1, 2. Ano nga mga pakiana an nabangon tungod han ginsiring ni Jesus ha Mateo 24:14?

NAUYON man o nakontra ha aton an mga tawo, gutiay la an makakagnigar nga sugad nga grupo, an mga Saksi ni Jehova kilala gud ha pagsangyaw nga buruhaton. Bangin may nakaistorya pa ngani kita ha ministeryo nga diri nauyon ha aton mga gintotoohan, pero nasiring nga gintatahod kita nira tungod han aton buruhaton. Maaram kita nga igintagna ni Jesus nga an maopay nga sumat han Ginhadian igsasangyaw ha bug-os nga inuukyan nga tuna. (Mat. 24:14) Pero paonan-o kita nahibaro nga an aton buruhaton katumanan han tagna ni Jesus? Nagpapahitaas ba kita ha paghunahuna nga kita an naghihimo hito nga buruhaton?

² Damu nga grupo hin relihiyon an nag-aangkon nga nagsasangyaw hira han Ebanghelyo, o maopay nga sumat. Pero agsob nga ginhihimo  nira ito pinaagi la hin kalugaringon nga mga testimonya, mga wali ha singbahan, o mga programa nga iginbubrodkast ha media—ha telebisyon man o ha Internet. Ginbubuhat liwat ito han iba pinaagi ha paghatag hin mga donasyon ha mga nanginginahanglan o pagbulig ha mga tawo pinaagi ha pagtagana hin medikal nga serbisyo ngan mga programa ha edukasyon. Sugad ba hito an paagi han pagsangyaw nga iginsugo ni Jesus ha iya mga disipulo?

3. Sumala ha Mateo 28:19, 20, ano an upat nga butang nga kinahanglan buhaton han mga sumurunod ni Jesus?

³ Waray la ba bubuhaton an mga disipulo ni Jesus; maghuhulat la ba hira nga may dumaop ha ira? Diri gud! Katapos banhawon hi Jesus, ginsidngan niya an iya ginatos nga disipulo: “Kadto kamo ha mga tawo han ngatanan nga nasud ngan tutdui hira basi magin akon mga disipulo, bawtismuhi hira . . . , tutdui hira ha pagtuman han ngatanan nga akon iginsugo ha iyo.” (Mat. 28:19, 20) Salit may upat nga butang nga kinahanglan buhaton. Kinahanglan naton tutdoan an mga tawo basi hira magin mga disipulo, bawtismohan hira, ngan tutdoan hira ha pagtuman han mga sugo, pero ano an siyahan nga sadang naton himoon? Hi Jesus nagsiring: “Kadto kamo”! May kalabotan hini nga sugo, usa nga eskolar han Biblia an nagsiring nga an pulong nga “kadto kamo” usa nga toka para ha ngatanan nga tumuroo, hirani man ito o hirayo.—Mat. 10:7; Luc. 10:3.

4. Ano an nahiuupod ha pagin “parapangisda hin mga tawo”?

⁴ Naghihisgot ba hi Jesus hin indibiduwal la nga pangalimbasog han iya mga sumurunod, o hin usa nga organisado nga pagsangyaw han maopay nga sumat? An usa nga indibiduwal diri makakasangyaw ha “ngatanan nga nasud,” salit ini nga buruhaton kinahanglan himoon han damu nga tawo ha organisado nga paagi. Matin-aw nga iginpakita ito ni Jesus han gin-aghat niya an iya mga disipulo nga magin “parapangisda hin mga tawo.” (Basaha an Mateo 4:18-22.) An gintutudlok dinhi ni Jesus nga paagi hin pagpangisda diri an pangawil, nga an parapangisda nagliliningkod la ngan naghuhulat nga may sumibad. Lugod, ito an paggamit hin pukot—usa nga mabug-at nga trabaho nga nagkikinahanglan hin urosa nga pangalimbasog han damu nga indibiduwal.—Luc. 5:1-11.

5. Ano an upat nga pakiana nga kinahanglan mabaton, ngan kay ano?

⁵ Basi hibaroan kon hin-o yana an nagsasangyaw han maopay nga sumat sugad nga katumanan han tagna ni Jesus, kinahanglan naton mabaton inin upat nga pakiana:

• Ano an mensahe nga sadang isangyaw?

• Ano an sadang naton magin motibo ha pagsangyaw?

• Ano an mga pamaagi nga sadang gamiton?

• Mationan-o kahaluag ngan kaiha an pagsangyaw nga buruhaton?

An baton hini nga mga pakiana diri la mabulig ha aton nga hibaroan kon hin-o an nagbubuhat hinin buruhaton nga nagtatalwas han kinabuhi kondi magpaparig-on liwat ha aton nga padayon nga buhaton ini nga toka.—1 Tim. 4:16.

6. Kay ano nga sigurado ka nga an mga Saksi ni Jehova an nagsasangyaw han husto nga mensahe?

⁶ Basaha an Lucas 4:43. Iginsangyaw ni Jesus an “maopay nga sumat han Ginhadian,” salit naglalaom hiya nga ito liwat an bubuhaton han iya mga disipulo. Ano nga grupo hin mga tawo an nagsasangyaw hito nga mensahe ha “ngatanan nga nasud”? Matin-aw an baton—an mga Saksi ni Jehova gud la! Bisan an iba nga parakontra nauyon hini. Pananglitan, may padi nga misyonero nga nagsiring ha usa nga Saksi nga nadestino hiya ha iba-ba nga nasud ngan ha kada nasud nga iya nakakadtoan napakiana hiya ha mga Saksi kon ano an ira iginsasangyaw. Ano an baton ha iya? An padi nagsiring: “Makatatawa kay usa la an ira baton: ‘An maopay nga sumat han  Ginhadian.’” Pero diri ito “makatatawa” kay iginpapakita hito nga an mga Saksi nagkakaurosa ha ira iginsasangyaw, nga amo an sadang buhaton han tinuod nga mga Kristiano. (1 Cor. 1:10) Ngan ira iginsusumat an mensahe ha An Barantayan Nagsasamwak han Ginhadian ni Jehova. Ini nga magasin mababasa ha 254 nga linggwahe ngan gin-iimprinta an kada isyu ha aberids nga haros 59 ka milyon nga kopya, salit ini an pinakadamu nga naipapanaltag nga magasin ha bug-os nga kalibotan.

7. Paonan-o kita nahibaro nga an mga klero han Kakristianohan diri nagsasangyaw han husto nga mensahe?

⁷ An mga klero han Kakristianohan diri nagsasangyaw han Ginhadian han Dios. Kon gin-uunabi man nira an mahitungod han Ginhadian, ginhuhulagway ito han damu sugad nga pag-abat o kahimtang han kasingkasing han usa nga Kristiano. (Luc. 17:21) Diri nira ginbubuligan an mga tawo nga masabtan nga an Ginhadian han Dios usa nga gobyerno ha langit diin hi Jesu-Kristo an Magmarando, nga ito an solusyon han ngatanan nga problema han mga tawo, ngan diri mag-iiha wawad-on hito an ngatanan nga karaotan ha tuna. (Pah. 19:11-21) Lugod, karuyag nira nga hinumdoman hi Jesus durante han Pasko ngan Easter. Baga hin waray hira ideya kon ano an bubuhaton ni Jesus sugad nga bag-o nga Magmarando ha tuna. Tungod kay diri hira maaram han mensahe nga angay unta nira isangyaw, diri urusahon nga diri liwat hira maaram han sadang magin motibo ha pagbuhat hini nga toka.

8. Ano an sayop nga motibo ha pagsangyaw?

⁸ Ano an sadang magin motibo ha pagsangyaw? Diri ito an pangulekta hin kwarta ngan pagtukod hin magarbo nga mga pasilidad. Hi Jesus nagsiring ha iya mga disipulo: “Ginkarawat niyo nga waray bayad, ihatag nga waray bayad.” (Mat. 10:8) An Pulong han Dios diri sadang himoon nga negosyo. (2 Cor. 2:17) Adton nagsasangyaw diri sadang magbuhat hini basi makaganansya. (Basaha an Buhat 20:33-35.) Bisan pa hini nga matin-aw nga giya, kadam-an han relihiyon an nakapokus ha pangulekta hin kwarta o ha pangalimbasog nga masuportaran an ira pinansyal nga panginahanglan. Kinahanglan nira sweldohan an mga klero ngan an damu nga empleyado. Kasagaran nga an mga lider han Kakristianohan nakakatirok hin damu nga bahandi.—Pah. 17:4, 5.

9. Paonan-o iginpapakita han mga Saksi ni Jehova nga husto an ira motibo ha pagsangyaw?

⁹ May kalabotan ha pangulekta hin kwarta, ano an ginbubuhat han mga Saksi ni Jehova? An ira buruhaton ginsusuportaran pinaagi hin boluntaryo nga donasyon. (2 Cor. 9:7) Waray pangulekta nga ginhihimo ha ira mga Kingdom Hall o kombensyon. Bisan pa hito, han naglabay la nga tuig, an mga Saksi ni Jehova naggahin hin 1.93 ka bilyon nga oras ha pagsangyaw han maopay nga sumat ngan ha pagdumara hin libre nga pag-aram ha Biblia ha sobra siyam ka milyon nga tawo kada bulan. Makatirigamnan gud kay labot la nga ginbubuhat nira ito nga waray sweldo, malipayon liwat hira ha pagbuhat hito ha ira kalugaringon nga gastos. May kalabotan ha buruhaton han mga Saksi ni Jehova, usa nga parasaliksik an nagsiring: “An [ira] tumong amo an pagsangyaw ngan pagtutdo. . . . Waray [hira] mga klero salit gutiay gud la an gastos.” Kon sugad, ano an aton motibo ha pagbuhat hini nga toka? Kinaburut-on nga ginbubuhat naton ini tungod kay hinigugma naton hi Jehova ngan an aton igkasi-tawo. Ini nga kinaburut-on nga pagbuhat katumanan han tagna ha Salmo 110:3. (Basaha.)

10. Ano an mga pamaagi ha pagsangyaw nga gin-gamit ni Jesus ngan han iya mga disipulo?

¹⁰ Ano an mga pamaagi nga gin-gamit ni Jesus ngan han iya mga disipulo ha pagsangyaw han maopay nga sumat? Kinadto hira ha bisan diin nga may mga tawo, ha publiko nga mga lugar  ngan ha balay-balay. An ira pagsangyaw nag-uupod ha pamiling hin mga tawo nga takos ha kada balay. (Mat. 10:11; Luc. 8:1; Buh. 5:42; 20:20) Inin organisado nga paagi han pagsangyaw nagpakita nga waray hira ginpapaurog.

11, 12. May kalabotan ha pagsangyaw han maopay nga sumat, ano an kaibahan han Kakristianohan ha mga Saksi ni Jehova?

¹¹ Ito ba liwat an paagi han pagsangyaw han mga relihiyon han Kakristianohan? Kasagaran nga kontento na an mga membro han singbahan nga itapod an pagsangyaw ha sweldado nga mga klero. Pero imbes nga magin “parapangisda hin mga tawo,” baga hin mas interesado an mga klero nga tipigan an “isda” nga aada na ha ira. Oo, usahay may mga klero nga bangin nangangalimbasog ha pag-aghat hin iba nga paagi han pag-ebanghelyo. Pananglitan, temprano han 2001, hi Pope John Paul II nagsurat: “Ha sulod hin mga tuig, agsob ko uroutruhon an panawagan para han bag-o nga pag-ebanghelyo. Nananawagan ako utro yana . . . Kinahanglan naton subaron an duro nga kadasig ni Pablo, nga nagsiring: ‘Kairo ko kon diri ko ipasamwak an Ebanghelyo.’” Katapos, an papa nagsiring nga ini nga misyon “diri puydi itapod ha grupo hin ‘mga eksperto’ kondi responsabilidad ini han ngatanan nga membro han Katawohan han Dios.” Damu ba an sumugot hini nga panawagan?

¹² Kumusta man an mga Saksi ni Jehova? Hira la an nagsasangyaw nga hi Jesus nagmamando na sugad nga Hadi tikang han 1914. Uyon han sugo ni Jesus, prayoridad gud nira an pagsangyaw nga buruhaton. (Mar. 13:10) An libro nga Pillars of Faith—American Congregations and Their Partners nagsiring: “Para ha mga Saksi ni Jehova, an pagsangyaw an pinakaimportante nga buruhaton.” Ha pagkotar han ginsiring han usa nga Saksi, an awtor nagpadayon: “Kon may nakikita hira nga nagugutom, nasusubo, ngan may sakit, nangangalimbasog hira ha pagbulig, . . . pero diri nira nahingangalimtan nga an ira nangunguna nga buruhaton amo an pagpasamwak han espirituwal nga mensahe mahitungod han tiarabot nga kataposan han kalibotan ngan han kinahanglan buhaton basi maluwas.” Padayon nga iginpapasamwak han mga Saksi ni Jehova ito nga mensahe gamit an mga pamaagi ni Jesus ngan han iya mga disipulo.

13. Mationan-o kahaluag an pagsangyaw nga buruhaton?

¹³ Iginhulagway ni Jesus an kahaluag han pagsangyaw nga buruhaton pinaagi ha pagsiring nga an maopay nga sumat isasangyaw “ha bug-os nga inuukyan nga tuna.” (Mat. 24:14) Kinahanglan tutdoan an “mga tawo han ngatanan nga nasud” basi magin mga disipulo. (Mat. 28:19, 20) Nagpapasabot ini nga bug-os-kalibotan an pagsangyaw nga buruhaton.

14, 15. Ano an nagpapamatuod nga an mga Saksi ni Jehova an nagtutuman han tagna ni Jesus may kalabotan ha kahaluag han buruhaton? (Kitaa an retrato ha tinikangan hini nga artikulo.)

¹⁴ Basi masabtan nga an mga Saksi ni Jehova an nagtutuman han tagna ni Jesus may kalabotan ha kahaluag han pagsangyaw nga buruhaton, tagdon naton an pipira nga impormasyon. Ha Estados Unidos, mga 600,000 an membro han mga klero ha magkalain-lain nga relihiyon, samtang  an mga Saksi ni Jehova mga 1,200,000 an kadamu. Ha bug-os nga kalibotan, an Romano Katoliko nga Singbahan may sobra 400,000 nga kapadian. Yana tagda an kadamu han mga Saksi nga nagsasangyaw han maopay nga sumat han Ginhadian. Ha bug-os nga kalibotan, mga 8,000,000 nga boluntaryo nga ministro an nagsasangyaw ha 240 nga nasud. Makatirigamnan gud ini nga buruhaton, an ngatanan para ha kadayawan ngan himaya ni Jehova!—Sal. 34:1; 51:15.

¹⁵ Sugad nga mga Saksi ni Jehova, hingyap naton nga maipasamwak an maopay nga sumat ha damu nga tawo tubtob nga posible antes umabot an kataposan. Tungod hini, naiiba gud kita ha kadam-an may kalabotan ha aton paghubad ngan pagpublikar hin mga literatura nga basado ha Biblia. Minilyon nga libro, magasin, tract, ngan imbitasyon para ha kombensyon ngan Memoryal an libre nga iginpapanaltag. Nagpupublikar kita hin iba-iba nga publikasyon ha sobra 700 nga linggwahe. Sobra 200 ka milyon nga kopya han New World Translation of the Holy Scriptures an ginpupublikar ha sobra 130 nga linggwahe. Han naglabay la nga tuig, nakagpublikar kita hin mga 4.5 ka bilyon nga kopya hin literatura nga basado ha Biblia. An mga impormasyon ha aton website maaakses ha sobra 750 nga linggwahe. May iba pa ba nga relihiyon nga naghihimo hin sugad hito?

16. Kay ano nga makakasiring kita nga an espiritu han Dios aada ha mga Saksi ni Jehova?

¹⁶ Mationan-o kaiha an igintagna nga pagsangyaw nga buruhaton? Hi Jesus nagsiring nga inin bug-os-kalibotan nga buruhaton magpapadayon tubtob ha kataposan nga mga adlaw, “ngan sunod hito an kataposan maabot.” May iba pa ba nga relihiyon nga nagpapadayon ha pagsangyaw han maopay nga sumat durante hinin makatirigamnan nga kataposan nga mga adlaw? An pipira nga aton nakakaistorya ha ministeryo bangin magsiring: “Kamo an nagwawali, pero kami an may baraan nga espiritu.” Pero diri ba an aton pakapadayon hini nga buruhaton nagpapamatuod nga aadi ha aton an espiritu han Dios? (Buh. 1:8; 1 Ped. 4:14) Ha panapanahon, may mga relihiyon nga nagsasari pagsubad ha ginhihimo han mga Saksi ni Jehova, pero kasagaran nga napapakyas hira. An iba nagmimisyonero hin pipira ka panahon katapos nabalik ha ira normal nga pagkinabuhi. An iba liwat bangin nagsasangyaw pa ngani ha balay-balay, pero ano an ira iginsasangyaw? An baton hito nga pakiana matin-aw nga nagpapakita nga diri nira ginhihimo an buruhaton nga gintikangan han Kristo.

17, 18. (a) Kay ano nga sigurado kita nga an mga Saksi ni Jehova an nagsasangyaw yana han maopay nga sumat han Ginhadian? (b) Kay ano nga nakakagpadayon kita hini nga buruhaton?

¹⁷ Salit hin-o gud ba yana an nagsasangyaw han maopay nga sumat han Ginhadian? An mga Saksi ni Jehova gud la! Kay ano nga sigurado kita hito? Tungod kay iginsasangyaw naton an husto nga mensahe, an maopay nga sumat han Ginhadian. Ginagamit liwat naton an husto nga mga pamaagi kay kita an napakadto ha mga tawo. Nagsasangyaw kita nga may husto nga motibo—gugma, diri pinansyal nga bentaha. An aton buruhaton an may pinakahaluag nga naaabot—ngatanan nga nasud ngan yinaknan. Ngan magpapadayon kita hini nga buruhaton tubtob nga umabot an kataposan.

¹⁸ Makatirigamnan gud an nahihimo han katawohan han Dios durante hinin importante hinduro nga mga panahon. Kondi kay ano nga nahihimo naton ini? Ginbabaton ito ni apostol Pablo ha iya surat ha mga taga-Filipos: “An Dios nagbubuhat uyon ha iya nalilipayan, pinaagi ha pagpakusog han iyo hingyap ngan paghatag ha iyo hin gahum ha pagbuhat han ngatanan nga iya karuyag.” (Fil. 2:13) Hinaot padayon kita nga parig-unon han aton mahigugmaon nga Amay samtang ginhihimo naton an aton pinakamaopay ngan bug-os nga gintutuman an aton ministeryo.—2 Tim. 4:5.