1, 2. (1) Ta l̦õmn̦ak eo an Ri Kõnnaan ro an Jeova kõn Baibõl̦ eo? (2) Bok ta eo em̦m̦antata ippam̦ ilo Baibõl̦?

 KÕJ Ri Kõnnaan ro an Jeova, el̦ap ad kaorõk Baibõl̦ eo. Naan ko ie rej kaenõm̦m̦an kõj, letok ad kõjatdikdik, im jemaroñ lõke naanin tõl ko ie. (Rom 15:4) Jejel̦ã bwe naan ko ie rej “naanin Anij” im rejjab itok jãn l̦õmn̦ak ko an armej.​—1 Tessalonika 2:13.

² Bõlen kõj aolep ewõr bok ko ilo Baibõl̦ me relukkuun em̦m̦an ippãd. Jet em̦m̦an ippãer bokin Gospel ko kõnke rej kwal̦o̦k kõn Jijej, im men in ej jipañ er ñan jel̦ã kõn wãween ko rem̦m̦an kõn Jeova. (Jon 14:9) Ro jet em̦m̦an ippãer bokin kanaan ko ãinwõt bokin Revelesõn kõnke ej kwal̦o̦k kõn men ko me m̦õttan jidik renaaj wal̦o̦k. (Revelesõn 1:1, UBS) Jet em̦m̦an ippãer bokin Sam kõnke ñe rej riiti, naan ko ie rej kaenõm̦m̦an er. Im ro jet em̦m̦an ippãer riiti bokin Jabõn Kõnnaan kõnke naanin kakapilõk ko ie el̦ap aer jipañ er. Ealikkar bwe Baibõl̦ eo ej ñan aolep armej.

3, 4. (1) Ta l̦õmn̦ak eo ad kõn bok ko jãn doulul in? (2) Bok im katak ta ko kar jei im kõm̦m̦ani ñan jet armej?

³ Kõnke jej kaorõk Baibõl̦, jej bar kaorõk bok ko ad jãn doulul in kõnke rej pedped ioon Baibõl̦. Aolep bok ko, brochure ko,  Naan in Keeañ ko, im kein riit ko jet me jej bũki rej aolep itok jãn Jeova. Aolep men kein rej jipañ kõj bwe jen epaake wõt e im bwe en kajoor wõt tõmak eo ad.​—Taitõs 2:2, UBS.

⁴ Elõñ iaan bok ko jãn doulul in kar jei ñan aolep Ri Kõnnaan ro an Jeova. Bõtab, ewõr jet bok ko im katak ko me kar jei ñan jet wõt, ãinwõt jo̦dikdik ro ak jemãn im jinen ajri ro. Enañin aolep katak ko im pijain alwõj ko ilo weep jait eo ad kar kõm̦m̦ani ñan ro me rejjab Ri Kõnnaan ro an Jeova. Kõnke elukkuun lõñ bok ko, pija ko, im katak ko ñan aolep, men in ej kaalikkar bwe Jeova ej kajejjet kallim̦ur eo an bwe enaaj lel̦o̦k elõñ katak ko ñan aolep armej.​—Aiseia 25:6, UBS.

5. Ta eo jemaroñ lõke im tõmak bwe Jeova ej buñbũruon kake?

⁵ Meñe jekõn̦aan kal̦apl̦o̦k ad iien ñan riiti Baibõl̦ eo im bok ko ad, ak jet iien ejabwe iien ippãd ñan kõm̦m̦ane men in. Eñin unin, jet iien ewõr jet bok ko jejjab lukkuun bõk ad iien ñan riiti. Jemaroñ lõke im tõmak bwe Jeova ej buñbũruon ippãd kõn ad kate kõj ñan kõm̦m̦an iien ñan riit Baibõl̦ im katak ippãd make. (Epesõs 5:15, 16, UBS) Bõtab, ewõr juon men ekauwõtata jej aikuj kõjparok kõj jãne. Ta in?

6. Ta eo emaroñ kõm̦m̦an bwe jen jab bõk tokjãn jãn jet iaan katak ko Jeova ej litok ñan kõj?

⁶ Jej aikuj kõjparok bwe jen jab l̦õmn̦ak bwe jet iaan eoon ko ilo Baibõl̦ ak jet iaan bok ko ad rejjab jejjet ñan kõj. Ñan waanjoñak, ta el̦aññe jej l̦õmn̦ak bwe jet iaan eoon ko ilo Baibõl̦ rejjab jejjet ñan wãween ko jej iiooni? Ak ta el̦aññe kar kõm̦m̦ane juon iaan bok ko ad ñan jet wõt kumi in armej im jejjab juon iaan rein? Jej ke ekkaiuriur ilo ad riiti men kein im jab lukkuun l̦õmn̦ak kaki, ak kõjekdo̦o̦ni ilo ad jab riiti ñan jidik? El̦aññe aet, men in emaroñ kõm̦m̦an bwe jen jab bõk tokjãn jãn mel̦el̦e kein me remaroñ kar jipañ kõj. Ewi wãween ad maroñ kõjparok kõj jãn kain l̦õmn̦ak rot in? Jej aikuj keememej bwe aolep katak ko kar litok ñan kõj rej itok jãn Jeova. Jeova ej ba: “Ña Jeova am̦ Anij, Eo ewõr tokjãn An katakin eok.” (Aiseia 48:17) Ilo katak in, jenaaj etale jilu men ko me renaaj jipañ kõj bwe en l̦ap ad bõk tokjãn jãn aolep katak ko Jeova ej litok ñan kõj.

7. Ñe jej riit Baibõl̦, etke jejjab aikuj bõk l̦õmn̦ak eo bwe ewõr jet eoon rejjab ekkar ñan kõj?

⁷ Ñe jej riit, jen jab l̦õmn̦ak bwe jet iaan mel̦el̦e ko rejjab ñan kõj. Em̦ool bwe ewõr jet jebta ak eoon ko ilo Baibõl̦ me rej ñan jet wõt armej ak jet kumi in armej. Bõtab, Baibõl̦ ej kaalikkar bwe “Jeje ko otemjej em̦õj letok kõn kakũrm̦ool an Anij” im el̦ap tokjãer ñan kõj. (2 Timote 3:16) Eñin unin ñe jej riit Baibõl̦, jejjab aikuj bõk l̦õmn̦ak eo bwe ewõr jet eoon rejjab ekkar ñan kõj. Juon jeid im jatid em̦m̦aan ej ba bwe ej kajjioñ keememej bwe elõñl̦o̦k jãn juon men emaroñ katak jãn juon jebta ak eoon ilo Baibõl̦. Men in ej jipañe ñan lo mel̦el̦e im katak ko me rejjab alikkar ilo jinoin. Kõn men in, m̦okta jãn ad riit Baibõl̦, jej aikuj kajjitõk ippãn Jeova bwe en jipañ kõj ñan lukkuun l̦õmn̦ak kõn men ko jej riiti im bwe en letok ñan kõj mãlõtlõt bwe jen maroñ mel̦el̦e men ko ekõn̦aan bwe jen jel̦ã im mel̦el̦e kaki.​—Ezra 7:10; riit Jemes 1:5.

8, 9. (1) Ñe jej riit Baibõl̦, ta kajjitõk ko jemaroñ kajjitõk ippãd make? (2) Ta eo jej katak kake kõn Jeova ñe jej riiti eoon ko me rej ñan em̦m̦aan ro rej lale eklejia?

⁸ L̦õmn̦ak kõn jet kajjitõk ko. Ñe kwõj riit Baibõl̦, kajjitõk ippam̦ make kajjitõk kein: ‘Ta eo men in ej katakin eõ kake kõn  Jeova? Ewi wãween aõ maroñ l̦oore men in ilo mour e aõ? Ewi wãween aõ maroñ kõjerbal eoon kein ñan jipañ ro jet?’ Ñe jej kõl̦mãnl̦o̦kjen̦ kõn kajjitõk kein, enaaj l̦apl̦o̦k ad bõk tokjãn jãn ad riit Baibõl̦. Jen lale juon waanjoñak. Ilo Baibõl̦, ej kõllaajraki men ko em̦m̦aan ro rej lale eklejia rej aikuj kõm̦m̦ani. (Riit 1 Timote 3:2-7, UBS.) Kõnke ejjab kõj aolep jej lale eklejia, jemaroñ l̦õmn̦ak bwe eoon kein rejjab ekkar ñan kõj im reban jipañ kõj. Bõtab, jen etale kajjitõk ko jilu im lale ewi wãween kõj aolep jemaroñ bõk tokjãn jãn eoon kein me rej kõllaajraki ta ko juon eo ej lale eklejia ej aikuj kõm̦m̦ani.

⁹ Ta eo men in ej katakin eõ kake kõn Jeova? Jeova ear kwal̦o̦k ñan kõj laajrakin men ko juon em̦m̦aan ej aikuj kõm̦m̦ani bwe en maroñ erom juon eo ej lale eklejia. Ewõr men ko Jeova ej kõtmãne jãn em̦m̦aan ro rej lale eklejia ko. Men in ej kaalikkar bwe el̦ap an Jeova kaorõk eklejia eo, “eo ear wiaik kõn bõtõktõkin Nejin.” (Jerbal 20:28, UBS) Kõn men in, Jeova ej kõtmãne bwe en em̦m̦an joñak eo an em̦m̦aan ro rej lale eklejia. Bareinwõt, rein renaaj aikuj uwaak ñan Jeova kõn wãween aer kõm̦m̦an ñan ro ilo eklejia eo. Jeova ear jitõñ em̦m̦aan rein bwe ren lale im kõjparok kõj. (Aiseia 32:1, 2) Kõn men in, ñe jej riiti eoon kein me rej ñan ro rej lale eklejia, men in ej jipañ kõj ñan kile joñan an Jeova lukkuun kaorõk kõj.

10, 11. (1) Ewi wãween ad maroñ l̦oore eoon ko me rej ñan em̦m̦aan ro rej lale eklejia? (2) Ewi wãween ad maroñ kõjerbal eoon kein ñan jipañ ro jet?

¹⁰ Ewi wãween aõ maroñ l̦oore men in ilo mour e aõ? El̦aññe kwõj juon eo ej lale eklejia, em̦m̦an ñe jãn iien ñan iien kwõj lale eoon ko me rej kõllaajraki men ko kwõj aikuj kõm̦m̦ani, im lale ta ko kwõmaroñ kakõm̦anm̦anl̦o̦k. El̦aññe kwõj juon eo im ekõn̦aan bõk eddo ko ilo eklejia, kate eok joñan wõt am̦ maroñ ñan kõm̦m̦ani men kein kar kõllaajraki ñan em̦m̦aan ro rej lale eklejia. (1 Timote 3:1, UBS) Bõtab, aolep ro rej karejar ñan Anij remaroñ bar katak jãn eoon kein me rej ñan em̦m̦aan ro rej lale eklejia. Ñan waanjoñak, Jeova ej kõtmãne bwe kõj aolep jen jab arõk m̦weiuk im jããn im bwe jen jel̦ã jipañ im lale armej. (1 Timote 6:9, 10; Rom 12:13, UBS) Ilo an em̦m̦aan ro rej lale eklejia likũt juon “joñak” em̦m̦an  ñan kõj ilo eklejia eo, jemaroñ katak jãn er im anõke tõmak eo aer.​—1 Piter 5:3; Hibru 13:7.

¹¹ Ewi wãween aõ maroñ kõjerbal eoon kein ñan jipañ ro jet? Jemaroñ kõjerbal eoon ko me rej ñan em̦m̦aan ro rej lale eklejia ñan jipañ rũkkatak ro im ro jet ñan mel̦el̦e ewi wãween an em̦m̦aan rein oktak jãn rũtõlin kabuñ ko. Eoon kein remaroñ bar kakeememej kõj kõn joñan an em̦m̦aan rein kate er ñan kõm̦m̦ani eddo ko aer ilo eklejia eo ad. Ad keememej men in, enaaj jipañ kõj ñan kwal̦o̦k kautiej ñan em̦m̦aan rein. (1 Tessalonika 5:12, UBS) Ñe el̦apl̦o̦k ad kwal̦o̦k kautiej ñan er, enaaj l̦apl̦o̦k aer lañlõñ ilo jerbal eo aer.​—Hibru 13:17.

12, 13. (1) Ta mel̦el̦e ko jemaroñ pukoti ñe jej kõjerbal kein kappok mel̦el̦e ko ad? (2) Kwal̦o̦k juon waanjoñak kõn wãween ad maroñ lo jet mel̦el̦e ko me rejjab alikkar ilo jinoin.

¹² Kappok mel̦el̦e. Ñe jej katak Baibõl̦, jemaroñ pukot uwaakin kajjitõk kein:

•   Wõn eo ear je bok in ilo Baibõl̦?

•   Ia im ñããt eo kar je bok in?

•   Ta men ko raorõk rar wal̦o̦k ke kar je bok in?

 Ñe jej pukot uwaakin kajjitõk kein, emaroñ jipañ kõj ñan lo mel̦el̦e ko me remaroñ kar jab alikkar ilo jinoin.

¹³ Ñan waanjoñak, bokin Ezekiel 14:13, 14 ej ba: “‘El̦aññe juon ãne ej jerawiwi n̦ae Eõ kõn an jab m̦ool, Inaaj erl̦o̦ke peiũ n̦ae e im jol̦o̦k pilawã eo kijeer, eo ej ãinwõt jokon̦õn armej, im Inaaj jilkinl̦o̦k ñũta ñane, im Inaaj jol̦o̦k armej im menninmour jãne. Meñe armej rein jilu rar ilo e, Noa, Daniel, im Job, renaaj kar maroñ in lo̦mo̦o̦ren er wõt kõn aer wãnõk,’ Irooj Jeova ej ba.” El̦aññe jenaaj kappok jet mel̦el̦e ko kõn eoon kein, jenaaj lo bwe Ezekiel ear je naan kein enañin 612 iiõ ko m̦okta jãn Kũraij. Emootl̦o̦k de elõñ bukwi iiõ ko jãn iien eo Noa im Job rar mej, ak Jeova ej keememej wõt aerro kar tiljek. Bõtab, Daniel ear mour wõt ilo tõre eo. Emaroñ kar kepaak 20 an iiõ ak bõlen ej kab 20 jim̦a ilo iien eo ke Jeova ear ba bwe ear wãnõk ãinwõt Noa im Job. Ta eo jej katak jãn men in? Jej katak bwe Jeova ej kile im kaorõk aolep rũkarejar ro an retiljek, ekoba jo̦dikdik ro im ro reddik.​—Sam 148:12-14.

14. Ewi wãween an katak ko kar jei ñan jo̦dikdik ro jipañ er, im ewi wãween an katak kein bar jipañ ro jet? (Lale pija eo ilo jinoin katak in.)

¹⁴ Katak ko kar jei ñan jo̦dikdik ro. Em̦õj ad katak bwe jemaroñ bõk tokjãn jãn aolep eoon ko jej riiti ilo Baibõl̦. Ilo ejja wãween in wõt, jemaroñ bar bõk tokjãn jãn aolep katak ko ilo bok ko ad. Jen etale jet waanjoñak ko. Jejjo iiõ ko remootl̦o̦k, Jeova ear letok elõñ katak ko ñan jo̦dikdik ro im ro reddik. ^[1] (Lale kõmel̦el̦e eo ilo jem̦l̦o̦kin katak in.) Katak kein rej jipañ er bwe ren jel̦ã ta ko ren kõm̦m̦ani ñe rej iioon mãlejjoñ ko ilo jikuul̦ im wãween ko reppen ilo aer dik im rũttol̦o̦k. Bõtab ewi wãween ad aolep maroñ bõk tokjãn jãn ad riiti katak kein me kar jei ñan jo̦dikdik ro? Ñe jej riiti katak kein, jenaaj jel̦ã kõn apañ ko jo̦dikdik ro rej iiooni im enaaj l̦apl̦o̦k ad jel̦ã kilen jipañ er im rõjañ er.

15. Etke ro rerũtto rej aikuj riit im etali katak ko kar jei ñan jo̦dikdik ro?

¹⁵ Ro rerũtto rejjab aikuj kõjekdo̦o̦n katak ko kar jei ñan jo̦dikdik ro ilo aer l̦õmn̦ak bwe katak kein rejjab ekkar ñan er. Elõñ iaan apañ ko me katak kein rej kwal̦o̦ki rej jelõt aolep Kũrjin ro. Ñan waanjoñak, kõj aolep jej aikuj jojomare tõmak eo ad, jel̦ã irooj ioon eñjake ko ad, jum̦ae menin kapo ko jãn ro jet, im kõjparok kõj jãn kõm̦m̦ao ko renana kab menin kam̦õn̦õn̦õ ko renana.  Kõn men in, meñe kar jei katak kein ñan jo̦dikdik ro, ak mel̦el̦e ko ie rej pedped ioon Baibõl̦ im aolep Kũrjin ro remaroñ bõk tokjãn jãni.

16. Ewi wãween an bar katak ko jipañ jo̦dikdik ro?

¹⁶ Katak ko kar jei ñan jo̦dikdik ro remaroñ bar jipañ er ñan kakajoor jem̦jerã eo aer ippãn Jeova. (Riit Ekklisiastis 12:1, 13.) Katak kein remaroñ bar jipañ ro rerũtto. Ñan waanjoñak, ilo Awake! eo an Eprõl̦ 2009, ear wal̦o̦k juon katak ñan jo̦dikdik kõn ta ko remaroñ kõm̦m̦ani bwe aer riit Baibõl̦ ippãer make en juon men rej itoklimo in kõm̦m̦ane. Katak in ear kwal̦o̦k jet men ko jemaroñ kõm̦m̦ani ñe jej riit Baibõl̦ im ewõr juon bo̦o̦k ie me jemaroñ m̦wijiti im kõjparoke bwe jen kõjerbale ñe jej katak Baibõl̦. Ro rerũtto rar ke bõk tokjãn jãn katak in? Juon jeid im jatid kõrã me ewõr pãleen im nejin ear ba bwe aolep iien ejjab pidodo ñe ej riit Baibõl̦. Bõtab ear l̦oore naanin rõjañ ko ilo katak in im kiiõ el̦ap an itoklimo ñe ej riit im loe wãween an bok ko ilo Baibõl̦ ekkejel ippãn doon im wãween aer aolep kwal̦o̦k juon wõt mel̦el̦e. Kõrã in ej ba: “Kiiõ aolep iien ij kijooror in riit Baibõl̦.” Im ear wõnm̦aanl̦o̦k im ba bwe ej kab tõn kiiõ lukkuun itoklimo in riit Baibõl̦.

17, 18. Ewi wãween ad bõk tokjãn jãn ad riiti bok ko kar kõm̦m̦ani ñan ro me rejjab Ri Kõnnaan ro an Jeova? Kwal̦o̦k juon waanjoñak.

¹⁷ Katak ko kar jei ñan ro me rejjab Ri Kõnnaan ro an Jeova. Jãn kar 2008 eo ear jino wal̦o̦k Naan in Keeañ eo me jej kõjerbale ñan katak ilo iien kweilo̦k. Kar kõm̦m̦ane bok in el̦aptata ñan Ri Kõnnaan ro an Jeova, bõtab ewõr bar bok ko jet kar kõm̦m̦ani ñan ro me rejjab Ri Kõnnaan ro an Jeova. Ewi wãween ad maroñ bõk tokjãn jãn bok kein? Jen lale juon waanjoñak. Ñe kwõj kũr juon armej ñan Im̦õn Kweilo̦k eo im ej itok, alikkar bwe el̦ap am̦ m̦õn̦õn̦õ. Ke rũkõnono eo ej kwal̦o̦k katak eo an, kwõj l̦õmn̦ak kõn armej in kwaar kũrtok. Kwõj lukkuun roñjake im l̦õmn̦ak kõn wãween an naaj armej eo l̦õmn̦ak kake katak eo im wãween an mel̦el̦e ko maroñ jipañe ilo mour eo an. Am̦ l̦õmn̦ak kõn men in ej kõm̦m̦an bwe en l̦apl̦o̦k am̦ kam̦m̦oolol kõn katak eo.

¹⁸ Emaroñ bar eñin eñjake eo ad ñe jej riiti bok ko kar kõm̦m̦ani ñan ro me rejjab Ri Kõnnaan ro an Jeova. Ñan waanjoñak, Naan in Keeañ eo jej kwal̦o̦k naan kake im katak ko ilo weep jait eo ad rej kõjerbale naan ko repidodo ñan kõmel̦el̦eiki eoon ko ilo Baibõl̦. Ñe jej riiti katak kein, enaaj l̦apl̦o̦k wõt ad mel̦el̦e im kam̦m̦oolol kõn katak ko ilo Baibõl̦ me jejel̦ã kaki. Bareinwõt, ilo ad riiti katak kein jemaroñ katak wãween ko rekããl ñan kõmel̦el̦eiki tõmak eo ad ñe jej kwal̦o̦k naan. Ilo ejja wãween in wõt, katak ko ilo Awake! ko rej kal̦apl̦o̦k ad tõmak bwe ewõr juon ad Rũkõm̦anm̦an im rej jipañ kõj bwe jen jel̦ã kilen jojomare tõmak eo ad.​—Riit 1 Piter 3:15.

19. Ewi wãween ad kwal̦o̦k ad kam̦m̦oolol Jeova kõn katak ko ej litok?

¹⁹ Ealikkar bwe Jeova ej letok elõñ katak ko ñan jipañ kõj. (Matu 4:4) Jen wõnm̦aanl̦o̦k ilo ad riiti im l̦oori aolep mel̦el̦e ko ilo katak ko ej litok ñan kõj. Ñe jej kõm̦m̦ane men in, jej kwal̦o̦k ad kam̦m̦oolol Jeova kõn aolep katak kein ej litok im jenaaj lo tokjãn ko rem̦m̦an.​—Aiseia 48:17.