1, 2. Enọ vọ yen a sa nọ fikirẹ eta rẹ Jesu rehẹ Matiu 24:14?

OWENẸ ihwo jiri avwanre yẹrẹ ayen hanrhe avwanre, ihwo buebun riẹn avwanre phiyọ ihwo ri ghwoghwo ota. Ọ sa tobọ dianẹ wọ mrẹ ihwo re vuẹ wẹ nẹ dede nẹ ayen ghwa rhọnvwephiyọ obo avwanre segbuyota-a, jẹ avwanre davwan mamọ vwẹ iruo aghwoghwo na. Kirobo avwanre riẹnre, Jesu tare nẹ e che ghwoghwo iyẹnrẹn esiri rẹ Uvie na ro akpọ na ejobi. (Mat. 24:14) Ẹkẹvuọvo mavọ avwanre ru riẹn nẹ iruo aghwoghwo avwanre na ọyen orugba rẹ aroẹmrẹ rẹ Jesu na? Ọyena omaẹshẹ re vwo roro nẹ avwanre yen ruiruo nana?

² Ẹga buebun nonẹna roro nẹ ayen ruiruo aghwoghwo na. Ẹkẹvuọvo, ikuegbe rẹ oborẹ ayen kurhẹriẹ wan yen ayen ta vwevunrẹ ishọshi, itẹlivishọni, vẹ itanẹti. Efa rionbọ kpo ukẹcha rẹ ayen vwọ kẹ ihwo, kẹrẹ idọktọ, inọsu yẹrẹ iyono. Jẹ, enana yen oborẹ Jesu vuẹ idibo rọyen nẹ ayen ru?

3. Kirobo rẹ Matiu 28:19, 20 tare, erọnvwọn ẹne vọ yen idibo rẹ Jesu che ru?

 ³ Idibo rẹ Jesu che chidia hẹrhẹ ọke rẹ ihwo vwo bru ayen rhe? Ẹjo, kakaka! Ra vwọ rhọvwọn Jesu nẹ ushi nu, ọ da vuẹ idibo rọyen ri te ujorin buebun: “Ovwan . . . yanran re we re yono ihwo rẹ akpọ na ejobi, [“we bru ayen phiyame,” NW] . . .  We yono ayen vwọ riẹn otọ rẹ imu na ejobi re dje kẹ ovwan na.” (Mat. 28:19, 20) A guọnọre nẹ e ru erọnvwọn ẹne. E che ru idibo, bru ayen phiyame, ji yono ayen, ẹkẹvuọvo die yen orọnvwọn ẹsosuọ e che ru? Jesu tare nẹ, “Yanran”! Ohwo ọvo ro yono Baibol kodo da ta: “Ra vwọ ‘yanran’ ọyen owian ro te Inenikristi eje, te ọ diẹ evunrẹ irhuvwun yẹrẹ abadi.”—Mat. 10:7; Luk 10:3.

4. Die yen o mudiaphiyọ ra vwọ dia “ihwiyeri rẹ ihwo”?

⁴ Jesu ta ota kpahen ẹgbaẹdavwọn rẹ idibo rọyen ọvuọvo, gbanẹ iruo aghwoghwo na rẹ ihwo che ru vwo nene ọrhuẹrẹphiyotọ? Rọ vwọ dianẹ ohwo ọvuọvo che se ghwoghwo kẹ ihwo rẹ “akpọ na ejobi” na-a, kọyen ihwo buebun yen che ruiruo nana vwo nene ọrhuẹrẹphiyotọ. Ọnana yen sorọ Jesu vwo durhie idibo rọyen nẹ ayen rhe dia “ihwiyeri rẹ ihwo.” (Se Matiu 4:18-22.) Ọnana họhọ ohwo ro phi oghọre phiyọ urhie, o mi chidia kpogono, hẹrhẹ ọke rẹ erin vwọ re obo rehẹ evun rọye-en. Ukperẹ ọtiọyen, ọ hepha kerẹ ohwo rọ reyọ ariri vwo ruiruo, ọkiọvo ọ tobọ guọnọ ukẹcha rẹ ihwo buebun.—Luk 5:1-11.

5. Enọ ẹne vọ yen a cha kpahenphiyọ, kẹ diesorọ?

⁵ A vwọ riẹn ihwo ri ghwoghwo iyẹnrẹn esiri na nonẹna kirobo rẹ Jesu tare, e jẹ a kpahenphiyọ enọ ẹne nana:

• Ovuẹ vọ yen e che ghwoghwo?

• Die yen mu avwanre vwo ruiruo nana?

• Ena vọ yen e vwo ruo?

• Mavọ yen iruo aghwoghwo nana cha hẹrabọ te, ji kri te?

Ẹkpahọnphiyọ rẹ enọ nana cha chọn avwanre uko vwo vughe ihwo ri ruiruo nana, ji ru orhiẹn-ebro avwanre gan vwo muomaphiyọ iruo na.—1 Tim. 4:16.

6. Die yen nẹrhẹ omuwẹro nẹ Iseri rẹ Jihova yen ghwoghwo ovuẹ rẹ Jesu tare na?

⁶ Se Luk 4:43. Jesu ghwoghwo “ikun esiri rẹ Uvie” na, ọ je guọnọ nẹ idibo rọyen ru ọtiọyen. Ihwo vọ yen ghwoghwo ovuẹ yena vwẹ “akpọ na ejobi”? Iseri rẹ Jihova ọvo. Ihwo re vwọsua avwanre tobọ je mrẹ ọnana vughe. Kerẹ udje, orherẹn ọvo rọ dia imishọnare da vuẹ Oseri rẹ Jihova ọvo nẹ ọyen dia ẹkuotọ buebun re, ọ je nọ Iseri rẹ Jihova rehẹ ẹkuotọ nana eje kpahen ovuẹ rẹ ayen ghwoghwo. Die yen a kpahen kẹ orherẹn na? Ọ da ta: “Ayen pha gheghẹn, ẹkpahọnphiyọ vuọvo yen ayen vwọ kẹ vwẹ: ‘Iyẹnrẹn esiri rẹ Uvie na.’” Ayen pha “gheghẹn” kakaka-a, ọyena odjephia rẹ oyerinkugbe rayen, kirobo ra guọnọ mie Inenikristi rẹ uyota. (1 Kọr. 1:10) Ayen ta ota rọhẹ ọbe Uwevwin Orhẹrẹ ro Ghwoghwo Uvie ri Jihova. Imagazini nana herọ vwẹ ejajẹ 254, ọvuọvo ra teyanphia joma te oduduru 59. Ọyehẹ imagazini rẹ ihwo me vwo vwẹ akpọ na.

7. Mavọ yen avwanre ru riẹn nẹ ilori rẹ ẹga rẹ efian ghwoghwo ovuẹ rẹ Jesu tare nẹ e ghwoghwo na-a?

 ⁷ Ilori rẹ ẹga rẹ efian ghwoghwo Uvie rẹ Ọghẹnẹ-ẹ. Buebun rayen da tobọ ta ota kpahen Uvie na, ayen reyọ vwo dje iroro yẹrẹ ẹdia rẹ ubiudu rẹ ohwo. (Luk 17:21) Uvie rẹ Ọghẹnẹ ọyen usuon rọhẹ odjuvwu rẹ Jesu Kristi che sun, ro che si ebẹnbẹn rẹ ihworakpọ no vẹ umwemwu rẹ akpọ nana. Ayen sa vwẹ ukẹcha kẹ ihwo vwọ riẹn ọnana-a. (Ẹvwọ. 19:11-21) Ukperẹ ọtiọyen, ayen karophiyọ Jesu vwẹ ọke rẹ Ikrismasi vẹ Ista. Ayen riẹn oborẹ Jesu che ru ọke ro che vwo sun akpọ na-a. Ọ vwọ dianẹ ayen riẹn ovuẹ ro fori nẹ ayen ghwoghwo na-a, ayen je cha sa riẹn ẹwẹn ro mu ayen vwo ruiruo na-a.

8. Die yen iroro ọchọchọ ro mu ohwo vwo ruiruo aghwoghwo na?

⁸ Ẹwẹn vọ yen mu avwanre vwo ruiruo aghwoghwo na? Ọ diẹ fikirẹ igho yẹrẹ iwevwin ride ra cha bọ-ọn. Jesu da vuẹ idibo rọyen: “Ọphẹ ovwan mrẹrẹ, ọphẹ ovwan je vwọ kẹ rhe.” (Mat. 10:8) Ofori nẹ a reyọ Ota rẹ Ọghẹnẹ vwọ guọnọ igho-o. (2 Kọr. 2:17) Ofori nẹ ihwo ri ghwoghwo ota na guọnọ osaẹhwa fikirẹ iruo rẹ ayen ruẹ na-a. (Se Iruo Rẹ Iyinkọn Na 20:33-35.) Dede nẹ a reyọ uchebro nana vwọphia, ishọshi buebun je guọnọ igho kpakpa rere ayen vwo jeshe. Ayen hwosa kẹ ilori rẹ ẹga vẹ ihwo efa buebun re wian kẹ ayen. Ọke buebun, ọnana nẹrhẹ ilori rẹ ẹga nana dia edafe ride.—Ẹvwọ. 17:4, 5. 

9. Mavọ yen Iseri rẹ Jihova vwo djephia nẹ omamọ rẹ ẹwẹn yen mu ayen vwo ruiruo aghwoghwo na?

⁹ Idjerhe vọ yen Iseri rẹ Jihova vwọ mrẹ igho rayen? Womarẹ itetoro ro wonhwo. (2 Kọr. 9:7) E mie arhọghọ vwẹ Eguan Ruvie yẹrẹ eghwẹkoko raye-en. Dedena, vwẹ ukpe ọwanre na, Iseri rẹ Jihova ghwọrọ inọke oduima 1.93 vwo ruiruo aghwoghwo na, kemeranvwe kemeranvwe ayen ji yono ihwo re vrẹ oduduru irhirin ọphẹ. Ọnana gbe ohwo unu, kidie a hwosa kẹ aye-en, igho romobọ rayen ayen vwo ruiruo na vẹ omavwerhovwẹn. Ọshare ọvo ro ruẹ ehiahiẹ ta ota ọvo kpahen iruo rẹ Iseri rẹ Jihova, ọ da ta: “Ọdavwẹ rayen yen iruo aghwoghwo na vẹ eyono. . . . Ayen vwo ilori rẹ ẹga ra hwosa rode vwọ kẹ-ẹ. Ọnana sẹro rẹ igho rẹ ayen vwori.” Kẹ ẹwẹn vọ yen mu avwanre vwo ruiruo nana? Avwanre vwomakpahotọ vwọ kẹ iruo nana, kidie avwanre vwo ẹguọnọ rẹ Jihova vẹ irivẹ avwanre. Ẹwẹn nana ghwe ru orugba rẹ aroẹmrẹ rọhẹ Une Rẹ Ejiro 110:3. (Se.)

ENA VỌ YEN E VWO RUO?

10. Ena vọ yen Jesu vẹ idibo rọyen vwo ghwoghwo?

¹⁰ Ena vọ yen Jesu vẹ idibo rọyen vwo ghwoghwo iyẹnrẹn esiri na? Ayen bru ihwo ra vwẹ kasan kasan ra da sa mrẹ ayen—vwẹ iwevwin rayen vẹ asan efa. Iruo aghwoghwo na ji churobọ si re vwo nẹ uwevwin kpo uwevwin vwọ guọnọ ihwo. (Mat. 10:11; Luk 8:1; Iruo Rẹ Iyinkọn Na 5:42; 20:20) Ona nana nẹrhẹ ota na se te kohwo kohwo.

11, 12. Vwẹ iruo aghwoghwo na, ọrhọ yen ofẹnẹ rẹ ẹgbaẹdavwọn rẹ ẹga rẹ efian vẹ ọ rẹ Iseri rẹ Jihova?

 ¹¹ Die yen ishọshi buebun se ru vwẹ ẹdia nana? Ọke buebun ilori rẹ ẹga na ọvo yen ghwoghwo kẹ ihwo rayen. Jẹ ukperẹ ayen vwọ dia “ihwiyeri rẹ ihwo,” ilori rẹ ẹga na kẹ sẹro rẹ “erin” rẹ ayen mu nure. Vwọrẹ uyota, a sa mrẹ ilori rẹ ẹga evo re vuẹ ihwo rayen nẹ ayen yanran re ghwoghwo. Kerẹ udje, vwẹ ọtonphiyọ rẹ ukpe rẹ 2001, Pope John Paul II da ta vwẹ ọbe ro siri: “Vwẹ ikpe evo rhire na, mi se ovwan abọ buebun kpahen iruo aghwoghwo kpokpọ na. Me je guọnọ rhoma vwanriẹn . . . Ofori nẹ e vwo oruru ọgangan kerẹ Pọl, rọ tare nẹ, ‘Ekan kẹ vwẹ ọ da dianẹ mi ghwoghwo iyẹnrẹn esiri na-a.’” Ọ da je tanẹ iruo nana, “a cha sa siọn kẹ ‘imihwo evo-o’ ẹkẹvuọvo ofori nẹ ọ dia owian rẹ Ihwo rẹ Ọghẹnẹ eje.” Jẹ, bru ihwo yen gueroma kpahen use nana re?

¹² Mavọ yen Iseri rẹ Jihova ru te re? Ayen ọvo yen ghwoghwo nẹ Jesu suẹn kerẹ Ovie rhanvwẹn 1914. Kirobo rẹ Jesu tare, ayen phi iruo aghwoghwo na phiyọ ẹdia rẹsosuọ. (Mak 13:10) Ọbe re se Pillars of Faith—American Congregations and Their Partners da ta: “Iruo aghwoghwo na yen ma ghanre vwọ kẹ Iseri rẹ Jihova.” Ohwo ro si ọbe na vwọ ta ota kpahen oborẹ Oseri rẹ Jihova ọvo tare, ọ da ta: “Ayen vwẹ ukẹcha vwọphia vwẹ ọke rẹ owẹnvwe, ọga vẹ ẹdia ọruvwohwo, . . . ẹkẹvuọvo ayen riẹnre nẹ iruo rẹsosuọ rẹ ayen ruẹ ọyehẹ aghwoghwo rẹ ovuẹ ro shekpahen oba rẹ akpọ na vẹ obo re ru e se vwo sivwin.” Iseri rẹ Jihova reyọ ena rẹ Jesu vẹ idibo rọyen vwo ruiruo, vwo ghwoghwo ovuẹ yena ọkieje.

13. Mavọ yen iruo aghwoghwo na cha hẹrabọ te?

¹³ Jesu djisẹ rẹ oborẹ iruo aghwoghwo na cha hẹrabọ te rọ vwọ tanẹ e che ghwoghwo iyẹnrẹn esiri na “wan akpọ na ejobi.” (Mat. 24:14) Ayen che ghwoghwo kẹ “ihwo rẹ akpọ na ejobi.” (Mat. 28:19, 20) Ọnana iruo rẹ akpọneje.

14, 15. Die yen djerephia nẹ Iseri rẹ Jihova yen ru orugba rẹ aroẹmrẹ rẹ Jesu ro shekpahen oborẹ iruo aghwoghwo na hẹrabọ te? (Ni ihoho rẹsosuọ na.)

¹⁴ E jẹ e roro kpahen erọnvwọn evo re cha chọn avwanre uko vwo vwo ẹruọ rẹ oborẹ Iseri rẹ Jihova ru orugba rẹ aroẹmrẹ rẹ Jesu na ro shekpahen oborẹ iruo aghwoghwo na cha hẹrabọ te. Omarẹ ilori rẹ ẹga 600,000 yehẹ evunrẹ ẹga sansan vwẹ United States, Iseri rẹ Jihova rehẹ ẹkuotọ na te omarẹ 1,200,000. Vwẹ akpọneje, emerha yen irherẹn rẹ ẹga rẹ Ifada vwọ vrẹ 400,000. Gbe roro kpahen uchunu rẹ Iseri rẹ Jihova  ri ghwoghwo Uvie na. Vwẹ akpọneje, ighwoghwota re vrẹ oduduru ẹrenren yen vwomakpahotọ rẹ ayen vwo ghwoghwo ota vwẹ ibrotọ ri te 240. Ọ diẹ ọmọrhiẹ owian ayen wia-an, ọ ghwa urinrin vẹ ujiri vwo rhe Jihova!—Une 34:1; 51:15.

¹⁵ Iseri rẹ Jihova guọnọ ghwoghwo iyẹnrẹn esiri na kẹ kohwo kohwo bẹsiẹ oba na vwo te. Ọtiọyena, a mrẹ vwo dje owian rẹ efanfan vẹ ẹbe-ẹteyọn rẹ avwanre ruẹ-ẹ. Avwanre ghare iduduru rẹ ẹbe, imagazini, itrati, ọmọbe re vwo durhie ihwo kpo eghwẹkoko vẹ Ẹkarophiyọ na, ọphẹ. Ẹbe avwanre herọ vwẹ ejajẹ re vrẹ 700. A teyen New World Translation of the Holy Scriptures na vrẹ oduduru 200 vwẹ ejajẹ re vrẹ 130 re. Vwẹ ukpe rọ wanre na, avwanre teyen ẹbe ri te omarẹ oduima 4 gbe ubro. A sa mrẹ ovuẹ vwẹ ejajẹ re vrẹ 750 vwẹ wẹbsaiti avwanre. O vwo ẹko rẹ ihwo efa ri ruiruo nana?

16. Mavọ yen avwanre ru riẹn nẹ Iseri rẹ Jihova vwo ẹwẹn ọfuanfon rẹ Ọghẹnẹ?

¹⁶ Mavọ yen iruo aghwoghwo na che kri te? Jesu tare nẹ e che ruiruo nana tobọ vwẹ ẹdẹ re koba na, tavwen “oba na ki rhi te.” Ẹga ọfa vọ yen ruiruo aghwoghwo na vwẹ ọke rẹ oba nana? Ihwo evo rẹ avwanre mrẹ vwẹ iruo aghwoghwo na sa tanẹ, “Avwanre vwo ẹwẹn ọfuanfon na, jẹ ovwan yen ruiruo na.” Ẹkẹvuọvo, iruo aghwoghwo rẹ avwanre ruẹ ọkieje na rhe djephia nẹ avwanre vwo ẹwẹn ọfuanfon na? (Iruo Rẹ Iyinkọn Na 1:8; 1 Pita 4:14) Vwẹ ọke sansan, ẹga efa davwan sẹ ayen se ru oborẹ Iseri rẹ Jihova ruẹ, ẹkẹvuọvo ayen se ruo-o. Evo ri se oma rayen imishọnare ruiruo na vwẹ ọmọke krẹn, ayen mi rhivwin kpo re ruiruo romobọ rayen. Efa ghwoghwo nẹ uwevwin kpo uwevwin, jẹ die yen ayen ghwoghwo? Ẹkpahọnphiyọ rẹ onọ yena cha nẹrhẹ wọ riẹn nẹ ọ diẹ oborẹ Jesu tare yen ayen ghwoghwo-o.

17, 18. (a) Die yen kẹ avwanre imuẹro nẹ Iseri rẹ Jihova yen ghwoghwo iyẹnrẹn esiri rẹ Uvie na nonẹna? (b) Die yen chọn avwanre uko vwo ruiruo na?

¹⁷ Ọtiọyena, amono yen ghini ghwoghwo iyẹnrẹn esiri rẹ Uvie na nonẹna? Vẹ imuẹro ọgangan, avwanre sa tanẹ, “Iseri rẹ Jihova!” Diesorọ o vwo mu avwanre ẹro? Kidie avwanre yen ghwoghwo obọdẹn rẹ ovuẹ na, rọ dia iyẹnrẹn esiri rẹ Uvie na. Avwanre ji bru ihwo na ra, rọ dia ona ra je guọnọ. Omamọ rẹ ẹwẹn yen mu avwanre vwo ruiruo aghwoghwo na—ẹguọnọ, ọ dia igho-o. Iruo avwanre na yen ma hẹrabọ, kidie e ghwoghwo ota kẹ ihwo rehẹ ẹgborho ejobi vẹ ejajẹ ejobi. Oma cha rhọ avwanre-e, nẹ ukpe fiẹ ukpe, ọyen avwanre che vwo ruiruo nana bẹsiẹ oba na vwo te.

¹⁸ Vwẹ ọke nana rẹ avwanre de yerẹn na, iruo rẹ ihwo rẹ Ọghẹnẹ ruẹ asaọkiephana gbe avwanre unu mamọ. Mavọ yen avwanre se vwo ru enana eje? Ọyinkọn Pọl da kpahenphiyọ onọ yena, vwẹ ileta ro si rhe ihwo rẹ Filipae: “Kidie Ọghẹnẹ ri ruẹ iruo vwẹ evun rẹ ovwan, ọye re rhọvwa nẹ we ru iruo fiki rẹ erhuvwu rọye.” (Fil. 2:13) E jẹ Ọsẹ rẹ avwanre kẹ avwanre ẹgba vwo ruiruo aghwoghwo na yoyovwin, gbagba.—2 Tim. 4:5.