1, 2. Ana yiwusyo yapi yayikusapagwa ligongo lya maloŵe ga Yesu ga pa Matayo 24:14?

MOŴA agano, likuga lya Mboni sya Yehofa likumanyika mnope ni masengo gawo gakulalicila. Komboleka kuti mu undumetume akusasimana ni ŵandu ŵangakamulana ni yikulupi yetu nambo akusacimbicisya masengo gatukusatenda. Yesu ŵasasile kuti ngani syambone syakwamba ya Ucimwene sicilalicikwa pacilambo cosope capasi. (Mat. 24:14) Nambo, ana tukumanyilila catuli kuti masengo gatukutendaga gakukwanilisya maloŵe gaŵasasile Yesuga? Ana kuli kupoka kujila kuti m’wejipe ni ŵatukukamula masengoga?

² Ŵandu ŵajinji ŵa dini sine akusaliwona kuti akamula masengo gakulalicila ngani syambone. Nambo jemanjaji akusatenda yeleyi m’macalici mwawo, soni kupitila pa ma TV kapena pa Intaneti. Panasoni ŵane ŵakusati naga akwakamucisya ŵandu ŵakulaga, kuŵa madokotala kapena aciticala nikuti akulalicila ngani syambone. Nambo ana yeleyi yikamulana ni masengo gakulalicila gaŵasasile Yesu gala?

3. Mwakamulana ni lilemba lya Matayo 28:19, 20, ana ŵakumkuya ŵa Yesu akusosekwa kutenda yindu mcece yapi?

 ³ Ana ŵakumkuya ŵa Yesu ŵasosekwaga kwamba kutama ni kwembeceyaga kuti ŵandu ŵasimaneje? Iyayi. Ali ajimwice kuŵawe, jwalakwe ŵawonecele kwa ŵakulijiganya ŵakwe ŵajinji ni ŵasalile kuti, “Ajawule akajiganye ŵandu ŵa mitundu josope kuti aŵe ŵakulijiganya ŵangu. Ŵabatisyeje . . . , ni kwajiganya kuti asunjeje yindu yosope yanalamwile.” (Mat. 28:19, 20) M’yoyo mpela ŵakumkuya Yesu tukusosekwa kutenda yindu mcece. Kupanganya ŵakulijiganya, kwabatisya soni kwajiganya. Nambo ana cindu candanda catukusosekwa kutenda cili cici? Yesu ŵatite, “Ajawule.” Pakwamba ya maloŵe gakuti “Ajawule,” mundu jwine jwamlijiganye mnope ya Baibulo ŵasasile kuti, “‘Kwawula’ gali masengo ga mundu jwakulupilila jwalijose pacilambo capasi.”—Mat. 10:7; Luk. 10:3.

4. Ana kuŵa “ŵakutanjisya ŵandu” kukusasosecela cici?

⁴ Ana Yesu ŵasakaga kuti jwakumkuya jwakwe jwalijose alalicileje pajika kapena ŵasakaga kuti alalicileje mpela likuga? Yili yangakomboleka kuti mundu jumo ŵalalicile ŵandu ŵa mitundu josope, m’yoyo masengoga gakusosekwa ŵandu ŵajinji. Ni ligongo lyakwe Yesu ŵaŵilasile ŵakumkuya ŵakwe kuti aŵe “ŵakutanjisya ŵandu.” (Aŵalanje Matayo 4:18-22.) Pelepa Yesu nganagopolelaga ya mundu jumo jwakusakamulicisya masengo cisopo, jwakusagamba kutama ni kwembeceyega kuti somba siyice. Nambo ŵasalaga ya kuwulaga somba pakamulicisya masengo likoka lyalikusasosekwa macili ga ŵandu ŵajinji.—Luk. 5:1-11.

5. Ana tukusosekwa kwanga yiwusyo mcece yapi, soni ligongo cici?

⁵ Kuti twamanyilile ŵandu ŵakulalicila ngani syambone pakwanilisya yakulocesya ya Yesu yila, tukusosekwa kwanga yiwusyo ayi:

• Ana tukusosekwa kulalicila utenga watuli?

• Patukulalicila, ana tukusosekwa kola cakulinga catuli?

• Ana tukusosekwa kamulicisya masengo matala gatuli patukulalicila?

• Ana tukusosekwa kulalicila mpaka kwapi soni kwandaŵi jelewu catuli?

Kwanga kwa yiwusyo yeleyi cikutukamucisye kwamanyilila ŵakukamula masengo gakulupusya ŵanduga soni cikutulimbikasye kuti tugakamuleje mwakulupicika.—1 Tim. 4:16.

6. Ana cici cacikwatendekasya kulupilila kuti Ŵamboni sya Yehofa ni ŵakulalicila utenga wakuŵajilwa?

⁶ Aŵalanje Luka 4:43. Yesu ŵalalicilaga “ngani syambone syakwamba ya Ucimwene.” Jwalakwe akusasaka kuti ŵakumkuya ŵakwe alalicilejesoni utenga welewu. Nambo ana likuga lyapi lya ŵandu lyalikulalicila utengawu kwa “ŵandu ŵa mitundu josope”? Kusala mwangapita mumbali lili likuga lya Mboni sya Yehofa. Atamose ŵandu ŵakusatusisya akusamanyilila cenene yeleyi. Mwambone, mmishonale jwine jwali jwambopesi soni juŵatemi m’yilambo yakulekanganalekangana ŵawusisye Ŵamboni ŵa m’yilamboyo kuti amsalile utenga wakusalalicila. Ana Ŵamboniwo ŵamjangaga wuli? Jwambopesijo ŵatite, “Wosope ŵaliji ŵakuloŵela mnope ligongo ŵanjangaga kuti akusalalicila ‘Ngani syambone sya Ucimwene.’” Yaŵasasile jwambopesijo yikulosya kuti nganituŵa ŵakuloŵela nambo tuli ŵakamulana mpela Aklistu ŵasyesyene. (1 Akoli. 1:10) Yeleyi yili yakamulana ni utenga wekulungwa wawukusasimanikwa m’magasini ja Sanja ja Mlonda Jakwenesya Ucimwene wa Yehofa. Magasiniji jikusimanikwa m’yiŵeceto yakwana 254 soni magasini ciŵandika 59,000,000 gakusakopoka. Magasiniji jili jakuwanda mnope pacilambo cosope.

7. Ana tukumanyilila catuli kuti acimlongola ŵa dini syaciklistu ngakulalicila utenga wakuŵajilwa?

 ⁷ Acimlongola ŵa dini syaciklistu ngakulalicila ngani syakwamba ya Ucimwene wa Mlungu. Jemanjaji akusati Ucimwenewu wuli mumtima mwa Mklistu jwalijose. (Luk. 17:21) Ŵangakamucisya ŵandu kumanyilila kuti Ucimwene wa Mlungu uli boma jakwinani jele jwakulamulila jwakwe ali Yesu Klistu. Ŵangakamucisyasoni kumanyilila kuti Ucimwenewu ucimasya yakusawusya yosope ya ŵandu, soni kuti pacangakaŵapa ciwutyosye kusakala kosope pacilambopa. (Ciu. 19:11-21) M’malo mwakwe akusanonyela kumbucila lisiku lyakupagwa soni kwimuka kwa Yesu. Jemanjaji ngakusamanyilila cilicose pakwamba yacacitenda Yesu pacaciŵa jwakulamulila jwasambano jwa cilambo capasi. Pakuŵa jemanjaji ngakumanyilila utenga wakusosekwa kulalicila, yili yangakayikasya kuti ngakumanyililasoni cakulinga cakamulila masengoga.

8. Ana ngatukusosekwa kola cakulinga catuli patukukamula masengo gakulalicila?

⁸ Patukukamula masengo gakulalicila, ana tukusosekwa kola cakulinga catuli? Cakulinga cetu cikaŵa kupata mbiya kapena kutaŵa majumba gakusalala. Yesu ŵasalile ŵakumkuya ŵakwe kuti, “Mwapocele kwalulele, mpelece kwalulele.” (Mat. 10:8) Ngatukusosekwa kutendela malonda Maloŵe ga Mlungu. (2 Akoli. 2:17) Masengo gakulalicila gakaŵa litala lyakupatilapo yindu. (Aŵalanje Masengo 20:33-35.) Atamose kuti maloŵe ga Yesuga gali gakupikanika cenene, nambope, macalici gamajinji gangapikanila yeleyi mwati gakusalokotela mbiya syakwendejecesya calicico soni syakwalipila acimlongola ŵawo soni ŵamasengo ŵane. Yeleyi yitendekasisye kuti acimlongola ŵadini syaciklistu ŵajinji aŵe ŵakusicila mnope.—Ciu 17:4, 5.

9. Ana cici cacikulosya kuti Ŵamboni sya Yehofa akusakamula masengo gakulalicila ni cakulinga cambone?

⁹ Ana Ŵamboni sya Yehofa akusalokotela mbiya pa Nyumba ja Ucimwene kapena pamisongano jekulungwakulungwa? Iyayi. Nambo masengo gawo gakusajenda cenene ni yakusapeleka ŵandu mwakusaka kwawo. (2 Akoli 9:7) Caka cimasile peci, Ŵamboni sya Yehofa ŵamalile maawala gakwana 1.93 biliyoni ali mkulalicila ngani syambone soni ŵatendesyaga majiganyo ga Baibulo galulele gakwana 9 miliyoni mwesi wuliwose. Cakutesya lung’wanu cili cakuti jemanjaji ngakusapocela malipilo galigose pa masengoga nambo akusasangalala kamulicisya masengo yindu yawo. Pakwamba ya masengo gakusatenda Ŵamboniga mundu jwine jwakuwungunya yindu ŵasasile kuti, “Cakulinga cawo cekulungwa cili kulalicila ni kwiganya ŵandu. . . . Jemanjaji ngakusajonanga mbiya ligongo nganakola acakulungwa ŵadini ŵakuti ŵalipileje.” Nambo ana cakulinga cetu pakamula masengoga cili cici? Tukusakamula masengoga mwakusacilila ligongo lyakuti tukusamnonyela Yehofa soni acimjetu. Mtima wakusacilila welewu ukwanilisya yakulocesya ya pa Salimo 110:3. (Aŵalanje.)

10. Ana Yesu ni ŵakumkuya ŵakwe ŵakamulicisyaga masengo matala gatuli pakulalicila?

¹⁰ Ana Yesu soni ŵakumkuya ŵakwe ŵakamulicisyaga masengo matala gapi pakulalicila? Ŵajawulaga kulikose kukwasimanikwaga ŵandu cinga pelanga kapena kunyumba ni nyumba. Kulalicila ngani syambone kukusapwatikapo kuwungunya ŵandu ŵakuŵajilwa kunyumba ni nyumba. (Mat. 10:11; Luk. 8:1;  Mase. 5:42; 20:20) Kulalicila m’litala lyeleli kwalosisye kuti jemanjaji ŵaliji ŵangali lusagu.

11, 12. Ana yakusatenda ŵadini syaciklistu pa masengo gakulalicila yikusalekangana catuli ni yakusatenda Ŵamboni sya Yehofa?

¹¹ Ana ŵandu ŵadini syaciklistu akusalalicila ngani syambone mpela mwaŵatendelaga Yesu? Iyayi. Ndaŵi syejinji ŵanduwo akusagamba kwalecela acakulungwa ŵa dinisyo kuti alalicileje. Nambo acakulungwakulungwa ŵadiniwo ngakusaganicisya yakonjecesya ŵandu ŵane mu dini syawosyo. Yili yisyene kuti ndaŵi sine acakulungwakulungwa ŵadini akusalimbikasya ŵandu ŵawo kuti alalicileje. Mwambone, cakundanda kwa caka ca 2001, Papa John Paul II ŵalembile m’cikalata kuti, “Kwa yaka yejinji, mbele ndili mkusala mwakuwilisyawilisya kuti tulalicileje. Apano nguwilisyasoni nganiji . . . Tukusosekwa kola mtima wakusacilila mpela waŵakwete Paulo juŵatite, ‘Likungu tiliciŵa kwa une naga ngangulalicila ngani syambone.’” Papaju ŵasasilesoni kuti kamula masengoga uli ukumu wa mundu jwa Mlungu jwalijose ngaŵaga wa ŵandu ŵaŵalijiganyisyepe. Nambo ana ŵandu ŵalingwa ŵaŵayikamulicisya masengo yaŵasasile papayi?

¹² Wuli pakwamba ya Ŵamboni sya Yehofa? Jemanjajipe ni ŵakulalicila kuti Yesu aŵele ali mkulamulila mpela Mwenye kutandila mu 1914. Mwakamulana ni yaŵasasile Yesu, jemanjaji akusagawona masengo gakulalicila kuŵa gakusosekwa mnope paumi wawo. (Maliko 13:10) Buku jine jakolanjikwa kuti Pillars of Faith—American Congregations and Their Partners jasasile kuti, “Ŵamboni sya Yehofa akusaŵika pasogolo masengo gakulalicila kupunda cilicose.” Jasasilesoni kuti, “Naga Ŵamboni asimene ni mundu jwasala, jwakamwilwe lipowo, kapena jwakulwala akusamkamucisya, . . . nambo ngakusaliŵalila kuti masengo gawo gekulungwa gali kwasalila ŵandu utenga wa m’Baibulo wakwamba mbesi ja cilambo soni yampaka atende kuti cakulupuce.” Ŵamboni sya Yehofa akwendelecela kulalicila utengawu pakamulicisya masengo matala gaŵakamulicisyaga masengo Yesu ni ŵakumkuya ŵakwe.

13. Ana tukusosekwa kulalicila mpaka kwapi?

¹³ Yesu ŵasasile kuti ngani syambone tisicilalicikwa “pacilambo cosope capasi.” (Mat. 24:14) M’yoyo, tukusosekwa kwiganya “ŵandu ŵa mitundu josope.” (Mat. 28:19, 20) Yeleyi yikulosya kuti tukusosekwa kulalicila pacilambo cosope capasi.

14, 15. Ana pana maumboni gapi gakulosya kuti Ŵamboni sya Yehofa akukwanilisya yaŵalocesye Yesu yakwamba kulalicikwa kwa ngani syambone pacilambo cosope? (Alole ciwulili cacili kundanda kwa nganiji.)

¹⁴ Ŵamboni sya Yehofape ni ŵakukwalisya yakulocesya ya Yesu yakwamba kulalicikwa kwa ngani syambone pacilambo cosope. Ligongo cici tukuti m’yoyo? Alole yisyasyo ayi. M’cilambo ca United States mwana acakulungwakulungwa ŵadini syaciklistu syakulekanganalekangana ciŵandika 600,000 nambo mwana Ŵamboni sya Yehofa ŵakwana 1,200,000. Pacilambo cosope dini ja Cikatolika  jikwete ŵambopesi ciŵandika 400,000. Ni aganicisye ya ciŵalanjilo ca Ŵamboni ŵakukamula masengo gakulalicila ngani syambone mwakulipeleka. Ŵamboni sya Yehofa ŵakupunda 8 miliyoni akulalicila m’yilambo yakwana 240. Yisyene, Ŵamboni sya Yehofa ni ŵakulalicila ngani syambone pacilambo cosope, soni yeleyi yikupeleka lumbili ni ucimbicimbi kwa Yehofa.—Sal. 34:1; 51:15.

¹⁵ Ŵamboni sya Yehofawe tuli ŵakusacilila mnope kwayicila ŵandu ŵajinji ni ngani syambone mbesi mkanijiyice. Kuti yeleyi yikombolece tugopolele mabuku, magasini, soni tumapepala twejinji. Yindu yeleyi tukusagaŵila kwalulele. Tugopolele mabuku gakulekanganalekangana m’yiŵeceto yakupunda 700. Tugaŵilesoni mabaibulo ga New World Translation of the Holy Scriptures gakupunda 200 miliyoni m’yiŵeceto yakwana 130. Caka cimasileci, tukopwesye mabuku gakusala ya Baibulo ciŵandika 4.5 biliyoni. Konjecesya pelepa, pa webusayiti jetu pakusasimanikwa ngani m’yiŵeceto yakupunda 750. Ana panasoni dini jine jajikukamula masengo mpela gelega?

16. Ana tukumanyilila catuli kuti Ŵamboni sya Yehofa akwete msimu weswela?

¹⁶ Ana masengo gakulalicilaga ciganjendelecele mpaka cakaci? Yesu ŵasasile kuti masengo gakulalicila ciganjelelecele mpaka pandaŵi jele mbesi jiciyika. Nambo, ana dini japi jajijendelecele kamula masengoga m’moŵa gambesi gano? Ŵane mwa ŵandu ŵatukusasimana nawo mu undumetume akusati, “M’weji tukwete msimu weswela, nambo jemanja akamula masengo.” Kwendelecela kwetu kamula masengoga wuli umboni wakulosya kuti tukwete msimu weswela wa Mlungu. (Mase. 1:8; 1 Pet. 4:14) Ŵandu ŵane alinjile kulalicila mpela mwakusatendela Ŵamboni sya Yehofa nambo alepele. Ŵane akusagamba kulalicila kwandaŵi jamnono kaneko ni kuleka. Ni panasoni ŵane ŵakusalalicila kunyumba ni nyumba, nambo ana akusalalicila utenga watuli? Kwanga kwa ciwusyo celeci kukulosya kuti jemanjaji ngakukamula masengo gaŵatandisye Yesu.

17, 18. (a) Ligongo cici tuli ŵakusimicisya kuti Ŵamboni sya Yehofa ni ŵakulalicila ngani syambone moŵa agano? (b) Ana cici cacikutukamucisya kwendelecela kamula masengo gakulalicila?

¹⁷ Sambano ana ŵani kusyesyene ŵakulalicila ngani syambone syakwamba ya Ucimwene moŵa agano? Kwanga mwangapita mumbali kuli kwakuti “Ŵamboni sya Yehofa.” Ligongo cici tukuti m’yoyo? Ligongo tukulalicila utenga wakuŵajilwa wawuli ngani syambone syakwamba ya Ucimwene. Kwawula kwakuli ŵandu kukusalosyasoni kuti tukukamulicisya masengo matala gakuŵajilwa gakulalicilila. Soni tukulalicila ni cakulinga cambone cacili cinonyelo ngaŵaga kusaka cipanje. Konjecesya pelepa, tukamula masengoga pacilambo cosope capasi soni kwa ŵandu ŵa mitundu ni yiŵeceto yosope. Soni citujendelecele kamula masengoga mwangalecesya mpaka ndaŵi jele mbesi jiciyika.

¹⁸ Yili yakusangalasya mnope kugawona masengo gakutenda Ŵamboni sya Yehofa moŵa gambesi gano. Nambo ana cici cacikutukamucisya kuti tulalicile ngani syambone pacilambo cosope? Cikalata ciŵalembile Paulo cakwawula kwa Aklistu ŵa ku Filipi cikwanga ciwusyo celeci. Jwalakwe ŵalembile kuti, “Mlungu akusatenda yindu m’litala lyalikusamsangalasya. Jwalakwe akusalimbisya yakumbila yawo kuti atende yindu yosope yakusasaka jwalakwe.” (Afi. 2:13) Tukuŵenda Yehofa kuti atupeje macili kuti tujendelecele kamula masengo gakulalicila ngani syambone mpela muŵatulamulile Yesu Klistu.—2 Tim. 4:5.