókkopaten fós. Ina minne, sipwe sópweló le akkafalafalafetálei ei kapas allim usun ewe Mwú tori sópwólóón!

¹⁸ Sia fókkun mwar ren amwararen ewe angang néún Jiowa kewe aramas ra féfféri ren ar afalafala ewe kapas allim lón ekkeei ránin le sópwólóón. Nge ifa usun sia tufichin féri unusen ei angang? Ewe aposel Paulus a áweweei: “Pun Kot ewe a angang lomi, epwe afisätä ämi mochen me ämi tufichin apwönüetä letipan.” (Fil. 2:13) Amwo Jiowa epwe sópweló le akkapéchékkúlakich pwe sipwe tongeni féri úkúkún ach tufich le akkafalafala ewe kapas allim!​—2 Tim. 4:5.