1, 2. Ahundango ndo wa la alondo na ndo ti tënë ti Jésus so ayeke na Matthieu 24:14?

ATÂA azo aye tënë so e yeke fa wala ala ke ni na bê oko, azo mingi ahinga aTémoin ti Jéhovah nzoni ndali ti kua ti ala ti fango tënë. A lingbi même ti si so mo tingbi na ambeni zo na fango tënë so atene atâa so ala ye tënë ti mabe ti e ape, ala ne e ndali ti kua ti fango tënë so e yeke sara. Tongana ti so e hinga, Jésus atene lani so a yeke fa ande nzoni tënë ti Royaume so na ndo ti sese kue so azo ayeke dä (Mat. 24:14). Tongana nyen la e hinga so kua so e yeke sara ayeke gango tâ tënë ti prophétie ti Jésus? Baba la asara e si e tene so gi e la e yeke sara kua ni so?

² Abungbi ti nzapa mingi atene so ala yeke fa Évangile wala nzoni tënë. Me angangu so ala yeke sara angbâ gi na fango tënë na yâ ti eglize, akua so ala yeke sara na eglize, wala kapa ti fango tënë so ala yeke fa ni na lege ti aye so ayeke vunga na sango tongana télé wala na Internet. Ambeni abâ aye so ala yeke sara ti mû maboko na azo wala ngangu so ala yeke sara ti soigné azo  nga ti fa mbeti na ala tongana mbeni lege ti fango tënë ti ala. Me aye ni so la ayeke kua ti fango tënë so Jésus asara tënë ni lani so?

3. Ti gue oko na Matthieu 28:19, 20 aye osio wa la a lingbi adisciple ti Jésus asara?

³ Adisciple ti Jésus asara lani ye oko ape, ala ku azo la aga gango na mbage ti ala? Ên-ën. Na peko ti so a zingo Jésus na kuâ, lo tene na adisciple ti lo ngbangbo mingi, lo tene: “Ala gue, ala sara si azo na popo ti amara kue aga adisciple. Ala batize ala. . . . Ala fa na ala ti bata aye kue so mbi mû yanga na ala ti sara.” (Mat. 28:19, 20). Tongaso, a hunda ti tene e sara aye osio. A lingbi e sara si azo aga adisciple, e batize ala nga e fa ye na ala. Me kozo ye so a lingbi e sara ayeke nyen? Jésus atene: “Ala gue.” Mbeni wandara ti Bible asara tënë na ndo ti commandement so, lo tene: “Ti ‘gue’ ayeke kua ti wamabe oko oko, atâa na ndo ti lege wala na lê ti ngu.”—Mat. 10:7; Luc 10:3.

4. A hunda ti tene azo so aga “awagingo azo” asara kua ni tongana nyen?

⁴ Jésus ayeke sara lani gi tënë ti ngangu so disciple ti lo oko oko ayeke sara? Wala lo yeke sara tënë ti mbeni kapa ti fango nzoni tënë so a leke yâ ni nzoni? So zo oko apeut ti gue na mbage ti “amara kue” ape, a hunda ti tene azo mingi abungbi si asara kua ni so. A yeke ye so Jésus aye lani ti tene la na ngoi so lo tene na adisciple ti lo ti ga “awagingo azo”. (Diko Matthieu 4:18-22.) Kua ti gingo susu so lo sara tënë ni ge so ayeke pëpe ti so zo oko amû yango ti lo, lo bi ni na yâ ti ngu lo ku ti tene susu aga ate ni si lo gboto ni. Me Jésus ayeke sara tënë ti sarango kua na gbanda, mbeni kua so ayeke ngangu, so na ambeni ngoi a hunda ti tene gbâ ti azo la asara ni.—Luc 5:1-11.

5. Ahundango ndo osio wa la a lingbi e kiri tënë na ni? Ngbanga ti nyen?

⁵ Ti hinga azo so ayeke fa nzoni tënë laso ti sara si prophétie ti Jésus so aga tâ tënë, a lingbi e kiri tënë na ahundango ndo osio so:

• Tënë ti nyen la a lingbi e fa?

• A lingbi nyen la apusu e ti sara kua ni?

• Akode wa la a lingbi a sara na kua ni?

• A lingbi a fa tënë ni na ando wa nga teti ngoi oke?

Akiringo tënë na ahundango ndo so ayeke mû maboko na e ti hinga azo so ayeke sara kua so ayeke sö fini ti azo, nga ayeke kpengba e ti ngbâ ti sara kua ni.—1 Tim. 4:16.

6. Ngbanga ti nyen mo hinga biani so aTémoin ti Jéhovah la ayeke fa nzoni tënë ti Royaume?

⁶ Diko Luc 4:43. Jésus afa lani “nzoni tënë ti royaume” na lo ku ti tene adisciple ti lo kue asara nga tongaso. Azo wa la ayeke fa tënë so na “amara kue”? Kiringo tënë ni ayeke polele: a yeke gi aTémoin ti Jéhovah. Même ambeni zo so aye tënë ti e ape kue ahinga ni. Na tapande, mbeni prêtre missionnaire atene lani na mbeni ita so ni tambela na yâ ti akodoro nde nde na ni hunda na aTémoin ti kodoro oko oko ti hinga tënë so ala yeke fa ni. Ala tene nyen na lo? Prêtre ni atene: “Teti so ala kue ayeke buba mingi, ala kue akiri gi même tënë, a tene: ‘Nzoni tënë ti royaume.’” A-Témoin so ayeke buba oko ape, me tënë ti yanga ti ala kue ague gi oko tongana ti so a hunda na atâ Chrétien (1 aCor. 1:10). Nga, ala yeke fa tënë so ayeke na yâ ti Tour ti Ba Ndo Afa Tene ti Royaume ti Jéhovah. A yeke wara mbeti so na ayanga ti kodoro 254 nga a yeke sigigi na ni nduru na million 59. Mbeti-sango so  la a kangbi ni mingi na yâ ti dunia ahon tanga ti ambeti-sango kue.

7. Tongana nyen la e hinga so akota zo ti abungbi ti nzapa ayeke fa nzoni tënë ti Royaume pëpe?

⁷ Akota zo ti a-eglize so atene ala yeke aChrétien ayeke fa tënë ti Royaume ti Nzapa ape. Tongana a si so ala sara tënë ti Royaume, mingi ni ala tene so ayeke mbeni ye so ayeke na yâ ti bê ti mbeni Chrétien (Luc 17:21). Ala ayeke mû pëpe maboko na azo ti hinga so Royaume ti Nzapa ayeke mbeni gouvernement so ayeke na yayu na Gbia ni ayeke Jésus. Nga ala fa na azo ape so Royaume ni la ayeke yorö ti akpale kue so azo ayeke wara na ala fa nga na azo ape so na yâ ti ngoi kete Royaume ni ayeke zi sioni ye kue na ndo ti sese (Apoc. 19:11-21). Me ala ye gi ti dabe na Jésus na ngoi ti Noël nga na ti Pâques. A yeke polele so ala hinga ye oko pëpe na ndo ti ye so Jésus ayeke sara ande tongana lo ga fini gbia ti sese. So ala hinga pëpe tënë so a lingbi ala fa ni, bê ti e adö pëpe so ala hinga nga pëpe ye so a lingbi ti pusu ala ti sara kua ti fango tënë.

8. Sioni bibe wa la apusu ambeni zo ti fa tënë?

⁸ A lingbi nyen la apusu e ti sara kua ti fango tënë? A lingbi a duti pëpe nzara ti warango gbâ ti nginza na ti lekengo akota da la apusu e ti sara ni. Jésus atene na adisciple ti lo: “Ala wara senge senge, ala mû na azo senge senge.” (Mat. 10:8). A lingbi a kä Tënë ti Nzapa kango ape (2 aCor. 2:17). A lingbi azo so ayeke fa tënë agi pëpe ti wara mbeni ye na peko ti kua ni. (Diko Kusala 20:33-35.) Atâa so atënë ti Jésus so ayeke polele, ye so agbu bê ti mingi ti azo ti a-eglize ayeke ti ro nginza ti bata na a-eglize ti ala wala ti futa na akota zo ti nzapa ni nga na ambeni zo so ayeke sara kua na yâ ni. Mingi ni, akota zo ti a-eglize so atene ala yeke aChrétien ayeke wara gbâ ti nginza.—Apoc. 17:4, 5.

9. Tongana nyen la aTémoin ti Jéhovah afa so nzoni bibe la apusu ala ti sara kua ti fango tënë?

⁹ Ka ti aTémoin ti Jéhovah ayeke tongana nyen? A-offrande so azo ayeke mû na bê ti ala wani la ayeke mû maboko na kua ti aTémoin ti Jéhovah (2 aCor. 9:7). A yeke ro nginza pëpe na maboko ti azo na ngoi ti abungbi wala na akota bungbi ti ala. Atâa so kue, gi na yâ ti ngu so ahon, aTémoin ti Jéhovah afa nzoni tënë nduru na l’heure milliard use nga nze na nze ala manda Bible na azo senge senge ahon million 9. Ye so adö bê ayeke so, atâa so a futa ala pëpe ndali ti kua so ala yeke sara, a nzere na ala ti mû nginza ti ala wani ndali ti kua ni. Mbeni koli so ayeke gi nda ti aye asara tënë ti kua ti aTémoin ti Jéhovah, lo tene: “Kozo ye so ala zia na gbele ala ti sara ayeke ti fa tënë na ti fa ye na azo. . . . So kota zo ti nzapa oko ayeke na popo ti ala ape, a sara si ala yeke bata nginza.” Ka nyen la apusu e ti sara kua so? Na nduru tënë, e yeke sara ni na bê ti e wani ndali ti so e ye Jéhovah nga e ye amba ti e. Nzoni bibe so asara si prophétie so ayeke na Psaume 110:3 aga tâ tënë (Diko ni.)

10. Akode wa la Jésus na adisciple ti lo asara kua na ni lani ti fa tënë?

¹⁰ Akode wa la Jésus na adisciple ti lo asara kua na ni lani ti fa nzoni tënë? Ala yeke gue lani na ando kue so azo ayeke dä: na alege nga na yâ ti agara. Ala yeke gue nga na yanga-da ti azo (Mat. 10:11; Luc 8:1; Kus. 5:42; 20:20). Fango tënë da  na da ayeke lani nzoni kode so amû lege ti fa tënë na mara ti azo kue.

11, 12. Kangbi wa la ayeke na popo ti a-eglize so atene ala yeke aChrétien na aTémoin ti Jéhovah na ndo ti tënë ti fango nzoni tënë?

¹¹ Na popo ti a-eglize so amembre ni atene ala yeke aChrétien, so wa la ayeke fa biani nzoni tënë tongana ti so Jésus afa lani? Mingi ni, a yeke nzere na amembre ti eglize ti zia kua ti fango tënë na akota zo ti abungbi ni so a yeke futa ala na nginza ti sara ni. Akota zo ti nzapa so aye mingi ti bata gi “asusu” so ala yeke na ni, me ala ye ti ga “awagingo azo” pëpe. Tâ tënë, na ambeni ngoi ala yeke tara ti pusu amembre ti ala ti fa tënë. Na tapande, na tongo nda ti ngu 2001, Pape Jean Paul II atene na yâ ti mbeni lettre so a lingbi amembre ti eglize afa Tënë nzoni nga a lingbi ala duti na oko bibe ti bazengele Paul, so atene: “Mawa na mbi tongana mbi fa Évangile pëpe.” Na pekoni Pape ni atene so gi azo so a fa kode ti fango tënë na ala oko la ayeke sara kua ni ape, me amembre ti eglize ni kue. Azo oke la asara ye lani alingbi na tënë ti Pape so?

¹² Ka ti aTémoin ti Jéhovah ayeke tongana nyen? Ala oko la ayeke fa na azo so Jésus ayeke komande na yayu ngbene ye na ngu 1914. Tongana ti so Jésus ahunda na ala ti sara, kua ti fango tënë la ayeke kota ye mingi na lê ti ala (Marc 13:10). Mbeni zo ti sungo mbeti atene: “Ti aTémoin ti Jéhovah, kua ti fango tënë ayeke kota ahon tanga ti aye kue.” Wa ti mbeti ni akiri na ndo ti tënë so mbeni Témoin atene, lo tene: “Na ngoi so ala wara mbeni zo so nzara asara lo, zo so ayeke gi lo oko nga mbeni zo ti kobela, ala yeke tara ti mû maboko na lo, . . . me ala girisa lâ oko pëpe so kozo kusala ti ala ayeke ti fa tënë na azo na ndo ti futingo ti dunia so ayeke pusu nduru nduru nga so a yeke kota ye ti tene azo asö fini ti ala” (Pillars of Faith—American Congregations and Their Partners). A-Témoin ti Jéhovah angbâ ti fa tënë so, na ala yeke sara kua na akode so Jésus na adisciple ti lo asara na kua lani.

13. A lingbi a fa tënë na ndo wa?

¹³ Jésus atene lani so adisciple ti lo ayeke fa nzoni tënë nga ala yeke fa ye “na ndo ti sese kue so azo ayeke dä”. (Mat. 24:14). A hunda na ala ti sara adisciple na “na popo ti amara kue”. (Mat. 28:19, 20). So aye ti tene a lingbi a fa nzoni tënë na yâ ti dunia kue.

14, 15. Nyen la afa so aTémoin ti Jéhovah asara si prophétie ti Jésus na ndo ti fango tënë na ndo ti sese kue aga tâ tënë? (Bâ afoto so ayeke na tongo nda ti article ni.)

¹⁴ Ti hinga tongana nyen la aTémoin ti Jéhovah asara si prophétie ti Jésus na ndo ti fango tënë na ndo ti sese kue aga tâ tënë, zia e gbu li ti e na ndo ti ambeni ye. Na États Unis, a yeke wara akota zo ti nzapa nduru na 600 000 tongaso na yâ ti a-eglize nde nde so atene ala yeke aChrétien, me wungo ti aTémoin ti Jéhovah kâ ayeke 1 200 000 tongaso. Na yâ ti dunia kue, a yeke wara aprêtre ti  Catholique 400 000 tongaso. Fadeso, bâ wungo ti aTémoin so ayeke sara kua ti fango tënë ti Royaume. Na yâ ti dunia kue, aTémoin ti Jéhovah million miombe tongaso la ayeke fa tënë na azo na bê ti ala wani na yâ ti akodoro 240. Ala yeke sara mbeni kua so apika bê mingi, ala yeke sara ni ti mû gonda nga na gloire na Jéhovah.—Ps. 34:2; 51:17.

¹⁵ E so e yeke aTémoin ti Jéhovah, e ye ti tene gbâ ti azo amä nzoni tënë kozo si nda ni aga. Ndani la, e yeke nde tongana andu kua so e yeke sara ti kiri na peko ti ambeti ti e nga ti sigigi na ni. A yeke kangbi na azo senge senge gbâ ti abuku, apériodique, atract nga na ambeti ti tisango ndo ndali ti Dango bê na kuâ ti Jésus nga ndali ti akota bungbi. E yeke sigigi na ambeti nde nde na ayanga ti kodoro ahon 700. E sigigi na Mbeti ti Nzapa ti fini dunia ahon million 200 na ayanga ti kodoro ahon 130. Gi na yâ ti ngu so ahon, wungo ti ambeti kue so e sigigi na ni asi nduru na milliard 4 na ndambo. Na ndo ti site ti e, ayeke wara asango na ayanga ti kodoro ahon 750. Mbeni bungbi ti vorongo Nzapa wa la ayeke sara mara kua so?

16. E hinga tongana nyen so aTémoin ti Jéhovah ayeke na yingo vulu ti Nzapa?

¹⁶ E yeke ngbâ ti sara kua ti fango tënë ni juska lawa? Jésus atene so a yeke ngbâ ti sara ni na yâ ti alango ti nda ni kue, “na pekoni, nda ni ayeke ga.” Ambeni bungbi ti vorongo Nzapa wa la angbâ ti fa nzoni tënë na alango ti nda ni so? Ambeni zo so e yeke tingbi na ala na fango tënë alingbi ti tene: “E yeke na yingo vulu. Me ala la ayeke azo so ayeke sara kua ni.” So e yeke gbu ngangu na yâ ti kua ti fango tënë na alango ti nda ni so, a fa biani so e la yingo ti Nzapa ayeke na ndo ti e ape? (Kus. 1:8; 1 Pi. 4:14). Ngoi na ngoi, ambeni bungbi ti vorongo Nzapa ayeke tara ti fa tënë tongana ti aTémoin ti Jéhovah, me ala gbu lê ni ape. Ambeni asara kua ti missionnaire teti mbeni ngoi na pekoni ala kiri na ngbene ye so ala sara kozo. Ambeni atara même ti gue da na da, me tënë ti nyen la ala yeke fa? Kiringo tënë ni ayeke polele, ala yeke fa pëpe nzoni tënë ti Royaume so Jésus akomanse ti sara ni lani.

17, 18. (a) Ngbanga ti nyen e hinga biani so gi aTémoin ti Jéhovah la ayeke fa nzoni tënë ti Royaume laso? (b) Tongana nyen la e lingbi ti ngbâ ti sara ni?

¹⁷ Tongaso, azo wa la ayeke sara biani kua ti fango nzoni tënë ti Royaume laso? E lingbi ti tene na kite oko ape, e tene: “aTémoin ti Jéhovah.” Ngbanga ti nyen e yeke na kite oko ape? Ngbanga ti so e yeke fa nzoni tënë ti Royaume. E yeke gue na mbage ti azo, so ti fa so e yeke sara kua na anzoni kode. Nzoni bibe la apusu e ti sara kua ni: ndoye, me nzara ti warango nginza ape. E yeke fa tënë na yâ ti dunia kue, na azo ti amara nga na ayanga ti kodoro kue. Nga, e yeke ngbâ ti sara kua so sân ti zia lege ni, juska na nda ni.

¹⁸ A yeke biani ye ti dongo bê ti bâ pendere kua so awakua ti Jéhovah ayeke sara na alango ti nda ni so. Me tongana nyen la e lingbi ti fa nzoni tënë na azo ti sese kue? Kiringo tënë ni ayeke na yâ ti lettre so bazengele Paul atokua na aChrétien ti Philippe, lo tene: “Nzapa si ayeke sara kusala na yâ ti ala ti tene ala duti na nzara ti sara ye nga ala sara ye, na lo sara tongaso ndali ti so a nzere na bê ti lo.” (aPhil. 2:13). Zia e kue e ngbâ ti wara ngangu na lege ti Babâ ti e ti ndoye na ngoi so e yeke sara kue ti fa tënë nga ti sara kusala ti e ni kue.—2 Tim. 4:5.