1, 2. Wanem nao iumi laek savve taem iumi tingim toktok bilong Jesus long Matthew 24:14?

PIPOL evriwea long world savve iumi Olketa Jehovah’s Witness nao pipol for duim preaching waka. Samfala laek for herem message wea iumi talemaot bat olketa narawan les for herem. Maet iu meetim samfala pipol long ministry wea sei olketa no agree long olketa teaching bilong iumi bat olketa respectim iumi from waka wea iumi duim. Jesus sei long olketa last day, olketa disaepol bilong hem bae talemaot gud nius abaotem Kingdom long evri ples long world. (Matt. 24:14) Bat hao nao iumi sure preaching waka wea iumi duim nao hem waka wea Jesus story abaotem long datfala scripture? Waswe, hem stret for iumi sei iumi nomoa duim preaching waka hia?

² Staka religion sei olketa nao preachim datfala message wea Jesus story abaotem. Bat wanem olketa duim nomoa olketa tekem sermon long church, long TV, or long Internet, or talem  testimony abaotem hao olketa acceptim Jesus long laef bilong olketa. Olketa narawan tingse olketa preach taem olketa helpem poor pipol or duim volunteer waka olsem doctor, nurse, or teacher. Bat waswe, hem nao kaen waka wea Jesus story abaotem?

3. Wanem fofala samting nao insaed long komand wea Jesus talem long Matthew 28:19?

³ Taem Jesus storyim preaching waka, waswe, hem tingim for olketa disaepol weitim pipol for kam long olketa? Nomoa! Bihaen hem laef bak, Jesus sei olsem long staka disaepol bilong hem: “Go and teachim pipol long evri kantri for kamap disaepol bilong mi. Baptaesim olketa . . . teachim olketa for followim evri samting wea mi laekem iufala for duim.” (Matt. 28:19, 20) So Jesus storyim fofala samting wea iumi mas duim. First samting iumi mas duim nao hem for go long pipol. Then Jesus sei for iumi mas mekem disaepol, baptaesim olketa, and teachim olketa. Wanfala savveman sei: “Each disaepol nao mas ‘go’ for duim disfala waka, nomata hem go long pipol long area bilong hem or long nara kantri.”—Matt. 10:7; Luke 10:3.

4. Wanem nao olketa samting wea iumi mas duim for “fishing for kasem pipol”?

⁴ Waswe, Jesus laekem each wan long olketa disaepol for preach seleva, or hem laekem olketa for preach olsem wanfala grup wea organize? From hem hard for wanfala man preach “long evri kantri,” olketa disaepol bilong hem mas organize olsem wanfala grup for duim disfala preaching waka. Datwan nao wanem Jesus minim taem hem sei hem bae teachim olketa disaepol hao for “fishing for kasem pipol.” (Readim Matthew 4:18-22.) Jesus no story abaotem kaen fishing wea wanfala man iusim fishing laen and bait, and weitim fish for kam kaikai. Bat Jesus tingim kaen fishing wea olketa fisherman iusim olketa net for fishing. Diskaen wei for fishing, staka pipol nao mas waka tugeta, olketa mas organize gud, and mas waka hard.—Luke 5:1-11.

5. Wanem fofala kwestin nao iumi mas ansarem, and why nao olsem?

⁵ For savve hu nao duim preaching waka wea Jesus story abaotem, iumi mas ansarem fofala kwestin hia:

• Wanem nao datfala message wea olketa disaepol bilong Jesus mas talemaot?

• Wanem nao stretfala reason for duim preaching waka?

• Hao nao for duim disfala waka?

• Hao big nao bae disfala preaching waka, and bae hem gohed kasem wanem taem?

Ansa bilong olketa kwestin hia bae helpem iumi for luksavve hu nao duim disfala important waka. And tu, diswan bae strongim iumi for gohed duim disfala preaching waka.—1 Tim. 4:16.

6. Wanem nao mekem iumi sure Olketa Jehovah’s Witness talemaot stretfala message long pipol?

⁶ Readim Luke 4:43. Jesus talemaot “gud nius abaotem Kingdom,” and hem laekem olketa disaepol bilong hem tu for duim sem samting. Wanem grup nao preachim disfala message “long evri kantri”? Olketa Jehovah’s Witness nomoa duim datwan! Nomata samfala wea no laekem iumi tu luksavve long datwan. Olsem example, tingim samting wea wanfala priest wea duim missionary waka long staka kantri hem talem long wanfala Jehovah’s Witness. Long each kantri, priest hia askem Olketa Jehovah’s Witness wanem message nao olketa preach abaotem. Priest hia sei: “Evriwan long olketa barava dark hed bikos evriwan talem sem ansa  nomoa. Olketa sei olketa preachim ‘gud nius abaotem Kingdom.’” Samting wea datfala priest talem showimaot iumi no “dark hed” bat hem showimaot iumi garem wan mind, wea hem nao wanem olketa tru Christian shud garem. (1 Cor. 1:10) And tu, Kingdom bilong God hem nao main message insaed magasin Wastaoa wea Talemaot Kingdom Bilong Jehovah. Disfala magasin hem stap long 254 languis, and olketa printim samting olsem 59 million copy evri month. Staka pipol kasem disfala magasin winim eni nara magasin long world!

7. Hao nao iumi savve olketa bigman long religion no preachim message wea Jesus storyim?

⁷ Olketa bigman long religion nating preach abaotem Kingdom bilong God. Taem olketa storyim Kingdom, staka long olketa sei hem samting wea insaed heart bilong Christian. (Luke 17:21) Olketa no teachim pipol hao Kingdom hem wanfala really gavman long heven wea Jesus hem King long hem. Bat olketa laek for mekhae long Jesus long taem bilong Christmas or Easter nomoa. Olketa no teachim pipol hao Kingdom bae stretem evri problem long world and klosap nao bae hem finisim nogud pipol. (Rev. 19:11-21) Olketa bigman long religion nating savve wanem Jesus, wea hem King long Kingdom bilong God, bae duim long future. And from olketa no savve long datfala message wea Jesus story abaotem, olketa no savve tu long stretfala reason for preach.

8. Wanem nao rongfala reason wea samfala garem for preach?

⁸ Olketa disaepol bilong Jesus shud no preach for kasem selen or for wakem olketa stael building. Jesus sei: “Samting wea iufala kasem hem free nomoa, so iufala mas no askem selen for samting wea iufala duim.” (Matt. 10:8) So iumi shud no mek bisnis from disfala preaching waka. (2 Cor. 2:17) Olketa disaepol bilong Jesus no askem eniwan for peim olketa for preaching waka wea olketa duim. (Readim Acts 20:33-35.) Nomata samting wea Jesus talem hem klia, bat staka church busy for aftarem selen for lukaftarem church building bilong olketa, peim olketa bigman bilong olketa, and peim olketa nara wakaman tu. Diswan mekem staka bigman long religion kamap rich.—Rev. 17:4, 5.

9. Wanem nao showimaot Olketa Jehovah’s Witness garem stretfala reason for duim preaching waka?

⁹ Waswe, Olketa Jehovah’s Witness tekem offering long olketa Kingdom Hall or long taem bilong convention? Nomoa! Olketa donation nao sapotim waka bilong iumi. (2 Cor. 9:7) Long last year nomoa, Olketa Jehovah’s Witness iusim 1.93 billion hour for preachim gud nius, and olketa conductim winim 9 million Bible study evri month. Olketa no kasem pei bat olketa hapi for iusim selen bilong olketa seleva for duim preaching waka. Wanfala savveman sei olsem abaotem waka wea Olketa Jehovah’s Witness duim: “Main goal bilong olketa hem for preach long pipol and teachim olketa.” Hem sei tu Olketa Jehovah’s Witness no garem eni bigman mekem olketa peim wages bilong olketa. So sapos iumi no tek pei, why nao iumi preach? Iumi willing for duim disfala waka bikos iumi lovem Jehovah and iumi lovem pipol. Diswan nao samting wea Bible storyim long Psalm 110:3. (Readim.)

10. Hao nao Jesus and olketa disaepol bilong hem duim preaching waka?

¹⁰ Hao nao Jesus and olketa disaepol bilong  hem duim preaching waka? Olketa go long eni ples wea pipol stap. Olsem example, olketa preach long street and long olketa market. Olketa preach long pipol long haos bilong olketa tu. (Matt. 10:11; Luke 8:1; Acts 5:42; 20:20) Wei for preach long haos tu haos hem gudfala wei for kasem evri difren kaen pipol.

11, 12. Wanem nao Olketa Jehovah’s Witness duim for preachim gud nius, and wanem nao olketa church wea sei olketa Christian duim?

¹¹ Waswe, olketa church wea sei olketa Christian olketa preachim gud nius olsem Jesus duim? Olketa main wan wea preach long olketa church hem olketa bigman wea kasem wages for datwan, and staka taem olketa tek service nomoa long church. Staka taem olketa tingim nomoa pipol wea stap finis long church bilong olketa, and olketa no “fishing for kasem pipol.” Samfala bigman hia trae for encouragem olketa member long church for preach. Olsem example, long year 2001, Pope John Paul II raetem wanfala leta and sei olketa member bilong church mas preach abaotem gud nius and mas strong for duim diswan olsem aposol Paul, wea sei: “Bae mi kasem barava nogud samting sapos mi no talemaot gud nius.” Pope sei tu hem no olketa bigman nomoa wea shud duim disfala preaching waka, bat evri member nao shud duim datwan. Bat no staka nomoa followim wanem hem talem.

¹² Waswe iumi Olketa Jehovah’s Witness? Iumi nomoa talem long pipol Jesus rul olsem King start long 1914. Iumi obeyim Jesus and iumi putim preaching waka olsem main samting long laef bilong iumi. (Mark 13:10) Datfala buk Pillars of Faith—American Congregations and Their Partners sei preaching waka hem barava important long Olketa Jehovah’s Witness. Hem sei tu, nomata olketa meetim pipol wea hangre, lonely, and sik, and trae for helpem olketa, bat main goal bilong Olketa Jehovah’s Witness hem for preach abaotem taem wea disfala world bae finis and for teachim pipol wanem olketa mas duim for sev. Iumi gohed for talemaot datfala message and iumi followim hao Jesus and olketa disaepol bilong hem preach.

13. Disfala preaching waka bae hem hao big?

¹³ Jesus sei olketa disaepol bilong hem bae preach abaotem gud nius and teachim pipol “long evri ples long world.” Jesus givim komand long olketa for mekem pipol “long evri kantri” kamap disaepol. (Matt. 28:19, 20) Diswan minim iumi mas preachim gud nius evriwea long world.

14, 15. Wanem nao showimaot Olketa Jehovah’s Witness nomoa duim bigfala preaching waka wea Jesus story abaotem? (Lukim olketa piksa long start bilong study.)

¹⁴ Olketa Jehovah’s Witness nomoa duim wanem Jesus talem for preachim gud nius evriwea long world. Why nao iumi sei olsem? Long United States, olketa church  wea sei olketa Christian garem samting olsem 600,000 bigman, bat namba bilong Olketa Jehovah’s Witness long datfala kantri wea preachim gud nius hem samting olsem 1,200,000. Catholic religion garem samting olsem 400,000 priest raonem world, bat Olketa Jehovah’s Witness wea preachim gud nius long 240 kantri hem winim 8 million. Diswan pruvim Olketa Jehovah’s Witness nao preachim gud nius evriwea long world, wea diswan mekem Jehovah kasem bigfala praise!—Ps. 34:1; 51:15.

¹⁵ Goal bilong iumi Olketa Jehovah’s Witness hem for preachim gud nius long staka pipol bifor end hem kam. Dastawe iumi transleitim and pablisim staka million buk, magasin, tract, and convention and Memorial invitation pepa long winim 700 languis. Evri samting hia hem free nomoa taem iumi givim long pipol. Long last year iumi pablisim samting olsem 4.5 billion Bible pablikeson. And tu, iumi pablisim winim 200 million copy bilong New World Translation of the Holy Scriptures long winim 130 languis. Long website bilong iumi, iumi garem olketa pablikeson long winim 750 languis. Waswe, eni nara grup duim bigfala preaching waka olsem?

16. Wanem nao showimaot iumi Olketa Jehovah’s Witness garem holy spirit bilong God?

¹⁶ Preaching waka bae hem gohed kasem wanem taem? Jesus sei preaching waka bae gohed go kasem taem wea end hem kam. Iumi Olketa Jehovah’s Witness gohed for duim disfala preaching waka long olketa last day bikos holy spirit bilong Jehovah nao helpem iumi. (Acts 1:8; 1 Pet. 4:14) Samfala bilong nara religion maet sei, “Mifala garem holy spirit.” Bat waswe, olketa savve duim preaching waka wea Olketa Jehovah’s Witness duim long olketa last day distaem? Samfala religion trae for duim preaching waka olsem iumi, bat olketa fail long datwan. Olketa narawan willing for preach, bat olketa duim for lelebet taem nomoa. Samfala moa maet preach from haos tu haos, bat olketa no preachim gud nius abaotem Kingdom. Datwan showimaot olketa no duim preaching waka wea Jesus storyim.

17, 18. (a) Hao nao iumi barava sure Olketa Jehovah’s Witness nomoa preachim gud nius abaotem Kingdom distaem? (b) Wanem nao mekem iumi fit for gohed preachim gud nius?

¹⁷ So hu nao preachim gud nius abaotem Kingdom long disfala taem? Hem Olketa Jehovah’s Witness nomoa! Hao nao iumi savve long datwan? Bikos iumi talemaot stretfala message long pipol, wea hem nao gud nius abaotem Kingdom. Iumi go faendem pipol, so datwan showimaot hao iumi duim disfala waka hem stret. Stretfala reason nao mekem iumi for go preach, wea datwan nao from iumi lovem Jehovah and iumi lovem pipol. Iumi preach long pipol long evri kantri and languis. And iumi bae gohed for preachim gud nius abaotem Kingdom go kasem end!

¹⁸ Iumi barava tinghae long nambawan waka wea pipol bilong Jehovah duim for preachim gud nius long olketa last day distaem. Bat wanem nao mekem iumi fit for duim disfala waka? Aposol Paul sei: “Samting wea mekem God hapi nao hem for givim paoa long iufala mekem iufala savve laek duim samting and for iufala duim datwan.” (Phil. 2:13) Iumi prea long Jehovah for strongim iumi for gohed duim best bilong iumi for datfala preachim gud nius!—2 Tim. 4:5.