1, 2. Anni ira i luttuag nga pakkiavu megafu ta kinagi ni Jesus ta Mateo 24:14?

MASKI umanugu onu kontran ittam na totolay, baddi laman i manniga nga madumu-rumug i Saksi ira ni Jehova ta pallayyagayyada. Awayyana nga egga nalayyagayyammu nga ari umanugu ta pangurug tam ngem irespetoda ittam megafu tatun nga trabahu. Ammu tam nga kinagi ni Jesus nga melayyagayya i mapia nga dumug na Pappatulan ta interu mundo. (Mat. 24:14) Ngem kunnasi tam makagi nga ketuppalan na profesiya ni Jesus i trabahu tam? Ari kari nga mepappangngo nga kagiattam tu sittam i mattuppal tatun nga trabahu?

² Aru nga relihioso nga grupo i mangikakkagi nga ilayyagayyada i Evanghelio, onu i mapia nga dumug. Ngem limitado laman i kukukuadda ta personal ira nga testimonia, pakimisa, onu programa ira ta media​—gukaban na telebision onu na Internet. Egga  ira karuan nga makkakkagi nga egga programada nga panguffun onu libre nga serbisio ta medisina anna ta edukasion. Kunnaw kari i nibilin ira ni Jesus nga kuan na disipulosna?

3. Anni i appa nga mawag nga kuan na disipulos ni Jesus segun ta Mateo 28:19, 20?

³ Maginnag kari ngana laman i disipulos ni Jesus nga umaranni nira i totolay? Ari! Kabalin na paginnolena, kinagina ta ginatu nga disipulosna: “Umay kamu gafu ta ngamin nga totolay ta ngamin nga lugu-lugar anna pabbalinan nu ira tu disipulò. Bawtisowan nu ira . . . . Tudduan nu ira tu parulattad-da ngamin i bili-bilik-ku nikamu.” (Mat. 28:19, 20) Egga gafu i appa nga kawagan nga makua. Mawag tu magaleg tam tu mabbalin tu disipulo, bawtisowan, anna tudduan ira. Ngem anni i ollu nga mawag tu kuattam? Kinagi ni Jesus: “Umay kamu”! Meyannung taw nga bilin, kinagi na tadday nga iskolar ta Biblia: “Trabahu na ngamin nga mangurug i ‘umay,’ ta mismu nga lugarda onu ta tanakuan nga nasion.”​—Mat. 10:7; Luc. 10:3.

4. Anni i nelagum ta “pangà tu totolay, embes tu manango”?

⁴ Tukuyan kari ni Jesus taw i appursigi na kada tadday ta disipulosna, onu i organisado nga kampania na pangilayyagayya ta mapia nga dumug? Megafu ta ari gapa nga makangay i tadday nga tolay ta “ngamin nga lugu-lugar,” mawag i organisado nga appursigi na magaru. Kinagi yatun ni Jesus turi ta nibilinna ta disipulosna nga ‘mangà tu totolay, embes tu manango.’ (Bibbigan i Mateo 4:18-22.) Ari nga tukuyan ni Jesus taw i tattadday nga gumaggimmanango nga mangusa tu bannuè anna appan nga agga-innag laman nu egga i mangagà ta appan. Tukuyanna yatun i pangusa tu ikò—madammo nga trabahu nga kawagan paga nu karuan i pakka-uffu-uffun na aru nga totolay.​—Luc. 5:1-11.

5. Anni i appa nga pakkiavu nga mawag tu matabbag, anna ngatta?

⁵ Tapenu mammuattam nu sinni ira i mangilayyagayya ta mapia nga dumug ta kaggawattam nga ketuppalan na profesiya ni Jesus, mawag nga tabbagattam yaw nga appa nga pakkiavu:

• Anni nakuan i mensahe nga ilayyagayya tam?

• Anni nakuan i motibo tam ta pallayyagayya?

• Anni ira nga metodo i mawag nga meyusa?

• Kunnasi kalawa anna adde sonu anni nga kawagan i pallayyagayya?

Makoffun nittam i tabbag taw ira nga pakkiavu ari laman nga tapenu mammuattam nu sinni ira i magaggangngua ta makepaliag-inango nga trabahu. Patuyagganna gapa yaw i determinasiottam nga ari magimmang ta matalo nga pallayyagayya.—1 Tim. 4:16.

6. Ngatta masiguradu tam nga ilayyagayya na Saksi ira ni Jehova i fustu nga mensahe?

⁶ Bibbigan i Lucas 4:43. Nilayyagayya ni Jesus i “Mapia nga Dumug nga meyannung ta Pammaguray na Dios,” yatutta ekspektanna nga kuan gapa yatun na disipulosna. Anni nga grupo na totolay i mangilayyagayya tatun nga mensahe ta “ngamin nga lugu-lugar”? Manawag i tabbag​—i Saksi ira ni Jehova laman. Ammu yatun maski na kumokkontra ira. Angngariganna, kinagi na tadday nga misionero nga pari ta tadday nga Saksi nga nedestino yaya ta nadduruma nga lugar, tapus niyavuna ta Saksi ira ta kada lugar nga inangngayanna nu anni i ilayyagayyada. Anni i nitabbagda? Kinagi na pari: “Kaggalo ira, para-parehu i tabbagda: ‘I mapia nga dumug na Pappatulan.’” Ngem ari ira nga “kaggalo,” egga pattaradday na Saksi ira megafu ta ari nga makkorontra i ikakkagida,  nga mepangngo laman ta kurug ira nga Cristiano. (1 Cor. 1:10) Ilayyagayyada i mensahe nga egga ta Passifusifutan Mangipakannammu ta Pappatulan ni Jehova. Mabibbig yaw nga magazina ta 254 nga lengguahe anna mappromedio tu maggi-59 million nga kopia na kada isyu i meyimprenta, yari tu yatun i magazina nga pinaka-alawa i sirkulasionna ta mundo.

7. Ngatta makagi tam nga ari nga ilayyagayya na klero na Kakristianuan i fustu nga mensahe?

⁷ Ari nga ilayyagayya na klero na Kakristianuan i Pappatulan na Dios. Kada kagiadda i meyannung ta Pappatulan, aru nira i makkagi nga yatun ay panageno onu kondision laman ta futu na tadday nga Cristiano. (Luc. 17:21) Ariadda nga uffunan i totolay tapenu malippawada nga i Pappatulan na Dios ay gobierno ta langi nga si Jesu-Cristo i Mammaguray, nga yatun i solusion ta ngamin nga problema na totolay, anna aranni ngana nga alsanna i ngamin nga kinamarakay ta davvun. (Nep. 19:11-21) Imbes nga kunnatun, daddammadda laman si Jesus nu Krismas anna Easter. Awan tu ammuda ta kuan noka ni Jesus bilang bagu nga Mammaguray ta davvun. Megafu ta ariadda ammu nu anni i mensahe nakuan nga ilayyagayyada, mattaka tam kari paga nu ariadda gapa ammu nu anni nakuan i motibo ta pallayyagayya?

8. Anni i ari fustu nga motibo ta pallayyagayya?

⁸ Anni nakuan i motibo tam ta pallayyagayya? Ari nga tapenu makkolekta tu kuartu tapus mappataddag tu makakkasta ira nga istruktura. Kinagi ni Jesus ta disipulosna: “Inalawa nu yaw nga . . . awan tu paga; yatun tu kuan nu gapa danaw tu ari nga kapagan.” (Mat. 10:8) Ari nakuan nga makua tu negosio i Uvovug na Dios. (2 Cor. 2:17) Ari nakuan nga alegan na mallayyagayya ira i personal nga pammakapianadda. (Bibbigan i Kingngua 20:33-35.) Maski manawag yaw nga bilin, aru nga relihion i makkokkolekta tu kuartu onu yatun ngana paga lagu i pagalegadda. Kawagadda nga suelduan i kleroda anna i aru nga empleyaduda, yatutta aru nga lider na relihion i narriku.​—Nep. 17:4, 5.

9. Kunnasi nga nepasingan na Saksi ira ni Jehova nga fustu i motiboda ta pallayyagayya?

⁹ Kumusta gapa i Saksi ira ni Jehova nu meyannung ta koleksion? Masussuportan ta boluntario nga donasion i trabahuda. (2 Cor. 9:7) Awan tu makolekta ta Kingdom Hall onu ta kombensiodda. Ngem ta nappasa laman nga dagun, 1.93 billion oras i niyusa na Saksi ira ni Jehova ta pangilayyagayya ta mapia nga dumug anna ta pangikondukta tu siam nga million nga libre nga paggigiammu tu Biblia kada vulan. Kappabbaw ta ariadda ngana lagu masuelduan, sigga-paran paga ira nga maggasto tapenu masuportan yaw nga trabahu. Kinagi na tadday nga researcher meyannung ta trabahu na Saksi ira ni Jehova: “I primero nga gakkag ay i pallayyagayya anna pattuddu. . . . Awan tu kleroda yatutta dakal i matipid.” Anni gafu i motibo tam ta pallayyagayya? Boluntario nga kuattam yatun megafu ta ideddukattam si Jehova anna i kasittoletam. Yatun nga sigga-paran nga espiritu ay ketuppalan na profesiya ta Salmo 110:3. (Bibbigan.)

10. Anni nga metodo i niyusa ni Jesus anna na disipulosna ta pallayyagayya?

¹⁰ Anni ira nga metodo i niyusa ni Jesus anna na disipulosna ta pangilayyagayya ta mapia nga dumug? Minay ira ta dian na totolay​—ta publiko ira nga lugar anna ta babaleda. Kasali ta pallayyagayya i pabbala-balay tapenu malegan danuri mapia-giffutuadda nga totolay. (Mat. 10:11;  Luc. 8:1; King. 5:42; 20:20) Awan tu pangirerumana yaw nga sistematiko nga metodo.

11, 12. Kunnasi nga neruma i totolay ira ni Jehova kumpara ta Kakristianuan nu meyannung ta pangilayyagayya ta mapia nga dumug?

¹¹ Kumusta gapa i Kakristianuan nu meyannung taw nga gannug? Maruddu nga pagurayan ngana laman na miembro ira na relihion nga i masuelduan nga klero i mallayyagayya. Imbes nga mabbalin ira nga gumaggimmanango tu totolay, i klero na Kakristianuan ay gittana kontento ngana laman nga mattalupaddian nira i “manango” nga egga ngana nira. Kurug gapa nga nu karuan, pagaramman na karuan nga klero i miembroda nga magevanghelio. Angngariganna, turi dagun 2001, kinagi ni Pope John Paul II ta tura: “Ta pappasa na daga-ragun, kanayukku nga kagian i dob meyannung ta bagu nga pagevanghelio. Uliakku mangana yatun . . . Mawag tu tolayattam ta baggi tam i umafa-afi nga determinasion ni Pablo, nga nangikagi: ‘Pakallallo ngà nu ari ngà mallayya-gayya.’” Tapus kinagi na santo papa nga yaw nga mision ay “ari tu puede nga mepakua ngana laman ta ‘eksperto ira,’ nu ari, responsibilidad yaw na ngamin nga Totolay na Dios.” Ngem piga i nattuppal taw?

¹² Kumusta i Saksi ira ni Jehova taw nga gannug? Ira laman i mangilayyagayya nga nammaguray ngana bilang Patul si Jesus namegafu turi 1914. Kagitta na nebilin ni Jesus, prayoridadda i mallayyagayya. (Mar. 13:10) Kinagi na libru nga Pillars of Faith​—American Congregations and Their Partners: “Para ta Saksi ira ni Jehova, i pallayyagayya i pinaka-importante anne ta maski anni nga gannug.” Kunna paga na autor meyannung ta kinagi na tadday nga Saksi: “Nu egga mabbisin, maraddam, anna mattaki nira, manguffun ira, . . . ngem ariadda vuluvuga kattamman nga i primero nga trabahuda ay i pangipakannammu ta espiritual nga mensahe meyannung ta duttal nga pangultimuan na mundo anna i pakawagan ta kapaliag.” Ari magimmang i Saksi ira ni Jehova nga mangipakannammu tatun nga mensahe, nga usadda i metodo ira nga niyusa ni Jesus anna na disipulosna.

13. Kunnasi nakuan kalawa na pallayyagayya?

¹³ Kinagi ni Jesus i kalawa na pallayyagayya turi ta nibilinna nga melayyagayya i mapia nga dumug “ta tanga-ravvunan.” (Mat. 24:14) Mawag nga magangngua tu disipulo ta “ngamin nga totolay ta ngamin nga lugu-lugar.” (Mat. 28:19, 20) Interu mundo yatun nga trabahu.

14, 15. Anni i mamakurug nga tuttuppalan na Saksi ira ni Jehova i profesiya ni Jesus meyannung ta kalawa na pallayyagayya? (Innan i letratu ira ta gafu na artikulo.)

¹⁴ Tapenu malippawa tam nu kunnasi nga tuttuppalan na Saksi ira ni Jehova i profesiya ni Jesus meyannung ta kalawa na pallayyagayya, ikonsidera tam i karuan nga informasion. Egga ma-600,000 nga miembro na klero ira na nadduruma nga relihion ta United States, nga dian gapa na maggi-1,200,000 nga Saksi ira ni Jehova. Ta interu mundo, egga maturu tu 400,000 nga pari na Romano Katoliko. Nonopammu gapa i bilang  na Saksi ira ni Jehova nga kasali ta nebase-Biblia nga pangilayyagayya ta Pappatulan. Ta interu mundo, mawwalu million nga boluntario nga ministro i mallayyagayya ta 240 nga nasion. Talaga makapabbaw nga trabahu i metuttuppal, para ta kedayaw ni Jehova!​—Sal. 34:1; 51:15.

¹⁵ Bilang Saksi ni Jehova, kayà tam nga malayyagayyan i aru nga totolay adde ta posible nige nga duttal i panuppalan. Megafu taw, nerumu-ruma tam nu meyannung ta trabahu tam nga pangitransleyt anna pangipublisa ta nebase-Biblia ira nga literatura. Minillion nga libru, magazina, tract, anna imbitasion ta kombension anna Memorial i libre nga metaneg. Nangipublisa ittam tu nadduruma nga publikasion ta maturu tu 700 lengguahe. Maturu tu 200 million nga kopia na New World Translation of the Holy Scriptures i nepublisa ta maturu tu 130 lengguahe. Ta nappasa ngana laman nga dagun, nakepublisa tam tu ma-4.5 billion nga kopia na nebase-Biblia nga literatura. Ta ofisial gapa nga website tam, mabibbig ta maturu tu 750 lengguahe i informasion ira tatun. Egga kari paga tanakuan nga grupo na ministro i magagganggua tu kunnatun?

16. Ngatta makagi tam nga egga ta Saksi ira ni Jehova i espiritu na Dios?

¹⁶ Adde sonu anni i neprofesiya nga pallayyagayya? Kinagi ni Jesus nga mebala-balayun yaw nga trabahu ta interu mundo adde ta pangurianan nga aggaggaw, “ta kabalin naw, duttal ngana i panuppalan.” Egga kari paga tanakuan nga grupo na relihion i tulu-tuloy nga mallayyagayya durante nga egga tam ngana ta pangurianan nga aggaggaw? Awayyana nga makagi na karuan nga malayyagayyattam: “Egga nikami i masanto nga espiritu, ngem sikamu i magaggangngua ta trabahu.” Ngem ari kari tu i ariattam pagimmang ta pallayyagayya ay ebidensia nga egga nittam i espiritu na Dios? (King. 1:8; 1 Ped. 4:14) Egga gapa tiempo nga mallayyagayya i tanakuan ira nga relihion kagitta na regular nga kukukuan na Saksi ira ni Jehova, ngem maruddu nga awan tu metuppalda. Mammisionero gapa i karuan ta ababba nga tiempo, ngem mattoli gabbalaman ira ta negagangay nga rutinada. Mamala-balay gapa i karuan, ngem anni i ilayyagayyada? Manawag nga ipasingan na tabbag tatun nga pakkiavu nga ariadda matuttuppal i trabahu nga pinegafuanan ni Jesus.

17, 18. (a) Ngatta siguradu ittam nga i Saksi ira ni Jehova i mangilayyagayya ta mapia nga dumug na Pappatulan ta kaggawattam? (b) Kunnasi tam nga makapattulu-tuloy taw nga trabahu?

¹⁷ Sinni gafu talaga i mangilayyagayya ta mapia nga dumug na Pappatulan ta kaggawattam? Kumbinsidu ittam nga mangikagi: “I Saksi ira ni Jehova!” Ngatta? Megafu ta ilayyagayya tam i fustu nga mensahe, i mapia nga dumug na Pappatulan. Sittam i umay ta totolay, yatutta mepangngo i metodo tam. Mallayyagayya tam megafu ta fustu nga motibo​—aya, ari nga megafu ta kuartu. I trabahu tam i pinaka-alawa, pallayyagayya ta totolay ta ngamin nga nasion anna lengguahe. Ariattam immangan yatun nga trabahu, ta pappasa na daga-ragun, adde ta duttal i panuppalan.

¹⁸ Talaga pappabbawattam i metuttuppal na totolay na Dios taw nga tiempo nga pattolayattam. Ngem kunnasi nga nabbalin tu posible ngamin yaw? Kunnaw i tabbag ni apostol Pablo ta turana ta taga-Filipos: “I Dios i kanayun nga egga nikamu nga mangiyawa ta pakkaraga anna pakawayya nu nga mamarulo ta uray na.” (Fil. 2:13) Paray nakuan tu tulu-tuloy tam ngamin nga pasikannan na minaggiddu nga Yama tam durante nga kukukuattam i ngamin nga mawayya tam anna ituttuppal tam tu mapia i ministerio tam.​—2 Tim. 4:5.