1, 2. Gini sanahe nakura nibipa agu afugo Yesu du rogo Matayo 24:14?

KA ABORO di gaani pangbanga kugume watadu ka i vura ka soga rani, ngenga aguyo rengbe ka tikango nga wa du aDezire Yekova ni badona, aboro ima ino yo wenengai tipa gayo sunge tungusapai te. Si rengbe kadu a nga mo aima gbiatiro na aboro gene tungusapai yo nga aguyo naape gupai foro nga wa vura duhe nga i aidanga na gaani ida te, i nabi rani na gu sunge ani amangaha na irisa. A wa ani nainihe, Yesu aima fura tipa kumbatayo nga i atungusa gu wene pangbanga nga ga Kindo rogo zegino dunduko. (Mt 24:14) Ono wai du ini ani he nga gu sunge ani amangaha si nadigiso ga Yesu sangbanebi? Ya mo pa tangbaduse du ngaha furani ani berẽ gupai nga ani du nga agu aboro namanga gi sunge re?

² Dungu apambori naberã gupai nga i natungusa wene pangbanga atungusa. Ono tie, gu ome i amangaha dedede nafu kina taarimo fu aboro, agu asunge nga ga kanisa, watadu agu apai i agbandakaha vurube aũgbandaka pangbanga singia terevizioni watadu Internet. Aguyo nafura tipa agu apai i amangaha tipa ka fu undo fu kura aboro, watadu sunge amunganga, na yugopai. Ya mo agi apai i ata ngbaduyo tipaha re nandu sa na  gupai Yesu azinaha fu gako abawiriki i mangihe?

3. Ringbisihe kuti Matayo 28:19, 20, gini apai biama si aida apefuo Yesu mangi he?

³ Ya mo si aaida ga Yesu abawiriki sungu asungo tipa aboro niye fuoyo? Nirengo, wo ko aidaha te! Fuo zingako be kpio, ko afura fu akama gako abawiriki na ki ya fuyo: “Oni ndú tie, ki sa arikaaboro dunduko ni abawiriki, ki nibapatizi yo . . . , ki nirugu yo a i niká kuti agu apai dunduko mi arugu roni kuti ni.” (Mt. 28:19, 20) Apai biama si aida ani mangihe. Ani duwa ka ani sa aboro ni abawiriki, ki bapatiza yo, ki yugupai fuyo, ono ginihe nga gu bambatapai si aida ani mangihe? Yesu aya: “Oni ndú”! Nibipa gi zinahe re, gu kura wene bawiriki Ziazia Kekeapai sa aya: “Ka ‘ndu’ nga gu sunge si aida boro na boro mangihe, singia ka ndu ku gii bagene yo, watadu ku mbiti baime yo.”—Mt. 10:7; Rk. 10:3.

4. Ginihe si aidaha tipa boro da ni “baziaboro”?

⁴ Ya mo Yesu afura tipa kina gu ome gako abawiriki amangaha ni tiyo, watadu ko aafura tipa gu mbakadapai nga ga gu tua du tipa tungusa wene pangbanga? Wa duhe nga bangisa boro sa arengbanga ka ndu fuo “rikaaboro dunduko” te, gi sunge re aida na gu ome nga ga mangimangi mbakadapai nga ga dungu aboro. Gere nga gupai Yesu afura tipaha ho ko ayambu gako abawiriki ni i da ni “abaziaboro.” (Oni gedi Matayo 4:18-22.) Gu ngbatunga zio aboro ko aafura tipaha re aadunga wa gu sunge rengbe baziatĩo arengba ka mangaha ni tiní nga ka maa pio ku ime yo na ki sungu ka pido atĩo zi ti ni te. Kuba gure, si nakoda gu mangasunge na pio atĩo nga gu naida na gu ome nga ga dungu aboro.—Rk. 5:1-11.

5. Gini asanahe biama si aida ani karagapai kutini na tipagine?

⁵ Tipa ani ini ada natungusa wene pangbanga areme ni digiso ga Yesu sangbanebi, si naida ani karagapai kuti agi asanahe du biama re:

• Gini pangbanga du gi tungusapai re nikaa fura tipaha?

• Si naida gaani ndu tungusapai du nga gine?

• Wai du ani atungusaha?

• Bakio ho nika du wai na si nika dia bagizo regbo wai?

Agu akaragapai du kuti agi asanahe re nika undo rani ani ini agu aboro namanga gi sunge batasa unga aboro re na ki nyakasi gaani diaberã tipa ani kpatagara kuti mangaha ni ruru rani.—1 Tim. 4:16.

6. Tipagine rengbe mo kadu na kido ti ni nga aDezire Yekova natungusa ruru pangbanga?

⁶ Oni gedi Ruka 4:43. Yesu atungusi “gu wene pangbanga nga ga ga Mbori ngbi,” na kina gu bangisapai re ko aaida gako abawiriki mangihe. Gini badona nga ga aboro areme rogo zegino na tungusa gu pangbanga re fu “rikaaboro dunduko”? Karagapai gbaiga nga kina aDezire Yekova sa. Zavura asogorani ima ida kuti gipai re. Ni kpiapai, pasita ni mokedi ape gupai fu Dezire Yekova nga ko ima raka rogo dungu aringara na ko ki ima sana dungu aDezire Yekova rogo agu aringara re ni basasa tipa gu pangbanga i atungusaha. Gini karagapai i afuhe fuko? Gu pasita re aya: “I dunduko angia airamungo na ki fu kina bangisa karagapai sa nga: ‘Gu wene pangbanga nga ga Kindo.’” Ono tie, agu aDezire Yekova re aangianga “airamungo” te, i dunduko adu ni kodikodi yo rogo afugoyo yo kina wai si aida ndikidi aKristano du. (1 Kor. 1:10) I afura tipa gu pangbanga du rogo gu magazini nga Ngbaõbambu Sinziri Natakapande ga Yekova Kindo. Gi magazini re awere rogo afugo nga 254 na i nakusa bangehe wa amirioni 59, nga gu nasaha  si du ni gu magazini niima nge areme rogo zegino.

7. Wai du ini ani he nga abarumbatayo rogo apambori atungusanga ruru pangbanga te?

⁷ Agu abarumbatayo nga ga agu akanisa i aya tipaha si nga ga aKristano atungusanga pa ga Mbori Kindo te. Ho i afura ni tipa Kindo, dunguyo naya si nga guhe du ngbadu Kristano yo. I aundongo aboro tipa i rugutiyo na gupai nga ga Mbori Kindo nga gu zogarago du ngbangbaturũ yo du Yesu Kristo ni gaha Bazogo te, na si nga ziga kuti agu akpakarapai dunduko nga ga aboro, na barambeda, si nika nyasariipa gbegberẽ apai auru kpotosende kusayo. (Yugo. 19:11-21) Kuba gure, gupai ngbatiyo nga i ni tingidapa Yesu ti regbo Krisimasi na Pasika. I na kandara wiri inohe tipa gupai Yesu nika mangaha wangia ko Bazogo te. Wa duhe nga i ainongo gu pangbanga Yesu aya fuyo i tungusihe te, ya mo si airiwongo ka bi gupai a nga i ainongo gu ndupai si aida i mangi gu sunge re ti ni te?

8. Gini gbegberẽ ndupai aboro atungusapai ti ni?

⁸ Ginipai si aida si du nga ndu tungusapai? Si aidanga si du nga ka dungura marã be aboro tipa ka dudua wenewene abambu na ni te. Yesu aya fu gako abawiriki wẽ: “Oni adihe gbua, oni fúkuhe tigaoni kinawo a gbua.” (Mt. 10:8, New World Translation of the Holly Scriptures.) Si aidanga i tungusi Fugo Mbori tipa marã te. (2 Kor. 2:17) Agu aboro natungusa gi pangbanga re si aidanga aboro ni tumo yo tipa gu sunge i amangaha a te. (Oni gedi Amokedi 20:33-35.) Wa vura du agi arugute re ziazia, dungu akanisa namerã kina gene dungura marã be aboro watadu ka manga ome tipa bakere marã du beyo. I natumo abarumbatayo rogo pambori kodihe na gu kura aboro namangasunge fuyo. Ni sangbana gipai re, abarumbatayo rogo akanisa ima da ni kere airakumuko.—Yugo. 17:4, 5.

9. Wai du aDezire Yekova nayuguhe nga i namangasunge tungusapai na ruru nduhe?

⁹ Ya mo aDezire Yekova naadia marã a rogo gayo aba irisombori yo? Gu sunge i amangaha, gu gamahe kina boro aida ka fuhe ni tiní nasongodaha. (2 Kor. 9:7) I adianga marã rogo gayo aBambu Kindo, watadu ti regbo gayo kikindigi adunguratise te. Ono wa vura duhe wo, rogo gu garã susi nisaha, aDezire Yekova adi asaa naambeda kuti birioni ue kuti sunge tungusa wene pangbanga na ki wiriki Ziazia Kekeapai na aboro bangeyo naima susa amirioni ribua zanga i tumo tipaha rogo adiwi ni basasa. Gu iriwo nga, i atumongo yo tipa gi gayo sunge re te, na i na ngbarago a ka mangasunge na gayo marã tipa gi sunge re. Kura baweteke apai sa afura tipa ga aDezire Yekova sunge ki ya: “Gayo bangua sasa nga ka tungusapai na ka yugopai. . . . Apasita beyo tipa ka rita gayo marã te.” Gaani ndu manga gi sunge re tie nga gine? Ka pepai ni guruhe, ani namanga gi sunge re mbiko gu nyemuse du ani na ni tipa Yekova na tipa gaani amurakporo. Gu nyemupai du ani na ni re nga digisidigisi gu sangbanebi du rogo Atambuahe 110:3. (Oni gedihe.)

10. Wai du aYesu na gako abawiriki anaamangasunge tungusapai?

¹⁰ Ginipai aYesu na gako abawiriki amangihe tipa ka tungusa wene pangbanga? I anaandu fuo aboro ku rogo agu aba i arengba ka gbiayo rogoho, wa ku babagaahe yo na rogo akporo. Sunge tungusapai nakoda gbata agu aboro du na nyemupai tiyo kporo na kporo. (Mt. 10:11; Rk. 8:1; Amo. 5:42; 20:20) Tungusapai ngba gi gene re adu tipa ka gbia aboro dunduko.

11, 12. Ho daha ni ti tungusa wene pangbanga, wai du du gu ome kura apambori amangaha kia ti ga aDezire Yekova?

 ¹¹ Ginipai agu akanisa i aya tipaha wẽ si nga ga aKristano namangihe nibipa gipai re? Dedede, dungu aboro pambori na ngbarago ka mbu sunge tungusapai fu kina apasita mbiko i ya tumo yo tipaha. Ono kuba gupai nga i du ni “abaziaboro,” agu abarumbatayo nga ga agu akanisa i aya tipaha wẽ si nga ga aKristano nabihe nga gupai ngba nga i banda kina agu “atĩo” du beyo. Nirengo, ti kura aregbo, kura abarumbatayo rengbe ka ngarasa gayo aboro pambori tipa i tungusipai. Ni kpiapai, bara ti tonatona gu garã nangia 2001, Papa Pauro gu Ueko aya rogo gako waraga yo wẽ: “Tipa agarã awere, mi ima dogoda gupai nga aboro ndu ka tungusa wene pangbanga. Mi natingida roni na ni awere berewe . . . Si naida ani du na kina gu bangisa kakaka nyemupai naadu ti Pauro nga gu ko naya: ‘Rungo du fere ka mi atungusa nga Wene Pangbanga ya.’” Sidu, papa aya berewe wẽ “si aidanga i mbu gi sunge re fu kina badona nga ga ‘agu aboro inipai tipaha wenengai te’ ono si naida si du nga gu sunge ga Mbori aboro dunduko amangaha.” Ono aboro wai nakaragapai kuti gupai ko apehe re?

¹² Ono ginipai tigaha du tipa aDezire Yekova? I nga gu yangara aboro natungusapai nga Yesu adani Bakindo tona rogo gu garã nangia 1914. A wa Yesu azinahe tipaha, i naperesapa tungusapai ni bambatapai rogo gayo raka yo. (Mk. 13:10) Buku sa aya: “Tipa aDezire Yekova tigayo, sunge amokedi nga gupai paha naima nyaka fuyo kisusi kura apai dunduko.” (Pillars of Faith—American Congregations and Their Partners.) Gu boro nakehe afura tipa gupai Dezire Yekova sa apehe ki ya: “Ho i agbiatiyo ni na gomoro, sungo nisase, gbiati akaza, i naundo aguyo aundo, . . . ono bangiriyo agonga ti gu gayo bangua sunge nga ka tungusa gu pangbanga nga ga toro tipa paye digido zegino gbiati bata te.” ADezire Yekova nandu kumbatayo kindi na tungusa gi pangbanga re, na kini mangi kina gu bangisapai aYesu na gako abawiriki anaamangaha.

13. Si adu nga bakio gu sunge re nika du wai?

¹³ Yesu afura tipa bakio wai sunge tungusapai ni kadu niya ko i nika tungusa gi wene pangbanga re ‘fu arikaaboro dũ.’ (Mt. 24:14) Si adu nga i nika sa ‘rikaaboro dunduko’ ni abawiriki. (Mt. 28:19, 20) Gipai re aaida i mangihe rogo zegino dunduko.

14, 15. Ginihe nayugo na ni nga aDezire Yekova nadigiso ga Yesu sangbanebi nibipa gu bakio sunge tungusapai i amangaha? (Oni bi gu sura du ti tonatonaha.)

¹⁴ Tipa ka rugatirani na wai aDezire Yekova adigiso ga Yesu sangbanebi nibipa bakio gi sunge tungusapai re, ani wisigingo bete kura arengo. Bange abarumbatayo rogo apambori ni bakiakia Amerika yo nambeda kuti sita kama akutu, baraho du aDezire Yekova ni wa mirioni sa na ue bawe kama akutu. Rogo zegino dunduko agu abavugahe nga ga Katoriko yo, bangeyo ima susa biama kama akutu. Awere ani bingo  namba agu aDezire Yekova namangasunge tungusapa Kindo. Rogo zegino dunduko, abatungusipai beyo bangeyo naima susa amirioni muambe natungusapai rogo aringara nga 240. Nairiwo gu iiriwo pa sunge i amangaha re, si dunduko du tipa ka fu taarimo fu Yekova!—Tam. 34:1; 51:15.

¹⁵ Wangia ani aDezire Yekova, ani na nyemu ka tungusa wene pangbanga fu dungu aboro mbata fu digido zegino da. Mbiko gipai re, ani ni kparakpara rani nibi gu sunge ani amangaha nga ga kusa agu awaraga du mburuhe rii Ziazia Kekeapai. Amirioni abuku, amagazini, atrakte, na ani nakparaka agu awaraga yambahe du tipa bakere adunguratise na Tingida Pakpio Yesu zanga aboro tumo tipaha. Ani ima kusa awaraga rogo afugo ni bakiakia bangehe naima susa 700. Bange gu Ziazia Kekeapai nga New World Translation of the Holy Scriptures ani nakusihe ima susa amirioni 200 rogo afugo naima susa 130. Rogo gu garã susi nisaha, ani akusi agu awaraga du mburuhe rii Ziazia Kekeapai naambeda kuti birioni biama na beberehe. Gaani bangiriba nga ga Internet na apai rogoho rogo afugo naima susa 750. Gini kura badona nga ga abatungusipai namanga ngbatunga sunge wa gere?

16. Wai du ini ani he nga aDezire Yekova na ga Mbori ziazia toro tiyo?

¹⁶ Si adu nga gi sunge tungusapai i afura tipaha re nika dia bagizo regbo wai? Yesu aya gi sunge i amangaha rogo zegino dunduko re nika ndu dati yangara arame na “ragoho ki digi adiga.” Gini kura badona nga ga pambori duho natungusa wene pangbanga rogo gi yangara arame re? Gu kura aboro ani agbiayo gene tungusapai yo rengbe ka ya: “Ziazia toro du tirani, ono oni tigaoni namanga sunge.” Ono anga gu rengo nga ani nahipai kutingba gi sunge re nayugo gupai nga ani na ga Mbori ziazia toro tirani te? (Amo. 1:8; 1 Pet. 4:14) Ti kura aregbo, gu kura abadona nga ga apambori aima asada ka manga gupai aDezire Yekova amangaha dedede, ono zanga i du na diabese. Aguyo kinaho namangi sunge amokedi tipa bete aregbo na ki karagatiyo berewe fuo agu apai i anaamangaha mbata. Aguyo ima rengbe ka ndu kporo na kporo, ono ginipai i atungusaha? Gu karagapai du tipa gu sanahe re nayugoho ziazia nga i amanganga gu sunge Kristo atonaha te.

17, 18. (a) Tipagine rengbe ani ti ni ka ya aDezire Yekova nga agu aboro natungusa wene pangbanga nga ga Kindo areme? (b) Wai du duhe furani taata tipa ani nimangi gi sunge re?

¹⁷ Sidu, ada natungusa gu wene pangbanga nga ga Kindo areme? Zanga kapa, ani rengbe ka ya: “aDezire Yekova!” Tipagine duhe ti ni wo? Mbiko ani natungusa ruru pangbanga, nga gu pangbanga nga ga Kindo. Pa ndu ani a fuo aboro nayugo gupai nga ani tungusaha ngba ruru gene. Ani namanga gaani tungusapai na wene nduhe nga nyemuse anginga tipa marã ya. Bakio gaani sunge ima kio, mbiko ani natungusaha fu rikaaboro dunduko na afugoyo. Na ani nikaa tungusaha zanga piriga, rogo agarã dunduko daho digido gi zegino re kada ni.

¹⁸ Kina ngbarani nazera na gupai ga Mbori aboro amangaha ti gi regbo ani araka rogoho re. Ono ginihe nasa agi apai re taata tipa si mangi? Gu mokedi nangia Pauro akaragapai rogo gako waraga yo fu aFiripoio nga: “Mbori nga gu ko namanga pai rogo roni yo, sa ida pai na manga ha mbiko wene sangbako.” (Frp. 2:13) Gu Barani nga boro nyemuse re nifu nga ome afu furani wa ani amanga gaani sunge tungusapai tipa ka digisoho.—2 Tim. 4:5.