1, 2. Enọ vẹ e romavia fiki ẹme Jesu nọ ọ rrọ obe Matiu 24:14?

DEDE nọ ahwo jọ a rẹ gaviezọ kẹ omai hayo wọso omai, ahwo buobu a rẹ rọwo nọ iruo usiuwoma ota a rọ riẹ Isẹri Jihova. O sae tubẹ jọnọ whọ nyaku ahwo jọ no evaọ usiuwoma ota nọ a vuẹ owhẹ nọ dede nọ a rọwo iwuhrẹ mai hi, a kpaobọ kẹ omai fiki iruo nọ ma bi ru na. Wọhọ epanọ ma riẹ, Jesu ọ ta nọ a te ta usiuwoma Uvie na evaọ akpọ na soso. (Mat. 24:14) Rekọ ẹvẹ ma rọ riẹ nọ usiuwoma ota mai na họ iruo nọ i bi ru eruẹaruẹ Jesu na gba? Kọ omoya o rrọ re ma ta nọ mai họ ahwo nọ a bi ru iruo nana?

² Utu egagọ sa-sa a re roro nọ a bi whowho emamọ usi na. Rekọ obọ ichọche, etẹlẹvisiọno, iredio hayo Itanẹte ọvo a rẹ jọ ru onana, ẹsejọ a vẹ vuẹ amọfa epanọ ae omarai a rọ riẹ kpahe Jesu. Efa e rẹ ta epanọ a bi ro fiobọhọ kẹ ahwo hayo epanọ a bi ru te evaọ ofẹ usiwo-imu gbe isukulu. Kọ iruẹru nana họ eware nọ Jesu ọ ta kẹ ilele riẹ nọ a ru?

3. Wọhọ epanọ o rrọ obe Matiu 28:19, 20, eware ene vẹ o gba ilele Jesu họ nọ a re ru?

 ³ Kọ o gwọlọ nọ ilele Jesu a jọ oria ovo, ahwo a vẹ hae nya bru ai ze? Vievie! Nọ Jesu ọ kparoma no uwhu ze no, ọ ta kẹ ilele riẹ buobu nọ i kokohọ inọ: “Wha nyai wuhrẹ ahwo erẹwho kpobi re a zihe ruọ ilele, wha họ ae ame . . . . wha wuhrẹ ae re a ru eware kpobi nọ me jie uzi rai kẹ owhai.” (Mat. 28:19, 20) Ẹme nọ Jesu ọ ta na o gwọlọ owojẹ ene. O gwọlọ nọ ma re fiobọhọ kẹ ahwo zihe ruọ ilele, họ ae ame, je wuhrẹ ai, rekọ eme họ oware ọsosuọ nọ o gwọlọ nọ ma re ru? Jesu ọ ta nọ: ‘Wha nya’! Ọgba-uwuhrẹ Ebaibol jọ ọ ta kpahe ujaje nana nọ: “Re a ‘nya’ yọ owha-iruo Oleleikristi kpobi, o tẹ make rọnọ ọ te fa edhere hayo abade vrẹ.”—Mat. 10:7; Luk 10:3.

4. Eme Jesu o wo họ iroro nọ ọ fodẹ “ikuori ahwo”?

⁴ Kọ omodawọ ilele riẹ omomọvo, Jesu ọ jẹ ta kpahe manikọ orọ utu ahwo nọ a kokohọ ziezi kẹ usiuwoma ota? Nọ orọnọ omọvo jọ ọvo ọ sae nya te “erẹwho kpobi” hi na, u dhesẹ nọ iruo nana e te gwọlọ omodawọ utu ahwo. Jesu o zizie ilele riẹ re a jọ “ikuori ahwo,” onana u dhesẹ nọ ahwo na a te ginẹ jọ buobu. (Se Matiu 4:18-22.) Orọnikọ Jesu ọ be ta kpahe oghẹrẹ iyei-ikpe nọ okuori ọvo ọ rẹ rọ keria oria ovo be rọ oghọlọ gbe adha kpe iyei hi, nọ ọ rẹ hẹrẹ bẹsenọ eri ọ rẹ nyaze te re oghọlọ riẹ. Ukpoye, onana yọ oghẹrẹ iyei-ikpe ẹriri, onọ o gwọlọ omodawọ gaga nọ ikuori buobu a rẹ jọ kuobọgbe ẹsejọ.—Luk 5:1-11.

5. Enọ ene vẹ o gwọlọ nọ ma rẹ riẹ iyo rai, kọ fikieme?

⁵ Re ma sae riẹ ahwo nọ a be ta usi uwoma na nẹnẹ wọhọ epanọ Jesu ọ ruẹaro riẹ, o gwọlọ nọ ma rẹ kiyo enọ ene jọ:

• Oghẹrẹ ovuẹ vẹ u fo nọ a re whowho?

• Ẹjiroro vẹ u fo nọ a re ro whowho ovuẹ na?

• Idhere vẹ u fo nọ a re ro whowho iei?

• Ẹvẹ u fo nọ a re whowho ovuẹ na kẹre te je kri te?

Iyo enọ nana i ti fiobọhọ kẹ omai riẹ ahwo nọ a bi ru iruo nana nọ e rẹ kẹ uzuazọ na, e te jẹ bọ ọtamuo mai ga ruabọhọ iruo na.—1 Tim. 4:16.

6. Ẹvẹ o sai ro mu owhẹ ẹro nọ Isẹri Jihova a bi whowho ovuẹ nọ Jesu ọ ta?

⁶ Se Luk 4:43. Jesu ọ jẹ ta “usi uwoma Uvie” na yọ o rẹro nọ ilele riẹ a re ru epọvo na. Utu ahwo vẹ a rrọ “akpọ na soso” whowho ovuẹ yena? Uyo na o rrọ vevẹ, Isẹri Jihova ọvo. Makọ ahwo jọ nọ a mukpahe omai dede a rọwokugbe onana. Wọhọ oriruo, u wo okejọ nọ ozerẹ ichọche jọ nọ ọ rrọ iruo imishọnare ọ ta kẹ oniọvo mai jọ inọ ọyomariẹ ọ rria erẹwho buobu no, ọ tẹ jẹ nọ Isẹri Jihova evaọ eria sa-sa nọ ọ rria no kpahe ovuẹ nọ a bi whowho. Uyo vẹ a kẹ riẹ? Ozerẹ na ọ ta nọ: “Aikpobi a ghẹ gaga nọ a rọ kẹ omẹ uyo ovona inọ: ‘Usi uwoma Uvie na.’” Isẹri Jihova nana a “ghẹ” vievie he, okugbe nọ ọ rrọ udevie rai Ileleikristi uzẹme o wọ rai kpobi ta ẹme ọvona. (1 Kọr. 1:10) Yọ a je whowho ovuẹ nọ o rrọ Uwou-Eroro Na Nọ U Bi Whowho Uvie Jihova. Ma wo emagazini nana evaọ evẹrẹ nọ i bu te egba ivẹ gbe udhuvẹ gbe ikpegbene (254), yọ ma bi printi uvitha ovuọvo bu te ima udhuvẹ gbe ikpegbizii  (59,000,000), onọ u ru rie fihọ emagazini nọ o be mai te ahwo obọ evaọ akpọ-soso.

7. Ẹvẹ ma rọ riẹ no isu-egagọ Kristẹndọm a bi whowho ovuẹ nọ Jesu ọ ta ha?

⁷ Isu-egagọ Kristẹndọm a bi whowho ovuẹ Uvie Ọghẹnẹ hẹ. A tẹ make ta kpahe Uvie na, a rẹ ta nọ Uvie na yọ oware nọ o rrọ udu Oleleikristi. (Luk 17:21) A bi fiobọhọ kẹ ahwo riẹ hẹ inọ Uvie Ọghẹnẹ yọ egọmeti obọ odhiwu nọ Jesu Kristi ọ rrọ Osu riẹ, inọ Uvie Ọghẹnẹ u ti ku ebẹbẹ ahwo-akpọ kpobi họ, gbe inọ kẹlena u ti si emuemu kpobi no otọakpọ. (Evia. 19:11-21) Ukpoye, nọ a te bi ru Kresimesi hayo Isita a rẹ rọ kareghẹhọ Jesu. O wọhọ nọ a riẹ oware ovo kpahe oware nọ Jesu o ti ru hu okenọ o ti su akpọ na soso. Nọ orọnọ a riẹ oware ovo ho kpahe ovuẹ nọ u fo nọ a hae whowho na, kọ u re gbomai unu inọ a riẹ ẹjiroro nọ u fo nọ a re ro ru iruo nana gbe he?

8. Ẹjiroro vẹ ọ thọ nọ a re ro ru iruo usiuwoma ota na?

⁸ Ẹjiroro vẹ u fo nọ ma re ro ru iruo usiuwoma ota na? Orọnikọ re ma mi igho jẹ bọ iwou ilogbo ho. Jesu ọ ta kẹ ilele riẹ nọ: “Ọvọvẹ a kẹ owhai, wha kẹ ọvọvẹ.” (Mat. 10:8) U fo nọ a rẹ rehọ Ẹme Ọghẹnẹ thueki hi. (2 Kọr. 2:17, oruvẹ obotọ) U fo nọ ahwo nọ a bi whowho ovuẹ na a rọ odẹ ovuẹ na gwọlọ erere kẹ omobọ rai hi. (Se Iruẹru Ikọ 20:33-35.) Ghelọ ọkpọvio nana, ichọche buobu a bi mi igho. A rẹ hwa ilorida egagọ rai osa, gbe amọfa buobu nọ a rehọ iruo. Onana u ru nọ isu-egagọ Kristẹndọm buobu a ro fe diezọ.—Evia. 17:4, 5.

9. Ẹvẹ Isẹri Jihova a ro dhesẹvia no inọ ẹjiroro nọ o fo a bi ro ru iruo usiuwoma ota na?

⁹ Ẹvẹ Isẹri Jihova a bi ru evaọ abọ ugho? Unevaze a be rọ tha iruo rai uko. (2 Kọr. 9:7) A rẹ jọ obọ Ọgwa Uvie hayo ikokohọ rai mi azọhọ họ. Ghele na evaọ ukpe nukpo ọvo, Isẹri Jihova a rehọ euwa nọ e joma bu te ima-odu ivẹ (2,000,000,000) ta usiuwoma yọ a wuhrẹ Ebaibol na ọvọvẹ kugbe ahwo nọ a bu vi ima izii (9,000,000) kamara kamara. Yọ orọnikọ a bi ru iruo nana ọvọvẹ ọvo ho rekọ a be rọ evawere hwosa araha obọrai evaọ etoke iruo na. Ọkiotọ jọ ọ ta kpahe iruo Isẹri Jihova na inọ: “Usiuwoma ota gbe ewuhrẹ amọfa họ ugogo utee [rai]. . . . A wo ilorida ha, onana u bi ru araha rai kpotọ gaga.” Kọ eme họ ẹjiroro nọ ma bi ro ru iruo nana? Unevaze ma bi ro ru iruo na, fikinọ ma you Jihova gbe erivẹ mai. Ẹzi unevaze nana yọ orugba eruẹaruẹ nọ e rrọ Olezi 110:3. (Sei.)

10. Edhere vẹ Jesu avọ ilele riẹ a rọ ta usiuwoma na?

¹⁰ Oghẹrẹ vẹ Jesu avọ ilele riẹ a rọ ta usi uwoma na? A jẹ nyabru ahwo na evaọ oria kpobi nọ a rrọ, ẹgbede gbe evaọ obọ iwou rai. A jẹ nya no iwou ruọ iwou be gwọlọ ahwo nọ a wo evezi. (Mat. 10:11; Luk 8:1; Iruẹru 5:42; 20:20) Edhere nana nọ a jẹ rọ ta usiuwoma na u dhesẹ nọ ọriẹwẹ ọ jariẹ hẹ.

11, 12. Ẹvẹ ichọche Kristẹndọm a bi ru iruo usiuwoma ota na te nọ a tẹ rehọ iẹe wawo Isẹri Jihova?

¹¹ Ẹvẹ ichọche Kristẹndọm a bi ru te evaọ abọ nana? Ahwo egagọ buobu a kuvẹ kẹ ilorida egagọ rai nọ a be hwosa  kẹ re ae ọvo a hae ta usiuwoma na. Rekọ ukpenọ ilorida ichọche nana a rẹ jọ “ikuori ahwo,” o wọhọ nọ oware nọ o rẹ mae jarai oja họ, epanọ ahwo nọ a rrọ egagọ rai na a gbe ro noi hi. Uzẹme, ẹsejọ ilorida egagọ jọ a rẹ gwọlọ tuduhọ ahwo rai awọ jẹ to oghẹrẹ usiuwoma ota jọ họ. Wọhọ oriruo, evaọ emuhọ ukpe 2001, Pope John Paul II ọ ta evaọ ileta riẹ jọ inọ: “Anwọ ikpe buobu ze na, noke toke mẹ be hae dhe owhai ẹtẹtakẹ kpahe oghẹrẹ usiuwoma ota okpokpọ na. Mẹ be jẹ wariẹe enẹna . . . O gba omai họ inọ ma rẹ jọ omamai wariẹ wo ọkpọ ọwhọ Pọl nọ o bo nọ: ‘Uye u te omẹ nọ me gbe whowho usi uwoma na ha.’” Pope na ọ tẹ jẹ ta nọ ovuẹ nana “a sae nyase iẹe ba kẹ utu ahwo jọ nọ a ‘wo onaa’ ha, rekọ o rẹ jọ owha-iruo Ahwo Ọghẹnẹ kpobi.” Rekọ bru ahwo a ru lele uzizie nana no?

¹² Ẹvẹ Isẹri Jihova a ru te no evaọ abọ nana? Ae ọvo họ utu ahwo nọ a bi whowho nọ Jesu yọ Ovie nọ o muhọ esuo no anwọ ukpe 1914. Wọhọ epanọ Jesu ọ kẹ ujaje riẹ, a se usiuwoma ota na gboja gaga. (Mak 13:10) Obe na, Pillars of Faith—American Congregations and Their Partners o ta nọ: “Rọkẹ Isẹri Jihova, iruo imishọnare na i vi oware ofa kpobi.” Obe na o ta kpahe ẹme jọ nọ Osẹri Jihova jọ ọ ta inọ: “Nọ a tẹ nyaku ohwo nọ ohọo u bi kpe, nọ ọ rrọ goli, nọ oma o ga ha, a rẹ daoma fiobọhọ kẹe, . . . rekọ o rẹ thọrọ ae ẹro ho inọ ugogo iruo rai họ re a vuẹ amọfa ẹme Ọghẹnẹ kpahe urere akpọ na gbe oware nọ a re ru re a sai wo esiwo.” Isẹri Jihova a gbe bi whowho ovuẹ yena, a be rọ aro kele oghẹrẹ nọ Jesu avọ ilele riẹ a ro ru ei.

13. Ẹvẹ u fo nọ a rẹ ta usiuwoma na kẹre te?

¹³ Jesu o dhesẹ epanọ a ti ru iruo usiuwoma ota na kẹre te nọ ọ ta nọ a rẹ te ta usi uwoma na “evaọ akpọ na soso.” (Mat. 24:14) O gwọlọ nọ a re wuhrẹ “ahwo erẹwho kpobi” re a zihe ruọ ilele Jesu. (Mat. 28:19, 20) Onana u dhesẹ nọ akpọ na soso a re jo ru iruo na.

14, 15. Eme ọ kẹ imuẹro nọ Isẹri Jihova a bi ru eruẹaruẹ Jesu gba kpahe epanọ iruo usiuwoma ota na e te kẹre te? (Rri iwoho nọ e rrọ emuhọ uzoẹme na.)

¹⁴ Re ma ruẹ oghẹrẹ nọ Isẹri Jihova a ro ru eruẹaruẹ Jesu gba no kpahe epanọ usiuwoma na o rẹ kẹre te, joma ta kpahe ugogo iyẹrẹ jọ. Otu ilorida ichọche sa-sa nọ e rrọ America a bu te oware wọhọ idu egba ezeza (600,000), yọ Isẹri Jihova nọ e rrọ iẹe a bu te oware wọhọ ima ọvo gbe idu egba ivẹ (1,200,000). Evaọ akpọ na soso, Ichọche Kathọlik a wo izerẹ nọ e rọ omojọ bu vi idu egba ene (400,000). Whọ rehọ unu nana wawo unu Isẹri Jihova nọ i bi whowho ovuẹ Uvie Ọghẹnẹ na. Evaọ akpọ na soso, iwhowho-uvie nọ i bu vi  ima eree (8,000,000) a be rọ unevaze ta usiuwoma na evaọ ekwotọ nọ i bu te egba ivẹ gbe udhuvẹ (240). Emamọ iyẹrẹ i bi no iruo ilogbo nana ze, yọ o be wha orro gbe adhẹẹ se Jihova.—Ol. 34:1; 51:15.

¹⁵ O rrọ ẹgwọlọ mai Isẹri Jihova re ma ta usiuwoma na kẹ ohwo kpobi taure urere na o tẹ ze. Fikiere, ma wo ohẹriẹ gaga evaọ oghẹrẹ nọ ma be rọ fa, printi, je whowho ebe nọ a kere no Ebaibol ze. Ma ghale ima ebe, emagazini, ebe-evẹvẹ, ebe uzizie okokohọ gbe erọ Ekareghẹhọ uwhu Jesu buobu kẹ ahwo no ọvọvẹ. Ma kere ebe sa-sa nọ a fa fihọ evẹrẹ sa-sa nọ i bu vi egba ihrẹ (700) no. Ma printi Ebaibol New World Translation of the Holy Scriptures nọ i bu vi ima egba ivẹ (200,000,000) no evaọ evẹrẹ nọ i bu vi udhozeza gbe ikpe (130). Evaọ ukpe nọ u kpo ọvo, ma printi ebe nọ a kere no Ebaibol ze nọ e joma bu te ima-odu ene gbe ima egba-isoi (4,500,000,000). Whọ rẹ jọ oria evuẹ Itanẹte mai ruẹ eware evaọ evẹrẹ nọ i bu vi egba ihrẹ gbe udhuvẹ gbikpe (750) no. Utu etausiuwoma efa vẹ a bi ru ọkpọ iruo nana?

16. Ẹvẹ ma rọ riẹ nọ Isẹri Jihova a wo ẹzi Ọghẹnẹ?

¹⁶ Ẹvẹ a te ta usiuwoma nọ Jesu ọ ruẹaro riẹ na krite? Jesu ọ ta nọ a ti ru iruo akpọ-soso nana evaọ etoke urere na kpobi, “kẹsena urere na o vẹ te ze.” Utu egagọ efa vẹ a be ruabọhọ iruo usiuwoma ota nana evaọ etoke urere nana kpobi? Ahwo jọ nọ ma rẹ nyaku evaọ usiuwoma ota a rẹ sae ta nọ: “Ma wo ẹzi ọfuafo na, rekọ whai wha bi ru iruo na.” Kọ ma gbe wo ẹzi ọfuafo Ọghẹnẹ hẹ, ma sai gine thihakọ evaọ iruo na? (Iruẹru 1:8; 1 Pita 4:14) Noke toke, itu egagọ efa jọ a daoma no re a ru iruo nana nọ Isẹri Jihova a bi ru ẹsikpobi na, rekọ a sai ru ai te oria ovo ho. Efa a re wobọ evaọ iruo nọ a se iruo imishọnare umutho oke, kẹsena a ve zihe kpohọ iruẹru uzuazọ ikẹdẹ kẹdẹ rai. Yọ efa e rẹ tubẹ ta usiuwoma no ẹthẹ ruọ ẹthẹ, rekọ eme a be ginẹ ta? Uyo onọ yena o kẹ imuẹro inọ orọnikọ iruo nọ Jesu ọ tohọ na a bi ru na ha.

17, 18. (a) Eme ọ kẹ omai imuẹro nọ Isẹri Jihova họ ahwo nọ a be ta usi uwoma Uvie na nẹnẹ? (b) Ẹvẹ ma be sae rọ ruabọhọ iruo nana?

¹⁷ Kọ amono a be ginẹ ta usi uwoma Uvie na nẹnẹ? Ma sae ta ududu nọ: “Isẹri Jihova.” Eme ọ kẹ omai imuẹro itieye? Fikinọ mai ma bi whowho ovuẹ nọ Jesu ọ ta na, usi uwoma Uvie na. Ma be rọ edhere nọ o fo ta usiuwoma na, keme ma be nyabru ahwo. Ma be rehọ ẹjiroro nọ o fo ta usiuwoma na, oye họ uyoyou, orọnikọ fiki erere ugho ho. Iruo usiuwoma ota mai e mae kẹre, keme ma be ta usiuwoma na kẹ ahwo erẹwho gbe evẹrẹ kpobi. Yọ ma te ruabọhọ iruo nana nukpe tukpe, rite ekuhọ akpọ na.

¹⁸ Eware nọ idibo Ọghẹnẹ a bi ru evaọ oke mai na u bi gine gbe omai unu. Kọ ẹvẹ a be sai ro ru eware nana kpobi? Pọl ukọ na ọ kẹ uyo nana evaọ ileta nọ o kere se Ahwo Filipai: “Ọghẹnẹ họ ọnọ ọ be kẹ owhai ẹgba nọ wha re ro ru eware nọ e rẹ were iẹe, ọ be kẹ owhai isiuru na gbe ogaga nọ wha re ro ru ere.” (Fil. 2:13) Ajọ Ọghẹnẹ, Ọsẹ oyoyou mai na ọ gbẹ kẹ omai ẹgba nọ ma be daoma mai kpobi re ma ru iruo odibọgba mai ziezi na.—2 Tim. 4:5.