1, 2. 1) Jehová Diosan Testigonakapajja, ¿kunjamsa Diosan Arupar uñjtanjja? 2) Jumarojja, ¿Bibliat kawkïr cheq liytʼañas wal gusttamjja?

DIOSAN ARUPAROJJA Jehová Diosan Testigonakapajj wal munastanjja. Ukanwa suma ewjjtʼanaksa, chuymachtʼir arunaksa, jutïrit parlir arunaksa jikjjattanjja (Rom. 15:4). Diosan Aruparojj janiw jaqen amuyunakapäkaspas ukham uñjktanti, “jan ukasti Diosan arunakapjamwa” uñjtanjja (1 Tes. 2:13).

² Jumarojja, Bibliat mä cheq liytʼañajj wal gustpachätamjja. Yaqhepanakajj Mateo, Marcos, Lucas, Juan qellqatanak liytʼasajja, Jehová Diosajj kunjam chuymanisa, ukwa Jesusan sarnaqäwip liytʼasajj amuyapjje (Juan 14:9). Yaqhepanakasti profecianakat parlir libronakwa liytʼapjjaraki. Ukanakat maynïrejj Apocalipsis librowa. Ukansti, kunatejj akat mä qawqha tiempot paskani uka toqenakatwa parli (Apo. 1:1). Salmos, Proverbios qellqatanakanjja, suma ewjjtʼanaka ukhamarak chuymachtʼkir arunakaw jikjjatasiraki. Cheqansa, Bibliajj taqenitak qellqatawa.

3, 4. 1) ¿Kunjamsa jumajj Bibliat apstʼat qellqatanakar uñjta? 2) Bibliat apstʼat qellqatanakasajja, ¿khitinakatak wakichtʼatasa?

³ Niyakejjay Diosan Arupar wal munasstanjja, Bibliat apstʼat qellqatanakarus ukhamarakiw uñjtanjja. Jehová Diosajj  libronaka, folletonaka, revistanaka ukhamarak yaqha ukham qellqatanak toqe yatichkistu ukanakjja, wali wakiskiritwa uñjtanjja. Ukanakaw ajay toqet jan ikjañatakisa, ‘suma iyawsäwinïñatakis’ yanaptʼistu (Tito 2:2).

⁴ Bibliat apstʼat qellqatanakajja, Jehová Diosan taqe Testigonakapatak lurtʼatawa. Yaqhep qellqatanakajj wayn tawaqonakatak lurtʼatawa, yaqhepasti awk taykanakatakiraki. Ukampis qellqatanakasan utjki uka yatichäwinakata, Internetan uchaski uka yatichäwinakat waljajja, jan Testigöpki jupanakatak wakichtʼatawa. Ukham walja qellqatanak utjatapajja, Jehová Diosajj “mä suma manqʼäwi” taqe markanakataki wakichä sasin arskäna uk phoqatapwa uñachtʼayi (Isa. 25:6).

5. ¿Kunatsa janipun pächasiñasäki?

⁵ Biblia liytʼañatakisa, Bibliat apstʼat qellqatanak liytʼañatakisa taqeniw jukʼamp tiemponïñ munpachätanjja. Ukampis janiw taqpachpun sumpach liytʼktanti. Ukhamäkchi ukasa, Biblia sapüru liytʼañataki chʼamachasitas uñjasasa, Bibliat jukʼamp yatjjatañataki chʼamachasitas uñjasasa, Jehová Diosajj wal kusisi, uka toqet janipuniw pächasiñasäkiti (Efe. 5:15, 16). Ukampisa, ¿kuna toqetsa amuyasiñasäspa? Uka toqet jichhajj amuytʼañäni.

6. ¿Kunatsa yaqhep yatichäwinak jan liyksna?

⁶ Awisajja, Biblia liyisasa jan ukajj Bibliat apstʼat qellqatanak liyisasa, yaqhep yatichäwinakajj janis jiwasatakjamäkaspa ukham amuysna. Amuytʼañataki, Bibliankir mä cheqasa jan ukajj jan Testigöpki jupanakatak mä yatichäwisa jan jiwasatakjamäkchi ukhajja, ¿kunsa lurañasa? Uka yatichäwinaktï ina ukhamak liysna, jan ukajj jan liyjjsna ukhajja, uka qellqatanakajj kuna suma yatichäwinakanis uk janiw yatksnati. Ukampis aka toqenakat amuytʼañaw wakisispa. Taqe yatichäwinakajj Jehová Diosatwa juti, uk janipun armañäniti. Jehová Diosajja, Isaías profeta toqejj akham sänwa: “Nayätwa [Jehová] Tatitu Diosamajja, nayasti kunatejj jumatakejj askïki ukwa yatichsma” sasa (Isa. 48:17). Aka yatichäwinjja, kuna yanaptʼanaktï Diosajj churkistu ukanakat sum yatjjatañatakejja, kunas yanaptʼistaspa ukwa kimsa toqet yatjjataskañäni.

7. ¿Kunatsa jukʼamp yatjjatañ amtampejj Diosan Arup leyiñasa?

⁷ Jukʼamp yatjjatañ amtampiw liyiñasa. “Taqe Qellqatasti Diosan amuytʼayatawa, askirakiw[a]” sasaw Bibliajj qhanañchi (2 Tim. 3:16). Biblianjja, mä qawqha cheqanakajj mä jaqetakiki jan ukajj mä qawqha jaqenakatakikiw qellqasïna, ukatwa jukʼamp yatjjatañ amtampejj leyiñasa. Mä jilatajj akham siwa: “Biblian mä sarnaqäwit liytʼasajja, walja yatichäwinak yateqañ amtampiw liytʼta. Jukʼamp sum amuytʼañatakis chʼamachasiraktwa” sasa. Janïr Biblia liytʼkasajja, jukʼamp yateqañatakisa, kunanak yateqañastï Diosajj munki ukanak amuytʼañatakisa, yanaptʼapwa mayisiñasa (Esd. 7:10; Santiago 1:5 liytʼañataki).

8, 9. 1) ¿Kunsa Biblia liykasajj jisktʼasiñasa? 2) Irpir chuymaninakataki utjki uka mayitanakajja, ¿kunsa Jehová Diosat yatichistu?

⁸ Jisktʼasiñasawa. Biblia liykasajja, akham sasaw jisktʼasiñasa: “¿Kunsa akajj Jehová Diosat yatichitu? ¿Kunjamsa yanaptʼitaspa? ¿Kunjamsa akampejj yaqhanakar yanaptʼirista?” sasa. Ukham jisktʼasiñaw Bibliat jukʼamp yatjjatañatak yanaptʼistani. Amuytʼañataki, kuna mayitanaktï irpir chuymaninakajj phoqapjjañapäki uka toqet amuytʼañäni (1 Timoteo 3:2-7 liytʼañataki). Jiwasat jila partejja, janiw irpir chuymanïktanti. Ukatwa uka mayitanakajj janis jiwasatakjamäkaspa ukham  amuysna. Ukampis, aka tʼaqa qalltan saniwayktan uka kimsa jisktʼanakarjam Biblia liyisin amuytʼañäni ukhajja, walja yatichäwinakwa jikjjatsna. Uk jichhajj uñjañäni.

⁹ “¿Kunsa akajj Jehová Diosat yatichitu?” Irpir chuymaninakan phoqapjjañapatakejja, Jehová Diosajj walja mayitanakwa Biblian qellqayawayi. Uka mayitanakjja, tamapar sum uñjapjjañapataki amtampiw Jehová Diosajj churawayi. Irpir chuymaninakajja, tamankirinakatak yateqaskayäpjjañapawa. Janiw ukakïkiti, ‘Yoqapan wilapampi alasiwayki’ uka tamaparojja, kunjamsa uñjasipki uka toqetsa Jehová Diosajj cuentwa irpir chuymaninakar mayini (Hech. 20:28, NM). Irpir chuymaninakampi suma uñjatäsajja, kusisita jakasiñaswa Jehová Diosajj muni (Isa. 32:1, 2). Ukhamasti, irpir chuymaninakajj taqe uka mayitanak phoqapjjañapa yatisajja, Jehová Diosajj jiwasat llakisitapwa amuytanjja.

10, 11. 1) Irpir chuymaninakajj phoqapjjañapäki uka mayitanakat amuytʼañajja, ¿kunjamsa yanaptʼistaspa? 2) Uka mayitanakampejja, ¿kunjamsa yaqhanakar yanaptʼsna?

¹⁰ “¿Kunjamsa yanaptʼitaspa?” Irpir chuymaninakajja, mayitanakarjam phoqasipkiti janicha uk sapa kutiw amuytʼapjjañapa, ukhamatwa kunanakansa jukʼamp chʼamachasipjjañapa uk yatipjjani. Mä jilatatï irpir chuymanïñ munchi ukhajja, uka mayitanak sum yatjjatañapawa, ukatsti ukarjam sarnaqañatakiw chʼamachasiñaparaki (1 Tim. 3:1). Cheqansa, irpir chuymaninakajj phoqapjjañapäki uka mayitanakat amuytʼañajja, yanaptʼistaspawa. ¿Kunatsa? Jehová Diosajja, uka mayitanakarjamaraki taqe cristianonakajj sarnaqsna ukwa muni. Sañäni, taqeniw ‘suma chuymanïñasa’ ‘suma amuytʼampis sarnaqañasaraki’ (Fili. 4:5; 1 Ped. 4:7). Irpir chuymaninakajj tamatak yateqaskay sarnaqapjje ukhajja, jupanakat yateqassnawa, jupanakjamaw Diosar iyawsaraksna (1 Ped. 5:3; Heb. 13:7).

¹¹ “¿Kunjamsa akampejj yaqhanakar yanaptʼirista?” Irpir chuymaninakajj phoqapjjañapäki uka mayitanakjja, Bibliat yateqañ munirinakarusa jan ukajj Bibliat yateqerinakarusa liytʼayaraksnawa. ¿Kunatakis liytʼaysna? Diosan markapan utjki uka irpir chuymaninakajj janiw cristianöpjjtwa sirinakan pʼeqtʼirinakapjamäkiti, uk amuytʼayañatakiw liytʼañasa. Irpir chuymaninakajj phoqapjjañapäki  uka mayitanak uñakiptʼañajja, kunanaktï jupanakajj jiwasar yanaptʼañatak lurasipki uk amuytʼañatakiw yanaptʼistani. Ukaw taman irnaqtʼapki uka irpir chuymaninakar respetañatak yanaptʼistani (1 Tes. 5:12). Wal irnaqtʼapjjatapat jukʼamp respetañäni ukajja, jukʼamp kusisitaw jupanakajj jikjjatasipjjani (Heb. 13:17).

12, 13. 1) Jukʼamp yatjjatañataki yanaptʼanakajj utjki ukanakampejja, ¿kunanakatsa yatjjatsna? 2) ¿Kunjamsa jukʼamp yatjjatañajj yanaptʼistaspa? Uk mä uñachtʼäwimpi qhanañchtʼma.

¹² Yatjjatañasawa. Jukʼamp yatjjatañataki yanaptʼanakajj utjki ukanakampejja, aka toqenakatwa Bibliat jukʼamp yatjjatsna:

• ¿Khitis aka cheq qellqawayi?

• ¿Kawkinsa, kunapachas qellqasïna?

• Aka librojj qellqaskäna ukhajja, ¿kunanakas pasäna?

Uka toqenakat jisktʼasiñaw Bibliat jukʼamp yatjjatañatak yanaptʼistani.

¹³ Ukatakejja, Ezequiel 14:13, 14 qellqatat amuytʼañäni, ukanjja siwa: “Mä markatejj naya toqe sartani, jucha lurasa, janiraki taqe chuymampi arkkitaniti, uka markatakisti amparajj aytä mutuyañataki, kuna manqʼaña imasitanakapatejj utjki ukanaksa apaqarakïwa. Uka markjjarusti machʼa apayanirakëjja, jaqenakasa, uywanakasa manqʼatjamawa jiwarapjjani. Uka markantejj Noé, Daniel ukhamaraki Job ukanakatejj jakapjjaspajja, uka kimsanikiw qhespipjjaspa aski jaqenakäpjjatap layku. Naya [Jehová] Tatituw ukjja arsta” sasa. Uka qellqatat jukʼamp yatjjatasajja, uka tʼaqanakajj 612 nayra pacha maranakanwa qellqasïna. Uka tiempotakejja, Noé chachasa Job chachasa jiwatäjjapjjänwa. Ukampis Danielajj jakaskänwa, niya 20 maranïpachänwa. Ukapachaw Jehová Diosajj Noé chachata, Job chachata, Daniel waynata parlkasajj ‘aski jaqenakäpjjewa’ sasin säna. ¿Kunsa uka qellqatajj yatichistu? Jehová Diosajj jupat jan jitheqtir servirinakaparojja, waynäpasa tawaqöpasa, taqeniruw munasi (Sal. 148:12-14).

14. Wayn tawaqonakataki lurat qellqatanakajja, ¿kunjamsa jupanakarusa, yaqhanakarus yanaptʼi? (23 janankir foto uñjjattʼam).

¹⁴ Kunjamtï uñjaniwayktanjja, Bibliat jukʼampiw yatjjatsna. Bibliat apstʼat qellqatanakatsa yatjjataraksnawa. Uka toqet mä qawqha amuytʼañäni. Wayn tawaqonakataki qellqatanaka. Aka qhepa maranakanjja, walja yatichäwinakaw jupanakatak qellqasiwayi. ^[1] Yaqhep yatichäwinakajja, escuelan jan waltʼäwinakar saykatañataki ukhamarak qʼajjo wayn tawaqonakajj jan waltʼäwinakan uñjasipki ukanakar saykatapjjañapatakiw wakichtʼasiwayi. Uka yatichäwinakajja, ¿kunjamsa jilïrinakarus yanaptʼistaspa? Wayn tawaqonakajj kuna jan waltʼäwinakansa uñjasipjje uk amuytʼañatakiw yanaptʼistaspa, ukham amuyasasti jupanakarojj yanaptʼsnawa, jan walinakar saykatapjjañapatakis chʼamañchtʼaraksnawa.

15. Wayn tawaqonakataki wakichtʼat qellqatanakjja, ¿kunatsa jilïrinakajj liytʼapjjañaparaki?

¹⁵ Bibliat apstʼat uka qellqatanakajja, janiw wayn tawaqonakatakik luratäkiti, jan ukasti jilïrinakarus yanaptʼarakispawa. Taqeniw iyawsäwis arjjatañasa, chuymasan munañaparjam jan sarnaqañatakis chʼamachasiñasa. Ukatsti, jan walinak lurañataki mayninakajj wiytapkistu ukarusa, taqenirakiw saykatañasa, jan wali kusistʼäwinakatsa jarkʼaqasiñasarakiwa. Wayn tawaqonakataki wakichtʼat qellqatanakajja, taqe ukanakatwa parli, ukham yaqha yatichäwinakatsa parlarakiwa. Jumatï jilïrëjjsta ukhajja, ¿uka qellqatanakajj wayn tawaqonakatakikiwa sasinti amuyañama? Janiwa. Uka qellqatanakajj wayn tawaqonakatakjam luratäkchi ukasa, Biblian aski yatichäwinakaparjam  wakichtʼatawa. Ukhamasti taqeniw uka qellqatanak liytʼapjjaspa.

16. Bibliat apstʼat qellqatanakajja, ¿kunjamsa wayn tawaqonakar yanaptʼaraki?

¹⁶ Bibliat apstʼat qellqatanakasajja, wayn tawaqonakarojj janiw jan waltʼäwinakaru saykatañatakik yanaptʼawaykiti, jan ukasti ajay toqen jiltapjjañapatakisa, Jehová Diosar jakʼachasipjjañapatakisa yanaptʼawayarakiwa (Eclesiastés 12:1, 13 liytʼañataki). Jilïrinakarusa uka qellqatanakajj yanaptʼarakispawa. Amuytʼañataki, ¡Despertad! abril, 2009 revistanjja, mä yatichäwiw mistüna, uka yatichäwejj “Los jóvenes preguntan. ¿Cómo disfrutar la lectura de la Biblia?” satänwa. Uka yatichäwinsti, walja ewjjtʼanakaw utjäna, mä recuadros utjarakïnwa, uka recuadrojj khuchsusina Bibliar imañatakïnwa. Uka yatichäwejja, ¿jan wayn tawaqöpki ukanakar yanaptʼawayarakiti? Casarata ukhamarak wawani mä kullakajj akham siwa: “Biblia liyiñajj nayatak chʼamakïnwa. Jichhasti, uka qellqatan mistkäna uka ewjjtʼanakaparjama ukat recuadrojj utjkäna ukarjam Biblia liyiñajja, nayatak wali sumäjjewa. Biblian utjki uka libronakas kunjamsa mä toqetak sum qhanañchi uksa amuyjjaraktwa, kunjamatï mä dibujojj wali suma coloranakampi lurtʼatäkejja ukhamawa. Jichhajja, Biblia liyiñajj wal gustitu, janipuniw kunapachas ukham gustirïkituti” sasa.

17, 18. Jan Testigöpki jupanakatak Bibliat apstʼata qellqatanakajja, ¿kunjamsa jiwasar yanaptʼarakistaspa? Uk mä uñachtʼäwimp qhanañchtʼma.

¹⁷ Jan Testigöpki jupanakatak wakichtʼat qellqatanaka. 2008 marat aksarojja, Jehová Diosan Testigonakapatakejj Yatiyañataki (taman yatjjatañataki) revistaw lurasjje. Ukampis ¿jan Testigöpki ukanakatak lurata revistajj yanaptʼarakistaspati? Akham amuytʼañäni. Jumajj Tantachasiñ Utankkasmas ukham sañäni, taqenitaki arstʼäwi janïr qalltkipanjja, tantachäwir jutañapataki invittʼkayäta uka jaqe purinispa. Cheqansa jumajj wali kusisitaw jikjjatasisma, janirakiw jupatsa armaskasmati. Arstʼäwi istʼkasinsti, arstʼäwejj kunjamsa jupar yanaptʼani uka toqets lupʼiraktawa. Jumas jupa lanti istʼkasma ukhamawa. Arstʼäwi tukuyjjepansti, arstʼäwejj wali wakiskirïtapwa amuytajja ¿janicha?

¹⁸ Jan Testigöpki jupanakatak Bibliat apstʼata qellqatanak liytʼasajja, ukhamarakiw pasaspa. Amuytʼañataki, Yatiyañataki (yatiyir sarañataki) revistanjja, yatichäwinakajj jan Testigöpki jupanakatakjam wakichtʼatawa. Internetan jw.org cheqan utjki uka yatichäwinakas ukham wakichtʼatarakiwa. Ukanakat yaqhepajj “Preguntas sobre la Biblia”, “Preguntas frecuentes” ukanakawa. Jiwasatï uka yatichäwinak liytʼañäni ukhajja, Biblian cheqa yatichäwinakapar jukʼamp munasiñatakiw yanaptʼistani. Ukatsti, kunarutï iyawsktan ukanakat yaqhanakar jukʼamp sum qhanañchañsa yateqarakiñäniwa. ¡Despertad! revistasti, Diosan utjatapat jan pächasiñasataki, ukatjja kunarutï iyawsktan ukanak arjjatañatakiw yanaptʼarakistani (1 Pedro 3:15 liytʼañataki).

19. Kunanaktï Diosajj churkistu ukanakat yuspäratasjja, ¿kunjamsa uñachtʼayañäni?

¹⁹ Jehová Diosajja, walja ewjjtʼanaka ukhamarak walja yatichäwinakwa jiwasan askisatak churawayistu (Mat. 5:3). Ukhamasti, kunanaktï Diosajj churkistu uka yanaptʼanakat yatjjatasipkakiñäni, ukhamatwa taqe kunsa jiwasan askisatak yatichiri Diosarojj yuspäratas uñachtʼayañäni (Isa. 48:17).