1, 2. A Zeezi sẽn yeel bũmb ning Matye 24:14 pʋgẽ wã kɩtame tɩ d segd n leok sogs-bʋse?

A ZEEZI pĩnd n togsame tɩ yaoolem wakatã, b na n moona Wẽnnaam Rĩungã koe-noogã tɩ ta neb buud fãa. (Mat. 24:14) Dũniyã gill zugu, nebã miime tɩ yaa tõnd a Zeova Kaset rãmbã n moond koɛɛgã. La pa b fãa la koɛɛgã d sẽn moondã noom ye. Baasgo, baa koɛɛgã sẽn pa noom-b rãmbã kẽer pẽgda tõnd d tʋʋmdã yĩnga. Sɩd me, yaa tõnd n tʋmd tʋʋmd ning a Zeezi sẽn yeel t’a karen-biisã na n tʋmame wã. La rẽ yĩnga d tara bʋʋm n tõe n yeel rẽ bɩ? Bõe n kɩt tɩ d miẽ tɩ yaa a Zeezi sẽn yeelã la tõnd sẽn maandã?

² Tũudum wʋsg yetame tɩ bãmb moonda a Zeezi koe-noogã. La naoor wʋsgo, b koe-moonegã teka b wẽnd-dotẽ wã, televiziõ wã pʋgẽ, wall ne ẽnternetã maasem, tɩ kẽer me kõt kaset n wilgd sẽn sɩng to-to tɩ bãmb wa bãng a Zeezi. Sãnda tagsdame tɩ b sã n sõngd naong rãmbã, wall b tɩpd nebã bɩ n zãmsd-b karengo, yaa koe-moonego. La a Zeezi sẽn da yetã yaa tʋm-kãensã bɩ?

3. Matye 28:19, 20 wilgda bũmb a naas kiris-nebã sẽn segd n maane. Bõn-kãens la bʋse?

 ³ A Zeezi karen-biisã ra segd n be b zĩigẽ tɩ nebã bʋʋgd-b tɩ b taasd-b koɛɛgã bɩ? Ayo. A vʋʋgrã poore, a yeela a karen-biis sõor sẽn da ta kobs woto: ‘Bɩ y kẽng n maan nebã buud fãa tɩ yɩ mam karen-biisi, n lis bãmba . . . , la y zãms bãmb tɩ b sak bũmb nins fãa mam sẽn yeel yãmb tɩ y maanã.’ (Mat. 28:19, 20) Dẽnd bũmb a naas n yaa tɩlɛ. Pipi, d segd n kẽnga nebã nengẽ n tɩ taas-b koɛɛgã. Rẽ poore, d segd n sõng-b lame tɩ b lebg a Zeezi karen-biisi, n lis-ba, la d zãms-ba. Biibl-mit a ye yeelame t’a Zeezi sẽn yeel tɩ “kẽngã” wilgdame tɩ kiris-ned fãa tog n moona koɛɛgã, baa sã n na n yɩɩ tɩlɛ t’a kẽng soayã noy wall a rʋʋg mogrã.—Mat. 10:7; Luk 10:3.

4. A Zeezi sẽn yeel t’a karen-biisã na n yɩɩ ‘nin-baoodbã’ wilgdame tɩ b tʋʋmdã na n yɩɩ wãn-wãna?

⁴ Rẽ yĩnga, a Zeezi ra ratame t’a karen-biig fãa moon koɛɛgã wa a sẽn dat to-to bɩ, bɩ a ra ratame tɩ b naag taab n sigl tʋʋmdã? Nin-yɛng sẽn pa tõe tɩ koɛɛgã ta dũniyã “nebã buud fãa” wã, yaa vẽeneg tɩ karen-biisã segd n naaga taab n sigl tʋʋmdã. A Zeezi gomd n wilgd rẽ. A sẽn wa n bool neb kẽer tɩ b na n lebg a karen-biisã, a yeel-b lame t’a na n kɩtame tɩ b yɩ “nin-baoodba.” (Karm-y Matye 4:18-22.) A gomdã wilgdame tɩ b ra na n tʋma tʋʋmd sẽn wõnd zĩm yõgbo. La pa wa ne zĩm-lɛooga, t’a soabã na n los koomã pʋgẽ, n zĩ n gũudẽ tɩ zĩif wa t’a yõk ye. Na n yɩɩ wa sẽn yõgd-b ne zĩm-gãmbrã. Rẽ baoodame tɩ b yɩ wʋsgo, n sigl tʋʋmdã n tʋmdẽ.—Luk 5:1-11.

5. Sogs-bʋs la d na n leoke, la bõe yĩnga?

⁵ Yɩl n bãng sẽn yaa neb nins n moond koe-noogã rũndã-rũndã, d na n leoka sogsg a naase:

• Koe-bʋg la d sẽn tog n moonã?

• Tõnd sẽn moond koɛɛgã segd n yɩɩ bõe yĩnga?

• D tog n maana wãn tɩ koɛɛgã ta nebã?

• D segd n mooname n ta zĩ-bʋgo, la na n teka wakat bʋgo?

D sã n bãng sogs-kãensã leoorã, na n sõngame tɩ d bãng sẽn yaa neb nins n moond koɛɛgã sẽn fãagd yõyã. Sẽn paase, na n kõ-d-la raood tɩ d wɩng ne tʋʋmdã.—1 Tɩm. 4:16.

6. Bõe n kɩt tɩ y kɩs sɩd tɩ yaa a Zeova Kaset rãmbã n moond koɛɛg ning a Zeezi sẽn yeel tɩ b moonã?

⁶ Karm-y Luk 4:43. A Zeezi moona “Wẽnnaam soolem [bɩ a Rĩungã] koe-noogã,” n dat t’a karen-biisã me maan woto. Rũndã-rũndã, ãnd dãmb n moond Rĩungã koɛɛg dũniyã “nebã buud fãa”? Yaa a Zeova Kaset rãmbã bala. Baa neb sẽn pa nong tõnd sak n deega rẽ. Wala makre, prɛtr a ye sẽn yaa misioneer yeela tõnd saam-biig tɩ yẽ zĩnda tẽns wʋsgo, la tɩ tẽn-kãens fãa pʋsẽ, yẽ soka a Zeova Kaset rãmb b sẽn moond koɛɛg ninga, la “b sẽn ka yamã yĩnga, b fãa leokame tɩ ‘Wẽnnaam Rĩungã koe-noogo.’” La woto pa wilgd tɩ d ka yam ye. Wilgdame tɩ d yaa kiris-neb hakɩɩka. Bala, d goamã tũuda taaba. (1 Kor. 1:10) Gũusg Gasgã gom-zugã zãng yaa: Gũusg Gasgã moonda a Zeova Rĩungã. Rĩung-kãng koe-noog me la tõnd sẽn moondã. Kiuug fãa, d yiisda seb-kãngã na maan  bãmb milyõ 59, buud-goam 254 pʋgẽ. Dũniyã gill zugu, sebr kae b sẽn yiisd t’a sõorã ta woto ye.

7. Bõe n wilgd tɩ kiris-neb ne yʋʋrã taoor dãmb pa moond koɛɛg ning a Zeezi sẽn yet tɩ b moonã?

⁷ Kiris-neb ne yʋʋrã taoor dãmb pa moond Wẽnnaam Rĩungã koɛɛg ye. B sã n wa gomd Rĩungã yelle, b wʋsg yetame tɩ yaa bũmb sẽn be kiris-nebã sũyẽ. (Luk 17:21) B pa wilgd nebã tɩ Wẽnnaam Rĩungã yaa goosneema sẽn be saasẽ, la tɩ yaa a Zeezi la Rĩungã naab ye. Sẽn bas n pak bãmb yaa b maand Nowɛll n tẽegd a Zeezi rogmã, la b maand Pak n tẽegd a sẽn nams n ki wã. B pa wilgd nebã t’a Zeezi sẽn yaa Rĩungã Rĩmã na n kɩtame tɩ wẽnem buud fãa sa, la tɩ na n tũu ne Rĩungã maasem tɩ ãdem-biisã paam-b mens ne zu-loeesã fãa ye. (Vẽn. 19:11-21) Dẽnd yaa vẽeneg tɩ kiris-neb ne yʋʋrã taoor dãmb pa mi a Zeezi sẽn na n wa maanã ye. B sẽn pa mi koɛɛg ning b sẽn tog n moonã kɩtame tɩ b pa mi bũmb ning yĩng b sẽn segd n moon-a wã me ye.

8. Neb kẽer moonda koɛɛgã bõe yĩnga, la bõe n wilgd tɩ pa segde?

⁸ A Zeezi karen-biisã pa segd n moon koɛɛgã ligd yĩnga, wall sẽn na yɩl n paam n me ro-bɛd ye. A Zeezi yeel-b-la woto: “Yãmb deega zaalem, bɩ y kõ zaalem.” (Mat. 10:8) Ned pa segd n dɩk Wẽnnaam goamã n maan leebg bũmb ye. (2 Kor. 2:17) Neb nins sẽn moond Wẽnnaam koɛɛgã pa tog n tũnug rẽ n bao b mens nafr ye. (Karm-y Tʋʋm 20:33-35.) La baa a Zeezi sẽn wilg woto vẽenegã, wẽnd-dot wʋsg pa tũud rẽ ye. B reesda ligd b nin-buiidã nengẽ sẽn na yɩl n ges b wẽnd-dotã yelle, la b yao b taoor dãmbã ne b tʋm-tʋmdb a taaba. Woto kɩtame tɩ b taoor dãmbã wʋsg lebg ra-kãag-rãmba.—Vẽn. 17:4, 5.

9. Bõe n wilgd t’a Zeova Kaset rãmbã pa moond koɛɛgã ligd yĩnga?

⁹ A Zeova Kaset rãmbã tigissã la b tigis-kãsemsã sasa, b reesda ligd nebã nengẽ bɩ? Ayo! Nebã kõta ligd ne yamleoogo, tɩ b tʋmd b tʋʋmdã. (2 Kor. 9:7) Rɩẽ, a Zeova Kaset rãmbã moona koe-noogã na maan lɛɛr milyaar a yi, tɩ neb nins b sẽn zãms Biiblã kiuug fãa wã sõor yɩɩd milyõ a wɛ. B pa reegd yaood rẽ yĩng ye. Bãmb mensã n yiisd b ligd ne yamleoog n moond koɛɛgã. Bãngd a ye goma a Zeova Kaset rãmbã yelle, n yeele: “Sẽn pak-b n yɩɩd yaa koe-moonegã, la nebã zãmsgo.” A paasame tɩ b sẽn pa tar taoor dãmb sẽn deegd yaood wa sẽn yaa to-to tũudum a taabã pʋgẽ wã kɩtame tɩ b kẽgsd ligd ning b sẽn paamdã. La tõnd sẽn moond koɛɛgã sã n pa ligd yĩnga, yaa bõe yĩnga? Yaa d sẽn nong a Zeova la d nong nebã yĩnga. Rẽ pidsda bãngr-gomd sẽn be Yɩɩn-sõamyã 110:3. Wẽnnaam Sebr ning b sẽn yiis yʋʋmd 1983 wã pʋgẽ, vɛrse-kãng yeta woto: “Yãmb nebã na n dɩka b mens n kõ yãmb ne yamleoog daar ning yãmb kʋʋngã sẽn na n tigim tãn-sõamyã zutã. Yãmb kom-bɩɩs na n waa yãmb nengẽ wa meenem sẽn yit yibeoogo.”

10. A Zeezi ne a karen-biisã ra maanda wãn tɩ koɛɛgã tat nebã?

¹⁰ A Zeezi ne a karen-biisã ra maanda  wãn tɩ koɛɛgã tat nebã? B ra kẽnda nebã sẽn beẽ fãa. Wala makre, soayã noya, raasẽ, la nebã zagsẽ. (Mat. 10:11; Luk 8:1; Tʋʋ. 5:42; 20:20) B sẽn da kẽnd nebã zagsẽ wã kɩtame tɩ koe-moonegã ra sigl sõma. Kɩtame me tɩ b ra moond koɛɛgã neb buud fãa, n pa bakdẽ ye.

11, 12. D sã n mak a Zeova Kaset rãmbã sẽn maand modgr ning n moond koɛɛgã ne kiris-neb ne yʋʋrã sẽn maandã, bõe la d tõe n yeele?

¹¹ Kiris-neb ne yʋʋrã sẽn maand to-to n moond koɛɛgã yaa wa a Zeezi sẽn maanã bɩ? Naoor wʋsgo, yaa b taoor dãmbã b sẽn yaoodã n wẽneg n karemd b wẽnd-dotã neba. B pa yit n moondẽ ye. B sẽn baood bal yaa b wẽnd-dotã neb ra boog ye. Wakat ninga, b sagenda b nebã tɩ b yi n moone. Wala makre, yʋʋmd 2001 wã, Pap Zãmpoll a yiib-n-soabã lɛtr pʋgẽ, a tika tʋm-tʋmd a Poll sẽn da yeel tɩ yẽ ‘sã n ka moon koe-noogã, toog n na n paam-a’ wã, n yeel tɩ wẽn-dotã neb segd n yi n moona koe-noogã ne yẽesem wa tʋm-tʋmd a Polle. A paasame tɩ pa neb a wãn bal sẽn paam bãngr n segd n moon koe-noogã, la tɩ yaa wẽnd-dotã neb fãa. La neb sẽn tũ a saglgã paoodame.

¹² La a Zeova Kaset rãmbã yẽ? Bãmb bal n moond koɛɛgã, n wilgd nebã tɩ yʋʋmd 1914 tɛka a Zeezi lebga Rĩma. A Zeezi yeelame tɩ yaa tɩlɛ tɩ koe-noogã reng n moone. (Mark 13:10) Sɩd me, yaa koe-moonegã n pak a Zeova Kaset rãmbã n yɩɩda. Seb-gʋlsd a ye yeela woto: “A Zeova Kaset rãmbã nengẽ, yaa koɛɛgã mooneg n pak n yɩɩda.” A lebs n dɩka saam-biig a yembr goam n yeel woto: “B sã n yã ned kom sẽn namsde, ned sẽn yaa a yembr tɩ namsd-a, bɩ bãada, b sõngd-a-la wa b sẽn tõe tɛka. . . . La b pa yĩmd abada tɩ tʋʋmd ning sẽn tar yõod n yɩɩdã yaa b moon koɛɛgã n wilg nebã tɩ dũniyã saab kolgame, la tɩ b segd n modgame n paam fãagr ye.” Yaa koe-kãng la a Zeova Kaset rãmbã ket n moondẽ, tɩ b sẽn maand to-to t’a tat nebã yaa wa a Zeezi ne a karen-biisã sẽn da maandã.

13. Koɛɛgã segd n mooname n ta zĩ-bʋgo?

¹³ A Zeezi yeelame tɩ yẽ karen-biisã na n moona koɛɛgã ‘dũni gill fãa.’ (Mat. 24:14) A yeel-b lame tɩ b sõng ‘nebã buud fãa’ tɩ b yɩ yẽ karen-biisi. (Mat. 28:19, 20) Woto wilgdame tɩ koe-noogã na n moona dũniyã gill zugu.

14, 15. Bõe n wilgd tɩ yaa a Zeova Kaset rãmbã bal n moond koɛɛgã dũniyã gill zug wa a Zeezi sẽn da yeelã? (Ges-y sõsgã sɩngrẽ fot-rãmbã.)

¹⁴ Yaa a Zeova Kaset rãmbã bal n pidsd gomd ning a Zeezi sẽn da yeelã, bala, bãmb n moond koe-noogã dũniyã  gill zugu. Bõe n wilgd rẽ? Etazĩni soolmẽ wã, kiris-neb ne yʋʋrã taoor dãmb sõor zemsa tus kobs-yoobe, t’a Zeova Kaset rãmbã sõor yaool n dat n ta milyõ la tus kobs-yi. Dũniyã gill zugu, katolik tũudmã prɛtr-dãmb kolga tus kobs-naase, la a Zeova Kaset rãmbã yaa milyõ a nii la zaka, n moond koe-noogã tẽns 240 pʋgẽ. Dẽnd vẽenega, yaa a Zeova Kaset rãmbã n moond koe-noogã dũniyã gill zug tɩ waoogd a Zeova la pẽgd-a.—Yɩɩn. 34:2; 51:17.

¹⁵ Tõnd a Zeova Kaset rãmbã rata ne d sũy fãa n moon koɛɛgã tɩ neb wʋsg wʋme, tɩ dũniyã sɛɛb yaool n ta. Sẽn na yɩl n tõog n maan rẽ, d yiisda sɛb buud toor-toor buud-goam 700 la zak pʋgẽ, tɩ kẽer yaa sẽn na n bool nebã tɩ b wa d tigis-kãsemse, wall a Zeezi kũumã tẽegre. Tõnd sɛbã pa koosd ye. Rɩẽ bala, d yiisa sɛb na maan milyaar a naas la pʋɩ-sʋka. D yiisa Les Saintes Écritures —Traduction du monde nouveau wã bãmb milyõ 200 la zaka, sẽn yɩɩd buud-goam 130 pʋgẽ. Sẽn paase, tõnd sɩt wɛɛbã bee ne buud-goam sõor sẽn yɩɩd 750. Tũudum a to kae n maand woto fãa ye.

16. Bõe n wilgd t’a Zeova sõngda a Kaset rãmbã ne a vʋʋsem sõngã maasem?

¹⁶ D segd n moona koɛɛgã n tãag wakat bʋgo? A Zeezi yeelame tɩ koɛɛgã na n mooname n tãag dũniyã sɛɛbo. Tõnd sẽn tõog n moond koe-noogã dũniyã gill zug rũndã-rũndã baa sẽn yaa yaoolem wakatã, wilgdame tɩ Wẽnnaam vʋʋsem sõngã sõngda tõndo. (Tʋʋ. 1:8; 1 Pɩy. 4:14) Tũudum kẽer neb mi n yetame tɩ bãmb n tar vʋʋsem sõngã. La bãmb n wɩngd ne koɛɛgã mooneg rũndã-rũndã sɩda? Tũudum kẽer makame n na n moon koɛɛgã wa a Zeova Kaset rãmbã, la b pa tõog ye. Sãnda sakdame n na n moone, la pa sẽn na n kaoos ye. Kẽer meng mi n moonda zak-zaka, la pa Wẽnnaam Rĩungã koɛɛg ye. Dẽnd pa a Zeezi sẽn sɩng tʋʋmd ningã la b sẽn tʋmdã ye.

17, 18. a) Bõe yĩng tɩ d sɩd tõe n yeel tɩ yaa a Zeova Kaset rãmbã n moond Rĩungã koe-noog rũndã-rũndã? b) Yɛ la d paamd pãng n ket n moond koɛɛgã?

¹⁷ D tõe n yeelame tɩ yaa ãnd dãmb n moond Wẽnnaam Rĩungã koe-noog rũndã-rũndã? Yaa tõnd a Zeova Kaset rãmbã. D bee bʋʋm n yet woto. Bala, tõnd moonda koɛɛg ning d sẽn segd n moonã. D sẽn maand to-to tɩ koɛɛgã tat nebã me zemsame. Sẽn paase, yaa d sẽn nong a Zeova la d nong nebã yĩng la d sẽn moond koɛɛgã, pa ligd yĩng ye. Dẽnd bũmb ning yĩng d sẽn moond koɛɛgã me zemsame. D moond-a-la dũniyã gill zug me, tɩ neb buud fãa sẽn gomd buud-goam toɛy-toɛy wʋmdẽ. La d na n kell n mooname n tãag dũniyã sɛɛbo!

¹⁸ D sã n get tʋʋm-kãseng ning a Zeova Kaset rãmbã sẽn tʋmd yaoolem wakatã, d sũy yaa noog wʋsgo. La d paamda pãng la tõog yɛ n maand woto fãa? Ad tʋm-tʋmd a Poll sẽn yeele: “Yaa Wẽnnaam n maand b tʋʋmd yãmb pʋsẽ, la b kõt yãmb ratmã, la pãng tɩ maan wa sẽn zems bãmb daabã.” (Fili. 2:13) Bɩ a Zeova ket n kõt tõnd fãa pãnga, tɩ d moond koe-noogã wa a Zeezi Kirist sẽn yeelã!—2 Tɩm. 4:5.