1, 2. Кʹижан пьрс пешда тен чахе әм Мәттада 24:14-да гьлийед Иса дьхуньн?

ӘМ ЧАԜА Шәʹдед Йаһоԝа, нав тʹәмамийа дьнйайеда гәләк тенә наскьрьне пе шьхӧле бәлакьрьна мьзгине. Дьԛәԝьмә хьзмәтийеда һун рʹасти ԝан мәрьва һатьнә, йед кӧ ԛәбул накьн баԝәрийа мә, ле йәкә ԛәдьре мә дьгьрьн жь бо шьхӧле кӧ әм дькьн. Әм заньн ԝәки Иса пʹехәмбәрти кьр, кӧ ԝе мьзгина дәрһәԛа Пʹадшатийе сәр тʹәмамийа дьнйайе бе бәлакьрьне (Мәт. 24:14). Ле әм жь кʹӧ заньн, ԝәки шьхӧле кӧ әм дькьн пʹехәмбәртийа Иса тинә сери? Ԝе рʹаст бә кӧ әм бежьн, ԝәки тʹәне әм әԝи шьхӧли дькьн?

² Гәләк мәрьвед жь рʹелигийед дьн дьфькьрьн, ԝәки әԝана жи бәла дькьн ԝе мьзгине, дәрһәԛа кʹижане кӧ Иса дьгот. Ле әԝана хьзмәта хԝә тиньн сери, тʹәне бь хьзмәта дереда, йан даннасин дькьн бь телевизийоне йан бь интернете. Ле йед дьн дьфькьрьн кӧ әԝана хьзмәта хԝә тиньн сәри бь ԝе йәке, чахе аликʹарийе дьдьнә мәрьварʹа, мәсәлә, алийе медисинеда, йан жи сәва мәрьв хԝәндьне бьстиньн. Ле пьрс пешда те: Гәло чь кӧ әԝана дькьн, те һʹәсабе әԝ  шьхӧл, кʹижан кӧ Иса шагьртарʹа гот кӧ бькьн?

3. Ль гора тʹәмийа Иса кӧ Мәтта 28:19, 20-да ньвисар ә, пәйчуйед Иса кʹижан чар тьшт гәрәке бькьн?

³ Ле гәло шагьртед Иса һивийе бун, кӧ мәрьв хԝәха бьһатана щәм ԝан? Тʹӧ щар на! Иса паши сахбуна хԝә, бь сәда шагьртед хԝәрʹа гот: «Һәрʹьн һʹәму мьләта һин кьн у ԝана . . . , бьньхӧминьн у ԝан һʹәму тʹәмийед кӧ мьн данә ԝә мьләта һин кьн, ԝәки әԝ хԝәй кьн» (Мәт. 28:19, 20). Демәк, чаԝа шагьртед Иса, әм борщдар ьн чар тьшта бькьн. Әм гәрәке мәрьва бькьнә шагьрт, ԝана бьньхӧминьн, у һин кьн, ле пешийа ԝе йәке әм гәрәке чь бькьн? Иса гот: «Һәрʹьн»! Дәрһәԛа ве тʹәмийе, зандарәки Кʹьтеба Пироз гьлийед ӧса гот: «‹Һәрʹьн› әԝ һәйә щабдарийа һәр баԝәрмәнда, фьрԛи тʹӧнә һәрʹьн кʹучерʹа дәрбаз бьн йан һәрʹьн океанева дәрбаз бьн» (Мәт. 10:7; Луԛа 10:3).

4. Чь дьһатә һʹәсабе бьбьнә «нечʹирванед мәрьва»?

⁴ Гәло Иса дьхԝәст бьгота кӧ пәйчуйед ԝи һәр кәс башԛә хьзмәт кә? Йан әԝи дьхԝәст кӧ әԝана тʹәвайи бь организә мьзгине бәла кьн? Фәʹмдари йә, мәрьвәк нькарьбу бьчуйа щәм «һʹәму мьләта». Демәк, бона ԝи шьхӧли лазьм бун гәләк мәрьв. Әԝ йәк жь гьлийед Иса һатә кʹьфше, чахе әԝи шагьртед хԝә тʹәглиф кьр кӧ бьбьнә «нечʹирванед мәрьва». (Бьхунә Мәтта 4:18-22.) Иса нәдьгот дәрһәԛа нечʹирванийа бь чәнгәле, демәк чахе нечʹирван рʹудьне у һивийе йә, һʹәта кӧ мәʹсик бе бькʹәвә чәнгәле. Ле әԝи дьгот дәрһәԛа нечʹирванийа бь тʹорʹа. Әԝ хәбатәкә гьран бу, кʹижанирʹа лазьм бу ԛәԝата гәләка у йәкти (Луԛа 5:1-11).

5. Сәр кʹижан чар пьрса лазьм ә щабе бьвиньн, у чьрʹа?

⁵ Сәва кӧ бьзаньбьн һәла кʹе иро мьзгине бәла дькә, у пʹехәмбәртийа Иса тинә сери, мәрʹа лазьм ә щаба ԝан чар пьрса бьвиньн:

▪ Чь мьзгин гәрәке бе бәлакьрьне?

▪ Нета мә гәрәке чь бә, чахе әве мьзгине бәла дькьн?

▪ Чь щурʹәйи гәрәке әԝе мьзгине бәла кьн?

▪ Еԝ мьзгин гәрәке чьԛаси бәла бә у чьԛас ԝәʹдә гәрәке әԝ бькʹьшинә?

Щабед ԝан пьрса ԝе али мә бькьн, кӧ әм тедәрхьн кʹе иро әв шьхӧле фәрз дькә. Хенщи ве йәке, әме һе ԛәԝи бьн, сәва кӧ әԝи шьхӧли бәрдәԝам кьн бь амьни бькьн (1 Тимтʹ. 4:16).

6. Чьрʹа әм дькарьн баԝәр бьн кӧ Шәʹдед Йаһоԝа бәла дькьн әве мьзгине, кʹижан кӧ Иса гот кӧ бәла кьн?

⁶ Бьхунә Луԛа 4:43. Иса «мьзгинийа Пʹадшатийа Хԝәде» бәла дькьр, у дьхԝаст ԝәки шагьртед ԝи жи әве мьзгине бәла кьн. Ле гәло кʹе иро «һʹәму мьләтарʹа» әве мьзгине бәла дькә? Щаб әʹйан ә, тʹәне Шәʹдед Йаһоԝа! Һәла һе һьнә жь ԝан мәрьва жи, йед кӧ мьԛабьли мә нә, һʹәсаб дькьн кӧ әԝ йәк ӧса нә. Мәсәлә, кʹәшише мисйонер щарәке Шәʹде Йаһоԝарʹа гот, ԝәки әԝ щурʹә-щурʹә ԝәлатада дьжит, у ԝан һәр ԝәлатада жь Шәʹдед Йаһоԝа дьпьрси, һәла әԝана чь әʹламәтийе бәла дькьн. Ле чь щаб әԝи кʹәшиши дьстанд? Әԝи гот: «Әԝана һаԛас бефәʹм ьн, ԝәки щаба хԝә мина һәв дан: ‹Мьзгина дәрһәԛа Пʹадшатийа Хԝәде›». Ле бь рʹастийе, жь гьлийед кʹәшиш те кʹьфше, ԝәки әԝана ча Мәсиһийед рʹаст йәктийеда ньн, нә кӧ «бефәʹм ьн» (1 Корн.  1:10). Ԝана һәма әԝ әʹламәти бәла дькьр, кʹижан кӧ әʹлам дькә журнала бь наве «Бьрща Ԛәрәԝьлийе Дәрһәԛа Пʹадшатийа Йаһоԝа Әʹлам Дькә». Әв журнал сәр 254 зьмана дәрдькʹәвә, у һәр дәрхьстьна ве ԝәкә 59 милйон һʹәв те нәшьркьрьне. Нав тʹәмамийа дьнйайеда әв журнал лапи бәлабуйи йә.

7. Әм жь кʹӧ заньн ԝәки Мәсиһийед ве дьнйайе мьзгина, кӧ Иса гот бәла накьн?

⁷ Мәсиһийед ве дьнйайе, мьзгина дәрһәԛа Пʹадшатийа Хԝәде бәла накьн. Һәрге жи әԝана хәбәрдьдьн дәрһәԛа Пʹадшатийе, гәләк жь ԝан дьбежьн ԝәки әԝ Пʹадшати дьле Мәсиһида йә (Луԛа 17:21). Әԝана мәрьва һин накьн ԝәки Пʹадшатийа Хԝәде әԝ һәйә сәрԝертийа әʹзмана, кʹидәреда Иса Мәсиһ сәрԝертийе дькә. У нә жи һин дькьн кӧ әԝ Пʹадшати ԝе һʹәму проблемед инсанәте сафи кә, у ӧса жи кӧ әԝ ԝе зутьрәке һʹәму зӧлмийе сәр әʹрде кʹӧта кә (Әʹйан. 19:11-21). Әԝана Иса тиньн бира хԝә тʹәне сәр щәжьна Рʹожа Буйина Иса у сәр Рʹожа Дәрбазбуне (Пасхә). Әԝана нә жи заньн Иса ԝе чь бькә сәр әʹрде чаԝа Сәрԝере тʹәзә. Һьн жи әԝана ньзаньн чь мьзгине гәрәке бәла кьн, ләма жи фәʹм накьн чьрʹа гәрәке әве йәке бькьн.

8. Кʹижан нета нәрʹаст дькарә һәбә чахе мьзгине бәла дькьн?

⁸ Нета мә гәрәке чь бә чахе мьзгине бәла дькьн? Нет гәрәке әԝ нибә кӧ пʹәрә ԛазанщ кьн у авайед мәхсус ава кьн. Чьмки Иса гот: «Ԝә беһәԛ стандийә, беһәԛ жи бьдьн» (Мәт. 10:8). Бәлакьрьна хәбәра Хԝәде гәрәке бизнес нибә (2 Корн. 2:17). Әԝед кӧ мьзгине бәла дькьн, бона ви шьхӧли гәрәке кʹара хԝә нәгәрʹьн. (Бьхунә Кʹаред Шандийа 20:33-35.) Рʹаст ә Иса әʹйан дәрһәԛа ве йәке гот, ле йазьх дер һʹәчʹи зәʹф пәй пʹәра дькʹәвьн, сәва кӧ деред хԝә хԝәй кьн. Чьмки кʹәшиш у хәбаткʹаред дьн йе дера, һәԛе хьзмәтийа хԝә дьстиньн. Ләма жи, гәләк сәрԝеред Мәсиһийед ве дьнйайе, пʹьрʹ дәԝләти бунә (Әʹйан. 17:4, 5).

9. Шәʹдед Йаһоԝа ча данә кʹьфше ԝәки әԝана бь нета рʹаст мьзгине бәла дькьн?

⁹ Ле чь дькарьн бежьн дәрһәԛа Шәʹдед Йаһоԝа? Шьхӧле ԝан пе пʹәре ԛӧрбанкьрьна рʹәзәдьли пешда дьчә (2 Корн. 9:7). Нә Ода Щьватада, нә жи щьватед мәзьнда, пʹәрә найе тʹопкьрьне. Сала пар, Шәʹдед Йаһоԝа ԝәкә 2 милиард сьһʹәт хәрщ кьрьнә сәр бәлакьрьна мьзгине, у һәр мәһ 9 милйона зедәтьр һинкьрьна Кʹьтеба Пироз дәрбаз кьрьнә. Рʹасти жи әʹщебмайи йә, ԝәки әԝана нә кӧ тʹәне беһәԛ әԝи шьхӧли дькьн, ле хенщи ве йәке әԝана хәрще хԝә кʹиси хԝә дадьдьн. Леколинкʹарәки дәрһәԛа шьхӧле Шәʹдед Йаһоԝа ӧса гот: «Нета ԝанә сәрәкә әԝ ә кӧ мьзгине бәла кьн у һин кьн. . . . Кʹәшишед ԝан тʹӧнә нә, ләма хәрще ԝан һьндьк ә». Ԝәки ӧса нә, нета мә чь йә кӧ мьзгине бәла дькьн? Һәрге кьн бежьн, әм әԝи шьхӧли бь рʹәзәдьли дькьн, чьмки әм Йаһоԝа у мәрьва һʹьз дькьн. Әԝ һазьрбуна мә, тинә сери пʹехәмбәртийа жь Зәбур 110:3. (Бьхунә.)

10. Иса у шагьртед ԝи чь щурʹәйи мьзгин бәла дькьрьн?

¹⁰ Ле Иса у шагьртед ԝи чь щурʹәйи мьзгин бәла дькьрьн? Әԝана дьчунә һʹәму щийа, кʹидәре кӧ мәрьв һәбун, мәсәлә, щийед кӧ гәләк мәрьв тʹоп дьбун, у малед мәрьвада. Әԝана мал бь мал мьзгине бәла дькьрьн, сәва  мәрьвед һежа бьгәрʹьн (Мәт. 10:11; Луԛа 8:1; Кʹар. Шанд. 5:42; 20:20). Әԝ те һʹәсабе кӧ әԝана фьрԛи нәдькьрьнә ортʹа мәрьва, у гьшкарʹа дәрһәԛа мьзгине гьли дькьрьн.

11, 12. Чь фьрԛи һәйә ортʹа Мәсиһийед ве дьнйайе у щьмәʹта Йаһоԝа, ве йәкеда кӧ әԝана ча мьзгине бәла дькьн?

¹¹ Ле әм чь дькарьн бежьн дәрһәԛа деред Мәсиһийед ве дьнйайе? Һʹәчʹи зәʹф кʹаһинед дера йед кӧ пʹәра дьстиньн, дәрһәԛа Хԝәде гьли дькьн, тʹәне ԝанрʹа кʹе те дера ԝан. Ча әʹйан ә, әԝана «нечʹирванед мәрьва» ниньн, ле хәма ԝан тʹәне әԝ «мәʹси» йә, кʹижан кӧ әԝана ида дитьнә. Щара, кʹәшиш һелан дькьн мәрьва, кӧ ча бежи мьзгине бәла кьн. Мәсәлә, сала 2001, Поп Щон Поле II, ньвиси: «Нава гәләк сала, мьн тʹьме һелан дькьр мьзгине бәла кьн. Әз һʹәта ньһа әве йәке дькьм, . . . Әм гәрәке мина Паԝлосе шанди бьн, йе кӧ гот: ‹Ԝәй ль мьн һәгәр әз мьзгинийе даннасин нәкьм!›» Паше, әԝи кʹәшиши бәрдәԝам кьр у гот, кӧ әԝи шьхӧли «нә кӧ тʹәне мәрьвед ‹щерʹьбанди› гәрәке бькьн, ле һʹәму мәрьв кʹе Хԝәде баԝәр дькьн». Ле гәло кәсәк пәй ԝе һеланкьрьне чу?

¹² Ле чь дькарьн бежьн дәрһәԛа Шәʹдед Йаһоԝа? Тʹәне әԝана мәрьварʹа гьли дькьн, кӧ Иса сала 1914 да сәрԝертийе дькә ча Пʹадша. Чаԝа кӧ Иса һин дькьр, жийина ԝанда бәлакьрьна мьзгине щийе пешьн дьгьрә (Марԛ. 13:10). Кʹьтебәкеда һатийә готьне: «Бона Шәʹдед Йаһоԝа хьзмәткьрьн жь һʹәму тьшти фәрзтьр ә. Чахе әԝана рʹасти мәрьвед бьрʹчи, нәхԝәш, у йед тʹәне манә тен, аликʹарийе дьдьнә ԝан, . . . ле йәкә әԝана диса жи тʹӧ щар бир накьн, кӧ шьхӧле ԝанә сәрәкә әԝ ә, ԝәки әʹламәтийе бәла кьн дәрһәԛа незикайа хьлазийа ве дьнйайе у дәрһәԛа хьлазбуне». (Pillars of Faith—Amеrican Congrеgations and Thеir Partnеrs statеs.) Шәʹдед Йаһоԝа бәрдәԝам дькьн әве әʹламәтийе бәла кьн, чаԝа кӧ Иса у шагьртед ԝи дькьрьн.

13. Мьзгин гәрәке чьԛаси бәла буйа?

¹³ Иса гот кӧ мьзгин гәрәке бе бәлакьрьне «нав тʹәмамийа дьнйайе» (Мәт. 24:14). Ләма жи шагьртед ԝи гәрәке «һʹәму мьләтарʹа» мьзгин бәлакьрана (Мәт. 28:19, 20). Демәк, әԝ те һʹәсабе ԝәки мьзгин һʹәму щийа гәрәке бьһата бәлакьрьне.

14, 15. Чь избат дькә кӧ Шәʹдед Йаһоԝа пʹехәмбәртийа Иса тиньнә сери, кӧ мьзгин гәрәке чьԛаси бәла бә? (Бьньһерʹә шькьле әʹԝльн.)

¹⁴ Тʹәне Шәʹдед Йаһоԝа пʹехәмбәртийа Иса тиньн сери, демәк мьзгине нав тʹәмамийа дьнйайеда бәла дькьн. Чьрʹа әм дькарьн ӧса бежьн? Ԝәрә һьнә һʹәсаба шеԝьр кьн. Дәԝләтед Йәкбуйида ԝәкә 600 000 кʹәшишед жь щурʹә-щурʹә религийа һәнә, ле Шәʹдед Йаһоԝа ԝәкә 1 200 000 ьн. Тʹәмамийа дьнйайеда, Дера Рʹомайа Католикида  ԝәкә 400 000 кʹәшиш һәнә. Ньһа дина хԝә бьдьн сәр һәжмара Шәʹдед Йаһоԝа, йед кӧ мьзгина Пʹадшатийа Хԝәде бәла дькьн. Нав тʹәмамийа дьнйайеда, 240 ԝәлатада, ԝәкә 8 милйон Шәʹдед Йаһоԝа мьзгина дәрһәԛа Пʹадшатийе бәла дькьн. Бәле, нав тʹәмамийа дьнйайеда шьхӧләки мәзьн те кьрьне, сәва рʹумәт у һӧрмәткьрьна Йаһоԝа (Зәб. 34:1; 51:15).

¹⁵ Һʹәта кӧ хьлази бе, әм ча Шәʹдед Йаһоԝа, дьхԝазьн чьԛас дькарьн гәләк мәрьварʹа мьзгине гьли кьн. Ләма әм гәләк әʹйан ьн пе шьхӧле хԝәйи ԝәлгәрʹандьне у дәрхьстьна әʹдәбйәтед сәр һʹиме Кʹьтеба Пироз. Милйон кʹьтеб, журнал, буклет, у ӧса жи тʹәглифа сәр Биранине у сәр щьватед мәзьн, әм бе пʹәра бәла дькьн. Әм щурʹә-щурʹә әʹдәбйәт сәр 700 зьмана зедәтьр дәрдьхьн. Кʹьтеба Пироз йа «Ԝәлгәрʹандьна Дьнйа Тʹәзә», , 200 милйон һʹәв һатә нәшьркьрьне, сәр 130 зьмана зедәтьр. Сала пашԝәхтийеда, мә ԝәкә 4.5 милиард әʹдәбйәт нәшьр кьр. Информасийа сәр малпәра мә, сәр 750 зьмана зедәтьр дәст дькʹәвә. Һәнә рʹелигийед дьн, кʹижан кӧ шьхӧле ӧса дькьн?

16. Чьрʹа әм дькарьн бежьн кӧ рʹӧһʹе Хԝәдейи пироз сәр Шәʹдед Йаһоԝа йә?

¹⁶ Гәло чьԛас ԝәʹдә гәрәке бькʹьшинә шьхӧле бәлакьрьна мьзгине? Иса гот кӧ һʹәта «хьлази ԝе бе», әԝ шьхӧле һʹәмдьнйайе ԝе бәрдәԝам бә (Мәт. 24:14). Ԛә һәнә рʹелигийед дьн, йед кӧ ԝан рʹожед ахьрийеда мьзгине бәла дькьн? Һьнәк мәрьвед баԝәрмәнд дьбежьн кӧ рʹӧһʹе пироз сәр ԝана йә. Ле шьхӧле бәлакьрьна мьзгине тʹәне әм бәрдәԝам дькьн. Гәло әԝ йәк избат накә кӧ рʹӧһʹе Хԝәдейи пироз сәр мә йә? (Кʹар. Шанд. 1:8; 1 Пәт. 4:14) Щара, рʹелигийед дьн дәстпедькьрьн мина Шәʹдед Йаһоԝа хьзмәт кьн, ле шьхӧле ԝан пешда нәчу. Һьнәк жи, йанчь мисйонертийе дькьн, ле тʹәне сәр һьнә ԝәʹдә у паше диса вәдьгәрʹьн бь жийина хԝәйә бәре дьжин. Һьнәк, дәстпедькьн мал бь мал хьзмәт кьн, ле әԝана мьзгина Пʹадшатийе бәла накьн. Демәк, әʹйан ә кӧ әԝана әԝи шьхӧли накьн, кʹижан кӧ Иса дәстпекьр.

17, 18. а) Әм чьрʹа дькарьн баԝәр бьн кӧ тʹәне Шәʹдед Йаһоԝа мьзгина Пʹадшатийе бәла дькьн? б) Чь али мә дькә кӧ әм әԝи шьхӧли бәрдәԝам дькьн?

¹⁷ Кʹи бь рʹастийе иро мьзгина Пʹадшатийе бәла дькә? Әм дькарьн дӧдьли нәбьн у бежьн: «Шәʹдед Йаһоԝа!» Ле чьрʹа әм дькарьн ве йәкеда баԝәр бьн? Чьмки әм мьзгина рʹаст бәла дькьн, демәк мьзгина дәрһәԛа Пʹадшатийе. Ӧса жи, әм хԝәха дьчьн мәрьва дьгәрʹьн, у әԝ рʹаст ә әм ӧса дькьн. Һьн жи, әм бь нета рʹаст мьзгине бәла дькьн. Әм пәй пʹәра накʹәвьн, ле әм Хԝәде у мәрьва һʹьз дькьн, ләма әԝи шьхӧли дькьн. Әм әԝи шьхӧли нав тʹәмамийа дьнйайеда бәла дькьн, демәк әм жь һʹәму мьләта у зьмана мәрьва дьгәрʹьн. У әме әԝи шьхӧли бәрдәԝам кьн бькьн беәгләкьрьн, һʹәта кӧ хьлази бе.

¹⁸ Рʹасти жи әʹщеб ә, кӧ щьмәʹта Йаһоԝа ԝан рʹожед ахьрийеда, шьхӧләки чьԛас мәзьн дькьн. Ле чь щурʹәйи әԝ шьхӧл ӧса пешда дьчә? Паԝлосе шанди шьровәдькә: «Чьмки Хԝәде хԝәха ве йәке дькә дьле ԝә, кӧ һун дьхԝазьн у дькьн, чаԝа ль ԝи хԝәш те» (Фили. 2:13). Дә ԝәрә әм пе ԛәԝата Баве мә Йаһоԝа, бәрдәԝам кьн бь дьл у щан мьзгине бәла кьн (2 Тимтʹ. 4:5).