1, 2 Yesuusi yootido, Maatiyoosa 24:14n deˈiya azazoy ayba oyshay denddanaadan oottii?

ASAY nuuni yootiyoobaa maayiyaaba gidin woy keehi eqettiyaaba gidinkka, Yihoowa Markkati sabbakiyoogan erettidaageeta gidiyoogaa kashi giya uri baawa. Neeni haggaaziyo wode, nuuni ammaniyoobaa maayana xayikkonne nu oottiyo oosuwaa gaasuwan nuna bonchiyoogaa yootiya asatuura gayttennan aggakka. Nuuni eriyoogaadan, Kawotettaabaa mishiraachoy saˈa ubban odettanaagaa Yesuusi kasetidi yootiis. (Maa. 24:14) SHin nuuni oottiyo oosoy Yesuusi yootido hiraagaa polo gidiyoogaa aybin eriyoo? Ha oosuwaa oottiyaageeti nuna giyoogee coo ceeqettiyoobee?

² Daro haymaanooteti Wonggeliyaa woykko mishiraachuwaa yootiyaabadan qoppoosona. Gidoppe attin, eti banttabaa markkattiyoogaappe, woosa keettan oottiyoogaappe, woy televizhiiniyaa woy Intternneetiyaa malaban yootiyoogaappe harabaa oottokkona. Harati qassi eti asaa maaddiyoogaa woy akkamuwaaranne timirttiyaara gayttidaban oottiyoobaa yootoosona.  Ha asati yootiyoobay Yesuusi bana kaalliyaageeti oottanaadan yootidobaara gayttiyaabee?

3. Maatiyoosa 28:19, 20y yootiyoogaadan Yesuusa kaalliyaageeti oottana koshshiyo oyddubay aybee?

³ Yesuusa kaalliyaageeti asay etakko yaanaadan naagana koshshii? CHii, koshshenna. Yesuusi hayquwaappe denddidi, bana kaalliya xeetan qoodettiyaageetussi, “Hegaa gishshau, intte biidi, asa ubbaa tana kaalliyaageeta oottite; . . .  eta xammaqite. Taani inttena azazidobaa ubbaa eti naagana mala, eta tamaarissite” yaagiis. (Maa. 28:19, 20) Oyddubaa oottana koshshiyoogaa i yootiis. Nuuni asaa a kaalliyaageeta oottana, eta xammaqananne tamaarissana bessees, shin oottana koshshiya koyroogee aybee? Yesuusi, ‘Biite’ yaagiis. He azazuwaa xeelliyaagan issi eranchay, “Ogiyaara gidin, abbaa bollaara gidin ‘biyoogee’ ammaniya asay ubbay oottiyooba” yaagiis.—Maa. 10:7; Luq. 10:3.

4. ‘Asa oyqqiyaageeta’ gidiyoogaa giyoogee woygiyoogee?

⁴ Yesuusi bana kaalliyaageeti huuphiyan huuphiyan oottanabaa yootideeyye hashetidi mishiraachuwaa odanaagaa yootidee? Issi uri “asa ubbaa” haasayissanawu baana danddayenna gishshawu, ha oosoy daroti hashetidi oottana koshshiyaaba. Yesuusi bana kaalliyaageeti ‘asa oyqqiyaageeta’ gidanaadan shoobbido wode hegaadan oottana koshshiyoogaa qonccissiis. (Maatiyoosa 4:18-22 nabbaba.) I he wode yootido moliyaa ohettay issi uri issi moliyaa piriyan oyqqiyo ohettaa gidenna. He ohettay issi issitoo daro asay issippe hashetidi minni oottana koshshiyo, gitiyaa yeggidi moliyaa oyqqiyo ohettaa.—Luq. 5:1-11.

5. Nuuni zaaruwaa erana koshshiyo oyddu oyshati awugeetee, qassi aybissi?

⁵ Yesuusi yootido hiraagay polettanaadan ha wodiyan mishiraachuwaa yootiyaageeti oonakko eranawu nuuni ha oyddu oyshata zaarana koshshees:

• Yootana koshshiyoobay aybee?

• Nuna he oosuwawu aybi denttettana koshshii?

• Ayba ogetun odettana koshshii?

• Ha sabbakiyo oosoy ay keena sohuwan, qassi woqqu wodiyawu odettana koshshii?

Ha oyshatu zaaroy ha oosuwaa oottiyaageeti oonakko eranaadan xalla gidennan, he oosuwaa aggennan minni oottanawu yaa murttanaadan nuna maaddees.—1 Xim. 4:16.

6. Yihoowa Markkati yootana bessiyo mishiraachuwaa yootiyoogaa neeni ammanettiyoy aybissee?

⁶ Luqaasa 4:43 nabbaba. Yesuusi “Xoossaa kawotettaa wonggeliyaa mishiraachchuwaa” yootiis; qassi ba erissiyo ashkkaratikka hegaadan oottanaadan koyees. He mishiraachuwaa “asa ubbau” yootiyaageeti oonee? Yihoowa Markkatu xalla gidiyoogee qoncce. Nuna ixxiya issi issi asatikka hegaa kashi gookkona. Leemisuwawu, issi qeesee dumma dumma biittan deˈidoogaanne Yihoowa Markkati sabbakiyoobay aybakko he biittatu ubban eta oychidoogaa issi ishawu yootiis. Eti ayyo woygi zaaridonaa? He qeesee, “Eti ubbay eeyya; ‘Xoossaa Kawotettaa mishiraachuwaa’ giidi issi malabaa zaaridosona” yaagiis. SHin Yihoowa Markkati “eeyya” gidokkona; tumu Kiristtaanetuppe koyettiyaagaadan he ishantti issi malabaa haasayidosona. (1 Qor. 1:10) Eti Yihoowa Kawotettaa Erissiya Wochiyo Keelaa maxeetiyan deˈiyaagaa mala qofaa yootidosona. Ha maxeetee 254 qaalan aginan aginan 59 miiloone gidiyaagee attamettees; he qooday  alamiyan attamettiya hara ay maxeetiyaagaappekka darees.

7. Kiristtaane giyo haymaanooteta kaalettiyaageeti yootana bessiyaabaa odennaagaa waati eriyoo?

⁷ Kiristtaane giyo haymaanooteta kaalettiyaageeti Xoossaa Kawotettaabaa yootokkona. Eti Xoossaa Kawotettaabaa yootiyaakkokka, daroti hegaa issi Kiristtaaniyaa wozanan deˈiyaabadan qoppoosona. (Luq. 17:21) Eti Xoossaa Kawotettay Yesuus Kiristtoosi haariyo saluwan deˈiya ayso gidiyoogaa, asaa naatu meto ubbaa qaariyaaba gidiyoogaanne iitatetta ubbaa mata wode ha saˈaappe xayssiyaaba gidiyoogaa asawu yootokkona. (Ajj. 19:11-21) Yaatiyoogaappe, eti ufayssa masqqalaanne Paasikaa baalaa bonchiyo wode xallan Yesuusa hassayoosona. Yesuusi saˈaa Haariyaagaa gididi mata wode oottanabaa eti eriyaaba milatokkona. Eti yootana koshshiyaabaa erenna gishshawu, ha oosuwaa oottanawu denttettana bessiyaabay aybakko erennaagee garamissiyaabee?

8. Mishiraachuwaa aybi denttettin yootana bessennee?

⁸ Nuuni mishiraachuwaa yootiyo gaasoy ayba gidana koshshii? Miishshaa shiishshanaassanne keehi maalaaliya keettaa keexxanaassa gidana bessenna. Yesuusi ba erissiyo ashkkarata, “Intte coo ekkideta; coo immite” yaagiis. (Maa. 10:8) Xoossaa Qaalay zalˈˈana bessennaba. (2 Qor. 2:17) Mishiraachuwaa yootiyaageeti oottiyooban banttawu miishsha demmanawu koyana bessenna. (Oosuwaa 20:33-35 nabbaba.) Ha qoncce azazoy deˈishin, daro woosa keettati waanna oosuwaa aggidi miishshaa shiishshoosonanne miishsha demmiyoobaa oottoosona. Damoozaa ekkiya qeesetussinne hara daro oosanchatussi eti miishshaa qanxxana koshshees. Kiristtaane giyo haymaanootiyaa asttamaareti daroti keehi duretidosona.—Ajj. 17:4, 5.

9. Yihoowa Markkati mishiraachuwaa yootanaadan banttana denttettiyaabay suureba gidiyoogaa waatidi bessidonaa?

⁹ Miishshaa shiishshiyoogaara gayttidaagan Yihoowa Markkatu taarikee ay qonccissii? Eta oosoy oosettiyoy asay ba dosan immiyo miishshaana. (2 Qor. 9:7) Eti bantta Kawotettaa Addaraashan woy gita shiiqotun muxuwaata shiishshokkona. SHin zillaytta xallan Yihoowa Markkati 1.93 biiloone saate gidiya wodiyan asawu mishiraachuwaa yootidosonanne aginan agina uddufun miilooneppe dariya asaa miishsha qanxxissennan Geeshsha Maxaafaa xannaˈissidosona. Eti bantta oosuwawu miishsha ekkennaagaa xalla gidennan, banttawu koshshiyaabawu ufayssan bantta miishshaa kessoosona. Yihoowa Markkatu oosuwaabaa xannaˈida issi eranchay hagaadan giis: “Etawu waanna halchoy sabbakiyoogaanne tamaarissiyoogaa. . . . Daro miishshaa kesissiya haymaanoote asttamaaree eta giddon baawa.” He oosuwaa oottanaadan denttettiyaabay ayba gidana koshshii? Nuuni he oosuwaa nu dosan oottiyo gaasoy, Yihoowanne nu shooruwaa siiqiyo gishshataassa. Hegaadan eeno giidi oottiyoogee Mazamure 110:3n deˈiya hiraagay polettiyoogaa bessees. (Nabbaba.)

10. Yesuusinne i erissiyo ashkkarati ayba ogetun mishiraachuwaa yootidonaa?

¹⁰ Yesuusinne i erissiyo ashkkarati mishiraachuwaa ayba ogetun yootidonaa? Eti asay deˈiyoosaa awanne biidi leemisuwawu, ogiyaaninne giyan sabbakidosona. Eti sooppe soo biyoogankka, mishiraachuwaa siyiya asaa koyidosona. (Maa. 10:11; Luq. 8:1; Oos. 5:42; 20:20) Hegaadan oottiyoogee  asa asappe shaakkennaagaa bessiyaaba.

11, 12. Mishiraachuwaa yootiyoogaa xeelliyaagan Kiristtaane giyo haymaanootetu oosuwaa Yihoowa asaagaara geeddarssa.

¹¹ Hegaara gayttidaagan Kiristtaane giyo haymaanootetu hanotay ay bessii? Daro baggan, woosa keettatu yameti sabbakiyoogaa damoozan tamaarissiyaageetu oosodan xeelloosona. Kiristtaane giyo haymaanootetu asttamaareta qofissiyaabay mole oyqqiyoogaadan ‘asa oyqqiyoogaa’ gidennan, oyqqido “moliyaa” naagiyoogaa. Haymaanootiyaa kaalettiya amaridaageeti issi issitoo asay sabbakanaadan guuttaa denttettana danddayoosona. Leemisuwawu, PHaaphaasee Jon Pol naaˈˈanttoy 2001 doomettan xaafido dabddaabbiyan hagaadan giis: “Amarida layttawu ooratta sibikatiyaabaa darotoo haasayaas. Haˈˈikka hegaadan gays . . . Nuuni, ‘Wonggeliyaa sabbakana xayikko tawu aayyeˈana’ giida PHawuloosaagaadan ammanuwawu zaarettidi mishettana bessees.” PHaaphaasee hegaa bolli gujjidi, ha oosoy “amarida ‘eranchatussi’ aggiigiyooba gidennan, Xoossaa asaa ubbaa aawatetta gidana” bessiyoogaa yootiis. SHin i giidobaa woqqu asay oottidee?

¹² Yihoowa Markkatu taarikee ay bessii? Yesuusi 1914ppe doommidi Kawo gididi haariyoogaa yootiyaageeti eta xalaala. Yesuusi azazidoogaadan mishiraachuwaa yootiyoogaa eti aybippenne kaseyoosona. (Mar. 13:10) Pilars of Feyz—Amerikan Kongrigeeshins end Zeyr Partners giyo maxaafay, “Yihoowa Markkati hara aybippenne aaruwan misoonaawe oosuwaabaa qoppoosona” yaagiis. Issi ishay yootidobaa xeelliyaagan he maxaafaa xaafidaagee hagaadan giis: “Eti namisettiya, boorasiyaanne sahettiya ura demmiyo wode maaddanawu koyoosona, . . . shin banttawu waanna oosoy alamiyaa xayoy matattidoogaanne atotettay keehi koshshiyoogaa yootiyoogaa gidiyoogaa mule dogokkona.” Yihoowa Markkati Yesuusinne i erissiyo ashkkarati yootido ogetun he mishiraachuwaa yootiiddi deˈoosona.

13. Mishiraachoy ay keena sohuwan odettana bessii?

¹³ Yesuusi mishiraachoy “sa7a ubban” sabbakettanaagaa yootiis. (Maa. 24:14) Yesuusa kaalliyaageeti “asa ubbaa” erissiyo ashkkara oottanaadan azazettidosona. (Maa. 28:19, 20) Hegee kumetta saˈan oottana bessiyo ooso.

14, 15. Mishiraachoy ay keena sohuwan odettanaakko Yesuusi kaseti odidobaa Yihoowa Markkati poliiddi deˈiyoogaa bessiyaabay aybee? (Doomettan deˈiya misiliyaa xeella.)

¹⁴ Mishiraachoy ay keena sohuwan odettanaakko Yesuusi kaseti odidobaa Yihoowa Markkati waati polidaakko akeekanawu, ane kaallidi deˈiya qofaa beˈoos. Amarkkan Kiristtaane giyo dumma dumma ammanuwan 600,000 gidiya asttamaareti deˈoosona; shin he biittan 1,200,000 gidiya Yihoowa Markkati deˈoosona. Qassi kumetta  saˈan Rooma Kaatolike Woosa keettan 400,000ppe guuttaa dariya qeeseti deˈoosona. Kawotettaa mishiraachuwaa yootiya Yihoowa Markkatu qoodaakka ane qoppa. Kumetta saˈan 240 biittan, bantta dosan sabbakiya hosppun miiloone gidiya Yihoowa Markkati deˈoosona. Hegee Yihooway sabettanaadaaninne bonchettanaadan oottiya maalaalissiya ooso!—Maz. 34:1; 51:15.

¹⁵ Nuuni Yihoowa Markkati wurssettay yaanaappe kase, daro asawu mishiraachuwaa yootana koyoos. Hegaa gishshawu, Geeshsha Maxaafaa qofay deˈiyo xuufeta birshshoosinne attamoos. Miilooniyan qoodettiya maxaafata, maxeeteta, traktteta, qassi gita shiiquwawunne Godaa Kahuwawu asaa shoobbiyo woraqataa miishshaa qanxxissennan asawu immoos. Nuuni 700ppe dariya qaalan dumma dumma xuufeta giigissoos. Qassi 200 miilooneppe dariya, Ooratta Alamiyaa Geeshsha Maxaafaa Birshshettay 130ppe dariya qaalan attamettiis. Zillaytta xallan, 4.5 biiloone gidiya xuufiyaa attamissida. Nu weybsaytiyan 750ppe dariya qaalan giigida qofay deˈees. Hegaa mala maalaalissiya oosuwaa oottiyay Yihoowa Markkatu xalla.

16. Yihoowa Markkatussi Xoossay ayyaanay deˈiyoogaa waati eriyoo?

¹⁶ Mishiraachoy ay keena wodiyawu odettana bessii? Kumetta saˈan oottiyo ha oosoy wurssetta gallassatu ubban oosettin, hegaappe guyyiyan ‘wurssettay gakkanaagaa’ Yesuusi yootiis. (Maa. 24:14) Mishiraachuwaa yootiyoogaara gayttidaagan hara haymaanooteti ha wurssetta gallassatun ay oottiyoonaa? Nuuni haggaazuwan demmiyo issi issi asati, “Geeshsha ayyaanay nuussi imettiis; shin oosuwaa oottiyay inttena” gaana danddayoosona. SHin nuuni he oosuwan gencciyoogeekka nuussi Xoossaa ayyaanay deˈiyoogaa bessiyaaba gidennee? (Oos. 1:8; 1 PHe. 4:14) Yihoowa Markkati ubba wode oottiyoogaadan, amarida haymaanootetikka issi issitoo oottanawu maloosona; shin hegee darotoo etawu hanenna. Issoti issoti amarida wodiyawu misoonaawe gididi oottanawu malidi, bantta oosuwawu simmi aggoosona. Harati qassi sooppe soo biidi sabbakanawu malana danddayoosona; shin ay sabbakiyoonaa? Ha oyshaa zaaroy, eti Kiristtoosi doommido oosuwaa oottiiddi deˈennaagaa bessees.

17, 18. (a) Ha wodiyan Kawotettaa mishiraachuwaa yootiyaageeti Yihoowa Markkata giyoy aybissee? (b) Nuuni ha oosuwaa ubba wode waanidi oottana danddayiyoo?

¹⁷ Yaatin, ha wodiyan Kawotettaa mishiraachuwaa yootiyaageeti tumu oonee? “Yihoowa Markkata” gidiyoogee qoncce! Nuuni hegaadan giyoy aybissee? Yootana bessiyaabaa, hegeekka Kawotettaa mishiraachuwaa yootoos. Qassi nuuni asaakko biyoogan, oottana bessiya ogiyan oottoos. Nuuni bessiyaabay denttettin, hegeekka miishshaa demmanawu gidennan, siiqoy denttettin sabbakoos. Kumetta saˈan, ubba biittan deˈiyaanne dumma dumma qaalaa haasayiya asawu yootoos. Nuuni ha oosuwaa wurssettay gakkanaashin aggennan ubba wode oottoos.

¹⁸ Ha ufayssiya wodiyan Xoossa asay oottiiddi deˈiyooban tumuppe maalaalettoos. SHin nuuni mishiraachuwaa kumetta alamiyan waanidi yootana danddayiyoo? Kiitettida PHawuloosi Piliphisiyuusa gubaaˈiyawu xaafido dabddaabbiyan, “Xoossai inttena bau eeno giissanaadaaninne qassi i qoppidobaa intte oottanaadan intte giddon ubba wode oottees” yaagidi qonccissiis. (Pili. 2:13) Nuuni ubbay nuussi danddayettida keenaa loytti haggaazanawu baaxetiyo wode, saluwan deˈiya nu Aaway nuuyyo wolqqaa immo.—2 Xim. 4:5.