1, 2. Mubvunjo japi jinomuka ngo pamusoro po magama a Jesu anowanika pana Mateu 24:14?

TINOZIVA kuti pikija vamweni vatidakarire kana kuti vatishore, vashoma basi ngo vanoramba kuti Zvapupu zva Jehovha zvinozivikanwa ngo basa razvo ro kucumaera. Zvingatoitika pamunonga mecicumaera mosongana no vandhu vanonanga kuti avatenderi zvitendhwa zvedu, asi vanotireremeja ngo basa ratinoita. Inga zvatinoziva, Jesu wakananga kuti masoko akanaka o Umambo aizocumaehwa pasi pese. (Mt. 24:14) Asi tinozvizivisa kudini kuti basa ratiri kuitari riri kukwanirisadi ciphorofita ca Jesu? Kureva kuti tiri kujikuja patinorangarira kuti ndisu basi tiri kuita basa iri here?

² Zviara zvizinji zvinovonavo kuti zviri kucumaera Vhangeri, kana masoko akanaka. Asi, basa razvo rinoperera pa kubonga nyasha kana kupupura, kuita mabasa o pa ceci, kana kuvonesa urongwa vecishandisa zvinofambisa masoko—zvakadari inga terevhizau kana Interneti. Zviara zvimweni zvakasotana no kuita mabasa o kubesera pa zvokurapa no divi ro kujijisa. Waro, kunanga kuti mabasa aya anozwirana no basa rakabvunjaya Jesu vajiji vake kuti vaite here?

3. Mukuzwirana no zviri pana Mateu 28:19, 20, zviro zvapi zvirongomuna zvinodikana kuitwa ngo vateveri va Jesu?

 ³ Kureva kuti vajiji va Jesu vaigara havo, vecivetera kuti vandhu vaende kovariwaro here? Haiwa! Pasure po kumuswa kwake, Jesu wakabvunja mazana o vajiji vake eciti: “Endanyi, meciita vajiji ku majinja ese, mecivabhabhatija . . .  mecivajijisa kungwarira zviro zvese zvondakamubvunja”. (Mt. 28:19, 20, Baiberi Mazwi Akacena aMwari) Ngo kudaro, kwaidikana kuitwa zviro zvirongomuna. Tinodikana kuita vajiji, kuvabhabhatija, no kuvajijisa. Asi cicinyi cinodikana kuitwa pakutanga? Jesu wakati: “Endanyi”! Ecinanga ngo pamusoro po mupango uwu, umwe anojija ngo zvo Bhaibheri, wakati: “ ‘Kwenda’ i basa ro mutendi umwe nga umwe, pikija zvecidiwa kuti adarike ngo mu zvitaka kana ngo mujombe.”—Mt. 10:7; Lc. 10:3.

4. Kuva “vatandi vo vandhu” kunobatanijenyi?

⁴ Kureva kuti Jesu wainga ecinangira basi kuvangisira ko muteveri wake umwe nga umwe kana kuti wainga ecinangira fafanya yo kucumaera masoko akanaka yaizoitwa ngo maitiro akarongeka? Zvecivoneka kuti mundhu umwe pacake aacaizokwanisa kwenda ku “majinja ese,” basa iri raizodikana kuitwa no besero ro vandhu vakawanda. Jesu wakazvinanga paakakoka vajiji vake kuti vave “vatandi vo vandhu.” (Verenganyi Mateu 4:18-22.) Matandire aainangirari apa aacainga o mutandi umwe ecishandisa civejo no nyambo, wogara hake ecivetera kuti hove ihire. Kusiapo, i matandire okushandisa juya—anobatanija kuita basa rakavanga ro kuti nguva jimweni rinoda vandhu vakawanda zve vakarongwa.—Lc. 5:1-11.

5. Mubvunjo japi murongomuna jinodikana kudavihwa, zve ngenyi?

⁵ Kuitira kuziva kuti mbhaani vari kucumaera masoko akana mukukwanirisa ciphorofita ca Jesu, tinodikana kudavira mubvunjo murongomuna:

• Masoko api anodikana kucumaehwa?

• Cicinyi cinodikana kukwevejera kuti acumaehwe?

• Njira japi jinodikana kushandiswa kuitira kucumaera?

• Kucumera kondhoko kunodikana kuitwa mbhera kwapi zve mbhera rini?

Mupinguro jo mubvunjo iji jicazotibesera haiwa basi kuziva kuti mbhaani vari kuita basa iri rinoponesa, asi jinozotivangisavo kuti tirambe tecicungirira takagondeka pa kuriita.—1 Tim. 4:16.

6. Ngenyi mungathemba kuti Zvapupu zva Jehovha ngozviri kucumaera masoko okadi kamare?

⁶ Verenganyi Luka 4:43. Jesu wakacumaera “masoko akanaka o Umambo,” zve anovetera kuti vajiji vake vaitevo zvondhozvo. Cikwata capi co vandhu ciri kucumaera masoko ondhowo ku “majinja ese”? Mupinguro wakajeka—Zvapupu zva Jehovha basi. Pikija vashori vamweni vanozvitenderavo. Inga muezaniso, bvaza imweni, umwe misionario, ari mupiri, wakananga kuti wakararama mu nyika jakasiyana-siyana zve ku nyika imwe nga imwe yaaiguma waibvunjisa Zvapupu kuti ngo api masoko ozvinocumaera. Ngo wapi mupinguro waaipekejwa? Iyena wakananga kudari: “No urethe hwavo vese vaipa mupinguro umwe basi wokuti: ‘Masoko akanaka o Umambo.’” Asi, ndhambo no kuva “marethe,” Zvapupu zvaimudaviraya, zvaivereketa ngo rubatano, inga zvinodikana kuitwa ngo maKristu okadi-kadi. (1 Kor. 1:10) Izvona zvainga zvecinanga masoko anowanika pa revhista Murindiri Wokuzivisa Umambo Hwa Jehovha. Revhista iyi iri kuwanika mu ndumi jinokwana kuita 254 zve inodhindhwa  mweji ngo mweji pa mutengo wo pakati no pakati unokhwedera kuita 59 o mamiriau o makhopi pa mujeura umwe nga umwe, zvoiita kuti ive revhista iri kukovaniswa maningi pasi pese kupinda amweni.

7. Tinozvizivisa kudini kuti vatungamiriri wo ciKristodhomu avaripi kucumaera masoko okadi kamare?

⁷ Vatungamiriri vo ciKristodhomu avaripi kucumaera Umambo hwa Mwari. Pavanobhuya ngo pamusoro po Umambo, vazinji vavo vanonga veciunangira kuva mazwiro kana mugariro wo mwoyo wo muKristu. (Lc. 17:21) Ivona avabeseri vandhu kuzwisisa kuti Umambo hwa Mwari i utongi hwo mugore unotongwa ndi Jesu Kristu, zve unozobvisa matambujiko ese o vandhu pomwe no ushati hwese pasi pese. (Ap. 19:11-21) Kusiapo, ivona vanoceukija Jesu pa Khisimuso no pa Phasika. Avatorangariri kuti zvicinyi zviri kuda kuitwa ndi Jesu inga Mutongi mupsa wo pasi pese. Zvecivoneka kuti avakwanisi kuziva masoko avaidikana kucumaera, zvingatishamaisa kuziva kuti avatozivizve zvinodikana kuvakwevejera kuti vaite basa iri here?

8. Cido capi cakashata cicikadikani pa kuita basa ro kucumaera?

⁸ Cicinyi cinodikana kukwevejera kuti tiite basa ro kucumaera? Asipi kupsaka mare kana kuda kuvaka nyumba jakaseja. Jesu wakabvunja vajiji vake kudari: “Makaaxira biresi, ipanyivo biresi.” (Mt. 10:8) Soko ra Mwari aridikani kutengeswa. (2 Kor. 2:17, Shanduro yeNyika Itsva) Vanoitaya basa ro kucumaera avadikani kuita no cido cokuda kuwana zviri zvese pacavo ngo basa rondhoro. (Verenganyi Maitiro o Vapostori 20:33-35.) Pikija no ndhungamiriro iyi yakajeka, maceci ari kupaukira mukuhengesa mare kana kuvangisira kuitira kukwanisa kuwana mare. Iwona anodikana kukwanisa kupoceresa vatungamiriri, pomwe no vashandiri vamweni. Kazinji, vatungamiriri vo ciKristodhomu vanoungamija upfumi hwakawanda maningi.—Ap. 17:4, 5.

9. Zvapupu zva Jehovha zviri kukhombijisa kudini kuti izvona zviri kucumaera no cido cakanaka?

⁹ Kureva kuti Zvapupu zva Jehovha zvinoitisavo muhengo-muhengo here? Basa razvo rinobesehwa ngo mupiro jo kujipira. (2 Kor. 9:7) Akuna muhengo-muhengo unoitwa pa Nyumba yo Umambo kana pa magungano. Pikija zvakadaro, mu gore rakapera basi, Zvapupu zva Jehovha zvakapeja mabhiriau anokhedera kuita maviri o nguva, zvecicumaera masoko akanaka zve zvakaitisa jijo jo Bhaibheri jicikapagahwi jinodarika zviuru zvipfumbamwe mweji ngo mweji. Zvinokahamaja ngo zvokuti pikija avapoceri ivona no mudakaro wese vanojisapota vega. Ecinanga ngo pamusoro po basa ro Zvapupu zva Jehovha, umwe mupsakisiri wakananga kudari: “Cinangwa cikuru cavo ngo cokucumaera no kujijisa. . . . Avana vatungamiriri, vanoda mutengo wakatikuti wo mare.” Waro ngo zvapi zvinotindundira kuti tiite basa iri? Ngo magama mashoma, tinoita basa iri ngo kuti tino rudo kuna Jehovha zve kuno vadoni vedu. Mujimu uwu wokujipira uri kukwanirisa ciphorofita cinowanika pana Nduyo 110:3, BMAA. (Verenganyi.)

10. Njira japi jakashandisa Jesu no vajiji vake kuitira kucumaera?

¹⁰ I njira japi jakashandiswa ndi Jesu no vajiji vake kuitira kucumaera masoko akanaka? Ivona vaienda kuri kwese kwaiwanika vandhu—mu ndau jo pambhene zve mu muzi mwavo. Basa ro kucumaera raibatanija kupsaka vandhu vanodakarira muzi ngo muzi. (Mt. 10:11; Lc. 8:1; Mait. 5:42; 20:20) Macumaerire aya aivonesa kutama mukheto.

11, 12. Tecinanga ngo pamusoro po kucumaera masoko akanaka, tingaezanisa kudini kuvangisira ko vo ciKristodhomu no ko vandhu va Jehovha?

 ¹¹ Maceci o ciKristodhomu ari kuitisa kudini pa divi iri? Kazinji, vandhu vo maceci vanosiira basa rese ro kucumaera riitwe ngo vatungamiriri vanopocehwa. Asi, kusiapo kuva “vatandi vo vandhu,” vatungamiriri vo ciKristodhomu vanovoneka kuva vanopsaka kungwarira “hove” jovaanajo. Zvokadi kuti nguva jimweni, mutungamiriri wo ciara angavangisira pa kukurumijira kuti vhangeri ricumaehwe. Inga muezaniso, ku matangiro ko gore ro 2001, Papa João Paulo II, wakananga kudari pa karata: “Ko makore, ndiri kundohwirijira mukoka kuti kuizwe macumaerire mapsa o vhangeri. Ndiri kuzviphindazve . . . Tinodikana kumusijira mwatiri kukhohwa kwa Pauro, uwo wakananga kudari: ‘Khombo kondiri, ndikatama kutokotesa Vhangeri.’” Papa wakaenderera mberi ecinanga kuti “basa iri aridikana kusiiwa kuti riizwe ngo cikwata co ‘vanoriziva’ asi rinodikana kuizwa ngo zvihwa zvese zvo Vandhu va Mwari.” Waro vangana vakazwira cikumbiro ici?

¹² Zvapupu zva Jehovha zviri kuitisa kudini pa divi iri? Ndizvona basi zviri kucumaera kuti Jesu ari kutonga inga Mambo kubvira mu gore ro 1914. Kudari ngo zvakajijisa Jesu, izvona zviri kudira pa kutanga kamare basa ro kucumaera. (Mc. 13:10) Bhuku rinozwi Pillars of Faith—American Congregations and Their Partners (Njiki jo Gonda—Ungano jo Amerika no Vabeseri Vajo) rakati: “Ku Zvapupu zva Jehovha, kusotesesa basa ro umisionario kunopindirija kukaya-kaya kumweni.” Ecinangira masoko akanangwa ngo cimwe Capupu, mune wo bhuku iri, wakaenderara mbheri eciti: “Pavanowana ano njara, ari ega, kana ari kuhwaja, ivona vanoeja kubesera, . . . asi avakanganwi kuti basa ravo i kupa masoko o kumujimu ngo pamusoro po kupera ko nyika pomwe no dikano yo rusujunuko.” Zvapupu zva Jehovha zviri kuramba zvecicumaera masoko ondhowo, zvecishandisa njira jakashandisa Jesu no vajiji vake.

13. Basa ro kucumaera rinodikana kuitwa mbhera kwapi?

¹³ Jesu wakasanangura kwaizogumira basa ro kucumaera paakananga kuti masoko akanaka aizocumaehwa “pasi pese.” (Mt. 24:14) Vajiji vaizoitwa ku vandhu vo “majinja ese.” (Mt. 28:19, 20, BMAA) Izvi zvaizobatanija kuita basa iri pasi pese.

14, 15. Zvicinyi zviri kuvonesa kuti Zvapupu zva Jehovha zviri kukwanirisa ciphorofita ngo pamusoro po kunodikana kugumira basa ro kucumaera? (Vonanyi pikica yo kutanga.)

¹⁴ Kuitira kuzwisisa kuti Zvapupu zva Jehovha zviri ku kwanirisa kudini ciphorofita ca Jesu ngo pamusoro po kunodikana kugumira basa ro kucumaera, ngatende tivone zviro zvinganani. Ku Estadhos Unidhus, kuno vatungamiriri vanokhwedera kuita 600.000 mu zviara zvakasiyana-siyana, kondhono kuno Zvapupu zva Jehovha zvinokhwedera kuita 1.200.000. Ceci yo Roma yo Katorika ino vapiri vanodarika  kuita 400.000, pasi pese. Wari rangariranyi mutengo wo Zvapupu zvakabatikana mu basa ro kucumaera Umambo rakacijikira mu Bhaibheri. Pasi pese, vashandiri vanojipira vanokhwedera kuita mamiriau masere vari kucumaera vandhu mu nyika jinokwana 240. Basa rinoshamaisa zvakadini riri kuizwa kuitira kusimba no kukuja Jehovha!—Ndu. 34:2; 51:17.

¹⁵ Inga Zvapupu zva Jehovha, tino cido co kugumira vandhu vese vanokwanisa kuwanika ngo masoko akanaka, mugumo ucito waviya. Ngo iyo ndava, ndisu tiri pamberi, no basa ro kusanduja no kubudisa mabhuku akacijikira mu Bhaibheri. Mamiriau o mabhuku, marevhista, mataratadho no mukoka kuitira magungano no Cirangarijo zvicikapagahwi, zviri kukovaniswa. Tiri kubudisa mabhuku akasiyana-siya mu ndumi jinodarika kuita 700. Mutengo unodarika 200 o mamiriau o makhopi o Shanduro yeNyika Itsva yeMagwaro Matsvene akadhindwa mu ndumi jinokhwedera 130. Mugore raperari basi, takabudisa mutengo unokhwedera 4.5 o mabhiriau o mabhuku akacijikira mu Bhaibheri. Mu saite yedu yakatendehwa, masoko anowanika mu ndumi jinodarika 750. Cikwata capi co vanamati ciri kuita basa rakaezana na iri?

16. Tinozvizivisa kudini kuti Zvapupu zva Jehovha zvino mujimu wa Mwari?

¹⁶ Basa ro kucumaera raizoizwa mbhera rini? Jesu wakananga kuti basa iri ro pasi pese, raizoitwa mbhera mukati mo njiku jo kupejisira, perepo “kunozovia kupejwa ko bzese.” Ciara capi cimweni ciri kuramba cecicumaera masoko akanaka mukati mo njiku jino jo kupejisira jinosisira? Vamweni vo vatinosongana navo mu kucumaera vangananga kudari: “Itusu tino mujimu mucena, asi imwimwi muri kuita basa.” Asi kuvangisira kwedu pa basa iri akuvonesi kuti tino mujimu mecena wa Mwari here? (Mait. 1:8; 1 Ped. 4:14) Nguva ngo nguva, zviara zvimweni zvinoejavo kuita zvinoizwaya nguva jese ngo Zvapapau zva Jehovha, asi azvikwanisi. Vamweni vanotoejavo kuita mabasa o vanodanijaya kuti ngo o umisionario, ko nguva shomani perepo votohwirirazve ku upenyu hwavo hwo njiku ngo njiku. Vamweni vangatoejavo kwenda nyumba ngo nyumba, asi zvicinyi zvavanonga vecicumaera? Mupinguro wo mubvunjo uwu unovonesa pambhene kuti avaripi kuita basa rakatangwaya ndi Kristu.

17, 18. (a) Tingava kudini no gwinyiso ro kuti Zvapupu zva Jehovha ndizvona zviri kucumaera masoko akanaka o Umambo nyamasi uno? (b) Zvinokwanisika kudini kuti tirambe tiri mu basa iri?

¹⁷ Waro mbhaani vari kucumaera masoko akanaka o Umambo nyamasi uno? No kuthemba kwese, tingadavira kuti: “Zvapupu zva Jehovha!” Ngenyi tinothemba kuti ndisu kamare? Ngokuti tiri kucumaera masoko okadi kamare, masoko akanaka o Umambo. Ngo kwenda kunowanika vandhu, itusu tiri kushandisa njira ijona kamare. Basa ro kucumaera tiri kuriita no cido cakarungama—rudo, haiwa kuda kuwana mare. Basa redu riri kuguma ndhambo kamare, tecigumira vandhu vo majinji ese no ndumi jese. Zve tinozoenderera mberi teciita basa iri ticikathuruji, gore ngo gore, mbhera mugumo waviya.

¹⁸ Zvokadi kamare tiri kushamaisika ngo maitihwe ari kuizwa basa iri ngo vandhu va Mwari mu nguva jino jo kupejisira jatiri kuraramari. Asi, zvese izvi zviri kukwanisika kudini? Mupostori Pauro wakazvidavira pa karata yake ku vaFiripi, eciti: “Ndiyena Mwari anomupa simba ro kuda no kuita, ngo kuteveja kuda kwake.” Tese ngatende mberi teciashira simba rinobva ka Baba wedu vo mugore, patinonga tecivangisira kuita zvatinokwanisa kuti tiite zvakakwana mushando wedu.—2 Tim. 4:5.