1, 2. (a) Ano an paghiling kan Mga Saksi ni Jehova sa Bibliya? (b) Ano an paborito mong kabtang kan Bibliya?

MAHALAGANG marhay para sa Mga Saksi ni Jehova an Bibliya. Nagtatao iyan sa sato nin masasarigan na mga instruksiyon, karangahan, asin paglaom. (Roma 15:4) Para sa sato, an Bibliya bakong koleksiyon nin mga ideya nin mga tawo. Kundi, inako niyato iyan bilang “kun ano man nanggad iyan, bilang tataramon nin Diyos.”—1 Tes. 2:13, NW.

² Gabos kita siguradong may paboritong kabtang kan Bibliya. An iba, gustong-gustong basahon an mga Ebanghelyo, na ipinapahiling an magagayon na kuwalidad ni Jehova na ipinabanaag kan saiyang Aki. (Juan 14:9) Paborito man kan iba an mga libro sa Bibliya dapit sa mga hula—arog kan Kapahayagan, na ipinapahiling an mga bagay na ‘kaipuhan mangyari sa madaling panahon.’ (Kap. 1:1, An Banal na Biblia) Asin siguradong dakul sa sato an naranga kan Salmo asin nakanuod nin praktikal na mga leksiyon sa libro nin Talinhaga. Tunay na sarong libro para sa gabos an Bibliya!

3, 4. (a) Ano an paghiling niyato sa satong mga publikasyon? (b) Anong mga publikasyon an nareresibi niyato na isinurat para sa espesipikong grupo?

³ Arog kan Bibliya, mahalaga man na marhay sa sato an mga  publikasyon na basado sa Bibliya. Halimbawa, pinapahalagahan niyato an nareresibi tang espirituwal na kakanon arog kan mga libro, brosyur, magasin, asin iba pang literatura. Aram niyato na an mga probisyon na ini na hali ki Jehova makakatabang na magdanay kitang alerto saka basog sa espirituwal, asin “makusog an pagtubod.”—Tito 2:2, NW.

⁴ Apuwera sa mga publikasyon na ginibo para sa mga Saksi ni Jehova, nakakaresibi man kita nin mga publikasyon na basado sa Bibliya na isinurat para sa espesipikong grupo. May mga publikasyon na espesipikong dinisenyo para sa mga hoben asin an iba, para sa saindang mga magurang. An kadaklan sa mga publikasyon na iniimprenta asin nasa website niyato inandam para sa mga bakong Saksi. Ipinapahiling sa sato kan siring na abundang espirituwal na kakanon na inuutob ni Jehova an saiyang panuga na ‘maandam siya nin bangkete nin masiram na mga pagkakan para sa gabos na nasyon.’—Isa. 25:6, BPV. ^[1]

5. Ano an masisiyerto niyatong pinapahalagahan ni Jehova?

⁵ Gusto kan kadaklan sa sato na magkaigwa nin urog pang panahon tanganing mabasa an Bibliya asin an mga publikasyon ta. Makakasiyerto kita na pinapahalagahan ni Jehova an satong mga paghihinguwa na ‘gamiton sa pinakamarahay an satong panahon’ paagi sa regular na pagbasa sa Bibliya asin personal na pag-adal. (Efe. 5:15, 16, NW) An totoo, tibaad bako pirming pareho an oras na ginagamit niyato sa pag-adal sa lambang publikasyon na nareresibi ta. Pero, kaipuhan tang maaraman an sarong daing gayo risang peligro kaiyan. Ano iyan?

6. Ano an puwedeng magin dahilan na mawaran kita kan oportunidad na makinabang sa mga probisyon ni Jehova?

⁶ May peligro na tibaad mawaran kita kan oportunidad na makinabang sa sarong espirituwal na probisyon huling sa paghuna niyato dai iyan aplikado sa sato. Halimbawa, paano kun sa hiling niyato dai man aplikado sa sitwasyon ta an sarong kabtang kan Bibliya? O paano kun bako man para sa sato ginibo an sarong publikasyon? May tendensiya daw kita na basahon sana iyan nin madali o dai na ngani basahon? Kun iyo, tibaad malipasan ta an mahalagang impormasyon na puwedeng makatabang na marhay sa sato. Paano ta malilikayan na mangyari iyan? Inot sa gabos, dapat niyatong tandaan na an Diyos an Gikanan kan espirituwal na mga probisyon na inaako ta. Paagi ki propeta Isaias, sinabi niya: “Ako, si Jehova, an saimong Diyos, an Saro na nagtutukdo sa saimo tanganing makinabang ka.” (Isa. 48:17, NW) Sa artikulong ini, pag-uulayan niyato an tulong suhestiyon na makakatabang sa sato na makinabang sa gabos na kabtang kan Bibliya asin sa manlain-lain na klase nin espirituwal na kakanon na makukua niyato.

7. Taano ta kaipuhan niyatong basahon an Bibliya na may bukas na isip?

⁷ Magbasa na may bukas na isip. Totoo, an ibang kabtang kan Bibliya isinurat kaidto para sa sarong indibidwal o grupo. Pero, malinaw an sinasabi kan Bibliya na “an bilog na Kasuratan ipinasabong nin Diyos asin kapaki-pakinabang.” (2 Tim. 3:16, NW) Kaya, kaipuhan niyatong basahon an Bibliya na may bukas na isip. Sinabi nin sarong brother: “Pag binabasa ko an Bibliya, pirmi kong isinasaisip na may manunudan akong nagkapirang bagay sa sarong kabtang na binasa ko.” Sinabi pa niya: “Pag iyan an isinasaisip ko, napapahiro akong aramon an iba pang nakatagong mga leksiyon.” Bago basahon an Tataramon nin Diyos, marahay na mamibi nguna ki Jehova na tawan kita nin bukas na isip asin kadunungan para masabutan an mga leksiyon na gusto niyang itukdo sa sato.—Esd. 7:10; basahon an Santiago 1:5.

8, 9. Ano an mga puwede tang ihapot sa sadiri pag nagbabasa kita nin Bibliya? (b) Ano an itinutukdo sa sato kan mga kuwalipikasyon para sa Kristiyanong mga elder mapadapit ki Jehova?

⁸ Magbangon nin hapot sa sadiri. Mantang nagbabasa ka nin sarong kabtang kan Bibliya, magpundo paminsan-minsan asin ihapot sa sadiri: ‘Ano an itinutukdo kaini sa sako mapadapit ki Jehova? Paano ko maiaaplikar sa sakong buhay an impormasyon  na ini? Paano ko ini magagamit para tabangan an iba? Kun huhurop-hurupon niyato an siring na mga hapot, siguradong mas makikinabang kita sa satong pagbasa sa Bibliya. Halimbawa, pag-ulayan ta an basado sa Kasuratan na mga kuwalipikasyon para sa Kristiyanong mga elder. (Basahon an 1 Timoteo 3:2-7.) Huling bako man elder an kadaklan sa sato, tibaad sa primero isipon niyato na dikit sana an maitatabang kan mga tekstong ini sa satong buhay. Pero, kun pag-iisipan ta an pira sana sa dakul na posibleng simbag sa nasambit na mga hapot, mahihiling niyato na gabos kita puwedeng makinabang sa dakul na paagi sa lista na ini nin mga kuwalipikasyon.

⁹ Ano an itinutukdo kaini sa sako mapadapit ki Jehova? Sa pagtao ni Jehova kan lista na ini nin mga kuwalipikasyon, ipinahiling niya na igwa siya nin halangkaw na pamantayan para duman sa nombradong mga lalaki na mangangataman sa kongregasyon. Linalauman niya na magigin sindang marahay na halimbawa, asin papanimbagon niya sinda sa kun paano ninda tinatratar an kongregasyon, “na binakal niya kan dugo kan saiyang sadiring Aki.” (Gibo 20:28, NW) Gusto ni Jehova na mamatian niyatong ligtas kita sa irarom kan pangangataman kan ninombrahan na mga katabang na pastor. (Isa. 32:1, 2) Kaya, ipinapagirumdom sa sato kan basado sa Kasuratan na mga kuwalipikasyon na ini para sa Kristiyanong mga elder na talagang nagmamalasakit si Jehova sa sato.

10, 11. Pag binabasa niyato an mga kuwalipikasyon para sa mga elder, paano ta maiaaplikar an impormasyon na ini sa satong buhay? (b) Paano ta magagamit an impormasyon na ini para tabangan an iba?

¹⁰ Paano ko maiaaplikar sa sakong buhay an impormasyon na ini? Sa pana-panahon, dapat na siyasaton nin sarong ninombrahan na lalaki an saiyang sadiri uyon sa espirituwal na mga kuwalipikasyon na ini, na inaaram kun arin an puwede pa niyang pauswagon. Kaipuhan nin sarong brother na “naghihinguwang magin paraataman” na tawan nin maingat na atensiyon an mga kuwalipikasyon na ini huling dapat niyang hinguwahon na maabot an mga iyan sagkod sa pinakamakakaya niya. (1 Tim. 3:1, NW) An totoo, may manunudan an lambang Kristiyano sa nakalistang mga kuwalipikasyon na ini, huling kadaklan kaiyan kahagadan ni Jehova sa gabos na Kristiyano. Halimbawa, kita gabos dapat na magin rasonable asin tultol an isip. (Fil. 4:5; 1 Ped. 4:7) Mantang nagigin “halimbawa sa aripumpon” an mga elder, makakanuod kita sa sainda asin puwede tang ‘arugon an saindang pagtubod.’—1 Ped. 5:3, NW; Heb. 13:7, NW.

¹¹ Paano ko magagamit an impormasyon na ini para tabangan an iba? Magagamit ta an lista nin mga kuwalipikasyon para sa Kristiyanong mga elder  para tabangan an mga interesado o tinutukduan niyato sa Bibliya na mahiling kun paano napapalain an mga elder kan mga Saksi ni Jehova sa mga klero nin Kakristiyanuhan. Asin pag binabasa niyato an mga kuwalipikasyon na ini, magigirumduman ta an ginigibong mga pagpapagal kan mga elder para sa sato. Kun huhurop-hurupon ta an saindang mga pagsasakripisyo, mararom an satong “paggalang sa mga nagpapagal” para sa satong kongregasyon. (1 Tes. 5:12, NW) Asin mantang mas ipinapahiling niyato an satong hararom na paggalang sa mahihigos na mga paraataman na ini, magigin mas maugma man sinda sa saindang paglilingkod.—Heb. 13:17.

12, 13. (a) Ano an puwede tang i-research gamit an mga kasangkapan na igwa kita? (b) Magtao nin halimbawa kun paano puwedeng maipahiling kan iba pang impormasyon an nakatagong mga leksiyon.

¹² Mag-research. Gamit an mga kasangkapan na igwa kita, puwede niyatong hanapon an mga impormasyon arog kan minasunod:

• Siisay an kagsurat kan kabtang na ini kan Kasuratan?

• Sain asin kasuarin ini isinurat?

• Ano an mahalagang mga pangyayari kan isinusurat an sarong partikular na libro sa Bibliya?

Makakatabang an siring na mga impormasyon tanganing mahiling an nakatagong mga leksiyon.

¹³ Halimbawa, pag-isipan an Ezequiel 14:13, 14, na nagsasabi: ‘Kun an sarong daga nagkakasala, asin nagigin bakong maimbod sa sako, uunaton ko an sakong kamot asin rarauton ko an ginigikanan kan saindang kakanon. Mapadara ako nin makuring gutom asin gagadanon ko an mga tawo saka mga hayop. “Maski pa nag-iirok duman idtong tulong lalaki na si Noe, Daniel, asin Job, an ikakaligtas sana kan saindang katanusan iyo an sadiri nindang buhay,” an sabi kan [Soberanong] Kagurangnan na [Jehova].’ (BPV) Kun ma-research kita, maaaraman niyato na an kabtang na ini kan Ezequiel isinurat kan mga 612 B.C.E. Sa panahon na iyan, ginatos na taon nang gadan si Noe asin Job, asin an rekord ninda nin kaimbudan nasa memorya na nin Diyos. Pero, buhay pa kan panahon na iyan si Daniel. Sa katunayan, kan sabihon ni Jehova na matanos si Daniel arog ni Noe asin Job, tibaad ma-20 anyos o labi pa sana siyang 20 anyos kaidto. Ano an manunudan ta digdi? Nahihiling asin pinapahalagahan ni Jehova an kaimbudan kan gabos niyang parasamba, kaiba an mga hoben.—Sal. 148:12-14.

14. Paano nakakatabang sa mga hoben an mga publikasyon na dinisenyo para sa sainda, asin paano man makikinabang an iba sa pagbasa sa mga iyan? (Hilingon an ritrato sa kapinunan kan artikulo.)

¹⁴ Kun paanong makikinabang kita sa pag-adal sa gabos na kabtang kan Tataramon nin Diyos, makikinabang man kita sa gabos na espirituwal na kakanon na makukua niyato. Hilingon ta an pira sanang halimbawa. Publikasyon para sa mga hoben. Sa nakaaging mga taon, para sa mga hoben an kadaklan sa ipinupublikar tang mga literatura. ^[2] Dinisenyo an mga ini para tabangan sindang maatubang an mga panggigipit sa eskuwelahan o an mga kadipisilan sa pagigin tin-edyer. Paano kita gabos makikinabang sa arog kaining mga publikasyon? Kun babasahon ta an mga ini, masasabutan ta an mga problemang inaatubang kan satong maimbod na mga hoben. Dangan, magigin mas madali para sa sato na tabangan asin pakusugon sinda.

15. Taano ta dapat na magin interesado an adultong mga Kristiyano sa mga publikasyon na ginibo para sa mga hoben?

¹⁵ An dakul sa mga problemang tinutukar sa mga publikasyon para sa mga hoben bako sana sinda an nakakaeksperyensiya. Gabos kita kaipuhan na idepensa an satong pagtubod, kontrulon an satong emosyon, labanan an panggigipit nin kairiba, asin likayan an maraot na mga pag-iriba saka libangan. An mga temang ini asin dakul na iba pa, tinutukar sa mga publikasyon na dinisenyo para sa mga tin-edyer. Nakakapamenos daw sa mga adultong Kristiyano an pagbasa nin mga publikasyon na ginibo para sa mga hoben? Dai nanggad! Dawa isinurat an  mga publikasyon na ini sa paaging magugustuhan kan mga hoben, an mga impormasyon diyan basado sa mga prinsipyo sa Bibliya na dai apektado nin panahon, asin gabos kita puwedeng makinabang sa espirituwal na mga probisyon na ini.

16. Sa ano pang paagi nakakatabang sa mga hoben an satong mga publikasyon?

¹⁶ Apuwera sa pagtabang sa mga hoben na maatubang an saindang mga problema, tinatabangan man sinda kan satong mga publikasyon na umuswag sa espirituwal asin maparani ki Jehova. (Basahon an Parahulit 12:1, 13.) Makikinabang man digdi an adultong mga Kristiyano. Halimbawa, kaiba sa isyu kan Awake! na Abril 2009 an artikulong “Young People Ask . . . How Can I Make Bible Reading Enjoyable?” Nagtao an artikulong ini nin nagkapirang suhestiyon saka sarong kahon na puwedeng guntingon asin ipaipit sa Bibliya para magin reperensiya. Nakinabang man daw an mga adulto sa artikulong ini? Sarong 24 anyos na agom asin ina an nagsurat: “Nasasakitan talaga ako sa pagbasa sa Bibliya. Inaplikar ko an mga suhestiyon sa artikulong ini, saka ginamit ko an itinaong kahon. Gustong-gusto ko na ngunyan an pagbasa sa Bibliya. Nahihiling ko kun paano nagkakauruyon asin minabilog nin sarong magayon na mensahe an mga libro sa Bibliya. Ngunyan ko sana nagustuhan nin arog kaini an pagbasa sa Bibliya.”

17, 18. Paano kita makikinabang sa pagbasa sa mga publikasyon na isinurat para sa publiko? Magtao nin halimbawa.

¹⁷ Publikasyon para sa publiko. Puon kan 2008, nagkaigwa kita nin pag-aadalan na edisyon kan An Torrengbantayan, na panginot na isinurat para sa mga Saksi ni Jehova. Pero, may mga magasin man kita na panginot na isinurat para sa publiko. Makikinabang man daw kita sa pagbasa sa mga ini? Pag-isipan an ilustrasyon na ini. Ipamugtak na bago an pampublikong pahayag, nahiling mong nag-atender an saro sa inimbitaran mo. Siguradong naugma ka. Mantang nagpapahayag an ispiker, naiisip mo an saimong bisita. Iniisip mo kun ano an namamatian kan bisita mo sa nadadangog niya asin kun paano iyan makakapabago sa buhay niya. Bilang resulta, nataros an saimong puso asin mas napahalagahan mo an temang ipinahayag.

¹⁸ Puwede man niyatong maeksperyensiyahan an arog kaiyan kun nagbabasa kita nin mga publikasyon na isinurat para sa publiko. Halimbawa, sa pampublikong edisyon kan An Torrengbantayan ipinapaliwanag an mga tema gamit an mga terminong nasasabutan kan mga parabasa na bakong Saksi. Sa arog man kaiyan na paagi isinurat an dakul na artikulong ipinublikar sa jw.org, arog kan nasa seksiyon na “Bible Questions Answered” asin “Parating mga Ihinahapot.” Kun babasahon niyato an impormasyon na ini, mas mararom an satong pakasabot asin pagpapahalaga sa mga katotoohan na dati na niyatong aram. Dugang pa, makakanuod kita nin bagong mga paagi nin pagpapaliwanag sa satong mga tinutubod pag kita nasa ministeryo. Sa kaagid na paagi, regular man na pinapakusog kan Awake! an satong kumbiksiyon na igwa nin tunay na Diyos, asin tinatabangan kita kaiyan na manudan kun paano idedepensa an satong mga tinutubod.—Basahon an 1 Pedro 3:15.

19. Paano niyato maipapahiling an satong pasasalamat ki Jehova para sa itinatao niyang mga probisyon?

¹⁹ Malinaw nanggad, tinatawan kita ni Jehova nin abundang probisyon para mapaniguan an pangangaipo niyato sa “espirituwal na mga bagay.” (Mat. 5:3, NW) Lugod na padagos niyatong basahon asin iaplikar an gabos na espirituwal na probisyon na itinatao sa sato. Paagi kaiyan, maipapahiling niyato an satong pasasalamat sa Saro na nagtutukdo sa sato tanganing makinabang kita.—Isa. 48:17.