1, 2. Iesu ena hereva Mataio 24:14 ese dahaka henanadai ia havaraia?

HEREVANA taunimanima ese ita idia ura henia o ita idia dadaraia, to momo idia diba Iehova ena Witnes taudia be hanaihanai haroro gaukara idia karaia. Reana nega haida haroro gaukara ai oi davaria taudia momo be ita abia dae gaudia idia abia dae lasi, to idia ese eda gaukara idia matauraia. Ita diba vadaeni Iesu ia peroveta, inai sivarai namona be tanobada ena kahana ibounai dekenai do idia harorolaia. (Mat. 24:14) To edena dala ai ita diba ita karaia gaukarana be Iesu ese ia perovetalaia? Ita gwau ita sibona ese unai gaukara ita karaia noho be maoro, a?

² Dubu momo idia laloa idia be sivarai namona idia harorolaia noho. To, idia be dubu sibona ai idia haroro, dubu gaukaradia idia karaia, TV, intanet eiava reidio sibona ai idia haroro. Ma haida idia laloa dabu taudia o gorere taudia idia durua bona sikuli idia haginidia amo haroro gaukara idia karaia noho. Unai be Iesu ese ena hahediba taudia dekenai ia henia hahegani bamona, a?

3. Mataio 28:19, 20 ai ia noho haheganina dainai, Iesu ena murinai idia raka taudia be dahaka gau foa do idia karaia?

 ³ Iesu ena hahediba taudia be do idia naria ela bona taunimanima be idia dekenai do idia lao bena do idia haroro henia, a? Lasi! Iesu ia toreisi lou murinai, iena hahediba taudia handred bamona dekenai ia hedinarai bona ia hamaorodia, ia gwau: “Umui Lao, bese ibounai taudia be hahediba taudia ai umui halaoa, . . . idia do umui bapatisoa, bona idia umui hadibaia, umui lau hamaoroa gaudia ibounai be do idia badinaia.” (Mat. 28:19, 20) Namona be gau foa ita karaia. Hahediba taudia halaoa gaukarana do ita karaia, idia do ita bapatisoa bona ita hadibaia. To ita karaia gauna ginigunana be dahaka? Iesu ia gwau: “Umui lao”! Baibel ia diba bada tauna ta ia gwau: “Unai hereva ‘lao’ ese abidadama tauna ena gaukara ia herevalaia, herevana ia be taoni eiava davara do ia hanaia.”​—Mat. 10:7; Luka 10:3.

4. “Taunimanima haoda henia” gaukarana ena anina be dahaka?

⁴ Iesu ia gwau sivarai namona be ia murinai idia raka taudia ta ta sibona ese do ia karaia eiava ibounai ese do idia karaia? Tau tamona be do ia hegeregere lasi “bese ibounai” dekenai ia haroro totona, to taunimanima momo ese unai idia karaia diba. Unai dainai taunimanima ibounai ese unai gaukara idia karaia be namo. Iesu ese ena hahediba taudia ia boiria ‘taunimanima haoda henia taudia ai do ia halaoa’ neganai, unai ia hahedinaraia. (Mataio 4:18-22 duahia.) Iesu be haoda tauna ia gini noho bona ia naria gwarume ese guma ia ania karana ia herevalaia lasi. To, haoda taudia ese reke idia gaukaralaia karana ia herevalaia​—nega momo unai gaukara be haoda taudia momo ese idia karaia.​—Luka 5:1-11.

5. Edena henanadai foa edia haere do ita tahua bona dahaka dainai?

⁵ Daidia ese hari sivarai namona idia harorolaia ita diba totona, namona be inai henanadai foa ita haerelaia:

• Haroro gaukara lalonai dahaka sivarai do ita harorolaia?

• Dahaka dainai haroro gaukara ita karaia?

• Haroro gaukara ai edena dala idauidau do ita gaukaralaia?

• Haroro gaukara ena bada bona ena daudau be edena bamona?

Unai henanadai edia haere ese ita do ia durua ita diba daidia ese unai hahemauri gaukarana idia karaia noho, to danu ita do ia hagoadaia mai abidadama ida ita haroro noho.​—1 Tim. 4:16.

6. Dahaka dainai oi abia dae Iehova ena Witnes taudia be sivarai maorona idia harorolaia noho?

⁶ Luka 4:43 duahia. Iesu be “Basileia ena sivarai namona ia harorolaia” bona ia ura ena hahediba taudia be unai bamona do idia karaia. Daidia ese Basileia ena sivarai namona be “bese ibounai” dekenai idia harorolaia noho? Haere be inai​—Iehova ena Witnes taudia sibona. Ita idia inai henia taudia haida be unai idia abia dae danu. Hegeregere, nega ta pris tauna ta be Witnes tauna ta ia hamaoroa, ia noho tanodia ai ia be Witnes taudia ia nanadaia idia be dahaka sivarai idia harorolaia. Edia haere be dahaka? Unai pris tauna ia gwau: “Idia ibounai be kavakava, badina haere tamona idia henia, idia gwau: ‘Basileia ena sivarai namona.’” To, unai Witnes taudia be kavakava lasi, badina idia be Keristani taudia korikoridia bamona, mai lalotamona ida idia hereva. (1 Kor. 1:10) Bona idia ibounai be, Gima Kohorona Iehova Ena Basileia Ia Harorolaia magasin ai ia noho sivaraina idia harorolaia  noho danu. Unai magasin be gado 254 ai idia halasia, bona kahirakahira kopi 59,000,000 idia printaia dainai, tanobada ibounai dekenai idia hariharilaia.

7. Edena bamona ita diba Kerisendom be sivarai namona idia harorolaia lasi?

⁷ Kerisendom ena gunalaia taudia be Dirava ena Basileia idia harorolaia lasi. Basileia idia herevalaia neganai, idia gwau ia be taunimanima edia hemami ta sibona o Keristani taudia edia kudouna lalonai ia noho gauna ta. (Luka 17:21) Idia ese taunimanima idia durua lasi dainai idia laloparara lasi Dirava ena Basileia be guba gavamanina bona Iesu Keriso ese ia Lohiaia, unai gavamani ese taunimanima edia hekwakwanai ibounai do ia haorea, bona kahirakahira kara dika taudia be inai tanobada amo do ia kokidia. (Apok. 19:11-21) To, idia gwau Iesu laloatao totona Krismas bona Ista idia karaia be namo. Idia diba lasi Iesu be tanobada ena Lohia Tauna matamatana ai ia lao vadaeni, bona do ia karaia gaudia be idia diba lasi. Idia ese do idia harorolaia sivaraina idia laloaboio vadaeni dainai, anina be haroro gaukara karaia ena badina idia laloaboio danu, a?

8. Haroro gaukara totona, edena badina kereredia ita dadaraia be namo?

⁸ Haroro gaukara ita karaia ena badina be dahaka? Iseda haroro gaukara be moni gogoa bona dava bada ruma haginia totona ita karaia lasi. Iesu ese ena hahediba taudia ia hamaoroa, ia gwau: “Umui abia davana lasi, umui henia davana lasi.” (Mat. 10:8) Dirava ena Hereva be do ita hoihoilaia gauna lasi. (2 Kor. 2:17) Sivarai namona idia harorolaia taudia be moni eiava kohu abia totona idia haroro lasi. (Kara 20:33-35 duahia.) Ena be Iesu ena hadibaia hereva be ia hedinarai goevagoeva, to dubu momo be moni idia gogoa unai amo edia dubu idia naria bona dubu ena gunalaia taudia bona gaukara taudia edia davana idia henia totona. Unai dainai, Kerisendom gunalaia taudia momo be taga taudia.​—Apok. 17:4, 5.

9. Edena dala ai Iehova ena Witnes taudia ese idia hahedinaraia, idia be badina maorona dainai haroro gaukara idia karaia?

⁹ Iehova ena Witnes taudia edia gaukara be edena bamona idia durua? Edia gaukara be volantia kontribusen moni amo idia durua. (2 Kor. 9:7) Kingdom Hall eiava hebouhebou gabudia ai moni idia gogoa lasi. To vanegai laganina ai, Iehova ena Witnes taudia ese hora 1.93 bilioni idia gaukaralaia sivarai namona idia harorolaia totona, bona hua ta ta ai davana lasi Baibel stadi 9 milioni mai kahana idia karaia. Hoa gauna be, ena be idia karaia gaukarana be davana lasi, to edia tauanina durua gaudia be sibodia ese davana idia karaia. Tahua gaukara ia karaia tauna ta ese Iehova ena Witnes taudia edia gaukara be inai bamona ia herevalaia, ia gwau: “Edia tahua gauna be haroro bona hahediba gaukara. . . . Edia orea lalonai prist o tau badadia idia noho lasi dainai, edia kontribution idia gaukaralaia namonamo.” To, dahaka dainai haroro gaukara ita karaia? Haroro gaukara be mai eda kudouna ibounai ida ita karaia, badina Iehova bona iseda dekena taudia ita lalokau henidia. Unai ese Salamo 110:3 (Duahia.) ena peroveta herevana ia hagugurua.

10. Iesu bona ena hahediba taudia be edena dala ai sivarai namona idia harorolaia?

¹⁰ Iesu bona ena hahediba taudia be edena dala ai sivarai namona idia harorolaia? Idia be taunimanima idia noho gabudiai idia lao​—pablik gabudiai bona edia ruma ai. Ruma ta ruma ta haroro gaukarana amo kudou maoro taudia idia davaria. (Mat. 10:11; Luka 8:1;  Kara 5:42; 20:20) Unai dala amo taunimanima idauidau idia haroro henia diba.

11, 12. Sivarai namona harorolaia totona, edena dala ai Iehova ena Witnes taudia be Kerisendom amo idia idau?

¹¹ Kerisendom dubudia be unai bamona idia karaia danu, a? Nega momo, edia dubu ai dubu gunalaia taudia o pris taudia sibodia idia haroro. Idia be ‘taunimanima haoda henia’ gaukarana idia karaia lasi, to edia dubu idia lao taudia sibona idia laloa bada. Nega haida edia dubu taudia idia hagoadaia idia haroro totona. Hegeregere, lagani 2001 ena matamana ai, Pope John Paul iharuana ese ena revareva ta dekenai, ia gwau: “Lagani momo lalonai, lau ese inai evanelia gaukara matamatana ena oda ma lau gwauraia. Hari lau gwauraia lou . . . Namona be Paulo ena lalonai lahi bamona ia araia gaunai ita karaia, ia gwau: ‘Bema sivarai namona lau harorolaia lasi, lau madi o!’” Pope ma ia gwau: “Unai gaukara be diba bada taudia sibona ese do idia karaia lasi, to Dirava ena Taunimanima ese idia karaia be namo.” To, taunimanima hida be unai hereva idia badinaia?

¹² Iehova ena Witnes taudia be edena bamona? Idia sibona ese Iesu be lagani 1914 ai King ai ia lao herevana idia harorolaia. Iesu ena hahegani hegeregerena, edia mauri lalonai haroro gaukara idia atoa guna. (Mar. 13:10) Buka ta (Pillars of Faith​—American Congregations and Their Partners) ia gwau: “Iehova ena Witnes taudia be haroro gaukara idia laloa bada.” Unai buka ia torea tauna be Witnes tauna ta ena hereva ia gwauraia, ia gwau: “Idia itaia taunimanima be idia hitolo, sibona idia noho, bona idia gorere neganai, idia ura idia durudia, to idia laloaboio lasi edia maduna badana be tanobada dokona bona hahemauri sivaraina do idia harorolaia.” Iehova ena Witnes taudia ese sivarai namona idia harorolaia neganai, Iesu bona ena hahediba taudia ese idia karaia dalana idia badinaia.

13. Haroro gaukara ena bada be edena bamona?

¹³ Iesu ese haroro gaukara ena bada ia herevalaia neganai, ia gwau sivarai namona be “tanobada ibounai” dekenai do idia harorolaia. (Mat. 24:14) Iesu ia gwau, “bese ibounai taudia” be hahediba taudia ai do ita halaoa. (Mat. 28:19, 20) Anina be tanobada ena kahana ibounai dekenai haroro gaukara do ita karaia be namo.

14, 15. Dahaka ese ia hamomokania Iehova ena Witnes taudia be Iesu ena peroveta herevana idia hagugurua? (Laulau ginigunana herevalaia.)

¹⁴ Iehova ena Witnes taudia ese Iesu ena peroveta herevana idia hagugurua dalana ita lalopararalaia totona, mani inai ita laloa. United States ai, dubu idauidau edia gunalaia taudia ibounai edia namba be 600,000, to unai tano ai Iehova ena Witnes taudia edia namba be 1,200,000. Tanobada hegegemadai, Roman Katolik Dubu edia pris taudia edia namba be 400,000 mai kahana. Mani Basileia sivarai namona be Baibel amo idia harorolaia Witnes taudia edia namba oi laloa.  Tanobada ibounai, Iehova ena Witnes taudia 8 milion mai kahana be tano 240 ai sivarai namona idia harorolaia. Iehova ita hanamoa badina unai gaukara namona ita karaia noho.​—Sal. 34:1; 51:15.

¹⁵ Ita be Iehova ena Witnes taudia dainai, dokona ia do ginidae lasi lalonai namona be taunimanima momo dekenai sivarai namona ita harorolaia. Unai dainai, Baibel bukadia momo ita hahanaia bona printaia karana amo ita hahedinaraia ita be dubu ma haida bamona lasi. Buka, magasin, hebouhebou bona memorial invateisen pepadia milioni momo ita hariharilaia davana lasi. Iseda pablikeisen idauidau be gado 700 mai kahana ai ita hahanaia. Baibel matamatana, New World Translation of the Holy Scriptures ena kopi 200 milioni mai kahana be gado 130 bamona ai idia printaia. Vanegai laganina ai, Baibel buka bona magasin edia kopi ibounai 4.5 bilioni bamona idia printaia. Iseda Web sait ai Baibel bukadia be gado 750 mai kahana ai idia noho. Edena orea ma ta be unai bamona gaukara ia karaia?

16. Edena dala ai ita diba Iehova ena Witnes taudia be Dirava ena lauma helaga ena heduru idia abia?

¹⁶ Unai haroro gaukara ena daudau be edena bamona? Iesu ia gwau dina gabediai unai haroro gaukara be tanobada ibounai do idia karaia, “unai murinai dokona be do ia ginidae.” Inai nega dokona ai, edena dubu oreana ese sivarai namona idia harorolaia noho? Haroro gaukara ai ita davaria taudia haida idia gwau, “Ai be lauma helaga ai abia, to umui be unai gaukara umui karaia noho.” To, haroro gaukara ai hahetoho ita haheaukalaia karana ese ia hamomokania ita be Dirava ena lauma helaga ita abia, ani? (Kara 1:8; 1 Pet. 4:14) Dubu orea haida be Iehova ena Witnes taudia ese hanaihanai idia karaia gaukarana idia tohoa, to idia hegeregere lasi. Ma haida be nega sisina lalonai sibodia idia gwauraia misinari gaukarana idia karaia, bena edia mauri gunana dekenai idia giroa lou. Haida be ruma ta ruma ta gaukarana idia karaia toho, to dahaka idia harorolaia? Unai henanadai ena haere ese ia hahedinaraia, idia be Iesu ese ia hamatamaia gaukarana idia karaia lasi.

17, 18. (a) Dahaka dainai ita gwau diba hari Iehova ena Witnes taudia ese Basileia ena sivarai namona idia harorolaia noho? (b) Dahaka ese ita do ia durua unai gaukara do ita karaia noho totona?

¹⁷ Hari daidia be Basileia ena sivarai namona idia harorolaia noho? Mai momokani ida ita gwau: “Iehova ena Witnes taudia!” Dahaka dainai unai ita abia dae? Badina ita ese sivarai maorona, Basileia ena sivarai namona unai, ita harorolaia. Ita ese haroro dala maorona ita gaukaralaia, badina taunimanima dekenai ita lao. Iseda haroro gaukara be badina maorona dainai ita karaia, unai be lalokau, to moni dainai lasi. Iseda gaukara be ia bada ia lao noho, ita ese bese bona gado idauidau taudia ita haroro henia. Bona unai gaukara do ita karaia goadagoada, ela bona dokona ia ginidae.

¹⁸ Inai nega dokona ai, Dirava ena taunimanima ese idia karaia gaukarana ita itaia noho be moale gauna, ani? Dahaka dainai unai gaukara ia heau namonamo noho? Aposetolo Paulo ese Filipi kongrigeisen ia tore henidia neganai unai ia haerelaia, ia gwau: “Dirava ia karaia gaudia be ia moalelaia dalana hegeregerena, bona unai ia karaia dalana be ia ese emui ura ia hagoadaia, ia ura henia gaudia ibounai umui karaia totona.” (Fili. 2:13) Iseda lalokau Tamana Iehova ese ita do ia hagoadaia, unai amo iseda hesiai gaukara do ita hagugurua.​—2 Tim. 4:5.