1, 2. (a) Tera aia iango Ana Tia Kakoauaa Iehova ibukin te Baibara? (b) Tera mwakoron te Baibara ae ko tatangiria?

A TATANGIRA te Baibara Ana Tia Kakoaua Iehova. Iai i nanona kaetieti aika kona n onimakinaki ao a buokira ni karekea te raunnano ao te kantaninga. (IRom 15:4) Ti iangoa te Baibara bwa “bon ana taeka raoi te Atua” ao tiaki aia iango aomata.​—1Tet. 2:13.

² A kakaokoro mwakoron te Baibara aika ti tatangiri. Tabemwaang a kukurei riki ni wareki taian Euangkerio, aika kaotaki iai aroaron Iehova aika raraoi ake a kaotiotaki iroun Natina. (Ioa. 14:9) Ake tabeman a tatangiri mwakoron te Baibara aika taetae ni burabeti tao n aron Te Kaotioti, ae kaotii bannani “bwaai aika a na waetata n roko.” (TeKao. 1:1) Antai i buakora ae tuai n reke kabebeteana man Taian Areru, ke ni karekei reireiana aika kakawaki man te boki ae Taeka N Rabakau? Te Baibara bon te boki ibukia aomata nako.

3, 4. (a) Tera ara iango ibukin ara boki? (b) Baikara booki aika ti kakarekei ni kaineti ma rooro aika kakaokoro?

³ Kioina ngkai ti tangira te Baibara, ti tangiri naba ara boki ake a aanaki mai iai. N te katoto, ti kakaitau ibukin amwarake n taamnei aika ti kakarekei rinanoni booki, boroutia, maekatin, ao  booki riki tabeua. Ti ataia ae baike e katauraoi Iehova akanne, a buokira ni kaanira ma ngaia ao n teimatoa ni ‘kakorakoraa ara onimaki.’​—Tit. 2:2.

⁴ Irarikini booki aika koreaki ibukia Ana Tia Kakoaua Iehova, ti karekei naba kaongora aika aanaki man te Baibara aika koreaki ibukia rooro aika kakaokoro. A katauraoaki kaongora tabeua ibukini buokaia rooro n rikirake, ake tabeua a buokaki iai aia karo. A bati riki kaongora aika boreetiaki n ara atureti n te intanete aika katauraoaki ibukia aomata aika tiaki taani Kakoaua. Ti kauringaki ni batin amwarake n taamnei aikai bwa e kakororaoa ana berita Iehova are e na “karaoa te baka n amwarake . . . ibukia botannaomata ni kabane.”​—Ita. 25:6.

5. Tera ae ti kakoauaa bwa e kakawaki iroun Iehova?

⁵ Angiina i buakora a taraa n tangira te tai ae bati riki ibukini warekan te Baibara ao booki aika aanaki mai iai. Ti kona ni kakoauaa bwa a kakawaki iroun Iehova ara kakorakora ni “kabonganai raoi [ara] tai ni kabane,” n arora ni katoatai ni wareka te Baibara ao n ukeuke n reirei i bon iroura. (IEbe. 5:15, 16) Ni koauana, ti kona n aki kamanenai raoi ara tai ibukin reiakinani booki nako. Ma e ngae n anne, ti riai n ataa te bwai ae karuanikai ae aki otara. Ae tera te bwai anne?

6. Tera ae ti kona iai ni kabuai kakabwaiaara mani baike e katauraoi Iehova?

⁶ Ti kona n reke n te kangaanga ae kabuaani kakabwaia tabeua ibukina bwa ti iangoia ae iai baika katauraoaki iroun te Atua aika aki kaineti nakoira. N te katoto, tera arora ngkana e taraa n aki kaineti nakoira mwakoron te Baibara teuana? Ke tera arora ngkana e aki kaineti nakoira te boki teuana? Ti a warekia nako naba ke ti rawa ni warekia? Ngkana ngaia anne, ti nang aki karekei rongorongo aika kakawaki aika a na bati kakabwaiaara mai iai. Ti na kangaa n aki mwane n te bwai ni kamwane aei? Boni moan te kakawaki bwa ti na bane n ururinga ae te Atua bon Nibwani bwaai n taamnei aika katauraoaki ibukira. E taku rinanon te burabeti ae Itaia: “Bon Iehova ngai ae Atuam, are Teuare reireiniko bwa ko aonga ni kabwaia.” (Ita. 48:17) N te kaongora aei, ti na rinanoi aanga aika tenua aika a na buokira ni kakabwaiaira mani mwakoron nako te Baibara ao amwarake n taamnei aika kakaokoro aika katauraoaki ibukira.

7. E aera bwa ti riai ni kauki ara iango ngkana ti wareka te Baibara?

⁷ Kauka am iango ngkana ko wareware. E taekinaki n te aro ae mataata n te Baibara bwa e “kairaki korean te Koroboki ae Tabu ni kabane iroun te Atua ao e manena.” (2Tim. 3:16) E koaua ae tabeua mwakoron te Baibara a moani koreaki ibukin te aomata temanna ke aomata tabeman. Anne bukina ae ti riai ni kauki ara iango ngkana ti wareka te Baibara. E taku te tari te mwaane temanna: “Ngkana I wareka te Baibara, I kataia n ururingnga ae iai reirei aika kakaokoro aika kona n reke man te kibu teuana.” E reitia ni kangai: “Ururingan aei, I a kaungaaki iai bwa N na aki tii karekea reireiau n are koreaki ma N na kananoa riki au ukeuke.” Imwaini warekan Ana Taeka te Atua, e raoiroi ngkana ti tataro ibukini kaukan ara iango ao ibukin te wanawana bwa ti aonga n atai reirei ake e tangirira Iehova bwa ti na atai.​—Etira 7:10; wareka Iakobo 1:5.

8, 9. (a) Baikara titiraki aika ti kona n titirakinira iai ngkana ti wareware n te Baibara? (b) Tera ae ti tuangaki ibukin Iehova n aroaro aika katauaki iai unimwaane?

⁸ Tabeki titiraki. Ngkana ko wareka te  kibu teuana n te Baibara, motirawa teutana ao titirakiniko ni kangai: ‘Tera ae I tuangaki n aei ibukin Iehova? N na kangaa ni maiuakina te rongorongo aei? N na kangaa ni kamanena ni buokiia iai tabemwaang?’ Ngkana ti iaiangoi titiraki aikai, ti na karekei riki kakabwaiaara aika bati man ara wareware n te Baibara. N te katoto, iangoi aroaro aika katauaki n te Baibara aika a riai n reke irouia unimwaane n te ekaretia. (Wareka 1 Timoteo 3:2-7.) Kioina ngkai angiina i buakora tiaki unimwaane, ti kona ni waekoa n iangoia bwa e aki rangi ni manena te kibu aei nakoira. Ma ngkana ti iangoi kaekaan titiraki tabeua aika imwina, ti na ataia ae ti kona ni kakabwaiaaki n aanga aika bati man aroaro aika karinanaki aikai.

⁹ Tera ae I tuangaki n aei ibukin Iehova? E karinani aroaro aika katauaki aikai Iehova ni kaotia iai ae moan te rietata ana kaetieti ibukia naake a mwiokoaki n te ekaretia. E kantaningaiia bwa a na katea te katoto ae raoiroi, ao e na boni motiki taekaia ibukin aroia nakon te ekaretia, “are e kabooa n raraan oin Natina.” (Mwa. 20:28) E tangiria Iehova bwa ti na namakina ae ti kamanoaki raoi i aan aia tararua taani kawakintiibu ake a rineaki. (Ita. 32:1, 2) Ti kauringaki n anne bwa aroaro aika katauaki n te Baibara ibukia unimwaane, boni kaotani mwannanoakira ni koaua iroun Iehova.

10, 11. (a) Ngkana ti wareki taekan aroaro aika katauaki iai unimwaane, ti na kangaa ni maiuakin? (b) Ti na kangaa ni kamanena te rongorongo aei ni buokiia iai tabemwaang?

¹⁰ N na kangaa ni maiuakina te rongorongo aei? E riai te mwaane ae mwiokoaki ni katoatai n tuoa ni kaineti ma aroaro ake a katauaki iroun te Atua, ao n tarai itera ake e kona ni kanakoraoi riki. Te tari te mwaane ae “ukoukora te kan riki bwa te mataniwi” e riai ni mutiakin aroaro aika riai n reke irouna aikai, bwa e na maiuakin n aron ana kabanea ni konaa. (1Tim. 3:1) A boni kona Kristian ni kabane ni karekei reireiaia man aroaro aika karinanaki ni kiibu aikai, bwa angiina a irekereke ma baike e tangiri Iehova mairouia Kristian ni kabane. N te katoto, ti riai ni bane ni bwaina te wanawana ao te iangoraoi. (IBir. 4:5; 1Bet. 4:7) Ngkai a riki unimwaane bwa banna ni “katoto nakon te nanai,” ti a kona ni karekei reireiara mairouia ao ni “katotonga aia onimaki.”​—1Bet. 5:3; Ebera 13:7.

¹¹ N na kangaa ni kamanena te rongorongo  aei ni buokiia iai tabemwaang? Ti kona ni kamanenai aroaro aika karinanaki aikai ibukia Kristian aika mataniwi ni buokiia iai aika kan ongora ke aika reirei n te Baibara, bwa a na ataa kaokoroia unimwaane aika Ana Tia Kakoaua Iehova ma mataniwi n Aaro ake aongkoa Kristian ngaiia. Ao ngkana ti wareki taekan aroaro aika karinanaki aikai, ti kona n uringa iai aia mwakuri korakora ibukira unimwaane n ara ekaretia. N iaiangoan aroia n anga ngaiia, e a kakorakoraaki iai iroura ‘karineaia naake a mwakuri korakora’ i buakora. (1Tet. 5:12) Ao ngkana ti kabatiaa riki karineaia mataniwi aika mwakuri korakora aikai, ti na kabatiaa riki kimwareireia.​—Ebera 13:17.

12, 13. (a) Tera te kakaae ae ti na karaoia ngkana ti kamanenai bwaai ni mwakuri aika katauraoaki ibukira? (b) Taekina te katoto bwa a na kangaa rongorongo riki tabeua ni kaotaraei baika aki otara n ara tai ni wareware.

¹² Karaoa am kakaae. Ngkana ti kamanenai bwaai ni mwakuri aika katauraoaki ibukira, ti a kona iai ni kakaaei rongorongo aikai:

• Antai ae korea mwakoron te Baibara aei?

• E koreaki ia ao n ningai?

• Baikara baika kakawaki ake a riki ngke e koreaki te boki aei?

A kona aeka n rongorongo akanne ni kaotaraei reirei aika aki otara n ara tai ni wareware.

¹³ N te katoto, iangoa Etekiera 14:13, 14, ae kangai: “Ngkana e bure te aba nakoiu n arona n aki kakaonimaki, ao N na arora baiu n ekaanako te aba ao N na urui nnen ana amwarake, ao N na karokoa te rongo i aona ao ni kamateia aomata ma maan ake iai. ‘E ngae ngkana a mena iai mwaane aika teniman aikai aika Noa, Taniera, ao Iobi, ma a tii kona ni karekei oini maiuia ngaiia n tatabemania nako ibukin raoiroia,’ bon ana taeka te Uea ae Moan te Rietata ae Iehova.” Ni karaoan ara kakaae, ti a ataia ae e koreaki mwakoron te boki ae Etekiera tao n 612 B.C.E. N te tai anne, a a kamani mate Noa ao Iobi n tienture aika nako, ao e teimatoa n uringi aroia ni kakaonimaki te Atua. Ma e maiu n te tai anne Taniera. Tao ai 20 ana ririki ngke e taekinna Iehova bwa titeboo raoiroina ma Noa ao Iobi. Tera reireiara iai? E noriia ana toro aika kakaonimaki ni kabane Iehova ao a kakawaki irouna, n ikotaki naba ma rooro n rikirake.​—TaiAre. 148:12-14.

14. A kangaa ni buokaki rooro n rikirake n te kaongora are boreetiaki ibukia, ao a na kangaa ni kakabwaiaaki naba iai tabemwaang? (Nora te taamnei ni moan te kaongora aei.)

¹⁴ N aron ae ti karekei kakabwaiaara man reiakinan Ana Taeka te Atua ni kabane, ti kona naba ni kakabwaiaaki n amwarake n taamnei ni kabane aika katauraoaki ibukira. Iangoi katoto tabeua. Kaongora ibukia rooro n rikirake. N ririki aika tibwa nako, a bati booki aika boreetiaki ibukia rooro n rikirake. ^[1] A katauraoaki tabeua mai iai ibukini buokaia ni kaaitarai kariri n te reirei ke kangaanga ngkai a a tabe n ikawai. Ti na kangaa ni bane ni kakabwaiaaki ni warekani kaongora aikai? Ni karaoan anne, ti a kauringaki iai te bwai ae a aitara ma ngaia ara roro n rikirake aika kakaonimaki. Ao ti a rabakau riki iai ni buokiia ao ni kaungaia.

15. E aera bwa a riai Kristian aika ikawai ni kani wareki naba kaongora ibukia rooro n rikirake?

¹⁵ A bati i buakoni kangaanga aika taekinaki n taiani kaongora ibukia rooro n rikirake aika ti rotaki naba iai. Ti riai ni bane n tei ibukin ara onimaki, n taobarai ara namakin, n rarawa nakon aia kairiri tabonrorora, ao n totokoi iraorao ma kaakibotu aika bubuaka. A a tia reirei aikai ao aika bati riki n taekinaki n taiani kaongora ibukia  rooro n rikirake. E koaua bwa a riai n iangoia Kristian aika ikawai bwa a kamangoraki ngkana a wareki booki aika kaineti nakoia rooro n rikirake? Tiaki ngaia anne! E ngae ngke a boreetiaki kaongora aikai ibukia rooro n rikirake, ma a bon nako rongorongo aikai man te Baibara, ao ti kona ni bane ni kakabwaiaaki iai.

16. Tera riki ae a buokaki iai rooro n rikirake n ara boki bwa a na karaoia?

¹⁶ A buokaki rooro n rikirake n ara boki bwa a na kaaitarai aia kangaanga, a na ikawai n te onimaki, ao ni kaania Iehova. (Wareka Te Minita 12:1, 13.) A kona naba ni kakabwaiaaki iai Kristian aika ikawai. N te katoto, e karinaki n te Awake! ae bwain Eberi 2009 te kaongora ae “Young People Ask . . . How Can I Make Bible Reading Enjoyable?” Iai n te kaongora aei aanga n ibuobuoki aika bati ao te bwaoki are kona ni koreaki ao ni karinaki n te Baibara bwa te bwai n reirei. A kakabwaiaaki naba ikawai n te kaongora aei? E korea ae kangai te buu te aine ae te tina ae 24 ana ririki: “E kangaanga irou warekan te Baibara. I mutiakin reirei n ibuobuoki man te kaongora aei, ao I kamanena raoi te bwaoki are e na koreaki. I a ingainga ngkai nakon te wareware n te Baibara. I a kona n nori aroni boraoin ao irekerekeni booki n te Baibara, n aron te kunnikai ae taeraki ni katamaroaaki n taian taamnei. I a tibwa namakina te aeka n ingainga aei ni warekan te Baibara.”

17, 18. Ti na kangaa ni kakabwaiaaki mani warekani kaongora ibukia aomata nako? Taekina te katoto.

¹⁷ Kaongora ibukia aomata nako. Ni moa man 2008 ao ti a karekea Te Taua-n-Tantani ibukin te reirei ae koreaki tii ibukia Ana Tia Kakoaua Iehova. Ma tera aron ara maekatin ake a kaineti riki nakoia aomata nako? Ti kona ni kakabwaiaaki ngkana ti wareki naba? Iangoa te katoto aei. Iangoia bwa n te bong teuana imwain te kabwarabwara ibukia aomata nako, ao ko noria bwa e roko n te Tabo n Taromauri te aomata are ko kaoa. Ko boni bae ni kimwareirei. Ngke e waakinako te kabwarabwara ao ko bae n iangoa am iruwa arei. Ko bae n iangoa ana namakin te aomata aei ni baike e ongoraei ao aron te rongorongo aei ni kona ni bita maiuna. Ibukin anne, e a ringaki nanom n te kabwarabwara anne ao ko a rangi ni kakaitau riki ibukin te reirei aei.

¹⁸ Ti kona naba n namakina anne ngkana ti wareka te kaongora ibukia aomata nako. N te katoto, n Te Taua-n-Tantani ibukia aomata nako ao a maroroakinaki iai reirei man te Baibara n taeka aika kai ota iroun te aomata ae tiaki te tia Kakoaua. Titeboo naba anne ma kaongora aika bati ake a toka n te jw.org, i aan te atu ae “Bible Questions Answered” ao “Frequently Asked Questions.” Ngkana ti wareka te kaongora aei, ti a kanenei riki otara ao ara kakaitau ibukini koaua ake ti a kaman atai. Irarikina, ti kona n reiakin aanga aika boou ibukini kabwarabwaraan ara koaua n ara mwakuri ni minita. N aron anne, n te Awake! ao e kamatoaaki ara koaua bwa bon iai te Atua, ao ti buokaki iai n atai arora ni kaeka ibukin ara koaua.—Wareka 1 Betero 3:15.

19. Ti na kangaa ni kaota ara kakaitau nakon Iehova ni baike e katauraoi?

¹⁹ E mataata bwa e katauraoi reirei ao kaetieti aika bati Iehova ibukini kakabwaiaara. (Mat. 5:3) Ti bia teimatoa ni kamanenai ni kabane baika katauraoaki ibukin ara onimaki. Ni karaoan anne, ti a kaota iai ara kakaitau nakon Teuare reireinira arora ae ti na kabwaia iai.​—Ita. 48:17.