1, 2. (a) Ano ang pagtamod sang mga Saksi ni Jehova sa Biblia? (b) Ano ang imo paborito nga bahin sang Biblia?

GINAPABALORAN sang mga Saksi ni Jehova ang Biblia. Nagatudlo ini sa aton, nagapabakod, kag nagahatag sing paglaum. (Roma 15:4) Wala naton ginatamod ang Biblia nga ideya lang sang mga tawo, kundi “kon ano gid ini, subong pulong sang Dios.”—1 Tes. 2:13.

² Ang kada isa sa aton may paborito nga bahin sang Biblia. Ang iban nanamian sang mga Ebanghelyo, nga matahom nga nagalaragway sang personalidad ni Jehova nga ginpakita sang iya Anak. (Juan 14:9) Ang iban nanamian sang bahin sang Biblia parte sa mga tagna, subong sang Bugna, nga nagalaragway sang “mga butang nga pat-od nga mahanabo sa indi madugay.” (Bug. 1:1) Kag indi bala nga nalugpayan kita sa Salmo ukon nakatuon sing praktikal nga mga leksion sa Hulubaton? Ang Biblia isa ka libro nga para gid sa tanan.

3, 4. (a) Ano ang pagtamod naton sa aton mga publikasyon? (b) Ano nga mga publikasyon nga ginhimo para sa espesipiko nga mga grupo ang ginaaman sa aton?

³ Bangod ginapabaloran naton ang Biblia, ginapabaloran man naton ang aton mga publikasyon nga base sa Biblia. Halimbawa,  ginaapresyar naton ang espirituwal nga pagkaon nga ginaaman sa aton paagi sa mga libro, brosyur, magasin, kag iban pa nga literatura. Nahibaluan naton nga gin-aman ini ni Jehova kag nagabulig ini sa aton nga magpabilin nga alisto, bugana sa espirituwal, kag “mapagros sa pagtuo.”—Tito 2:2.

⁴ Magluwas sa mga publikasyon nga ginhimo para sa mga Saksi ni Jehova, ginaamanan man kita sing mga publikasyon nga ginhimo para sa espesipiko nga mga grupo. Ang pila ka publikasyon ginhimo para buligan ang mga pamatan-on; ang iban para sa ila mga ginikanan. Ang kalabanan nga publikasyon nga ginaimprinta kag ang makita sa aton website ginhimo para sa mga indi Saksi. Ining bugana nga espirituwal nga pagkaon nagapahanumdom sa aton nga gintuman ni Jehova ang iya saad nga ‘magahanda sia para sa tanan nga katawhan sing isa ka sinalusalo sang bugana nga pagkaon.’—Isa. 25:6.

5. Ano ang ginaapresyar ni Jehova?

⁵ Mahimo gid nga kalabanan sa aton gusto kuntani nga mas madamo ang tion sa pagbasa sing Biblia kag sang aton mga publikasyon. Makasalig kita nga ginaapresyar ni Jehova ang aton mga panikasog nga ‘gamiton sing maayo ang aton tion’ sa regular nga pagbasa sing Biblia kag sa personal nga pagtuon. (Efe. 5:15, 16) Ang matuod, indi kita makahinguyang sing pareho kadamo nga tion sa tanan nga espirituwal nga pagkaon. Pero, dapat kita mag-andam sa indi hilmunon nga katalagman. Ano ini?

6. Ano ang mahimo mangin rason nga indi naton mapanginpuslan ang pila ka aman ni Jehova?

⁶ May katalagman nga indi naton mapanginpuslan ang pila ka espirituwal nga aman bangod nagahunahuna kita nga indi ini maaplikar sa aton. Halimbawa, ano abi kon ang isa ka bahin sang Biblia daw indi man maaplikar sa aton sitwasyon? Ukon ano abi kon ang isa ka publikasyon ginhimo para sa isa ka espesipiko nga grupo? Ginapahapyawan lang bala naton ini basa ukon wala na gid ginabasa? Kon himuon naton ini, ginadingutan naton ang aton kaugalingon sing mapuslanon nga mga impormasyon. Paano naton malikawan ini nga katalagman? Dapat gid naton dumdumon nga ang Dios amo ang Ginahalinan sang tanan nga espirituwal nga aman. Paagi kay manalagna Isaias, nagsiling sia: “Ako si Jehova nga imo Dios, ang nagatudlo sa imo para sa imo kaayuhan.” (Isa. 48:17) Binagbinagon naton ang tatlo ka panugda nga makabulig sa aton nga mapanginpuslan ang tanan nga bahin sang Biblia kag ang sarisari nga espirituwal nga pagkaon nga ginaaman sa aton.

7. Ngaa dapat naton basahon ang Biblia nga may bukas nga hunahuna?

⁷ Magbasa nga may bukas nga hunahuna. Matuod, ang pila ka bahin sang Biblia ginsulat sang una para sa isa ka tawo ukon grupo. Pero, maathag nga ginasiling sang Biblia nga “ang pagsulat sa bug-os nga Kasulatan gintuytuyan sang Dios kag mapuslanon.” (2 Tim. 3:16) Gani dapat naton basahon ang Kasulatan nga may bukas nga hunahuna. “Kon nagabasa ako sing Biblia, pirme ko ginahunahuna nga madamo ako sing matun-an sa kada teksto,” siling sang isa ka utod nga lalaki. Nagdugang pa sia: “Ang paghunahuna sini nakabulig sa akon nga pangitaon ang mga leksion nga daw indi gilayon matalupangdan.” Antes naton basahon ang Pulong sang Dios, maayo gid nga mangamuyo para sa bukas nga hunahuna kag kaalam agod mahantop ang mga leksion nga luyag ni Jehova nga matun-an naton.—Esd. 7:10; basaha ang Santiago 1:5.

8, 9. (a) Kon nagabasa sing Biblia, ano ang mahimo naton ipamangkot sa aton kaugalingon? (b) Ano ang ginatudlo sa aton sang mga kalipikasyon para sa Cristianong mga gulang parte kay Jehova?

⁸ Magpamangkot. Kon nagabasa ka sing Biblia, magdulog kag pamangkuta ang imo  kaugalingon: ‘Ano ang ginatudlo sini sa akon parte kay Jehova? Paano ko ini maaplikar sa akon kabuhi? Paano ko ini magamit sa pagbulig sa iban?’ Kon pamalandungan naton ini nga mga pamangkot, madamo gid kita sing matun-an sa aton pagbasa sing Biblia. Bilang halimbawa, binagbinaga ang mga kalipikasyon para sa Cristianong mga gulang suno sa Kasulatan. (Basaha ang 1 Timoteo 3:2-7.) Bangod ang kalabanan sa aton indi man mga gulang, mahimo maghunahuna kita nga daw indi man naton ini maaplikar. Pero, kon binagbinagon naton ang posible nga mga sabat sa masunod nga mga pamangkot, makita naton nga tanan kita makapanginpulos sa sini nga listahan sang mga kalipikasyon.

⁹ Ano ang ginatudlo sini sa akon parte kay Jehova? Paagi sa paghatag sini nga listahan sang mga kalipikasyon, ginpakita ni Jehova nga mataas ang iya talaksan sa mga gintangdo nga manguna. Ginapaabot niya nga mangin maayo sila nga halimbawa, kag manabat sila kon paano nila ginapakig-angutan ang kongregasyon, “nga ginbakal niya paagi sa dugo sang iya Anak.” (Binu. 20:28) Luyag ni Jehova nga mabatyagan naton ang proteksion sang gintangdo nga kabulig nga mga manugbantay. (Isa. 32:1, 2) Paagi sa pagbinagbinag sa mga kalipikasyon para sa Cristianong mga gulang, makita naton nga palangga gid kita ni Jehova.

10, 11. (a) Kon ginabasa naton ang mga kalipikasyon para sa mga gulang, paano naton ini maaplikar sa aton kabuhi? (b) Paano naton ini magamit sa pagbulig sa iban?

¹⁰ Paano ko ini maaplikar sa akon kabuhi? Kon isa ikaw ka gulang, dapat regular mo nga ginausisa ini nga mga kalipikasyon agod makita mo kon diin sa sini ang kinahanglan mo pauswagon. Kon isa ikaw ka utod nga “nagatinguha nga mangin manugtatap,” dapat mo binagbinagon sing maayo ini nga mga kalipikasyon, kay kinahanglan nga malab-ot mo ini. (1 Tim. 3:1) Ang matuod, ang kada Cristiano makatuon sa sini nga mga kalipikasyon, bangod ang kalabanan sa sini ginapatuman ni Jehova sa tanan nga Cristiano. Halimbawa, tanan kita dapat mangin makatarunganon kag maligdong sing hunahuna. (Fil. 4:5; 1 Ped. 4:7) Kon ang mga gulang maayo nga “halimbawa sa panong,” makatuon kita sa ila kag ‘mailog naton ang ila pagtuo.’—1 Ped. 5:3; Heb. 13:7.

¹¹ Paano ko ini magamit sa pagbulig sa iban? Magamit naton ini nga listahan sang mga kalipikasyon para sa Cristiano nga mga manugtatap agod buligan ang mga interesado ukon mga estudyante sa Biblia nga makita ang  kinatuhayan sang mga gulang sang mga Saksi ni Jehova sa mga klero sang Cristiandad. Subong man, kon ginabasa naton ini nga listahan, mahimo naton hunahunaon ang mga panikasog nga ginahimo sang mga gulang sa aton kongregasyon. Kon pamalandungan naton ang ila mga sakripisyo, magadalom pa gid ang aton ‘pagtahod sa mga nagapangabudlay sing lakas’ para sa aton. (1 Tes. 5:12) Samtang mas ginatahod naton ining mapisan nga mga manugtatap, nagadugang man ang ila kalipay.—Heb. 13:17.

12, 13. (a) Paagi sa mga gamit sa pagtuon nga gin-aman sa aton, paano kita mag-research? (b) Maghatag sing halimbawa kon paano ang dugang nga mga impormasyon makabulig sa aton nga makita ang mga leksion nga daw indi gilayon matalupangdan.

¹² Mag-research. Paagi sa mga gamit sa pagtuon nga gin-aman sa aton, mahimo naton pangitaon ini nga mga impormasyon:

• Sin-o ang nagsulat sini nga bahin sang Kasulatan?

• Diin kag san-o ini ginsulat?

• Anong importante nga mga hitabo ang natabo sa tion nga ginsulat ini nga libro sa Biblia?

Ining dugang nga mga impormasyon mahimo makabulig sa aton nga makita ang mga leksion nga daw indi gilayon matalupangdan.

¹³ Halimbawa, binagbinaga ang Ezequiel 14:13, 14: “Kon ang isa ka pungsod magpakasala sa akon paagi sa ila pagkadimatutom, untayon ko ang akon kamot batok sa sini nga pungsod. Pauntaton ko man ang suplay sang pagkaon sa sini, kag padalhan ko ini sing tiggulutom kag pamatyon ko ang mga tawo sa sini lakip ang kasapatan. ‘Bisan pa yara sa sini ang tatlo ka lalaki nga sanday Noe, Daniel, kag Job, maluwas lamang nila ang ila kaugalingon bangod sang ila pagkamatarong,’ siling sang Soberanong Ginuong Jehova.” Kon mag-research kita, matun-an naton nga ginsulat ini ni Ezequiel sang mga tuig 612 B.C.E. Sa sina nga tion, pila na ka siglo nga patay si Noe kag si Job, kag ara sa handumanan sang Dios ang ila ginpakita nga katutom. Pero si Daniel buhi pa. Mahimo nga mga 20 anyos sia sang nagsiling si Jehova nga matarong man sia pareho kay Noe kag kay Job. Ano ang leksion? Makita ni Jehova ang katutom sang tanan niya nga sumilimba kag ginapabaloran niya ini, lakip ang katutom sang mga pamatan-on.—Sal. 148:12-14.

14. Paano makabulig sa mga pamatan-on ang mga publikasyon nga ginhimo para sa ila, kag paano man makabenepisyo sa sini ang iban? (Tan-awa ang piktyur sa umpisa sini nga artikulo.)

¹⁴ Natun-an naton nga mapuslanon ang pagtuon sa tanan nga bahin sang Pulong sang Dios, gani pat-od nga mapuslanon man ang tanan nga espirituwal nga pagkaon nga ginaaman sa aton. Binagbinaga ang pila ka halimbawa. Mga publikasyon para sa mga pamatan-on. Sining nagligad nga mga tinuig, madamo sa aton mga publikasyon ang ginhimo para sa mga pamatan-on. ^[1] Ang katuyuan sini amo nga buligan sila nga maatubang ang mga pag-ipit sa eskwelahan ukon ang ila mga problema. Paano kita tanan makabenepisyo kon basahon naton ini nga mga publikasyon? Kon basahon naton ini, magapahanumdom ini sa aton sang mga kabudlayan nga ginaatubang sang matutom nga mga pamatan-on. Gani, mahibaluan naton kon paano naton sila buligan kag palig-unon.

15. Ngaa dapat mangin interesado ang may edad na nga mga Cristiano sa pagbasa sang mga publikasyon para sa mga pamatan-on?

¹⁵ Indi lang mga pamatan-on ang nagaatubang sang kalabanan nga problema nga ginabinagbinag sa mga publikasyon nga ginhimo para sa ila. Tanan kita dapat magpangapin sa aton pagtuo, magkontrol sang aton emosyon, mag-andam nga magsunodsunod lang, kag maglikaw sa malain nga kaupdanan kag kalingawan. Ini nga mga topiko kag madamo pa nga iban ang ginabinagbinag sa mga publikasyon  nga ginhimo para sa mga tin-edyer. Dapat bala magbatyag ang may edad na nga mga Cristiano nga indi bagay sa ila ini nga mga publikasyon? Indi! Bisan pa ginhimo ini para sa mga pamatan-on, ang mga impormasyon sa sini ginbase sa wala nagadaan nga mga prinsipio sa Kasulatan, kag tanan kita makabenepisyo sa sining espirituwal nga mga aman.

16. Ano pa ang mabulig sang aton mga publikasyon sa mga pamatan-on?

¹⁶ Magluwas sa pagbulig sa mga pamatan-on nga maatubang ang mga problema, ang aton mga publikasyon nagabulig man sa ila nga mag-uswag sa espirituwal kag magsuod kay Jehova. (Basaha ang Manugwali 12:1, 13.) Makabenepisyo man sa sini ang may edad na nga mga Cristiano. Halimbawa, ang Abril 2009 nga isyu sang Magmata! may artikulo nga “Pamangkot sang mga Pamatan-on . . . Ano ang Himuon Ko Para Manamian Ako sa Pagbasa sing Biblia?” Mabasa sa sini ang pila ka panugda kag may kahon nga puede magunting kag ibutang sa Biblia. Nakabenepisyo man bala ang mga may edad na sa sini nga artikulo? “Daw wala ako nanamian sadto sa pagbasa sing Biblia,” siling sang isa ka 24 anyos nga asawa kag iloy. “Ginsunod ko ang mga panugda sa sini nga artikulo, kag gingamit ko ang kahon. Subong, nanamian na ako magbasa sing Biblia. Makita ko na kon paano nagaalalangot ang mga libro sa Biblia pareho sang isa ka matahom nga tela nga may mga burda. Nalangkag na ako pirme magbasa sing Biblia.”

17, 18. Paano kita makabenepisyo sa pagbasa sing mga publikasyon para sa publiko? Maghatag sing halimbawa.

¹⁷ Mga publikasyon para sa publiko. Sugod sang 2008, gin-aman para sa mga Saksi ni Jehova ang tulun-an nga edisyon sang Ang Lalantawan. Kamusta naman ang mga magasin para sa publiko? Makabenepisyo man bala kita sa pagbasa sini? Binagbinaga ini nga ilustrasyon. Isa ka adlaw sa Kingdom Hall, antes sang pamulongpulong publiko, nag-abot ang imo gin-agda. Pat-od gid nga nalipay ka. Samtang nagapamulongpulong ang humalambal, mahimo nga ginahunahuna mo ang imo bisita. Ginapamensar mo kon ano ayhan ang iya reaksion sa iya ginapamatian. Subong resulta, mas naapresyar mo ang topiko sang pamulongpulong.

¹⁸ Amo man sini ang epekto sa aton kon basahon naton ang mga publikasyon para sa publiko. Halimbawa, ginabinagbinag sang publiko nga edisyon sang Ang Lalantawan ang mga topiko sa Kasulatan sa paagi nga mahangpan ini sang mga indi Saksi. Amo man sini ang ginahimo sa mga artikulo nga mabasa sa jw.org/hil, pareho sang seksion nga “Sabat sa mga Pamangkot sa Biblia” kag “Pirme Ginapamangkot.” Kon basahon naton ini nga mga impormasyon, magadalom ang aton apresasyon sa kamatuoran bisan pamilyar na kita sa sini. Dugang pa, mahimo may matun-an kita nga bag-o nga mga paagi sa pagpaathag sang aton mga ginapatihan kon nagabantala kita. Sing kaanggid, ang Magmata! nagapabakod sang aton pagpati nga may ara gid matuod nga Dios, kag nagabulig ini sa aton nga pangapinan ang aton mga ginapatihan.—Basaha ang 1 Pedro 3:15.

19. Paano naton mapasalamatan si Jehova sa iya mga aman?

¹⁹ Gani, maathag nga bugana kita nga ginaamanan ni Jehova sang aton “espirituwal nga kinahanglanon.” (Mat. 5:3) Kabay pa nga padayon naton nga panginpuslan ang tanan nga espirituwal nga aman. Kon himuon naton ini, ginapakita naton ang aton pagpasalamat sa Isa nga nagatudlo sa aton para sa aton kaayuhan.—Isa. 48:17.