1, 2. (a) Lucaden pa Jehovah giwinyo nining i kom Baibul? (b) Wang Baibul mene ma imaro loyo?

LUCADEN PA JEHOVAH gimaro Baibul adada. Baibul miyo tira ma genne, dok konyowa me nongo kwe cwiny ki gen. (Rom. 15:4) Wan waneno Baibul “macalo lok pa Lubanga”, ento pe macalo lok pa dano adana ma kiribo kiketo kacel​—1 Tec. 2:13.

² Labongo akalakala mo, wan ducu watye ki wang Baibul mogo ma wamaro adada. Jo mogo gimaro kwano Jiri, ma nyuto kit mamwonya pa Jehovah ma onen ka maleng i Wode. (Jon 14:9) Jo mukene gimaro wang Baibul ma tye ki lok pa lunebi​—calo Niyabo, ma tito wiye wiye “gin ma myero otimme oyotoyot i kare me anyim.” (Yabo 1:1) Dok anga i kinwa ma peya onongo kwe cwiny ki i kwano Jabuli nyo onongo pwony ma twero ketone i tic ki i buk me Carolok? Ki lok ada, Baibul tye buk pa jo ducu.

3, 4. (a) Wawinyo nining pi bukkewa? (b) Bukke mene mukene ma wanongo ki dok pi angagi?

³ Kit macalo wamaro Baibul-li, wamaro bene bukkewa ma jenge i kom Baibul. Me labolle, watye ki pwoc pi cam me cwiny ma kiketogi i bukke, brocuwa, magajin ki dong jami mukene.  Wangeyo ni mot magi ma a ki bot Jehovah-ni konyowa me bedo ma wayubbe i yo me cwiny, me nongo cam me cwiny muromo ki dong me bedo ‘jo ma niyegi tye kakare.’​—Tito 2:2.

⁴ Medo i kom bukkewa ma kicoyo pi Lucaden pa Jehovah ducu, tye bene bukkewa ma jenge i kom Baibul ma tye ki kony pi gurup pa dano mapatpat. Pwony mogo tye tutwalle me konyo jo matino; mukene konyo lunyodogi. Pol pa ngec ma kimiyo i bukkewa ki dong i kabedowa me intanet kiyubo i yo ma twero konyo jo ma pe gitye Lucaden pa Jehovah. Cam me cwiny mapol kit meno poyo wiwa ni Jehovah ogwoko cikkene me miyo “karama ma gicamo iye ringo mogo makur.”​—Ic. 25:6.

5. Wageno ni Jehovah tye ki pwoc pi gin ango?

⁵ Ki lok ada, pol pa wan wawinyo ni onongo twero bedo ber ka watye ki cawa muromo me kwano Baibul nyo bukkewa ma jenge i kom Baibul. Wageno ni Jehovah tye ki pwoc madit ka watiyo ki cawawa “i yo maber” kun wakwano Baibul piwa kenwa kare ki kare. (Ep. 5:15, 16) Ki lok ada, pe watwero keto cwinywa i yo marom i kom cam me cwiny ducu ma watye kwede. Ento tye gin marac acel ma omyero wagwokke kwede. Gin ango?

6. Tam ango ma twero gengowa me nongo adwogi maber ki i cam me cwiny mogo ma Jehovah miyo?

⁶ I kare mogo watwero bedo ki tam ni cam me cwiny mogo pe tye me kony botwa, dok man twero gengowa me nongo adwogi maber ki iye. Me labolle, ka wang Baibul moni nen calo pe gudo kwowa kono? Nyo ka pe watye i kin jo ma kiyubo buk moni tutwalle pigi kono? Tika wangiyo ngec ma kit meno wiye wiye keken​—nyo gwok pe wakwanogi kulu? Ka tye kumeno, twero bedo ni watye ka kwero ngec ma romo konyowa i yo madit adada. Watwero gwokke ki i owic ma kit meno nining? Ma pire tek loyo, myero ngat acel acel i kinwa onge ni Lubanga aye Wang It me camwa me cwiny ducu. Jehovah otiyo ki lanebi Icaya me wacone ni: “An a Rwot Lubangawu amito pwonyowu wek wubed maber.” (Ic. 48:17) Wabinongo kony ki i nyamo tam adek ma kimiyo i kit me nongo adwogi maber ki i kwano wang Baibul ducu kacel ki cam me cwiny mapatpat ma wanongo.

7. Pingo myero wakwan Baibul ki wic ma mito niang maber?

⁷ Kwan ki wic ma mito niang maber. Baibul otito ka maleng ni ‘Ginacoya ducu ma yam gicoyo, gicoyo pi teko pa cwiny pa Lubanga dok konyo.’ (2 Tem. 3:16) Ada, lok mogo ma i Baibul onongo wiati kicoyo bot ngat acel nyo bot gurup mo pa dano. Meno aye gin mumiyo omyero wakwan Ginacoya ki miti me niang. Omego mo owacci, “Ka atye ka kwano Baibul, aketo i wiya ni atwero nongo pwony mapol ki i lok ma akwano-ni.” Dok omedo ni: “Bedo ki tam ma kit meno tugo mitina me ngiyo lokke i yo matut.” Ma peya wakwano Lok pa Lubanga, omyero kong waleg bote pi wic ma mito niang maber, ki ryeko me ngeyo jami ducu ma Jehovah mito ni wapwony.​—Ejira 7:10; kwan Yakobo 1:5.

8, 9. (a) Ka watye ka kwano Baibul, lapeny ango ma watwero penye kwede? (b) Jami ma i Ginacoya ma nyuto ka ngat moni opore me tic macalo laelda tittiwa gin ango i kom Jehovah?

⁸ Peny lapeny. Ka itye ka kwano Baibul, cung manok ci ipenye ki lapeny calo: ‘Man wacca gin ango i kom Jehovah? Atwero tic kwede nining i kwona? Atwero tic kwede me konyo jo mukene nining?’  Ka walwodo lok i kom lapeny macalo magi, wabiniang jami mapol ki i kwanwa me Baibul. Me labolle, tam kong i kom Ginacoya ma loko i kom jami ma mitte wek ngat moni obed mupore me tic macalo laelda. (Kwan 1 Temceo 3:2-7.) Kit macalo jo mapol i kinwa pe gubedo luelda-ni, watwero bedo ki tam ni meno pe gudowa. Kadi bed kit meno, ka watamo i kom lagam pi lapeny ma gitye pinyi, ci wabineno ni jami ma kicoyogi me nyuto ka ngat moni tye mupore me tic macalo laelda bene twero konyo wan ducu i yo mapol.

⁹ Man wacca gin ango i kom Jehovah? Jami magi ma Jehovah oweko kicoyo i tyeng man nyuto ni Jehovah mito ni jo ma gitye ki tic i kacokke myero gukwo i yo mupore. En mito ni gunyut lanen maber, dok bene en bipenyogi i kom kit ma gugwoko kwede kacokke ma en “owilogi ki remo me wel madwong pa Wode.” (Tic 20:28) Jehovah mito ni wabedo agonya i cing lukwat ma en ocimogi. (Ic. 32:1, 2) Ma lubbe ki meno, jami ma Ginacoya otito me nyuto ka ngat moni opore me bedo laelda poyo wiwa i kom kit ma Jehovah paro kwede piwa.

10, 11. (a) Ka watye ka kwano jami ma mitte wek ngat moni odok laelda, watwero tic ki ngec meno i kwowa nining? (b) Watwero tic ki ngec man me konyo jo mukene nining?

¹⁰ Atwero tic kwede nining i kwona? Kare ki kare laelda myero kong ongine kekene i yo me cwiny, wek onen ka ma etwero timo iye alokaloka. Omego ma “mito tic me bedo latel jo pa Lubanga” myero oket tek me kwo ma lubbe ki tira man. (1 Tem. 3:1) Ki lok ada, Lakricitayo acel acel nongo pwony ki i tyeng magi kit macalo giloko i kom jami ma Jehovah mito ki bot wan ducu. Me labolle, Lukricitayo ducu myero gubed ki neno mupore ki dok wic makwiri. (Pil. 4:5; 1 Pet. 4:7) Ka luelda gitemme me ‘bedo lanen maber bot romi,’ wan bene watwero nongo pwony ki botgi kun ‘walubo niyegi.’​—1 Pet. 5:3; Ibru 13:7.

¹¹ Atwero tic kwede me konyo jo mukene nining? Watwero tic ki Ginacoya man ma nyuto ka ngat moni opore me tic macalo laelda bot jo ma gitye ki miti me ngeyo lok ada nyo bot lutino kwanwa me Baibul, wek guniang apokapoka ma tye i kin luelda pa Lacaden pa Jehovah ki lutela dini pa Lukricitayo ata-ni. Medo i kom  meno, ka watye ka kwano jami ma gicoyo i tyeng magi, wiwa twero po i kom kit ma luelda ma i kacokkewa gitute matek me konyowa. Lwodo lok i kom jami ma gitimo piwa biweko ‘waworo jo ma tye ka tic matek i kinwa.’ (1 Tec. 5:12) Ka wamedde kiworo jo magi ki cwinywa ducu, cwinygi bene bimedde ki bedo yom.​—Ibru 13:17.

12, 13. (a) Watwero tic ki jami ma watye kwede me kwedo lok nining? (b) Mi kong labol ma nyuto kit ma watwero niang kwede lok mo ma pe kitito ka maleng.

¹² Kwed lok. Ti ki jami me kwedo lok ma gitye me yenyo ngec macalo magi:

• Anga ma ocoyo but Ginacoya man?

• Ka kwene ki dok awene ma kicoyo lok man iye?

• Gin ango ma pire tek ma otimme i kare ma kitye ka coyo buk man me Baibul-li?

Kodi ngec macalo man twero weko icako tam i kom jami mogo ma niang iye pe twero bedo yot.

¹³ Me labolle, nen kong Ejekiel 14:13, 14, ma kwanne ni: “‘Ka ce inen lobo timo bal i koma kun turo cikka, abiryeyo cinga ci ajwiko cam woko ki iye. Abicwalo kec neko dano ma gibedo iye kacel wa ki lee ducu. Kadi bed jo adek-ki, Nua, Daniel ki Yubu onongo gibedo kunnu, kitgi ma atir gire bilaro kwogi gin kengi,’ man Lubanga [Jehovah] ma owaco.” Ka wakwedo lok man matut, wanongo ni but buk man pa Ejekiel-li kicoyo i mwaka 612 K.M.P. I kare meno, onongo dong Nua ki Yubu guto woko cencwari mapol ata angec, kun Lubanga onongo pud wiye po i kom jami ma gutimo pi gwoko gennegi. Ento Daniel onongo pud tye kwo i kare meno. Ki lok ada, twero bedo ni en onongo pud tye mwaka 20 ki wiye i kare ma Jehovah owacci kite atir calo pa Nua gin ki Yubu. Pwony ango ma wanongo? Jehovah neno dok keto cwinye i kom jami mabeco ma luticce ma lugen gitimo, kadi wa jo ma pud gitino.​—Jab. 148:12-14.

14. Bukkewa mapol ma kigoyogi pi jo matino i kareni konyogi nining, dok twero konyo jo mukene nining? (Nen cal ma tye i pot karatac 28.)

¹⁴ Kit macalo waneno ni kwano Lok pa Lubanga ducu kelo adwogi maber-ri, watwero bene nongo adwogi maber ki i cam me cwiny ducu ma watye kwede. Nen kong labol mogo. Jami ma opore pi jo matino. I mwaki mogo mukato cokcok-ki, bukkewa mapol ma wabedo ka goyone onongo tye pi jo matino. ^[1] Tye jami mogo ma kiyubo me konyogi me lweny ki dic ma gikato ki iye ki i cukul nyo i kare me bulu. Wan ducu watwero nongo adwogi maber ki i kwano jami man nining? Ka wakwano bukke man, bipoyo wiwa i kom jami ma jo matino ma lugen gikato ki iye. Macalo adwogine, wabedo atera me konyogi ki dok me cuko cwinygi.

15. Pingo myero jo muteggi gubed ki miti i kom jami ma kicoyo pi jo matino?

¹⁵ Jami mapol ma kiloko iye i bukke magi ma kwako jo matino-ni pe ni obedo jami ma welo botgi. Wan ducu myero wacung matek i niyewa, wadi cwinywa, wakwer dic ma a ki bot luwotwa, dok wagwokke ki galowang kacel ki lurem maraco. Kiloko i kom jami magi kacel ki mukene i bukke ma kicoyo pi jo matino. Tika Lukricitayo muteggi myero gutam ni dwoko rwomgi piny ka gikwano jami ma kicoyo pi jo matino? Pe wacel! Kadi bed ni kicoyo i yo ma gudu cwiny jo matino, ngec ma iye cung i cik ma iye lac dok wan ducu pud watwero nongo adwogi maber ki i kom ngec meno ma kikwanyo ki i Ginacoya-ni.

16. Gin ango dok mukene ma bukkewa konyo jo matino me timone?

 ¹⁶ Mapat ki konyo jo matino me lweny ki peko, bukkewa konyogi me dongo i yo me cwiny dok bene nyikogi cok bot Jehovah. (Kwan Latitlok 12:1, 13.) Lukricitayo muteggi ducu gitwero nongo adwogi mabeco ki iye. Me labolle, Awake me April 2009, tye ki pwony ma wiye tye ni “Young People Ask . . . How Can I Make Bible Reading Enjoyable?” [“Lapeny pa Jo Matino . . . Atwero Nongo Mit pa Kwano Baibul Nining?”] Pwony man kimiyo iye tam mabeco mapol ki bene kiketo bok mo ma watwero ngolone ci wagwoko i Baibulwa wek obed yot ka wamito tic kwede. Tika jo muteggi bene dong gunongo adwogi maber ki i pwony meno? Lamego mo me mwaka 24 ma tye ki lutino owaco ni: “Pol kare onongo anongo kwano Baibul pe yot tutwal. Ento aketo pwony man i tic dok atye ka kwano Baibul nino ducu. Kare ducu nongo atye ki miti me kwano Baibul. Ma naka yam peya abedo ki miti me kwano Baibul calo i kareni.”

17, 18. Watwero nongo adwogi maber ki i jami ma kicoyo pi lwak nining? Mi labol.

¹⁷ Jami ma kicoyo pi lwak. Nicakke i 2008 wabedo ka nongo ber pa Wi Lubele me akwana i kacokke, ma kicoyo tutwalle pi Lucaden pa Jehovah. Ento magajinwa ma kicoyo tutwalle pi lwak kono? Tika watwero bene nongo adwogi maber ki iye? Tam kong i kom lapor man. Ket kong ni, ma pud peya kimiyo pwony ma kiyubo pi lwak, iniang ni meno ngat mo ma ilwongo obino i Cokke. Labongo akalakala ibibedo ki yomcwiny. Ka kitye ka miyo pwony, twero bedo ni tammi tye i kom welo meno. Watwero wacone ni nongo itye ka goyo kit ma en tye ka winyo kwede pwony meno. Macalo adwogine, pwony man bigudo cwinyi adada dok ibibedo ki pwoc madit adada.

¹⁸ Watwero bene nongo pwony i yo acel-li ka wakwano jami ma kicoyo pi lwak. Me labolle, Wi Lubele pi lwak nyamo Ginacoya i yo ma kadi wa ngat ma pe Lacaden pa Jehovah twero niang maber. Man bene kwako pwony mapol ma tye i kabedowa me intanet me jw.org, calo pwony ma wiye tye ni “Lapeny ma Kigamo me Baibul” ki “Lapeny ma Kipenyo Kare ki Kare” [“Frequently Asked Questions.”] Ka wakwano jami magi, ngecwa kacel ki pwocwa i kom lok me ada ma onongo dong wangeyo con bidongo. Medo i kom meno, watwero pwonyo yo mapat dok mayot i kit me nywako niyewa ka watye i ticwa me pwony. I yo acel-li, Awake! pol kare jingo niyewa ni Lubanga tye ada, dok weko wapwonyo kit me tito pi niyewa labongo lworo.​—Kwan 1 Petero 3:15.

19. Watwero nyuto pwocwa i kom cam me cwiny ma Jehovah miyo nining?

¹⁹ Ki lok ada, Jehovah ominiwa jami mapol ma twero cobo ‘mitiwa me cwiny.’ (Mat. 5:3) Myero wamedde wunu ki tic ki cam me cwiny magi ma kiyubo piwa-ni. Ka watimo man, ci wabinyuto pwocwa bot Ngat ma tye ka pwonyowa wek wanong adwogi mabeco.​—Ic. 48:17.