1, 2. (a) Met meefien Chón Pwáraatá Jiowa usun ewe Paipel? (b) Menni kinikin lón Paipel ka kon efich?

 KICH Chón Pwáraatá Jiowa sia tongei ewe Paipel. A ngenikich ouruur, ápilúkúlúk me emmwen sipwe tongeni lúkúlúk wóón. (Rom 15:4) Masouen Paipel esap ekiekin aramas nge “wesewesen kapasen Kot.”​—1 Tes. 2:13.

² Ese mwáál, emén me emén a wor kinikinin lón Paipel sia kon efich. Ekkóch ra sani ekkewe Puken Kapas Allim pokiten ra silei napanapéchún Jiowa kewe Jesus a napanapeni. (Joh. 14:9) Ekkóch ra sani ekkewe puken oesini áwewe chék puken Pwärätä, ewe a pwári “met epwe müttir fis.” (Pwär. 1:1) Ekkóch ra kúna ouruur seni ar álleani Kölfel me ekkóch ra pwapwaiti le álleani ekkewe kapasen fén mi álilliséch lón Än Salomon Fos. A ffat pwe Paipel ina ewe puk fán iten aramas meinisin.

3, 4. (a) Met sia meefi usun néúch kewe puk? (b) Ikkefa ekkewe minen álillis seni Paipel ra kawor fán iten chék eú sókkun mwichen aramas?

³ Pokiten sia tongei ewe Paipel, sia pwal tongei néúch kewe puken álillis pún ra alóngólóng wóón Kapasen Kot. Meinisin ekkewe puk, brochure, magazine me ekkewe ekkóch, ra kawor  seni Jiowa. Ra álisikich le pacheéch ngeni Jiowa me akkapéchékkúla ach lúkú.​—Tit. 2:2.

⁴ Chómmóng néúch kewe puk ra kawor fán iten Chón Pwáraatá Jiowa. Iwe nge, mei wor ekkóch puk ra mak fán iten chék eú sókkun mwichen aramas usun chék ekkewe sáráfé me kúkkún are ekkewe sam me in. Lape ngeni ekkewe pwóróus me video wóón ach we website ra ffér fán iten chék aramas esap iir Chón Pwáraatá Jiowa. Ekkena sókkópaten minen álillis ra pwáraatá pwe Jiowa a apwénúetá an we pwon pwe epwe awora sókkópaten emmwen fán iten aramas meinisin.​—Ais. 25:6.

5. Sia lúkúlúk pwe Jiowa a aúcheani met?

⁵ Lape ngenikich sia mochen awatteeló fansoun le álleani ewe Paipel me néúch kewe puk. Nge neman esap léllé ewe fansoun sia áeá le káé eú me eú puk a kawor. Sipwe lúkúlúk pwe Jiowa a pwapwaitikich atun sia áeáéchú ach fansoun le állea me káé ewe Paipel me néúch kewe puk. (Ef. 5:15, 16) Iwe nge, mei wor och mettóch sipwe túmúnúkich seni. Met ena?

6. Met a tongeni efisi péútúlóón álilliséchún minne Jiowa a awora?

⁶ Ika sise túmúnúéch eli sipwe ekieki pwe ekkóch kinikinin Paipel are ekkóch puk rese weneitikich. Ren chék áwewe, epwe ifa ika eú kinikinin lón Paipel, usun ese álilliséch ngeni nónnómuch? Are sise fit lein ekkewe ewe puk a fós usun? Iwe met, sia chék mwittir álleani are sise mwo nge fen álleani? Ika ina, neman epwe péút senikich pwóróus mi aúchea mi tongeni efeiéchúkich? Ifa usun sipwe túmúnúkich seni ena mettóch? Sipwe chemeni pwe meinisin pwóróus mi kawor ra feito seni Jiowa. Iei alon Paipel: “Ngang ewe Samol mi Lapalap om we Kot. Üa aiti ngonuk mine kopwe feiöch ren.” (Ais. 48:17) Lón ei lesen, sipwe pwóróus wóón úlúngát kapasen pesepes repwe álisikich le kúna feiéch seni meinisin minne Jiowa a awora ngenikich.

7. Pwata a lamot sipwe állea Paipel fán ekiek tekison?

⁷ Állea fán ekiek tekison. Pwúngún pwe ekkóch kinikinin ewe Paipel a mak fán iten emén aramas are fán iten eú mwichen aramas. Iwe nge, a ffat alon Paipel ei: “Kapasen lon ekewe Toropwe mi Pin meinisin ra pop seni Ngünün Kot, ra aüchea.” (2 Tim. 3:16) Ina popun a lamot ach ekiek epwe tekison atun sia álleani ewe Paipel. Emén pwiich a áchema ngeni pwisin pwe a tongeni káé pwal ekkóch lesen seni chék eú pwóróus. Ena a tongeni álisi i le weweiti ekkewe lesen rese kon ffat ngeni. Ina popun, me mwen sipwe álleani ewe Paipel mi lamot sipwe tingorei Jiowa pwe epwe ngenikich eú ekiek mi tekison me tipachem pwe sipwe weweiti ekkewe lesen a mochen sipwe káé.​—Esr. 7:10; álleani James 1:5.

8, 9. (a) Atun sia álleani ewe Paipel, ikkefa ekkewe kapas eis sia tongeni pwisin eisinikich? (b) Met sia káé usun Jiowa ren ekkewe napanap a kútta seni ekkewe mwán mi ásimaw?

⁸ Eáni kapas eis. Atun ka álleani ewe Paipel, kopwe mwo kaúló me pwisin eisinuk ekkeei kapas eis: ‘Met ei pwóróus a áiti ngeniei usun Jiowa? Ifa usun upwe tongeni apwénúetá lón manawei? Ifa usun upwe tongeni áeá ei pwóróus le álisi ekkewe ekkóch?’ Atun sia ekilonei ekkena kapas eis, a tongeni alapaaló ach feiéch seni ach álleaan Paipel. Áwewe chék, ewe Paipel a eiteita ekkewe napanap ekkewe mwán mi ásimaw repwe eáni. (Álleani 1 Timoty 3:2-7.) Nge lap ngenikich esap kich mwán mi ásimaw, ina popun neman sipwe ekieki  pwe ena pwóróus ese tongeni álisikich. Nge sipwe áeá ekkena úlúngát kapas eis sia fósun pwe sipwe kúna ifa usun ekkewe napanap Paipel a eiteita ra pwal tongeni álisikich meinisin.

⁹ “Met ei pwóróus a áiti ngeniei usun Jiowa?” Jiowa a eiteita ekkewe napanap ekkewe mwán mi ásimaw repwe napanapeni. A wor an allúk mi tekia fán iten ekkewe mwán mi wisen túmúnú ewe mwichefel. Ei a pwáraatá pwe mi aúchea ewe mwichefel me ren Jiowa. Paipel a apasa pwe a mééni ren “chaan püsin Nöün we.” (Föf. 20:28) Ina popun Jiowa a mochen pwe ekkewe mwán mi ásimaw repwe isetiw eú leenien áppirú mi múrinné, me repwe pwal kúna etittin me ren Kot ren féfférúr ngeni chón ewe mwichefel. A mochen sipwe meefi núkúnúkéch fán ar túmún. (Ais. 32:1, 2) Atun sia álleani ekkewe napanap Jiowa a kútta seni ekkewe mwán mi ásimaw, sia káé úkúkún watteen án Jiowa tongekich.

10, 11. (a) Atun sia álleani ekkewe napanap Kot a kútta seni ekkewe mwán mi ásimaw, ifa usun sipwe apwénúetá lón manawach? (b) Ifa usun sipwe tongeni áeá ei pwóróus le álisi ekkewe ekkóch?

¹⁰ “Ifa usun upwe tongeni apwénúetá lón manawei?” Ika en emén mwán mi ásimaw, kopwe iteitan ekieki ekkewe napanap Kot a kútta sonuk me achocho le ámúrinnééló napanapom. Ika ka “mochen wiseni ewe wisen soumasen mwichefel,” kopwe achocho le eáni ekkewe napanap Kot a kútta sonuk úkúkún óm tongeni. (1 Tim. 3:1) Nge meinisin Chón Kraist ra tongeni káé seni ekkena napanap. Áwewe chék, Jiowa a mochen pwe emén me emén leich esap mochenia moni me pisek, me epwe etiwaéchú waséla. (1 Tim. 6:9, 10; Rom 12:13) Ika ekkewe mwán mi ásimaw, iir “eu lenien apirü ngeni ewe mwich,” iwe sia tongeni káé seniir me “appiru ar luku.”​—1 Pet. 5:3; Ipru 13:7, Testament Mi Fö.

¹¹ “Ifa usun upwe tongeni áeá ei pwóróus le álisi ekkewe ekkóch?” Sia tongeni áeá ekkewe napanap Kot a eiteita fán iten ekkewe Chón Kraist mwán mi ásimaw le álisi ekkewe chón káé me ekkewe mi sani le rongorong ar repwe weweiti sókkofesenin ekkewe mwán mi ásimaw me ekkewe néúwisin lamalam. Ekkeei napanap ra pwal tongeni álisikich le ekieki ewe angang weires ekkewe mwán mi ásimaw ra féri fán  iten ach mwichefel. Iwe, a tongeni álisikich le súfélitiir. (1 Tes. 5:12) Ewin ach súfélitiir, ewin lapólóón ar pwapwa le féri wiser.​—Ipru 13:17.

12, 13. (a) Ren ach néúnéú ekkewe puk me minen álillis ra kawor ngenikich, ifa usun sipwe kúttafichi weween ekkewe pwóróus? (b) Apasa eú pwóróus ren ifa usun ach kúttafichi pwóróusan epwe tongeni pwári ekkóch lesen ese kon ffat ngenikich me akkomwan.

¹² Kúttafichi weween ekkewe pwóróus. Ren ach néúnéú ekkewe puk me minen álillis ra kawor ngenikich, sia tongeni kúna pélúwen ekkeei kapas eis:

•   Ié a makkeei ei kinikin lón Paipel?

•   Ineet me ia a makkeei ei?

•   Ikkefa ekkewe mettóch ra fiffis atun ei puk lón Paipel a mak?

 Ekkena pwóróus neman repwe álisikich le kúna ekkóch lesen sise silei me akkomw.

¹³ Áwewe chék, Isikiel 14:13, 14 a erá: “‘Are chon eu fanü repwe tipis ngeniei ren ar resap allükülük, üpwe ü ngeniir o angei seniir ener mongö ra manau seni, üpwe tinala lengita rer o arosala aramas me man. Nge are ekewe ülüman mwän Noa, Taniel me Hiop repwe nom lon ewe fanü, repwe chök püsin amanaueer ren ar pwüng,’ iei alon Kot ewe Samol mi Lapalap.” Ika sia kúttafichi weween ena pwóróus, sia káé pwe Isikiel a makkeei ekkena kapas ina epwe mwen are mwirin 612 ier mwen Kraist. Noa me Hiop ra fen máló fitepúkú ier nge Jiowa a chúen chechchemeni ar tuppwél. Nge Taniel a chúen manaw. Ese mwáál a 20 ierin atun Jiowa a apasa pwe i emén mi pwúng usun chék Noa me Hiop. Iwe, met sia káé seni? Pwe Jiowa a kúna me aúcheani meinisin néún kewe mi tuppwél, kapachelong ekkewe mi kúkkún ieriir.​—Kölf. 148:12-14.

14. Ifa usun ekkewe puk me ekkewe álillis seni Paipel fán iten ekkewe sáráfé ra álisiir? Ifa usun a pwal tongeni álisi ekkewe ekkóch? (Ppii ewe sasing lepoputáán ei lesen.)

¹⁴ Puk fán iten ekkewe sáráfé. Sia fen káé pwe sia tongeni kúna álillis seni meinisin kinikinin ewe Paipel. Usun chék pwal ach sipwe tongeni kúna álillis seni meinisin néúch kewe puk me ekkewe álillis seni Paipel. Sipwe pwóróus usun ekkóch me leir. Kkanoto chék, Jiowa a awora chómmóng pwóróus fán iten ekkewe sáráfé. ^[1] Ekkeei pwóróus ra tongeni álisiir ar repwe likiitú fán etipetip mi ngaw lón sukul me ekkewe weires ra kúna atun ar mámmááritá. Nge ifa usun kich meinisin sia tongeni kúna feiéch seni ach álleani ekkeei pwóróus me puk? Atun sia álleaniir, sia silei usun ekkewe osukosuk a toriir me sia tongeni álisiir me apéchékkúler.

15. Pwata Chón Kraist mi mwukóló repwe álleani ekkewe pwóróus fán iten sáráfé?

¹⁵ Chón Kraist mi mwukóló resap meefi pwe ese pwal lamot ngeniir repwe álleani ekkewe pwóróus fán iten sáráfé. Pún chómmóng osukosuk mi nóm lón ekkena pwóróus a pwal tori meinisin Chón Kraist. Áwewe chék, a lamot kich meinisin sipwe ánneta ach lúkú, nemenifichi ach memmeef, túmúnú seni etipetip seni chiechi me seni chiechi mi ngaw me minen apwapwa mi ngaw. Ina minne ikaamwo ekkeei puk me ekkewe álillis seni Paipel ra ffér fán iten sáráfé nge ekkewe pwóróus lón ra feito seni Paipel me meinisin Chón Kraist ra tongeni kúna álillis.

16. Pwal met ekkewe puk me ekkewe álillis seni Paipel ra ális ngeni ekkewe sáráfé?

¹⁶ Ekkewe puk me ekkewe álillis seni Paipel mi ffér fán iten ekkewe sáráfé ra pwal  tongeni apéchékkúla ar riri ngeni Jiowa. (Álleani Än Salomon Afalafal 12:1, 13.) Ekkewe mi mwukóló ra pwal tongeni kúna álillis. Áwewe chék, lón ewe Awake! minen April 2009, a wor eú pwóróus itelapan “Young People Ask . . . How Can I Make Bible Reading Enjoyable?” Lón ena pwóróus a wor chómmóng kapasen pesepes me a pwal wor eú pwóór a tongeni ffichiwu, iseis me néúnéú fán iten káé. Nge met, ekkewe mi mwukóló ra tongeni kúna álillis seni? Emén fin pwúpwúlú nge i emén in a apasa pwe ewe álleaan Paipel a weires ngeni seni lóóm. Nge a néúnéú ekkewe minen pesepes lón ena pwóróus, iwe iei a mwétéresiti ewe álleaan Paipel. A apasa pwe a pwapwaiti an weweiti ifa usun ekkewe puk lón Paipel ra ririfengen me a usun eú lios mi fókkun lingéch. A pwal apasa: “Esap fán eú ua meefi ena mwétéresin állea Paipel me lóóm.”

17, 18. Ifa usun sipwe kúna álillis seni ekkewe puk mi ffér fán iten aramas meinisin? Áweweei.

¹⁷ Puk fán iten aramas meinisin. Seni 2008 sia pwapwaiti ewe minen káé fán iten ewe mwichefel lón The Watchtower. Ei a ffér lap ngeni fán iten Chón Pwáraatá Jiowa nge mi pwal wor néúch kewe magazine fán iten chék anéúnéú. Ifa usun sipwe pwal tongeni kúna álillis seniir? Sipwe eáni áwewe wóón ei mettóch. Atun ka etiwa emén epwe fiti mwich lón ewe Leenien Mwich nge a fiti, ka fókkun pwapwa. Atun ewe chón afalafal a afalafal, ka ekieki eménna ka etiwa. Ka ekieki epwe ifa meefian usun ekkewe mettóch a rongorong me ifa usun ekkewe pwóróus epwe tongeni ekkesiwili manawan. Iwe mwirilóón, a chúng letipom me pwal mwo nge fókkun kilisou ren ena afalafal.

¹⁸ Neman a pwal ina usun meefiach atun sia álleani ekkewe puk me ekkewe álillis seni Paipel fán iten aramas meinisin. Áwewe chék, The Watchtower fán iten anéúnéú ngeni aramas meinisin me ekkewe pwóróus wóón jw.org ra áweweei ewe Paipel nge ra néúnéú ekkewe kapas mi mecheres repwe weweiti. Atun sia álleani ekkeei pwóróus, a alóllóólaaló ach wewe me tongei minne mi enlet lón Paipel ekkewe sia fen silei seni lóóm. Pwal och, neman sipwe káé mineféén alen ach sipwe áweweei ach lúkú lón ewe angangen afalafal. Pwal ina chék usun ren ewe Awake!, a apéchékkúla ach lúkú pwe mi wor emén Chón Fératá. A pwal álisikich le ánnetatá ach lúkú ngeni aramas.​—Álleani 1 Petrus 3:15.

19. Ifa usun sipwe pwári ngeni Jiowa pwe sia aúcheani minne a awora?

¹⁹ A ffat pwe Jiowa a awora chómmóng kapasen éúréúr me káit pwe sipwe kúna feiéch. (Mat. 5:3) Sipwe sópweló le álleani me áeá meinisin minne Jiowa a awora ngenikich. Ika sia féri ena, sipwe kúna feiéch me pwári ngeni pwe sia aúcheani meinisin minne a awora.​—Ais. 48:17.