1, 2. Mi la jkʼeltik Mateo 24:14, ¿kʼusi van xuʼ jakʼbe jbatik?

OY KRIXCHANOETIKE chalik ti lek ti ta jcholtik mantale, pe li yantik xtoke mu jechuk tsnopik. Akʼo mi jech, jutuk mu skotoluk li krixchanoetike xojtikinutik ta skoj ti ta jcholtik mantale. Bakʼintike xuʼ van ta jtatik krixchanoetik ta cholmantal ti chalbutik ti lek li abtelal yakal ta jpastike, akʼo mi mu xchʼunik li kʼusi chkaltike. Pe kʼuchaʼal jnaʼojtike, xi yaloj li Jesuse: «Li lekil aʼyejetik ta sventa li Ajvalilal liʼe ta xichʼ cholel ta spʼejel balumil» (Mat. 24:14). Pe ¿kʼuxi jnaʼojtik ti jaʼ yakalutik spasel li albil kʼop laj yal Jesuse? ¿Mi ta van jtoy-o jbatik ta skoj taje?

² Epal relijionetike chalik ti yakal la chcholik batel li Evanjelio o li lekil aʼyeje. Pe kʼajomal noʼox chalik mantaletik ta stemploik, ta television, ta Internet o jaʼ noʼox chalbeik yantik ti kʼuxi la xchanik ta sventa li Jesuse. Yantike jaʼ la chcholik mantal yalojik kʼalal tskoltaik li buchʼutik abol sbaike, kʼalal tskoltaik krixchanoetik ta ospitaletike xchiʼuk kʼalal chkoltavanik  ta eskuelaetike. Pe ¿mi ta melel jaʼ yakal chchʼunik li mantal laj yalbe komel yajchankʼoptak li Jesuse?

3. Jech kʼuchaʼal chal Mateo 28:19 xchiʼuk 20, ¿kʼusitik skʼan spasik li yajtsʼaklomtak Kristoe?

³ ¿Mi jaʼ van laj yakʼ ta aʼiel Jesus ti te noʼox smeyoj skʼobik yajchankʼoptak xchiʼuk ti jaʼ noʼox te tsmalaik chtal stuk li krixchanoetike? Moʼoj. Yuʼun kʼalal chaʼkuxiem xa ox li Jesuse, xi laj yalbe ta sienal xa noʼox yajchankʼoptake: «Batanik, bat pasik ta jchankʼop li krixchanoetik ta skotol jteklumetike, akʼbeik yichʼ voʼ [...], chanubtasik ta xchʼunel skotol li kʼusitik laj kalboxuke» (Mat. 28:19, 20). Jech kʼuchaʼal chkiltike chantos kʼusitik skʼan jpastik. Li oxtose jaʼ liʼe: ta jpastik ta jchankʼop li krixchanoetike, chkakʼbetik yichʼik voʼ xchiʼuk ta jchanubtastik. Pe ¿kʼusi baʼyel skʼan jpastik? Xi laj yal li Jesuse: «Batanik». Jun krixchano ti chchanbe skʼoplal Vivliae, xi laj yal ta sventa taje: «Li mantal laj yichʼ alel ‹batanik› xie, jaʼ skʼan xal ti ta jujuntal yajtsʼaklomtak Kristo skʼan jech spasike, yuʼun mu ventauk mi skʼan xtuchʼik kaye o junuk nab» (Mat. 10:7; Luk. 10:3).

4. Sventa jsaʼtik talel li krixchanoetike, ¿kʼusi skʼan jpastik?

⁴ ¿Mi jaʼ van la skʼan laj yal Jesus ti ta jujuntal skʼan xcholik mantal li yajtsʼaklomtake? ¿O mi jaʼ van laj yalbe skʼoplal jun mukʼta abtelal ti skʼan lekuk chapanbile? Ta melel, ta stuk noʼox jun krixchanoe mu xuʼ yuʼun xcholel mantal ‹ta skotol jteklumetik›, yuʼun sventa xichʼ pasel li abtelal taje skʼan epal krixchanoetik xchiʼuk ti lekuk chapanbile. Jaʼ jech laj yal Jesus kʼalal xi laj yalbe li yajchankʼoptake: «Krixchanoetik xa chatsakik kuʼun jech kʼuchaʼal chatsakik choye» (kʼelo Mateo 4:18-22). Pe maʼuk laj yalbe skʼoplal jun vinik ti tstsak choy ta stsakobile, ti te smalaoj chtal stuk li choye. Jaʼ laj yalbe skʼoplal ti kʼuxi ta tsakel choy kʼalal ta stunesik li nutiʼ sventa stsakobil choye, yuʼun skʼan jayvoʼuk krixchanoetik sventa jmoj snitik lokʼel (Luk. 5:1-11).

5. ¿Kʼusitik skʼan jtakʼtik, xchiʼuk kʼu yuʼun?

⁵ Sventa jnaʼtik buchʼutik yakal chchʼunik li albil kʼop laj yal Jesus ta sventa li xcholel lekil aʼyeje, skʼan jtakʼtik li kʼusitik liʼe:

• ¿Kʼusi aʼyej skʼan xcholik?

• ¿Kʼusi skʼan xtijbat yoʼontonik ta xcholel?

• ¿Kʼu yelan chcholik?

• ¿Bu to kʼalal chcholik xchiʼuk bakʼin chkechanik?

Mi la jtakʼtik taje, tskoltautik snaʼel buchʼutik yakal chchʼunik li mantal laj yal Jesus ta skoltael li krixchanoetike. Jech xtok, mas tstij koʼontontik sventa mu xijlubtsaj ta xcholel li mantale (1 Tim. 4:16).

6. ¿Kʼuxi xuʼ jnaʼtik ti jaʼ yakal chcholik stestigotak Jeova li aʼyej laj yal Jesuse?

⁶ (Kʼelo Lukas 4:43). Li Jesuse la xchol batel «li lekil aʼyejetik ta sventa Ajvalilal yuʼun Dios[e]», vaʼun tskʼan ti jechuk spasik batel li yajchankʼoptak eke. ¿Mi oy van junuk organisasion ti yakal chcholik mantal «ta skotol jteklumetike»? Oy ta melel, jaʼ li stestigotak Jeovae. Jaʼ jech chakʼik venta ek li buchʼutik skontrainojik li abtelal ta jpastike. Jech kʼuchaʼal chal jun pale ti ayem ta naklej ta epal lumetike, kʼalal ta sjakʼbe stestigotak Jeova ti kʼusi aʼyejal chcholike, xi laj yale: «Bol krixchanoetik ta jyalel, yuʼun xi la stakʼ skotolik li buchʼutik la jakʼbee: ‹Jaʼ li lekil aʼyejetik ta sventa Ajvalilal yuʼun Diose›». Pe ta melel,  maʼuk «bol krixchanoetik» li stestigotak Jeovae. Yuʼun lek tsobolik ta skoj ti jaʼik li melel yajtsʼaklomtak Kristoe (1 Kor. 1:10). Li aʼyej chalike koʼol tajek kʼuchaʼal chal Li Jkʼel osil ta toyole. Yakal chalbe skʼoplal li Ajvalilal yuʼun Jeovae. Jaʼ yuʼun kʼalal chlokʼ jujun velta li revista taje, chichʼ pasel imprimir jutuk mu 59 miyon ta lik ta 254 jeltos kʼopetik. Jaʼ li vun ti mas pukbil ta spʼejel Balumile.

7. ¿Kʼuxi jnaʼojtik ti muʼyuk chcholik mantal li jbeiltasvanejetik ta relijione?

⁷ Li jbeiltasvanejetik ta relijione muʼyuk chcholbeik skʼoplal li Ajvalilal yuʼun Diose. Kʼalal chalbeik skʼoplale, ep buchʼutik chalik ti jaʼ noʼox la te oy ta yoʼontonike (Luk. 17:21). Muʼyuk chchanubtasik krixchanoetik ti jaʼ jun Ajvalilal ta vinajele, ti jaʼ ch-ajvalilaj li Jesukristoe, ti jutuk xa skʼan xakʼbe slajeb li jvokoltike xchiʼuk li kʼusitik chopole (Apok. 19:11-21). Jaʼ noʼox chalbeik skʼoplal Jesus li ta skʼinal Svokʼel Ninyoe (Navidad) xchiʼuk li ta Kʼin Kuxele. Mu snaʼik li kʼusitik tspas Jesukristo kʼalal mi lik sventain li Balumile. Mu xaʼibeik smelolal li aʼyej laj yal komel li Jesuse xchiʼuk mu xaʼibeik smelolal kʼu yuʼun skʼan xcholik li mantale.

8. ¿Kʼusi mu jaʼuk ta skoj ti ta jcholtik mantale?

⁸ Kʼalal ta jcholtik mantale maʼuk ta skoj ti ta jkʼantik takʼine xchiʼuk ti ta jmeltsantik alakʼik sba naetike. Yuʼun xi laj yalbe yajchankʼoptak li Jesuse: «Ta moton la-akʼbatik, jaʼ jech ta moton xavakʼik ek» (Mat. 10:8). Maʼuk me sventa spasel kanal takʼin li Skʼop Diose (2 Kor. 2:17). Ti buchʼutik chcholik mantale, skʼan me ta moton spasik (kʼelo Echos 20:33-35). Akʼo mi lek jamal li mantaletik laj yal komel li Jesuse, jutuk mu skotoluk li relijionetike jaʼ batem ta yoʼontonik ta stsobel takʼin o sventa oyuk noʼox stakʼinik. Jech xtok, skʼan stojik li jbeiltasvanejetike xchiʼuk li epal j-abteletike. Ep tajek ti pasemik ta jkʼulej li jbeiltasvanejetik ta relijione (Apok. 17:4, 5).

9. ¿Kʼu yelan chakʼik ta ilel stestigotak Jeova ti xaʼibeik lek smelolal ti kʼu yuʼun skʼan xcholik mantale?

⁹ ¿Kʼu van yelan chilik stestigotak Jeova li stsobel takʼine? Skotol li abtelal tspasike, jaʼ koliyal li matanal takʼin chichʼ akʼele (2 Kor. 9:7). Li ta Salon sventa Tsobobbaile xchiʼuk li ta sventa asambleae, muʼyuk chichʼ kʼanel takʼin te. Li echʼ jabile jutuk mu chib biyon ora la xcholik mantal xchiʼuk mas ta baluneb miyon laj yakʼik estudio jujun u. Akʼo mi vokol ta chʼunel, muʼyuk tskʼan stojolik ta spasel taje. Ta sjunul yoʼonton tstoj stukik li kʼusitik chtun yuʼunike. Jun ti buchʼu chchanbe skʼoplale, xi laj yal ta sventa li stestigotak Jeovae: «Li kʼusi oy ta yoʼontonike jaʼ li xcholel mantale xchiʼuk ti xchanubtasvanike [...]. Chʼabal junuk jnitvanej yuʼunik, ta skoj taje muʼyuk ep chlaj takʼin yuʼunik». Jaʼ yuʼun chaʼa, ¿kʼusi skʼan stij koʼontontik sventa jcholtik li mantale? Ti kʼusi tstij koʼontontik ta spasel ta moton li abtelale, jaʼ ta skoj ti jkʼanojtik li Jeovae xchiʼuk li krixchanoetike. Ti kʼu yelan chichʼ pasel taje jaʼ yakal chkʼot ta pasel li albil kʼop chal ta Salmo 110:3 (kʼelo).

10. ¿Kʼu yelan la xcholik mantal li Jesus xchiʼuk yajchankʼoptake?

¹⁰ ¿Kʼu yelan la xcholik mantal li Jesus xchiʼuk yajchankʼoptake? Chkʼotik ta cholmantal ta buyuk noʼox; maʼuk noʼox ti  bu oy ep krixchanoetike, chbatik ta naetik xtok sventa saʼik ti buchʼutik sta-oe (Mat. 10:11; Luk. 8:1; Ech. 5:42; 20:20). Ti kʼu yelan la xcholike jaʼ svinajeb ti muʼyuk la stʼujik li buchʼutik la xcholbeik mantale.

11, 12. ¿Kʼusi sjelbenal ti kʼu yelan chcholik mantal li stestigotak Jeova xchiʼuk li yan relijionetike?

¹¹ ¿Kʼusi spasojik ta sventa cholmantal li buchʼutik tskuy sbaik ta yajtsʼaklomtak Kristoe? Jutuk mu skotolikuk tskʼanik ti akʼo xchol mantal li jbabeetik yuʼunike. Pe muʼyuk chcholik mantal un, jaʼ xa noʼox chchabiik li jayvoʼ yajchʼunolajelike. Melel onoʼox ti oy yalojbeik krixchanoetik ti xcholik mantale. Jech kʼuchaʼal li ta sjabilal 2001, li papa Juan Pablo II laj yalbe batel ta jlik karta skotol li buchʼutik jbabeik ti skʼan xcholik mantale xchiʼuk ti skʼan jechuk ta yoʼontonik kʼuchaʼal laj yal li jtakbol Pabloe: «¡Abol jba mi muʼyuk bu ta jchol batel li lekil aʼyejetike!». Ta tsʼakale, laj yal ti maʼuk noʼox skʼan xcholik li buchʼutik lek chanemike, yuʼun skʼan xcholik ek li jchʼunolajeletike. Pe taje jutuk tajek ti buchʼutik la xchʼunike.

¹² ¿Kʼusi spasojik li stestigotak Jeovae? Jaʼ noʼox stukik chalik ti lik Ajvalilajuk ta 1914 li Jesuse. Jaʼ mas tsots skʼoplal chilik li cholmantale, jech kʼuchaʼal laj yal mantal li Jesuse (Mar. 13:10). Xi laj yal jun ants ta jlik livro ti chalbe skʼoplal relijione: «Li kʼusi mas tsots skʼoplal chaʼiik li stestigotak Jeovae, jaʼ li xcholel mantale». Xi to laj yale: «Kʼalal tstaik jun krixchano ti chil svokol ta skoj viʼnal, ti stuk chaʼi sba o ti ip chaʼie, chakʼik persa skoltael, [...] pe muʼyuk chchʼay ta yoʼontonik ti chalbeik ti chlaj li kʼusitik chopole xchiʼuk ti skʼan xchanubtasik sventa sta skolebike». Jaʼ jech yakal chcholik mantal li stestigotak Jeova kʼuchaʼal la spas xchiʼuk yajchankʼoptak li Jesuse.

13. ¿Bu to kʼalal skʼan xichʼ cholel li mantale?

¹³ Li Jesuse laj yal ti chcholik mantal xchiʼuk chchanubtasvanik li yajchankʼoptak sventa xaʼiik lekil aʼyejetik skotol li jteklumetike (Mat. 24:14). Li yajchankʼoptake chlikik talel ta «skotol li jteklumetike» (Mat. 28:19, 20). Taje jaʼ skʼan xal ti skʼan cholel mantal ta spʼejel Balumile.

14, 15. ¿Kʼuxi yakal chkʼot ta pasel yuʼunik stestigotak Jeova li albil kʼop laj yal Jesuse? (Kʼelo li lokʼoletik ta slikebale).

¹⁴ Jaʼ noʼox stestigotak Jeova yakal tspasik li albil kʼop laj yal Jesus ta sventa li xcholel lekil aʼyejetik ta spʼejel Balumile. ¿Kʼu yuʼun jech chkaltik taje? Li ta Estados Unidose oy jutuk mu jun miyon 200 mil stestigotak Jeova. Pe jaʼuk li jnitvanejetik ta jeltos relijione kʼajomal 600 mil li ta lum taje. Li ta spʼejel Balumile mas jutuk ta 400 mil paleetik li ta relijion katolikae. Pe taje jutebik, yuʼun li stestigotak Jeovae oy vaxakib miyon ti yakal chcholik mantal ta 240 mukʼtik lumetike.  Toj labal sba ti kʼu yelan chichʼ muyubtael xchiʼuk chichʼ albel slekilal li Jeovae (Sal. 34:1; 51:15).

¹⁵ Li stestigoutik Jeovae oy ta koʼontontik ti jcholbetik mantal epal krixchanoetike, yoʼ to muʼyuk chtal li slajebal kʼusitik chopole. Jun sprevaile jaʼ li abtelal ta sjelubtasel ta jeltos kʼopetik xchiʼuk li spasel imprimir vunetik o yan kʼusitik ti lokʼem ta Vivliae. Taje muʼyuk buchʼu jech yakalik ta spasel. Kakʼojtik xa ta moton ta smiyonal xa noʼox livroetik, revistaetik, tratadoetik xchiʼuk uni vunetik sventa asamblea xchiʼuk ta sventa li Snaʼobil slajel Kristoe. Mas xa ta vukub sien jeltos kʼopetik lokʼem li vunetike. Jech xtok, mas ta 200 miyon yichʼoj pasel imprimir li Traducción del Nuevo Mundo de las Santas Escrituras sbie, taje mas xa ta 130 jeltos kʼopetik lokʼem. Jaʼ noʼox li echʼ jabile, laj yichʼ pasel imprimir te van chanib miyon xchiʼuk oʼlol vunetik. Jech xtok, oy mas ta 750 jeltos kʼopetik li mantaletik ta jpajinatik ta Internete. ¿Mi oy van junuk organisasion ti jech tspase?

16. ¿Kʼuxi jnaʼojtik ti te oy ta stojolalik chʼul espiritu li stestigotak Jeovae?

¹⁶ ¿Bakʼin to chkechanik li cholmantal ta spʼejel Balumile? Li ta albil kʼop laj yal Jesuse, te chal ti chichʼ cholel kʼalal to ta slajebal kʼakʼale, ‹vaʼun ta xtal slajebal› li kʼusitik chopole. ¿Mi oy van yan organisasion ti chcholik li lekil aʼyejetik ta spʼejel Balumil li ta slajebal kʼakʼale? Junantik krixchanoetik ti ta jtatik ta cholmantale, xi chalike: «Voʼoxuk chapasik li abtelale, pe voʼonkutik kichʼojkutik li chʼul espiritue». Ta skoj ti voʼotik kuchem talel kuʼuntik spasel li abtelale, ¿mi mu jaʼuk skʼan xal ti te oy ta jtojolaltik li chʼul espiritue? (Ech. 1:8; 1 Ped. 4:14). Bakʼintike, li junantik relijionetike chlik xcholik mantal jech kʼuchaʼal tspas li stestigotak Jeovae, jaʼ noʼoxe ta xlubtsajik, vaʼun chiktaik-o. Junantik xtoke ta xcholik mantal kʼuk sjalil. Yantik xtoke chlik xcholik mantal ta naetik, pe ¿kʼusi li aʼyej chalike? Ta melel jaʼ te chvinaj ti muʼyuk tspasik li abtelal la slikes komel li Kristoe.

17, 18. 1) ¿Kʼuxi jnaʼojtik ti jaʼ noʼox stestigotak Jeova chcholbeik skʼoplal li Ajvalilal yuʼun Diose? 2) ¿Kʼuxi tspas kuʼuntik li abtelal taje?

¹⁷ Jaʼ yuʼun chaʼa, ¿buchʼutik ti chcholik li lekil aʼyej ta sventa Ajvalilal yuʼun Diose? Xuʼ xi xkaltik ta jamale: «Jaʼ noʼox li stestigotak Jeovae». ¿Kʼuxi jnaʼojtik? Yuʼun jaʼ ta xkaltik batel li melel aʼyeje: li lekil aʼyej ta sventa li Ajvalilal yuʼun Diose. Jech ta jcholtik mantal ti kʼu yelan lek albile, yuʼun voʼotik chbat jsaʼtik li krixchanoetike. Jaʼ ta skoj ti jech chlokʼ ta koʼontontike, ti jkʼanojtik li Jeovae xchiʼuk li krixchanoetike, maʼuk ti ta jkʼan ta jpastik kanal takʼine. Li abtelal ta jpastike jaʼ ta spʼejel Balumil, yuʼun ta jcholbetik mantal skotol krixchanoetik ta yan lumetik xchiʼuk ta jeltos kʼopetik. Jech xtok muʼyuk chijlubtsaj li ta xcholel mantale, yuʼun jech ta jpastik jujun jabil, jaʼ to ta jkechantik mi tal li slajeb kʼusitik chopole.

¹⁸ Toj labal sba li kʼusi yakal tspasik avi li steklumal Diose. ¿Kʼuxi tspas yuʼunik taje? Te tstakʼbutik li ta karta la stsʼiba jtakbol Pablo ta sventa li ermanoetik ta Filipose: «Jaʼ chakʼboxuk avipalik li Diose, chakʼ ti oyuk ta avoʼontonik spasele xchiʼuk chakʼ ti xuʼuk avuʼunik spasel li kʼusitik lek chile» (Filip. 2:13). Jkʼanbe kipaltik Jtotik Jeova sventa ‹lek tsʼakal jpastik batel li kabteltike› (2 Tim. 4:5).